Mataupu 18
Mosaea 1–3
Folasaga
Mo le tele o tausaga, o le nuu o Saraemila, lea na lauiloa ia sa Nifae, na taitaia e le tupu e igoa ia Peniamina. A o faasolosolo ina matua le Tupu o Peniamina, na ia faatonuina lona atalii o Mosaea e faapotopoto mai tagata. Na ia faapea mai i lana lauga mulimuli, o le a ia tofia se tupu fou. O le a ia tuu atu foi i le nuu “se igoa e le tineia e faavavau, vagana o le solitulafono e tineia ai” (Mosaea 1:12). I le amataga o lana lauga, na folafola atu ai e le Tupu o Peniamina o le a avea lona atalii o Mosaea ma tupu i le nuu. I le lauga atoa, na ia molimau atu ai i le Faaola, e saunia ai tagata e talia le igoa o le a ia tuu atu ia i latou.
O mea o loo mulimuli mai o loo taulai atu i le molimau a le Tupu o Peniamina e uiga i le Faaola e pei ona tusia i le Mosaea 2–3. Ua maua ai se avanoa mo oe e faamanatu atu ai i tamaiti ia faamanuiaga o le faaolataga e oo mai e ala ia Iesu Keriso ma le Togiola. E mafai ona e fesoasoani ia i latou ia iloa pe faapefea ona faatoilalo e le Togiola ia aafiaga o le Pau ma totogi ai vaivaiga faaletino ma le auala e taua ai le lotomaualalo ma le loto faafetai a o tatou tauivi e tausia a tatou feagaiga ma le Atua. O le isi taimi e te feiloai ai ma tamaiti, o le a outou talanoaina le Mosaea 4–6, lea na tuu atu ai e le Tupu o Peniamina i lona nuu le igoa e pei ona ia folafola atu.
O Nisi o Aoaoga Faavae ma Mataupu Faavae
-
Tatou te tali atu i le Atua i auala tatou te auauna atu ai i isi (tagai i le Mosaea 2:1–18).
-
Tatou te nofo aitalafu e faavavau lava i le Atua (tagai i le Mosaea 2:19–41).
-
E na o Iesu Keriso lava e oo mai ai le faaolataga (tagai i le Mosaea 3).
Fautuaga mo le Aoaoga
Upu a Mamona 1:12–18; Mosaea 1. O le Tupu o Peniamina o se Taitai Amiotonu
Uu i luga se ata o le Tupu o Peniamina i luga o lona olo. (E mafai onae faaaogaina le Tusi Ata o le Talalelei [2009], nu. 74, po o le ata o loo i le itulau 72.) Fai i tamaiti e faailoa mai mea o loo tupu i le ata.
Faamatala o le Upu a Mamona 1:12–18 ma le Mosaea 1 ua aumai ai se faamatalaga o le talaaga o le lauga a le Tupu o Peniamina. Ina ia faasoa atu lena faamatalaga o le talaaga, Fai i tamaiti taitasi e tusi le numera 1 e oo i le 5 i luga o se fasi pepa. Ona faitau lea o faamatalaga e lima o loo i lalo ifo, e aunoa ma faamatalaga o loo i puipui. Fai i tamaiti e tusi le Sa’o po o le Sese mo saunoaga taitasi. A maea ona tusi e tamaiti a latou tali, ona fai lea i ai e faitau ia mau fetaliai ma talanoaina pe sa’o pe sese ia faamatalaga taitasi.
-
Sa tau le Tupu o Peniamina ma sa Lamana i le pelu a Lapana (Sa’o; tagai i le Upu a Mamona 1:13; tagai foi i le Ominae 1:24.)
-
I le taimi atoa o le nofoaiga a le Tupu o Peniamina, na alolofa uma tagata ia te ia ma talia ana fautuaga. (Sese; tagai i le Upu a Mamona 1:16; peitai, tagai foi i le Mosaea 1:1.)
-
E na o le Tupu o Peniamina na faavaeina le amiotonu i sa Nifae. (Sese; tagai i le Upu a Mamona 1:17–18.)
-
Na aoao atu e le Tupu o Peniamina ona atalii i le gagana a ona tama ina ia mafai ai ona latou sailiili i tusitusiga paia ma iloa ai mea lilo a le Atua. (Sa’o; tagai i le Mosaea 1:2–4.)
-
Na faapotopoto mai e le Tupu o Peniamina le nuu ina ia faalogologo ia te ia o tautala atu i mafuaaga faaupufai ma faaleagaga. (Sa’o; tagai i le Mosaea 1:10–11.)
Faamalamalama atu pe a tatou iloaina le auala na faatuina ai e le Tupu o Peniamina le filemu ma le amiotonu, o le a tatou maua se agaga faafetai sili mo le loloto o ana aoaoga ma le molimau.
Mosaea 2:1–18. Tatou te Tali Atu i le Atua i le Auala Tatou te Auauna atu ai i Isi
Faamalamalama atu na faapotopoto sa Nifae i fafo o le malumalu i Saraemila e faalogolgo a o saunoa atu le Tupu o Peniamina. Sa faatutu o latou faleie e faasaga i le malumalu ina ia mafai ai ona latou lagona upu a Peniamina. Na poloai atu le tupu ina ia fau se olo ina ia mafai ai ona toatele tagata e lagonaina o ia. Na ia poloai atu foi ina ia tusiaina ana upu mo tagata o loo mamao ese pea ma tau le lagonaina ai. (Tagai i le Mosaea 2:1–8.)
I luga o le laupapa, tusi le Tatou te tali atu i le Atua i auala tatou te auauna atu ai i isi.
Faitau le Mosaea 2:9–18 faatasi ma tamaiti. Atonu e te manao e gauai faapitoa atu i le Mosaea 2:17 . Fai i tamaiti e vaavaai mo faamaoniga na talitonu le Tupu o Peniamina tatou te tali atu mo a tatou auaunaga i isi.
-
O a mafuaaga na tuuina mai e le Tupu o Peniamina mo ana auaunaga?
-
O a ni auala ua e lagonaina ai o au faatinoga o le auaunaga i isi o auaunaga foi lava ia i le Alii?
Faasoa atu le saunoaga lenei mai ia Peresitene Marion G. Romney (1897–1988) o le Au Peresitene Sili (o loo maua foi i le companion DVD A):
“E ala i le auauna atu ma le siitiaina o isi … tatou te oo ai i le fiafia moni ma le faavavau. O le auauna atu e le o se mea tatou te onosaia i lenei lalolagi ina ia mafai ai ona tatou maua le aia tatau e ola ai i le malo selesitila. O le auauna atu, o le uiga tonu lea e faavae ai se olaga faaeaina i le malo selesitila.
“O le iloaina o le auauna atu e faamalieina ai le Tama Faalelagi, ma le iloaina tatou te mananao ina ia i ai i le mea o loo Ia afio ai ma avea e faapei o Ia, aisea la ua poloaiina ai i tatou ia auauna atu i isi? Oka, i se matagofie o le aso o le a tatou faia ai nei mea e aunoa ma le tau poloaiina ona o le mama o o tatou loto. I lena aso o le a le toe manaomia ai se poloaiga ona o le a tatou iloa mo i tatou lava ua na o le faia lava o auaunaga lē manatu faapito tatou te maua ai le fiafia moni” (i le Lipoti o le Konafesi, Oke. 1982, 135; po o le Liahona, Nov. 1984, 6).
-
Mafaufau i se taimi na e mulimuli ai i se uunaiga e auauna atu i se tagata. Na faapefea ou lagona ina ua e tali atu i lea uunaiga?
-
Mafaufau i le saunoaga a Peresitene Romney e faapea “ua na o le faia lava o auaunaga lē manatu faapito tatou te maua ai le fiafia moni” Aisea e te manatu ai e moni lenei tala?
Mosaea 2:19–41. Tatou te Nofo Aitalafu pea e Faavavau i le Atua
Valaaulia tamaiti e lisi i luga o se fasi pepa ni faamanuiaga se lima pe ono na latou maua ua latou maua ai se loto faafetai faapitoa. A maea ona tusi a latou lisi, valaaulia i latou e faitau le leoa le Mosaea 2:19–24. Tuu i ai e faailoa mai, a o latou faitauina, soo se mea i luga o latou lisi na fautua mai ai le Tupu o Peniamina e tatau ona tatou faafetai ai. Valaaulia tamaiti taitasi e faasaga atu i le isi tamaitiiti ma talanoaina po o a mea ua aoao mai e nei fuaiupu e tatau ona tatou loto faafetai ai.
-
O a nisi o auala e mafai ona tatou faaali atu ai lo tatou loto faafetai i le Alii?
Fai i tamaiti e iloilo le fuaiupu 22, saili mo faamanuiaga folafolaina. Fai i ai po o le a le mea o loo manaomia e le Alii mai ia i tatou ina ia tatou maua ai na faamanuiaga.
-
O a faamanuiaga ua e mauaina pe ua maua foi e lou aiga o se taunuuga o le usitai i poloaiga?
Aumai se mea i le vasega o loo iloa ai le pefu i lona tino. Solo lou tamailima i le tino o le mea lea ma tuu i luga e vaai i ai le vasega.
-
O le fea mea e sili atu le taua—o le pefu i lo’u tamai lima po o au?
A o talanoaina e tamaiti lenei fesili, valaaulia se tasi e faitau le Mosaea 2:25–26. Fai i tamaiti e faamalamalama mai po o le a le uiga o le tala a Peniamina ina ua ia faapea mai o ia ma lona nuu e le “tusa ma le efuefu o le eleele.”
Tusi le mau faasino lenei i luga o le laupapa:
Tuu atu se taimi i tamaiti e faitau ma faailoga nei mau. Faamatala o le isi mau o loo faapea mai e le “tusa [i tatou] ma le efuefu o le eleele,” ae o le isi o loo faapea mai o loo “faamaulalo ane teisi [i tatou] i agelu.”
-
E faapefea ona moni ia mau uma e lua?
Valaaulia se tamaitiiti e faitau le Mosaea 2:34. Valaaulia tamaiti uma e faalogo mo se fuaiupu o loo aoao mai ai i tatou e uiga i la tatou sootaga ma le Tama Faalelagi.
-
O le a le uiga o le nofo aitalafu i se tagata?
-
O le a le mea ua saunia e le Atua mo i tatou?
-
Aisea e taua ai mo oe ona manatua o loo e nofo aitalafu e faavavau i le Alii?
Valaaulia se tamaitiiti e faitau le Mosaea 2:36–41. Valaaulia le vasega e mulimulitai i le faitauga, saili mo eseesega i le va o tagata e tausia poloaiga a le Atua ma tagata e le tausia ia poloaiga.
-
E tusa ai ma nei fuaiupu, o a taunuuga e oo mai i tagata e le tausia poloaiga ma ē le salamo?
-
E tusa ai ma nei fuaiupu, o a faamanuiaga e oo mai ia i latou e tausia ia poloaiga?
-
E mafai faapefea e le lagonaina o le loto faafetai i le Tama Faalelagi ona fesoasoani ia i tatou ia usiusitai i Ana poloaiga? E mafai faapefea e le lē loto faafetai ona taitai atu i le lē usiusitai?
Fautuaina tamaiti e mafaufau i a latou aitalafu i le Alii.
Mosaea 3. E Na o Iesu Keriso Lava e Oo mai ai le Faaolataga
Faasoa atu le saunoaga lenei a Peresitene Henry B. Eyring o le Au Peresitene Sili:
“O le mea tatou te manaomia, o le faatuatua lea ia [Iesu Keriso] ma alolofa ia te Ia. E tatau ona tatou iloa o loo soifua o Ia ma pe o ai foi o Ia. A tatou iloa, o le a tatou alolofa foi ia te Ia” (i le Lipoti o le Konafesi, Ape. 2006, 16; po o le Liahona, Me 2006, 16).
-
Aisea o le a sili atu ai ona tatou alolofa i le Faaola pe a tatou iloa pe o ai o Ia?
Faamalamalama atu o loo i ai i le Mosaea 3 upu ia na fetalaia e se agelu i le Tupu o Peniamina. Fesoasoani i tamaiti ia iloa na ala atu i faaaliga, na mafai ai e sa Nifae ona iloa auiliiliga taua o le soifuaga o le Faaola ma le faamoemoega o Lana misiona i le silia i le 100 tausaga a o lei oo i Lona soifua mai. I le ala lava e tasi, i le agaga o faaaliga e mafai ai ona tatou iloa le moni o savali a agelu i le silia ma le 2000 tausaga mulimuli ane. E ala i le molimau a le Agaga, tatou te iloa ai ma alolofa i le Faaola, ma atiina ae ai se faatuatua sili atu ia te Ia.
Vaevae le vasega i vaega e lima. Tuu atu i vaega taitasi se tasi o poloka mau o mau nei:
-
Mosaea 3:19–22 (manatua o le fuaiupu 19 o se mau tauloto
)
A o suesueina e vaega a latou poloka mau, fai atu i ai e faailoa mai valoaga e uiga i le galuega a le Faaola ma le Togiola ma faamalamalamaga i le auala e maua ai le faaolataga e ala i le suafa o Keriso. A maea le taimi na tuu atu i tamaiti e talanoa ai mea na latou maua i a latou vaega, ona tuu lea i ai e lipoti mai i le vasega atoa.
E fuafua i manaoga o tamaiti, mafaufau e fai atu nisi o fesili nei:
-
Mai mea ua e faitauina i lenei mataupu, aisea ua na o Iesu Keriso ai e maua ai le faaolataga?
-
I itulau 145 i le tusi lesona a tagata o le vasega, faitau le faamalamalamaga o le fuaitau “tagata o le lalolagi.” Aisea ua na o le faatuatua ai ia Keriso ma Lana Togiola le ala e tasi e faatoilalo ai le tagata o le lalolagi ma avea ai ma tagata o le au paia?
-
I le fuaiupu 19, ua tau mai ai ia i tatou e tatau ona avea i tatou “ma se tamaitiiti.” O le a le uiga o lenei mea ia te oe?
-
E faapefea ona molimau mai lenei mataupu i lo tatou manaomiaina o Iesu Keriso?
Valaaulia tamaiti e faasoa mai a latou molimau i faamanuiaga o le Togiola. Mafaufau e tuu atu foi lau molimau.