Mataupu 34
Alema 52–63
Folasaga
O nisi taimi e tau mananao ai faiaoga e topelau ia mataupu o taua i le tusi a Alema, ma le manatu e sili atu ona taua le se’e atu i isi aoaoga ma tala. Ae o nei mataupu o loo aofia ai le tele o le oa o malamalamaaga lea e mafai ona taua tele mo i latou e te aoaoina. I le tele o auala, e osofaia ai au tamaiti aoga e ‘au a le tiapolo. A o latou suesueina nei mataupu, o le a mafai ona latou aoao mai ni faataitaiga sili, e pei o Taitai Au Moronae, Paorana, ma Helamana ma ana autau talavou —lesona o le a fesoasoani ia i latou e tumau ai i le saogalemu ma le puipuiga. O le a latou aoaoina le tau o finauga ma le mana o le lotogatasi ma le amiotonu. O le a latou vaai i le taunuuga o le tausia o feagaiga ma faamanuiaga ia e mafai ona tafe mai le faamaoni i soo se tulaga latou te feagai ai. O le a latou vaai i faamanuiaga o aiga e totonugalemu ai le talalelei. O le a latou maua le faateleina o le agaga faafetai mo le latalata mai o le Alii i Ana auauna filifilia i taimi o faigata ma tofotofoga.
O Nisi o Aoaoga Faavae ma Mataupu Faavae
-
Tausiaina o feagaiga e taitai atu ai i faamanuiaga a le Atua ma le puipuiga (tagai i le Alema 53:10–18).
-
O soo o le Alii e faamaoni i soo se mea ua faatuatuaina i latou e fai (tagai i le Alema 53:16–23; 57:19–27).
-
E tuu atu e le Alii le faamoemoe, faatuatua, filemu, ma faamautinoaga o le laveaiga i e amiotonu (tagai i le Alema 58:1–12).
-
Ua faamoemoeina i tatou e le Alii e puipui le saolotoga (tagai i le Alema 60–61).
Fautuaga mo le Aoaoga
Alema 53:4–5. E Tatau ona Tatou Faamalolosia i Tatou Lava e Tetee i Faaosoosoga a Satani
Tuu atu i se tamaitiiti e faitau le Alema 53:4–5. Faaali atu se ata o se olo o siomia ai se aai anamua (mo se faataitaiga, tagai i le Tusi o Ata o le Talalelei [2009], nu. 52, lea e faaalia ai Ierusalema i ona tua atu ma se ‘aupa o sio ai, po o le Tusi o Ata o le Talalelei, nu. 81, lea e faaalia ai Samuelu le sa Lamana i luga o se aupa e faataamilo i le aai o Saraemila). Faamalamalama atu i aso anamua, e masani lava ona fau e tagata ia aupa e faataamilo i o latou aai.
-
I aso anamua, o a tulaga lelei e tuu atu e se aai e sio e se aupa i taimi o faafitauli?
-
O le a se mea e mafai ona tatou faia i o tatou olaga patino lea e pei o le fausiaina o se aupa o le puipuiga e siomia ai i tatou?
A o talanoaina e tamaiti lenei fesili, atonu e te manao e faasino atu i latou i le Alema 37:6–7 . E mafai ona e fai atu ia i latou e lisi mai “mea faatauvaa ma le faavalea” lea e faataunuuina ai “mea tetele” e puipuia ai i tatou. E mafai ona aofia i tali ia tatalo patino, suesueina o tusitusiga paia, auai i sauniga a le Ekalesia, ma le anapogi. Faamatala o tatalo taitasi tatou te tuu atu, o fuaiupu taitasi o tusitusiga paia tatou te faitaua, o anapogi taitasi tatou te faia, o faatinoga o auaunaga taitasi tatou te faia, ma isi, o le a faateleina ai le malosi o aupa o lo tatou puipuiga. O Satani o le fili o le amiotonu uma, ma o loo galue o ia ma le tetemu e soli pala i lalo lo tatou puipuiga. E tatau ona mautu lelei a tatou ‘olo patino ma faamalolosia i taimi uma. Tuu atu i tamaiti e talanoaina fesili nei i ni vaega taitoalua pe taitoatolu:
-
E mafai faapefea ona faamalolosia o tatou puipuiga patino e tetee atu i le leaga?
Valaaulia tamaiti e mafaufau loloto i le lapataiga lenei na tuuina mai e Peresitene Henry B. Eyring o le Au Peresitene Sili:
“A o faateleina le malosi o malosiaga e siomia ai i tatou, pe o le ā le lava o le malosi faaleagaga na i ai muamua o le a lē lava. Ma pe o le a foi le tuputupu ae i le malosi faaleagaga na tatou manatu muamua sa faigofie, o le a tatou maua se tuputupu ae sili atu. O le manaomia uma o le malosi faaleagaga ma le avanoa e maua ai, o le a faateleina i ni fuataga ia tatou te manatu faatauvaa i ai i lo tatou lava tulaga lamatia” (“Always” [Church Educational System fireside for young adults], Jan. 3, 1999, 3, ldsces.org).
Alema 53:10–18. Tausiaina o Feagaiga e Taitai atu ai i Famanuiaga a le Atua ma le Puipuiga
Tusi i luga o le laupapa le Tausia o feagaiga e taitai atu ai i faamanuiaga a le Atua. Fai atu i tamaiti e lisi nisi o feagaiga ua latou osia pe o le a osia. Tusi a latou tali i luga o le laupapa.
-
O a nisi o faamanuiaga e tuu mai e le Alii ia i tatou a o tatou tausia a tatou feagaiga?
Valaaulia tamaiti e faitau le leoa le Alema 53:10–18 ma faailoga le upu tautoga ma le feagaiga ma isi upu tali tutusa. Fai i tamaiti e faamatala mai feagaiga na osia e matua i lenei tala ma feagaiga na osia e atalii.
-
O a ni auala na avea ai le feagaiga a matua ma se faamanuiaga i le nuu?
-
Aisea na avea ai le feagaiga a matua ma se popolega?
-
Na faapefea e le feagaiga a atalii ona taulimaina lena popolega?
-
Aisea e taua ai le tausia o a tatou feagaiga e oo lava i taimi o faigata? (Toe iloilo le Alema 53:14–15; tagai foi i le MFF 82:10
.)
A o talanoa tamaiti e uiga i le manaomia o le tausia o feagaiga i taimi uma, atonu e te manao e faasino i latou i le saunoaga a Elder M. Russell Ballard o loo i le itulau 269 i le tusi lesona a tagata o le vasega. A.
Alema 53:16–23; 57:19–27. O Soo o le Alii e Faamaoni i Soo Se Mea ua Faatuatuaina i Latou e Fai
Taulai atu le gauai o tamaiti i le saunoaga a Mamona i le Alema 53:20 e faapea o atalii o sa Amona na “faamaoni i latou i aso uma, i mea uma ua tuuina atu ia te i latou.” Fai i tamaiti e mafaufau i se taimi na faatuatuaina ai i latou e fai se mea na foliga mai e faigata. Valaaulia i latou e mafaufau pe o a mea na latou faia sa faaalia ai na latou agavaa mo lena faatuatuaina.
Vaevae le vasega i ni vaega se lua. Tuu atu i le tasi vaega e faitau le Alema 53:20–21 ma le isi vaega e faitau le Alema 57:19–21, 26. Valaaulia i latou e saili mo uiga o nei alii talavou ma faasoa mai mea na latou maua i le vasega. Atonu e te manao e tusi a latou tali i luga o le laupapa. Uunaia i latou e tusi nei manatu i a latou api po o a latou tusitusiga paia.
-
E faapefea ona fesootai nei uiga i le faatuatuaina?
Alema 56:31–57. E Mafai e Tina ona I ai se Faatosinaga Tele mo le Lelei o a Latou Fanau
Faitau le Alema 56:31–48 faatasi ma tamaiti. Mafaufau e fai i tamaiti e faitau leotele feauauai. Ina ia faamamafa le faatosinaga a tina o sa Amona i o latou atalii, fai atu i se tamaitiiti e faitau le saunoaga a Sister Julie B. Beck o loo i le itulau 271 i le tusi lesona a tagata o le vasega. O loo maua foi lenei saunoaga i le companion DVD
B.
-
Aisea e te manatu ai sa i ai i nei au tau lea faatuatuaga i aoaoga a o latou tina?
-
O anafea na e vaaia ai pe lagona ai le faatosinaga a se tina e iloaina lona faasinomaga ma pe o ai le Atua?
A o talanoaina e tamaiti nei fesili, mafaufau e faitau le saunoaga lenei a Elder Neal A. Maxwell (1926–2004) o le Korama a Aposetolo e Toasefululua:
“O tamaitai … e faamafanafanaina se tamaitiiti o tagi e aunoa ma le manatu pe latou te le o misia se mea o ofo atu e le lalolagi ia i latou i le aso, aua latou te iloa o loo latou uumauina le lumanai i o latou lima. …
“Pe a faailoaina atoatoa le talafaasolopito o le tagata, pe o le a i ai ea siuleo o uāfana—pe o leo ea o pese e faana ai se tamaitiiti?” (Woman [1979], 96).
-
Aisea e te manatu ai e i ai i tina se faatosinaga loloto i a latou fanau?
Toe faafoi atu le gauai a tamaiti i le Alema 56:47. Fesoasoani ia i latou ia iloa o le au tau talavou a Helamana na tuuto atu foi i o latou tama.
Ina ia faamamafa atu le manaomia o le galulue faatasi o tina ma tama i le aoaoina o a latou fanau, faitau le upusii lenei mai le “O Le Aiga: O Se Folafolaga i le Lalolagi”:
“Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia faaletino ma le faaleagaga, ma ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea latou te nonofo ai. O tane ma ava—tina ma tamā—o le a latou tali atu i le Atua mo le faataunuuina o nei mea e ao ona faia.
“… I le fuafuaga paia, e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa.” (Liahona, Oke. 1998, 24).
Tuu atu lau molimau e uiga i lenei mataupu faavae.
Alema 58:1–12. E Tuu mai e le Atua le Faamoemoe, Faatuatua, Filemu, ma le Faamautinoaga o le Laveaiga i E Amiotonu
Tuu atu i tamaiti e faitau le Alema 58:2 ma le 56:21 ma faailoa mai mea na fai e le autau a Helamana na fesoasoani ai e faatumauina lo latou saogalemu.
-
O le a le uiga o le upu olo mau?
-
O a nisi o olo mau a le Alii—nofoaga o le saogalemu lea e mafai ona tatou o i ai i aso nei?
-
O a nisi o olo mau a Satani i aso nei?
Faitau le saunoaga lenei a Peresitene Siaosi Alapati Samita (1870–1951), le Peresitene lona valu o le Ekalesia:
“O loo i ai se laina e vaelua ai ua faauigaina lelei lea e tuuese ai le teritori a le Alii mai le teritori a Lusifelo. Afai tatou te nonofo i le pito o le laina a le Alii, e le mafai ona sau Lusifelo iina e faatosina i tatou, ae afai tatou te kolosiina le laina i lana teritori, ua tatou i ai i lona mana. O le tausia o poloaiga a le Alii, tatou te saogalemu ai i Lana pito o le laina, ae afai tatou te le usiusitai i Ana aoaoga ua tatou kolosiina ma le manatu i ai le sone o faaosoosoga ma valaaulia ia faatafunaga o loo i ai iina” (Improvement Era, May 1935, 278).
-
O le a le mea e matautia ai le kolosi o le laina i le teritori a Satani? Aisea tatou te vaivai ai iina nai lo le itu o le laina a le Alii?
Tuu atu i tamaiti e faitau le Alema 58:3–9 ma faamatala le faafitauli na feagai ma le autau a Helamana.
-
O le a se mea e mafai ona e faia i lenei tulaga?
Faitau le Alema 58:10–13.
-
O le a le mea na faia e Helamana ma ana autau talavou e faafetaiaia ai lo latou faafitauli?
-
Na faapefea ona tali atu le Alii i a latou tatalo?
-
A o tatou feagai ai ma luitau o le olaga, o le a faapefea ona tatou manuia mai le mulimuli ai i lenei mamanu?
Na tusia e Elder Gene R. Cook o le Fitugafulu e uiga i lenei tulaga i le Tusi a Mamona:
“Atonu na faamoemoe sa Nifae mo se vavega. Atonu na latou mananao i ni agelu e o mai e laveai i latou, e pei ona tupu i se taimi pe lua i le Feagaiga Tuai. Ae o le a le mea na latou maua? Na tuu atu e le Alii ia i latou le faamautinoaga, filemu, faatuatua, ma le faamoemoe. Na te lei faaumatia tonu o latou fili, ae na ia tuu atu ia i latou meaalofa na latou manaomiaina ina ia latou laveaiina ai i latou lava. …
“I se isi faaupuga, na tuu atu e le Alii i totonu o nei alii le loto ma le mana e fai ai mea latou te mananao i ai—ia amata i se faaiuga malosi ona faatino ai lea. Ina ua taliina a latou tatalo, na mafai loa ona puipuia e sa Nifae lo latou saolotoga.
“Pe a tuuina e le Alii i totonu o le tagata le faamoemoe ma le faatuatua ma le filemu ma le faamautinoaga, e mafai ona latou faataunuuina ni mea tetele. O le mea la lea, e tatau lava ona tatou saili i ai pe a tatou ole atu mo se fesoasoani ae le o se vavega e foia ai o tatou faafitauli mo i tatou lava, ae o se vavega i totonu, e fesoasoani ai ia i tatou e maua ai le tali mo i tatou lava, i le fesoasoaniga a le Alii ma le mana o le Alii” (Receiving Answers to Our Prayers [1996], 156–57).
E mafai faapefea e lenei saunoaga ona aafia ai mea tatou te sailia e avea ma tali i a tatou tatalo?
Alema 60:23–24. E Tatau Ona Tatou Faamama Totonu o le Ipu
Tuu atu i se tamaitiiti se ipu inu e mama fafo ae palapalā totonu.
-
Aisea e le lava ai le tausia o fafo o le ipu ia mama?
Valaaulia tamaiti e faitau le Alema 60:23–24. Atonu foi e te manao e tuu atu ia i latou e faitau le Mataio 23:25–26.
-
O le a le uiga o le fuaitau “totonu o le ipu” i nei fuaiupu?
-
O a ni auala e mafai ona faaaoga ai le fuaitau “totonu o le ipu” i o tatou olaga taitoatasi?
-
Aisea e manaomia ai ona faamama totonu o o tatou ipu? O a nisi o mea e mafai ona tatou faia e tausia ai le mama o totonu o a tatou ipu?
Faasoa atu le apoapoaiga a Peresitene Ezra Taft Benson o loo i le itulau 272 i le tusi lesona a tagata o le vasega. Ona fai atu lea i tamaiti e mafaufau loloto i le fesili lenei e aunoa ma le tali leotele mai:
-
O a ni auala e mafai ai ona e faaaogaina le fautuaga a Peresitene Benson?
Alema 60–61. Ua Faamoemoeina i Tatou e le Alii e Puipuia le Saolotoga
Faamalamalama atu e i ai i malo taitasi se lisi o o latou tagata lotonuu—o alii ma tamaitai o e alolofa i o latou atunuu ma lagolago le saolotoga o o latou tagata. Ua faamamaluina i latou o ni tagata lotonuu ona o uiga ma tomai ua ia i latou. Vaevae tamaiti taitoalua. Fai atu i le tamaitiiti e toatasi o le vaega taitoalua nei e faitau le upu a Taitai Au Moronae i le mataupu 60, ma fai atu i le isi tamaitiiti e faitau upu a Paorana latou te lagona e taua e fesoasoani ai i se malo e faasaoina lona saolotoga. Ona fai atu lea ia i latou e fefaasoaai ma isi mea na latou maua. O a latou lisi e mafai ona aofia ai uiga nei:
Taitai Au Moronae |
Paorana |
---|---|
Lototoa (fuaiupu 2) |
Faanoanoa mo puapuaga o isi (fuaiupu 2) |
Popole mo le manuia o isi (fuaiupu 10) |
Manao e puipui le saolotoga (fuaiupu 6) |
Manatuaina o faamanuiaga ua tuanai (fuaiupu 20) |
E le ita i faitioga (fuaiupu 9) |
-
O le a le mea e sili ona faagaeetia ai oe e uiga ia Taitai Au Moronae ma Paorana?
-
E tusa ai ma nei mataupu, o le a le mea iloa ai le uiga lotonuu?
-
O a ni auala e mafai ona e faaaofiaina ai nei mataupu faavae i lou olaga?
-
O a ni faataitaiga o nei mataupu faavae ua e vaaia i isi tagata?
Alema 62:39–51. I Taimi o Faigata, o Nisi Tagata e Faamaualaloina i Latou Lava i Luma o le Atua, A o Isi e Faamaaaina
Valaaulia tamaiti e faitau le Alema 62:39–41.
-
I le fuaiupu 41, o le a le uiga o le upu faamaaaina? O le a le uiga o le upu faamaluluina?
-
Aisea e te manatu ai na faamaaaina nisi o sa Nifae ona o le taua a e o isi sa faamaluluina?
-
E tusa ai ma upu a Mamona i le fuaiupu 40, aisea na faasaoina ai sa Nifae? (Tagai foi i le Alema 10:22–23.)
Faitau le Roma 8:28, 35–39. Valaaulia tamaiti e ta’u mai se taimi na latou liliu atu ai i le Alii i o latou puapuaga.
Faitau le Alema 62:42–51 ma talanoaina le auala e mafai ona fesoasoani ai le Ekalesia i se malo ma ona tagata e toe faaleleia mai aafiaga o taua. Molimau atu e mafai e le Alii ona faamaloloina ia manu’a uma na mafua mai i taua. Atonu foi e te manao e faasino atu e faapea e pei lava ona mafai ona faamalolo e le Alii se malo na i ai i se taua, e mafai foi ona Ia faamalolo i tatou taitoatasi a o tatou i ai i faigata.
Fai i tamaiti e mafaufau e uiga i talanoaga na latou faia e uiga i le Tusi a Mamona i mataupu i taua (Alema 43–62). Toe iloilo nisi o mataupu faavae na e talanoaina ma au tamaiti a o suesueina nei mataupu.
-
Aisea na tusi faamaumau ai e Mamona le tele o mea e uiga i taua?
Faaiu atu i ou lava manatu e uiga i mataupu o taua. Faasoa atu lau molimau.