Inisitituti
Mataupu 4: 1 Nifae 12–15

Mataupu 4

1 Nifae 12–15

Folasaga

Ina ua maea ona iloa e Nifae le faauigaga o le faalepo o le laau o le ola, na ia maua se faaaliga mata’ina o le lumanai. Na ia vaai i le nuu o le folafolaga lea o le a nofoia e lona aiga. Na ia vaai i vaitaimi o fefinauaiga, taua, ma le agasala tele ma vaitaimi o le amiotonu ma le filemu i ē tupuga mai ia te ia faapea ma ē tupuga mai ia Lamana ma Lemuelu. Na ia vaai i galuega a le Faaola i Amerika. Na ia vaai foi i le Liliuese Tele, le Toefuataiga o le talalelei, le taua faifai pea a Satani e tetee i le upumoni, ma le matafaioi tupito a Iesu Keriso i le avea ai ma Faaola o le lalolagi. A o talanoaina e tamaiti le faaaliga a Nifae ma faitau i le manumalo mulimuli o le malo o le Atua ia Satani, e mafai ona latou maua le mafanafana i le iloa ai o le a manatua e le Alii Ana feagaiga ma Lana Au Paia. E mafai ona e faamautinoa atu ia i latou e tusa lava po o le a le taufaamatau mai o le tiapolo ma i latou o i lona malo, e pule lava le Atua ma o le a Ia faamalosia ē mulimuli ia te Ia a o latou i ai i Lana galuega.

O Nisi o Aoaoga Faavae ma Mataupu Faavae

Fautuaga mo le Aoaoga

1 Nifae 13:1–9, 26–29; 14:9–13. Na Faavaeina e le Tiapolo se “Lotu Tele ma le Inosia” e “Faapiopio ai Ala Tonu o le Atua”

Faamalamalama atu na maua e Nifae se faaaliga lea na ia vaai ai ile lumanai o lona nuu ma le nuu o Lamana ma Lemuelu. I lenei faaaliga na ia vaai ai “i le faatuina o se lotu tele” (1 Nifae 13:4). Fai i tamaiti e faitau le 1 Nifae 13:5–9, 26–29, vaai uiga o lenei lotu. Lisi na uiga i luga o le laupapa (pe tofi se tasi na te faia).

Faamatala o le fuaitau “lotu tele ma le inosia” ma le “ekalesia a le tiapolo” e le o faatatau moni i se ekalesia. Ina ia fesoasoani i tamaiti e malamalama i lenei mea, valaaulia i latou e faitau le saunoaga a Elder Bruce R. McConkie i le itulau 27 i le tusi lesona a le vasega.

  • Aisea e te manatu ai e taua le iloa o loo faatulaga e Satani ana ‘au e taitai ese ai i tatou mai le Atua?

  • Na ta’u atu e le agelu ia Nifae e na o le lua lava ekalesia (tagai i le 1 Nifae 14:10). O a auala e moni ai lenei faamatalaga? E mafai faapefea ona tatou mautinoa o loo tatou i ai i le ekalesia a le Tamai Mamoe a le Atua?

1 Nifae 13:20–42. Ua Toefuatai Mai e le Alii ia Upumoni Malamalama ma le Taua e Fesoasoani ai ia i Tatou e O Mai ia te Ia

Fai i tamaiti e manatunatu i le o i le fomai ona o se ma’i. I le taimi atoa o le suesuega, ua maua ai e le fomai le ma’i ma tusi mai se pepa talavai. Ae toe sui e le tagata i le faletalavai le talavai.

  • E faapefea ona aafia ai lou ma’i i lenei suiga?

Fai i tamaiti e faitau le 1 Nifae 13:20–29. Ona fai lea o le fesili lenei:

  • E tutusa faapefea lenei tala ma le faataitaiga o le suia e le faletalavai se talavai mai se fomai?

  • Fuaiupu 23 e faatatau i le Tusi Paia. O a upu i lenei fuaiupu e faasino i le Tusi Paia?

  • E tusa ai ma fuaiupu 23–25, o a mea na i ai i le Tusi Paia ina ua faato’ā oo mai?

  • O ai e tele ana suiga matuia na faia i anotusi o le Tusi Paia? O a mea na latou aveesea? O a ni o latou faanaunauga? (Tagai i le fuaiupu 26–29; tagai foi i le saunoaga a le Perofeta o Iosefa Samita i le itulau 624 i le Bible Dictionary.)

Valaaulia tamaiti e faitau le 1 Nifae 13:34–39.

  • E tusa ai ma nei fuaiupu, o a mea na manaomia ona toefuatai?

  • E faaopoopo atu i le Tusi a Mamona, o a “isi tusi” e ono faasino i ai le fuaiupu 39?

  • E faapefea e upumoni o le Tusi a Mamona ma isi tusitusiga paia o aso e gata ai ona uunaia lau molimau?

Valaaulia tamaiti e sue i itulau 29–30 i le tusi lesona a le vasega. Fai i ai e faitau le faamatalaga a Peresitene James E. Faust ma le faamalamalamaga mai le Taiala i Tusitusiga Paia e faatatau i mea tatou te maua ai upumoni malamalama ma le taua ua toefuatai mai i aso e gata ai. (O loo maua foi le faamatalaga a Peresitene Faust i le companion DVD A.)

Valaaulia se tamaitiiti e faitau le 1 Nifae 13:40–41.

  • E faapefea e le Tusi a Mamona ona faavae le moni o le Tusi Paia? (Tagai foi i le Mamona 7:8–9.)

  • O le a sou manatu i le uiga pe a faapea atu o le Tusi a Mamona ma le Tusi Paia ua “faavaeina ia tasi?”

  • E mafai faapefea ona faaaogaina le Tusi a Mamona e molimau ai i upumoni o i le Tusi Paia?

1 Nifae14. O Le a Manumalo le Malo o le Atua i Aso Amuli

Fesili i tamaiti po o le a so latou manatu, o le a se tala a se perofeta ua tuanai na vaai i o tatou aso i le faaaliga, e uiga i tulaga faaleagaga o o tatou aso. Otooto a latou tali i luga o le laupapa.

Valaaulia tamaiti e tagai vave i le 1 Nifae 14 ina ia iloa ai pe faapefea ona faatusatusa a latou tali i le faaaliga a Nifae o aso e gata ai. Atonu e manaomia ona e fesoasoani ia latou iloa na faamatala e Nifae ia le malosi faaleagaga faapena foi ma le faatafunaga ma le faapologaina faaleagaga (tagai, mo se faataitaiga, fuaiupu 7, 14, ma le 17).

I le amataga o le faaaliga, na vaai ai Nifae i le faatafunaga o e tupuga mai ia te ia. Peitai, i le vaega lenei i le faaaliga na ia vaai ai i le manumalo o le malo o le Atua. Fai i tamaiti e faitau le 1 Nifae 14:10–17.

  • E tusa ai ma le faaaliga a Nifae, o fea e maua i ai le Ekalesia a le Tamai Mamoe i aso amuli? O le a le telē o le a i ai e faatusatusa i le lalolagi atoa? (Tagai i le fuaiupu 12.)

  • E faapefea ona tali atu e amioleaga ma tagata o le lalolagi i le Ekalesia a le Tamai Mamoe? (tagai i le fuaiupu 13.)

  • O a mea e lua o le a faaauupegaina ai le Ekalesia a le Tamai Mamoe mo le puipuiga? (Tagai i le fuaiupu 14.)

  • Aisea e taua ai mo i tatou ona iloa o le a manumalo silisili le galuega a le Atua?

  • Na faapefea e lenei iloa ona fesoasoani ia Nifae a o ia onosaia ia tofotofoga ma faigata i lona olaga?

1 Nifae 15:1–11. Tatalo e Taitai Atu ai i Faaaliga

Fai i tamaiti e faitau le 1 Nifae 15:1–3 ma faamatala pe aisea latou te manatu ai e lei malamalama ia Lamana ma Lemuelu i aoaoga a lo laua tama. Lisi tali i luga o le laupapa.

Tofi se tamaitiiti e faitau le 1 Nifae 15:6–9. Fai i tamaiti uma e mafaufau i auala e tutusa ai nisi i le asō ma Lamana ma Lemuelu i lo latou tali atu i le Atua.

Atonu e te manao e ta’ua o le tele o tagata e soifua i le olaga e aunoa ma le saili atu ia agavaa mo le siufofoga o musumusuga. O le toatele o nei tagata e le amioleaga pe tetee, ae e na o na latou mumusu lava e aoao ma faia le finagalo o le Alii.

Faasoa atu ia faamatalaga a le Perofeta o Iosefa Samita i le itulau 31 i le tusi lesona a tagata o le vasega. Ona fai lea i tamaiti ia fesili nei:

  • O a auala na faaali atu ai e Nifae i faataitaiga nei mataupu faavae?

  • O le a le taunuuga o le manao o Nifae ia iloa mea a le Atua?

  • O le a le mea ua folafola mai e le Alii e faatatau i lo tatou tomai e maua ai se poto o Ona ala? (A o talanoaina e tamaiti lenei fesili, atonu e te manao e tuu atu ia i latou e faitau se vaega po o le mau atoa lenei: Iakopo 1:5 ; 1 Nifae 10:19; MFF 88:63–64; 121:26–33.)

  • A o tatou saili atu e iloa le finagalo o le Atua, o a nisi o auala patino e mafai ai ona tatou avea atili e pei o Nifae ma aua ai nei o tatou pei o Lamana ma Lemuelu?

Faitau le 1 Nifae 15:10–11 faatasi ma tamaiti. Tuu i ai latou te faailoa mai mea e fa ia na tau atu e Nifae ia Lamana ma Lemuelu e tatau ona la faia e maua ai le malamalama faaleagaga mai le Alii. (Ia aua nei faamaaaina o laua loto, ia ole atu i le faatuatua, ia talitonu o le a la maua, ma ia tausi ma le filiga i poloaiga.)

  • E mafai faapefea i le faia o nei mea e fa ona fesoasoani tatou te maua ai tali i tatalo?

1 Nifae 15:12–20. E Manatua e le Alii Ana Feagaiga ma le Aiga o Isaraelu

O se autu e taua soo i le Tusi a Mamona e faapea e manatua e le Alii Ana feagaiga ma le aiga o Isaraelu. E silisili lava o le a faapotopotoina ma togiolaina e le Faaola ia Isaraelu. Fautua atu i tamaiti ia tagai mo lea upumoni i le Tusi a Mamona atoa. Atonu e te manao e taua le faatusa o le laau o le olive i le 1 Nifae 15 o loo toe faaalia foi i le faataoto o le laau o le olive i le Iakopo 5.

I le 1 Nifae 15:7, o a elemene o aoaoga a Liae na le malamalama i ai ia Lamana ma Lemuelu?

Tusi le laau o le olive i luga o le laupapa. Tuu atu i tamaiti e faitau le 1 Nifae 15:12 ma vaai mea ia e suitulaga ai le laau o le olive.

  • O le a le mea o loo suitulaga ai le laau o le olive? (I luga o le laupapa, tusi ai le laau o le olive = aiga o Isaraelu.)

  • Na faapefea e e na tupuga mai ia Liae ona “mafa’iese mai le aiga o Isaraelu”?

Tuu atu i se tamaitiiti e faitau le 1 Nifae 15:13.

  • E tusa ai ma le tala a Nifae, o afea o le a avatu ai le talalelei i e na tupuga mai ia Liae? O ai o le a aveina atu le talalelei ia i latou?

Tusi Nuuese i luga o le laupapa. Faamalamalama atu e tele uiga o le upu lenei. E mafai ona faasino i tagata e le i ai i le gafa o Isaraelu, i tagata foi e le tupuga mai Iutaia, po o malo ia e aunoa ma le talalelei (tagai i le Bible Dictionary, “Gentile”; Guide to the Scriptures, “Gentiles,” scriptures.lds.org; tagai foi i le MFF 109:60–62). Toe faasino atu tamaiti i le 1 Nifae 15:13. I lenei fuaiupu, o loo ta’ua ai le upu lea i le Au Paia o Aso e Gata Ai, o tagata ia, i le taimi o le Toefuataiga, sa nonofo ai i se malo o Nuuese. Faasoa atu ia faamatalaga a Elder Bruce R. McConkie i le itulau 31 i le tusi lesona a tagata o le vasega.

Tuu sao atu le gauai a tamaiti i le fuaitau “faapipiina o la moni.”

  • O le a le uiga o le faapipii o se la?

A talafeagai ai, faamalamalama atu e faapea o le faapipii o se la o le laau, o le faapipii atu lea o se la o le tasi laau i le isi laau. O le la ua faapipiina na te maua le tausiga mai le laau ma avea ai o se vaega tumau o le laau.

Tau atu o loo faamalamalama mai i le 1 Nifae 15:14 le auala o le a faapipii atu ai e tupuga mai ia Liae i le laau o le olive, po o le aiga o Isaraelu. Valaaulia tamaiti e faitau le 1 Nifae 15:14–16. Fai i ai e aotele nei fuaiupu i a latou lava upu. Atonu e te manao e fai atu fesili nei:

  • E faapefea ona “faapipiina” ia tagata, pe faapotopotoina, a o latou “oo mai i le iloa lelei o lo latou Togiola”?

  • Aisea e te manatu ai e taua mo i tatou ona malamalama “i sauniga lava a lana mataupu”?

  • E faapefea ona tatou maua le tausiga e ala i lo tatou auai i le Ekalesia?

Valaaulia tamaiti e faaamatala le taimi na “faapipiiina” ai i latou i le Ekalesia po o anafea foi na latou fesoasoani ai i se tasi e maua lena faamanuiaga.

1 Nifae 15:24. O Le Afioga a le Atua e Faamalosia ai i Tatou e tetee i U Fanafana Mu a le Tiapolo

Faasino tamaiti i le 1 Nifae 15:24 ma tuu atu ia i latou e vase lalo o le fuaitau “u fanafana mu.” Ona valaaulia lea o i latou e faatusatusa lenei fuaiupu ma le Efeso 6:16 ma le Mataupu Faavae ma Feagaiga 27:17.

  • O a nisi o “u fanafana mu” o loo feagai ma i tatou i le lalolagi i le asō?

  • O le a le mea o loo lapatai mai ai le 1 Nifae 15:24 o le a avea ma taunuuga o le lolo atu i u fanafana mu a Satani?

  • O a auala e mafai ai e le afioga a le Atua ona fesoasoani ia i tatou e tetee atu i u fanafana mu a le fili?

E mafai ona e otootoina lenei mataupu faavae i le faamatalaga lenei a Elder Neal A. Maxwell (1926–2004) o le Korama a Aposetolo e Toasefululua (o loo maua foi i le companion DVD B:

“O soo moni [e tetee atu] i u fanafana mu a le fili e ala i le uuina i luga o le talipupuni o le faatuatua i le tasi lima, a o uuina le ai uamea i le isi (tagai i le Efeso 6:16; 1 Nifae 15:24; MFF 27:17). E le tatau ona i ai se mea sese; o le a faaaoga uma lima e lua!” (i le Lipoti o le Konafesi, Ape. 1987, 87; po o le Liahona, Iulai 1987, 70).

Valaaulia tamaiti e faasoa atu pe faapefea e lo latou faatuatua ma lo latou malamalama i tusitusiga paia ona fesoasoani ia i latou e tetee atu i faaosoosoga.

Tuu atu lau molimau i le taua o tusitusiga paia ma le auala o loo fesoasoani ai ia i tatou e tetee atu i u fanafana mu a Satani.

Lolomi