Mataupu 25
Alema 8–12
Folasaga
Ina ua taunuu atu Alema e talai i le aai o Amonaea, o le toatele o tagata iina ua i ai i se tulaga faateleina o le liliuese. Na vave lava ona teenaina e tagata amioleaga i Amonaea ia Alema ma tulia o ia i fafo ma lo latou aai. Ae peitai, na asiasi atu se agelu ia te ia, faamalosiau ia te ia, ma tuuina atu se poloaiga mai le Alii ina ia toe foi atu o ia i Amonaea. Ina ua ia toe foi atu “loa” i le aai (Alema 8:18), na ia fetaui ai ia Amoleka, o lē na saunia e le Alii e fai ma soa faifeautalai mo Alema. Na tali atu Alema ma Amoleka i le loto maaa o le nuu e ala i le aoaoina o aoaoga faavae malolosi e faatatau i le ala o le togiola, Toetu, ma le Faamasinoga. A o talanoaina e tamaiti nei aoaoga, e mafai ona e fesoasoani ia latou iloa pe a tatou fausia a tatou molimau i luga o upumoni o le ata o le faaolataga, tatou te maua le malosi e faalogo ai i auauna a le Atua ma usitai i Ana poloaiga. Ua tatou saunia i tatou lava mo le afio mai o le Alii.
O Nisi o Aoaoga Faavae ma Mataupu Faavae
-
Afai tatou te faamaoni ma filiga, o le a saunia e le Alii se ala mo i tatou e ausia ai mea ua Ia poloaiina (tagai i le Alema 8).
-
O le a toetutu uma tagata mai le oti ma tutu i luma o le Alii ina ia faamasinoina (tagai i le Alema 11:41–46; 12:1–18).
-
Ua saunia e le Atua le ala o le togiola e laveai ai i tatou mai lo tatou tulaga pa’ū (tagai i le Alema 12:22–37).
Fautuaga mo le Aoaoga
Alema 8. Afai Tatou te Faamaoni ma Filiga, O Le A saunia e le Alii se Ala mo i Tatou e Ausia ai Mea ua Ia Poloaiina
Tusi le Alema 8:8–18 i luga o le laupapa. Vaelua le vasega. Tofi le afa o le vasega e faitau fuaiupu nei, saili mo faamatalaga e uiga i tagata o Amonaea. Tofi le isi afa o le vasega e faitau fuaiupu lava ia e tasi, saili mo faamatalaga e uiga ia Alema. Faamalamalama atu pe a maea ona latou faitauina, o le a e fesiligia i latou e uiga i mea na latou faitau i ai.
Pe a maea ona faitau tamaiti, fai atu fesili nei e uiga i tagata o Amonaea:
-
O le a le taunuuga o le “malosi o le pule [a Satani] i loto o tagata” o Amonaea? (Tagai i le Alema 8:9.)
-
Na faapefea ona vaevaeina e tagata o Amonaea ia aoaoga ma faatinoga a le Ekalesia? (Tagai i le Alema 8:11.)
-
O a mea a le nuu o Amonaea na fai ia Alema? (Tagai i le Alema 8:9–13.)
-
Aisea na agaleaga ai le nuu ia Alema, e ui lava o ia o se faitaulaga sili na pule i le Ekalesia? (Tagai i le Alema 8:11–12.)
Fai atu fesili nei e uiga ia Alema:
-
Na faapefea ona tali atu Alema i le teenaina i Amonaea? (Tagai i le Alema 8:14.)
-
O le a le mea na tupu na suia ai le mafaufau o Alema a o ia tuua Amonaea? (Tagai i le Alema 8:14–16.)
-
E faapefea ona e manatu na faatosinaina e le savali a le agelu le manatu o Alema i lana misiona i Amonaea? (Tagai i le Alema 8:15–17.)
-
O le a se mea e mafai ona tatou aoao mai le tali atu a Alema i le savali a le agelu? (Tagai i le Alema 8:18.)
Valaaulia tamaiti e faitau le Alema 8:19–27. Fai i ai e saili mo ni faamaoniga na tatala e le Alii se ala mo Alema e talai atu ai le talalelei i Amonaea.
-
Aisea na ese ai le ala na talia ai e Amoleka ia Alema mai le ala na talia ai e isi tagata i Amonaea? (Tagai i le Alema 8:20.)
Faasoa atu le upusii lea i tamaiti. O loo maua foi le saunoaga a Peresitene Monson i le companion DVD A. Fai atu pe faapefea ona fesootai saunoaga nei i le aafiaga o Alema i Amonaea.
Na aoao mai Peresitene Thomas S. Monson, le Peresitene lona 16 o le Ekalesia e faapea: “Ia outou manatua o lenei galuega ua le na o oe ma au. O le galuega a le Alii, ma pe a tatou i ai i le feau a le Alii, … ua tatou agavaa mo le fesoasoani a le Alii. Ia manatua e faamalosia e le Alii le tua ina ia mafai ona tauave ai avega e tuu i ai” (i le Lipoti o le Konafesi, Ape. 2005, 61; po o le Liahona, Me 2005, 56).
Na fautua mai Peresitene Gordon B. Hinckley (1910–2008), le Peresitene lona 15 o le Ekalesia e faapea: Tulai atu i le malosi sili o i totonu ia te oe. Ou te le o fai atu e te aapa atu e sili atu ma lou gafatia. Ou te faamoemoe o le a e le faitio ia te oe i manatu o le toilalo. Ou te faamoemoe o le a e le taumafai e setiina ni sini e sili atu ma lou malosi e ausia ai. Ou te faamoemoe o le a tau lava ina e faia o mea e mafai ona e faia i le ala sili e te iloa. Afai e te faia faapena, o le a e molimauina le faataunuuina o ni vavega” (Teachings of Gordon B. Hinckley [1997], 696).
-
O a ni auala e fesoasoani ai nei saunoaga ma le tala i le Alema 8 ia te oe e fetaiai ai ma luitau?
Valaaulia ni nai tamaiti e faasoa mai ni faataitaiga o auala na fesoasoani ai le Alii ia i latou e fetaiai ma luitau. I le avea ai ma se vaega o lenei talanoaga, atonu e te manao e faasino atu e faapea e masani lava ona oo mai le fesoasoani a le Alii i ala iti ma le faatauvaa, e pei o le taitaiga le leoa mai le Agaga Paia po o se galuega agalelei a se uo.
Faitau faatasi le Alema 8:30–31, fai i tamaiti e saili mo mea na faia e le Alii mo Alema ina ua toe foi atu Alema i Amonaea.
-
O le a le mea na faia e le Alii e fesoasoani ai ia Alema e faasoa atu le talalelei i tagata o Amonaea?
Faasoa atu lau molimau e uiga i le mana o le alii e saunia i se ala e tusa lava pe foliga mai ua faigata ona faataunuuina Ana poloaiga. “E le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou” (1 Nifae 3:7 ).
Alema 9. “Pe Faapefea ona Galo ia te Outou le Uputuu a o Outou Tama”?
Fai i tamaiti e lisi ni tomai po o ni manatu ia e teena ai e le autalavou i nisi taimi le aoao mai o latou matua. (E mafai ona tuuina mai e tamaiti ni tali e pei o le faatausi aiga, fausiaina ma le faaleleiina, mausa o le suesue po o musika.)
-
Aisea e te manatu ai e teena e nisi tagata le atamai taua mai augatupulaga ua mavae atu?
Faitau le Alema 9:7–14 faatasi ma tamaiti. A o outou faitau, tuu atu i tamaiti e saili mo fuaitau po o manatu ia na ta’ua soo e Alema (e pei o le “faapefea ona galo ia te outou” ma le “tou te le manatua ea”).
-
O le a le mea na galo i tagata sa Amonaea? Aisea e te manatu ai o le galo o lenei mea na taitai atu ai i le liliuese ma le amioleaga?
-
O faapefea ona faamanuiaina oe mai le iloa o uputuu lelei, aoaoga, ma aafiaga o augatupulaga ua mavae? O le a se mea e mafai ona tatou faia e manatua ai ia faamanuiaga?
Valaaulia tamaiti e faitau le leoa le Alema 9:19–22 ma faailoa mai faamanuiaga faaleagaga ma aafiaga ia na muai olioli ai sa Nifae. Fai i tamaiti e faasoa mai mea na latou maua.
Fai i tamaiti e faitau le Mataupu Faavae ma Feagaiga 82:3 .
-
E faapefea ona faatatau lenei fuaiupu i tagata o Amonaea?
Valaaulia se tamaitiiti e faitau leotele le Alema 9:23–24 ma le 10:22–23, 27. Fai atu i isi tamaiti e faitau le leoa, saili mo lapataiga o faigata ia o le a oo mai i tagata o Amonaea pe afai latou te le salamo.
-
O a lapataiga na tuu atu e Alema ma Amoleka i tagata?
-
E tusa ai ma le saunoaga a Alema, aisea na sili atu ai le leaga o le amioleaga o tagata o Amonaea nai lo le amioleaga o sa Lamana?
Toe faasino atu i le Alema 9:19–22, i le mea o loo lisi ai e Alema nisi o faamanuiaga ma aafiaga na olioli ai sa Nifae.
-
Aisea e aoga ai le manatuaina o aafiaga faaleagaga ua tuanai?
Faasoa atu ou lagona e uiga i le taua o le manatuaina o aafiaga faaleagaga patino ma aafiaga faaleagaga o tagata i augatupulaga ua mavae. Valaaulia tamaiti e faamaumau ma le totoa mea paia na tutupu i o latou olaga i api talaaga a le tagata lava ia.
A o lei se’e atu i le Alema 11, atonu e te manao e fautua atu o Amoleka o se soa faifeautalai sili mo Alema. O loo lisi i le Alema 10:4–12 nisi o aafiaga lea na saunia ai o ia e auauna atu faatasi ma Alema. E mafai foi ona e faasino atu na i ai foi se taimi na avea ai Amoleka ma se tagata lē toaga o le Ekalesia a o lei avea o ia ma se faifeautalai malosi tele. E mafai ona tuu atu e lenei tala se faamoemoe mo alii ma tamaitai talavou o e ua masalosalo i lo latou mafai ona auauna atu faamisiona.
Alema 11:41–46; 12:1–18. O Le A Toetutu Tagata Uma mai le Oti ma Tutu i luma o le Alii Ina ia Faamasinoina
Ua tuuina atu i lenei vaega ia te oe se isi avanoa e molimau atu ai ua faatoilaloina e le Togiola a le Faaola ia aafiaga o le Pa’ū.
A o lei amataina le vasega, saunia le suega lenei i luga o se masini e faaali ai, po o se pepa e tufa atu mo tamaiti. Mo faamatalaga uma taitasi, tuu atu i tamaiti e tusi le M mo le moni po o le S mo le sese. Fai i tamaiti e fai le suega e aunoa ma le faaaogaina o a latou tusitusiga paia.
-
Pe a faamasinoina i tatou, o le a tatou manatuaina a tatou agasala. (Tagai i le Alema 11:43; tagai foi i le 2 Nifae 9:14; Alema 5:18.)
-
O i latou na maumau o latou lima po o vae i le olaga faaletino o le a toefuatai mai o latou ivi pe a latou toetutu. (Tagai i le Alema 11:43–44.)
-
E ui lava o le a aveesea uma tulaga le atoatoa o le tino po o ma’i pe a tatou toetutu, ae o le a i ai pea o tatou ma’ila ma isi ila laiti. (Tagai i le Alema 11:43–44; tagai foi i le Alema 40:23.)
-
O se tagata ua toetu o le a le mafai lava ona toe oti faaletino. (Tagai i le Alema 11:45.)
-
I le Faamasinoga Mulimuli, o le a na ona faamasinoina i tatou e tusa ma a tatou galuega. O le a leai ma se isi lava mea e iloiloina. (Tagai i le Alema 11:41, 44; 12:14; tagai foi i le MFF137:9.)
-
O i latou e faamaaaina o latou loto i le upumoni o le a le pine ae le iloa se mea e faatatau i mea lilo a le Atua. (Tagai i le Alema 12:9–12.)
-
O le Faamasinoga Mulimuli o le a avea ma se aafiaga olioli mo tagata uma. (Tagai i le Alema 12:13–14, 17.)
(Tali: 1-M; 2-M; 3-S; 4-M; 5-S; 6-M; 7-S)
Pe a maea le suega a tamaiti, tuu atu ia i latou e galulue taitoatasi pe taitoalua e faitau le mau faasino ma siaki a latou tali. Ona fai atu lea o fesili nei:
-
E faapefea ona fesoasoani le malamalama i le Toetu ma le Faamasinoga Mulimuli ia i tatou e malamalama atili ai i le Togiola a Iesu Keriso?
-
O a ni auala e mafai ai e se malamalama tonu o nei aoaoga faavae ona faatosinaina o tatou olaga i lea aso ma lea aso?
A o talanoaina e tamaiti nei fesili, atonu e te manao e tuu atu ia i latou e faitau le saunoaga a Elder Dallin H. Oaks o loo i itulau 195 ma le 197 i le tusi lesona a tagata o le vasega. O loo maua foi nei saunoaga i le companion DVD B
C.
Valaaulia tamaiti e mafaufau le leoa i lenei fesili:
-
Pe i ai ea soo se mea i lou olaga e manaomia ona e suia ina ia e le fefe ai i le Faamasinoga Mulimuli?
Uunai tamaiti e faamaualaloina i latou lava i le tatalo, ina ia ole atu i le Alii mo le faamagaloga o agasala, ma ia saili Lana fesoasoani i le faatoilaloina o a latou agasala. Fesoasoani ia i latou ia malamalama o le taimi lenei e saunia ai mo le Toetu ma le Faamasinoga Mulimuli (tagai i le Alema 34:32–34 ).
Alema 12:22–37. Ua Saunia e le Atua le Ala o le Togiola e Laveai ai i tatou mai lo Tatou Tulaga o le Pa’ū
Mafaufau e muai faafesootai ni tamaiti se toalua pe toatasi ma valaaulia i la’ua ia saunia e faasoa mai a la’ua molimau i le ata o le faaolataga ma le filemu na te aumaia i o la’ua olaga.
A o lei amataina le vasega, saunia se pepa e tufa atu faatasi ai ma fesili nei ma mau faasino:
-
O a nisi o taunuuga o le ‘aia e Atamu ma Eva o le fua faasaina? (Tagai i le Alema 12:22, 24.)
-
O le a le mea na faatuina e le Atua e foia ai aafiaga o le Pa’ū? (Tagai i le Alema 12:25.)
-
Na faapefea ona aoaoina tagata i le ala o le togiola? (Tagai i le Alema 12:28–30.)
-
O le a le mea na tuu atu e le Atua i tagata ina ia mafai ai ona latou faaaogaina lo latou faitalia i se aga e ogatusa ai ma Lana ala o le togiola? (Tagai i le Alema 12:31–32.)
-
E faapefea ona tatou maua ia faamanuiaga o le Togiola a le Faaola? (Tagai i le Alema 12:33–37.)
Faitau le saunoga lenei a Peresitene Boyd K. Packer, Peresitene o le Korama a Aposetolo e Toasefululua:
“A aunoa ma se malamalama i le fuafuaga o le talalelei, e foliga mai o se mea fua le solitulafono, ma ta’umamaina, e oo lava ina faamaoniaina. E le o i ai se puipuiga sili atu mai le fili nai lo mo i tatou lava ia iloa le upumoni—ia iloa le fuafuaga” (Our Father’s Plan [1984], 27).
-
E faapefea e lo tatou malamalama i le fuafuaga a le Tama Faalelagi ona puipuia i tatou mai le fili?
Faamalamalama atu o loo i ai i le Alema 12 ni auiliiliga taua e uiga i le fuafuaga a lo tatou Tama Faalelagi mo Ana fanau. I le silafia ai o le a tatou pa’u’u i le solitulafono, na saunia ai e le Tama Faalelagi se ala mo i tatou ina ia togiolaina ai ma toe foi atu ai e mau faatasi ma Ia e faavavau. Fesoasoani i tamaiti ia iloa o le tele o lo latou malamalama i le fuafuaga a le Tama Faalelagi, o le sili atu foi lena o lo latou fiafia.
Tufatufa atu kopi o pepa e tufa atu. Tofi tamaiti taitasi e sue ia tali i se tasi po o fesili e lua o loo i luga o le pepa e tufa atu ma saunia e faasoa mai o la’ua manatu i le vasega.
Pe a uma ona taliina e tamaiti ia fesili, fesoasoani ia i latou e talanoaina autu e lua nei ina ia mafai ai ona latou faasoa mai mea ua latou aoaoina ma faaaoga atoatoa aoaoga faavae i o latou olaga.
Autu 1: Na aoao atu e Alema ma Amoleka le tele o upumoni e uiga i le ala o le togiola.
Fai i tamaiti e toe iloilo ia mau na latou suesueina i le aso ma faailoa mai nisi o upumoni na aoao mai e Alema ma Amoleka. Atonu e te manao e lisiina tali a tamaiti i luga o le laupapa.
Valaaulia tamaiti e filifili se tasi o upumoni ua lisi atu ma faamalamalama mai pe o le a faapefea e le malamalama i lena upumoni ona fesoasoani e puipui i latou mai le fili.
Autu 2: Na faapea mai Alema na tuu atu e le Atua i Ana fanau ia poloaiga “ina ua uma ona ia faaali ia te i latou le ala o le togiola” (Alema 12:32; faaopoopo le faatusilima).
-
Aisea e te manatu ai na taua mo tagata le iloa e uiga i le ala ae latou te lei mauaina poloaiga?
Afai na e talosagaina ni tamaiti se toalua pe toatasi e saunia e faasoa mai a la’ua molimau i le fuafuaga o le togiola, valaaulia loa i la’ua e faia i le taimi nei. Pe a talafeagai ai, e mafai foi ona e faasoa atu lau molimau ma valaaulia isi tamaiti e faasoa mai foi a latou molimau.