Pag-angkon og Espirituhanong Kahibalo

batan-ong lalaki nga nagbasa og mga kasulatan

Ang Dios mao ang Tinubdan sa Tanang Kamatuoran

1. Nahibalo ang Dios sa tanang butang ug ang tinubdan sa tanang kamatuoran (tan-awa sa Mosiah 4:9). Tungod kay gihigugma kita sa atong Langitnong Amahan ug gusto nga kita molambo ngadto sa pagkahimong sama Kaniya, Iya kitang giawhag nga “[pangitaon] ang pagtulun-an, gani pinaagi sa pagtuon ug usab pinaagi sa hugot nga pagtuo” (DP 88:118). Sa atong pagpangita sa kamatuoran, makasalig kita Kaniya sa hingpit, makasalig sa Iyang kaalam, Iyang gugma, ug sa Iyang gahum sa pagtudlo ug pagpanalangin kanato. Misaad siya nga ipadayag ang kamatuoran diha sa atong mga hunahuna ug kasingkasing pinaagi sa Espiritu Santo kon magkugi kita sa pagpangita Kaniya (tan-awa sa DP 8:2–3).

2. Aron matabangan kita, gitudloan kita sa Langitnong Amahan unsaon sa pag-angkon og espirituhanong kahibalo. Giestablisar niya ang mga kondisyon nga angay natong sundon aron maangkon kana nga kahibalo. Ang balaanon nga sumbanan nga giorden sa Dios nagkinahanglan nga kita adunay matinuorong tinguha nga mahibalo sa kamatuoran (tan-awa sa Moroni 10:4–5) ug andam nga magpakabuhi sumala sa unsay Iyang gipadayag (tan-awa sa Juan 7:17). Ang sinsero natong tinguha modala kanato ngadto sa pagpangita sa kamatuoran pinaagi sa pag-ampo (tan-awa sa Santiago 1:5–6; 2 Nephi 32:8–9) ug sa seryusong pagtuon sa pulong sa Dios (tan-awa sa 2 Timoteo 3:15–17; 2 Nephi 32:3).

Pagpangutana ug Pagpangita og Tubag

3. Usahay makadiskubri kita og bag-ong impormasyon o may mga pangutana kita mahitungod sa doktrina, mga naandang gimbuhaton, o kasaysayan sa Simbahan nga ingon og lisud sabton. Ang pagpangutana ug pagpangita og mga tubag usa ka mahinungdanong bahin sa atong paningkamot nga makakat-on sa kamatuoran. Ang ubang mga pangutana nga moabut sa atong hunahuna tingali dinasig sa Espiritu Santo. Ang dinasig nga mga pangutana kinahanglang ikonsiderar nga mga gasa gikan sa Dios nga maghatag kanato og mga kahigayunan nga mapalambo ang atong panabut ug malig-on ang atong pagpaniguro nga ang Ginoo andam nga motudlo kanato. Bisan unsa ang tinubdan sa atong mga pangutana, gipanalanginan kita og abilidad sa paghunahuna ug pagpangatarungan ug ang impluwensya sa Ginoo mopalambo sa atong hunahuna ug mopalawom sa atong panabut. Ang atong kinaiya ug intensyon diin kita mangutana ug magtinguha og mga tubag makaapekto og dako sa atong abilidad sa pagkat-on pinaagi sa Espiritu Santo.

4. Ang mosunod nga mga baruganan makagiya kanato samtang magtinguha kita sa pagkat-on ug pagsabut sa mahangturong mga kamatuoran ug pagsulbad sa mga pangutana o mga isyu:

• Lihukon inubanan sa hugot nga pagtuo.

• Susihon ang mga konsepto ug mga pangutana inubanan sa mahangturong panglantaw.

• Tinguhaon ang dugang nga panabut pinaagi sa balaanong gitudlo o gipili nga mga tinubdan.

Baruganan 1. Lihukon Inubanan sa hugot nga Pagtuo

5. Molihok kita inubanan sa hugot nga pagtuo kon atong pilion ang pagsalig sa Dios ug Siya ang unahon pinaagi sa sinserong pag-ampo, ang pagtuon sa Iyang mga pagtulun-an, ug pagsunod sa Iyang mga sugo.

6. Samtang magtinguha kita sa pagpalambo sa atong panabut ug sa pagsulbad sa mga problema, importante nga mosalig kita sa pagpamatuod nga ato nang naangkon mahitungod ni Jesukristo, ang Pagpahiuli sa Iyang ebanghelyo, ug sa mga pagtulun-an sa Iyang gi-orden nga mga propeta. Gitudlo ni Elder Jeffrey R. Holland sa Korum sa Napulog Duha ka mga Apostoles nga: “Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (Nagatuo Ako,” Liahona,Mayo 2013, 94). Ang Ginoo mismo midapit kanato sa “paghunahuna ngadto [Kaniya] sa matag hunahuna; ayaw pagduha-duha, ayaw kahadlok” (DP 6:36).

7. Atol sa mga panahon nga dili dayon matubag ang atong mga pangutana, makatabang ang paghinumdom nga bisan og ang Langitnong Amahan mipadayag sa tanan nga gikinahanglan sa atong kaluwasan, wala pa Niya ikapadayag ang tanang kamatuoran. Samtang padayon kita nga mangita og mga tubag, kinahanglan nga magpakabuhi kita sa hugot nga pagtuo—mosalig nga sa katapusan kita makadawat sa mga tubag nga atong gitinguha (tan-awa sa Mga Proverbio 3:5–6; Ether 12:6). Samtang magmatinud-anon kita sa mga kamatuoran ug kahayag nga nadawat na nato, makadawat pa kita og daghan. Ang mga tubag sa atong mga pangutana ug pag-ampo kasagaran moabut nga “ pagtulun-an human sa usa ka pagtulun-an, lagda human sa usa ka lagda” (2 Nephi 28:30).

Baruganan 2. Susihon ang mga Konsepto ug mga Pangutana inubanan sa Mahangturong Panglantaw

8. Sa pagsusi sa doktrinal nga mga konsepto, mga pangutana, ug sosyal nga mga isyu inubanan sa mahangturong panglantaw, atong ikonsiderar ang kinatibuk-ang kahulugan niini sa plano sa kaluwasan ug sa mga pagtulun-an sa Manluluwas. Tinguhaon nato ang tabang sa Espiritu Santo aron makita ang mga butang sama sa pagkakita niini sa Ginoo (tan-awa sa 1 Mga Taga-Corinto 2:5, 9–11). Magtugot kini nga atong maporma og usab ang pangutana (aron makita sa laing paagi ang pangutana) ug matan-aw ang mga ideya basi sa sumbanan sa kamatuoran nga gihimo sa Ginoo kay sa pagdawat sa ideya o mga pagbana-bana nga gihimo sa kalibutan. Mahimo nato kini pinaagi sa pagpangutana og sama sa “Unsa man gayud ang akong nahibaloan mahitungod sa Langitnong Amahan, sa Iyang plano, ug sa unsang paagi Niya gidumala ang Iyang mga anak?” ug “Unsa nga pagtulun-an sa ebanghelyo ang may kalabutan o naghatag og katin-awan niining konsepto o isyu?”

9. Bisan gani ang mga pangutana nga may kalabutan sa makasaysayanon nga mga panghitabo nagkinahanglan nga susihon inubanan sa mahangturong panglantaw. Samtang padayon natong gipalig-on ang atong pagsalig sa Langitnong Amahan ug sa Iyang plano sa kaluwasan, mas klaro natong makita ang mga problema. Makatabang usab ang pagsusi sa historikal nga mga pangutana sa tukmang makasaysayanon nga kahulugan pinaagi sa pagkonsiderar sa kultura ug mga kinaiya sa maong panahon kay sa pagtan-aw sa kasamtangang mga panglantaw ug mga kinaiya.

10. Importante ang paghinumdom nga ang historikal nga mga detalye wala magdala sa makaluwas nga gahum sa mga ordinansa, mga pakigsaad, ug doktrina. Kon mabalda ka sa wala kaayoy kahulugan nga mga detalye nga maoy hinungdan nga dili na nimo makita ang nagkadayag nga mga milagro sa Pagpahiuli sama ra kini sa paggahin og panahon sa pag-analisar sa sudlanan sa regalo ug gibaliwala ang kanindot sa regalo mismo.

Baruganan 3: Tinguhaa ang Dugang nga Panabut pinaagi sa Balaanong Gitudlo nga mga Tinubdan

11. Isip kabahin sa gipili sa Ginoo nga proseso sa pag-angkon og espirituhanong kahibalo, miestablisar Siya og mga tinubdan nga pinaagi niini Siya mopadayag sa kamatuoran ug giya ngadto sa Iyang mga anak. Kini nga mga tinubdan naglakip sa kahayag ni Kristo, sa Espiritu Santo, sa mga kasulatan, mga ginikanan, ug mga lider sa Simbahan. Ang Unang Kapangulohan ug ang Korum sa Napulog Duha ka mga Apostoles—mga propeta sa Ginoo dinhi sa kalibutan karon—mao ang importante kaayong tinubdan sa kamatuoran. Gipili ug giorden sa Ginoo kining mga tawhana nga mamulong alang Kaniya.

12. Makat-unan usab nato ang kamatuoran pinaagi sa ubang kasaligan nga mga tinubdan. Hinoon, ang sinserong mga tigpangita sa kamatuoran kinahanglang magmabinantayon sa dili kasaligang mga tinubdan sa impormasyon. Nagpuyo kita sa panahon diin daghan ang “nagangalan sa dautan nga maayo, ug sa maayo nga dautan” (Isaias 5:20). Si Satanas mao ang amahan sa tanang bakak ug nagtinguha sa pagtuis sa kamatuoran ug pag-agni aron kita mopalayo sa Ginoo ug sa Iyang pinili nga mga sulugoon. Kon kita mosalig sa balaanong pinili sa Ginoo nga mga tinubdan alang sa mga tubag ug direksyon, mapanalanginan kita nga makaila tali sa tinuod ug sayop. Ang pagkat-on sa pag-ila ug paglikay sa dili kasaligang mga tinubdan makapanalipud nato gikan sa sayop nga impormasyon ug niadtong mga nagtinguha sa pagdaot sa atong tinuohan.

Pagtabang sa Uban nga Makaangkon og Espirituhanong Kahibalo

13. Kon ang uban moduol kanato nga mangutana o magpakisusi bahin sa doktrina sa Simbahan, mga gibuhat, o kasaysayan, unsa kaha ang pinakamaayong paagi sa pagtabang sa ilang pagpangita sa kamatuoran? Ang mosunod mao ang pipila ka mga paagi nga sila atong matabangan:

14. Maminaw pag-ayo ug pagmainampoon: Paminawa gayud sa dili ka pa motubag, magtinguha nga maklaro ug masabtan ang aktwal nga mga pangutana nga ilang gipangutana. Tinguhaa ang pagsabut sa tinuod nga tuyo sa ilang mga pangutana ug ilang mga pagbati ug gituohan.

15. Itudlo ug ipamatuod ang mga kamatuoran sa ebanghelyo: Ipakigbahin ang magamit nga mga pagtulun-an gikan sa mga kasulatan ug sa modernong mga propeta ug kon sa unsang paagi kini nakahimo og kalainan sa imong kinabuhi. Tabangi kadtong imong gipakigsultihan nga masuta o usabon ang ilang mga pangutana diha sa kinatibuk-ang kahulugan sa ebanghelyo ug sa plano sa kaluwasan.

16. Dapita sila sa paglihok inubanan sa hugot nga pagtuo: Hinumdumi nga ang Ginoo nagkinahanglan nga kita magtinguha og espirituhanong kahibalo alang sa atong kaugalingon. Busa kinahanglan gayud nga dapiton nato ang uban sa paglihok inubanan sa hugot nga pagtuo pinaagi sa pag-ampo, pagsunod sa mga sugo, ug makugihon nga pagtuon sa pulong sa Dios, gigamit ang balaanong gitudlo nga mga tinubdan, ilabi na ang Basahon ni Mormon. Kon mahimo, dapita sila sa paghinumdom sa ilang mga kasinatian dihang mibati sila sa Espiritu Santo ug sa ilang hugot nga pagpanggunit sa mahangturong mga kamatuoran nga ilang nakat-unan hangtud miabut ang dugang nga kahibalo.

17. Ipadayon ang pagtabang: Itanyag ang pagpangita og mga tubag, ug dayon ipadayon ang pagtabang pinaagi sa pagpakigbahin unsay imong nakat-unan. Mahimo usab nga dungan kamong mangita og mga tubag. Ipahayag ang pagsalig sa saad sa Ginoo nga mohatag og personal nga pagpadayag.

May kalabutan nga mga pakisayran: Jeremias 1:4–5; Amos 3:7; Mateo 5:14–16; Mateo 16:15–19; Juan 15:16; Juan 17:3; Mga taga-Efeso 2:19–20; Mga taga-Efeso 4:11–14; 2 Nephi 2:27; Mosiah 18:8–10; 3 Nephi 18:15, 20–21; DP 1:37–38; DP 18:15–16; DP 21:4–6; DP 88:118

May kalabutan nga doktrinal nga mga hisgutanan: Ang Dios nga Kapangulohan: Ang Espiritu Santo; Ang Pag-ula ni Jesukristo: Hugot nga Pagtuo kang Jesukristo; Mga Propeta ug Pagpadayag; Mga Sugo