Martes, Marso 26

Pagtudlo diha sa Jerusalem

“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan” (Mateo 22:37).

Sa Jerusalem, si Jesus gilibotan sa mga tigpaluyo ug ingon man usab sa mga kritiko. Isip ang Agalon nga Magtutudlo, wala gayod Siya motugot nga mausik ang oportunidad sa pagpakigbahin sa Iyang kaalam. Atol sa kataposang semana sa Iyang kinabuhi, Siya mipakigbahin og pipila sa Iyang labing malahutayong mga pagtulon-an. Apan ang Iyang mga pulong wala lamang gituyo alang sa mga tawo nga anaa nianang higayona. Ang Iyang mga pagtulon-an sa Iyang tibuok nga pagpangalagad makapanalangin usab sa atong kinabuhi.

Niadtong Oktubre 2023 nga kinatibuk-ang komperensiya, si Presidente Dallin H. Oaks mitudlo:

Ang ebanghelyo ni Jesukristo naghagit kanato nga mahimong usa ka mahiyasong tawo. … Gumikan niana nga mga pagtulon-an atong maingon nga ang Kataposang Paghukom dili lamang usa ka pagtimbang-timbang sa suma total sa maayo ug daotan nga mga buhat—unsay atong nahimo. Kini gibase sa kataposang sangpotanan sa atong mga buhat ug mga hunahuna—unsa ang atong gidangatan. Mahimo kitang mosarang alang sa kinabuhing dayon pinaagi sa usa ka proseso sa pagkakabig. Ingon nga gigamit dinhi, kini nga pulong nga adunay daghang kahulogan nagtimaan og usa ka hingpit nga kausaban sa kinaiyahan. Dili paigo ni bisan kinsa nga mokuyog lang sa panon kon unsay nahitabo. Ang mga sugo, mga ordinansa, ug mga pakigsaad sa ebanghelyo dili usa ka lista sa mga deposito nga gikinahanglang ideposito ngadto sa langitnong account. Ang ebanghelyo ni Jesukristo usa ka plano nga nagpakita kanato kon unsaon nga mahimong unsay gitinguha sa atong Langitnong Amahan nga kita mamahimo. (“Mga Gingharian sa Himaya,” Liahona, Nob. 2023, 28)

Basaha ug Pamalandongi

• Mateo 22:36–40

• Mateo 25:34–45

Unsaon nimo paggamit ang mga pagtulon-an ni Jesus sa imong kaugalingong kinabuhi?

Magkanta

“Tudloi Ko Paglakaw sa Kahayag,” Mga Himno, nu. 192