Huwebes, Marso 28

Usa ka Panon ug Usa ka Magbalantay

“Ako adunay lain nga karnero nga wala niini nga pundok; kanila usab Ako kinahanglan modala, ug sila maminaw sa akong tingog; ug adunay usa ka pundok, ug usa nga magbalantay (3 Nephi 15:21).

Si Jesukristo misulti sa mga Nephita nga sila mao ang mga “karnero” nga iyang gipasabot sa dihang Siya nagtudlo sa Jerusalem, “Ako adunay lain nga karnero nga wala niini nga pundok; kanila usab Ako kinahanglan modala” (3 Nephi 15:21). Si Jesus mahigugmaong mipahayag nga adunay “usa ka pundok, ug usa ka magbalantay” ug mitagna mahitungod sa pagpundok sa Israel sa ulahing mga adlaw.

Usa ka paagi nga kita makatabang sa pagpundok sa Israel mao ang pagpaambit sa mensahe sa Basahon ni Mormon, kay kita gidapit nga mobuhat ni Elder Ronald A. Rasband:

Akong minahal nga mga higala, isip usa ka Apostol sa Ginoo, gidapit ko kamo sa pagsunod sa atong minahal nga propeta, si Presidente Nelson, sa pagpakatap sa yuta sa Basahon ni Mormon. Ang panginahanglan dako kaayo; kita kinahanglang molihok karon dayon. Ako mosaad nga kamo maapil sa “labing dako nga buhat sa yuta,” ang pagpundok sa Israel, samtang kamo madasigon sa pagtabang niadtong kinsa “natago gikan sa kamatuoran tungod kay sila wala masayod asa kini pangitaa.” Sila nagkinahanglan sa inyong pagpamatuod ug pagsaksi kon sa unsang paagi nga kini nga basahon nakapausab sa inyong kinabuhi ug nakapaduol ninyo sa Dios, sa Iyang kalinaw, ug sa Iyang “mga balita sa dako nga hingpit nga kalipay.”

Ako mopamatuod nga pinaagi sa balaanong plano ang Basahon ni Mormon giandam sa karaang Amerika nga moabot aron sa pagpahayag sa pulong sa Dios, sa pagdala sa mga kalag ngadto ni Jesukristo ug sa Iyang gipahiuli nga ebanghelyo “karong adlawa.” (“Karong Adlawa,” Liahona, Nob. 2022, 27)

Basaha ug Pamalandongi

• 3 Nephi 15:11–24

• 3 Nephi 16

Kinsa ang pwede nimo nga pakigbahinan sa ebanghelyo ni Jesukristo karon nga panahon sa Pasko sa Pagkabanhaw? Kini mahimong pinaagi sa yano nga buhat sa kamabination, pagpakigbahin og makabayaw nga mensahe, o pagdapit sa usa ka tawo nga mosimba kauban nimo karong Dominggo sa Pagkabanhaw.

Tan-awon

“Si Jesukristo Mipamatuod bahin sa Usa ka Panon ug Usa ka Magbalantay”

Magkanta

“Gimahal sa Magbalantay,” Mga Himno, nu. 134