“Ang Pagkabanhaw ni Jesukristo,” Plano sa Pagtuon atol sa Pasko sa Pagkabanhaw (2024)
Dominggo sa Pagkabanhaw, Marso 31
Ang Pagkabanhaw ni Jesukristo
‘Tungod kay Ako buhi, kamo usab mabuhi’ (Juan 14:19).
Sayo sa buntag, si Maria Magdalena, usa ka higala ug sumusunod ni Jesukristo miadto sa lubnganan aron sa pag-asikaso sa Iyang lawas. Sa iyang katingala, iyang nakita nga wala nay sulod ang lubnganan. Human niana samtang siya nagbakho sa gawas sa lubnganan, usa ka lalaki ang mitawag niya—ang hardinero, sa iyang hunahuna. Apan mitawag Siya sa iyang ngalan, “Maria.” Ug iyang nakita. Si Jesukristo kini nga nabuhi pag-usab. Ang kahibalo katingalahan kaayo aron itago, ug siya midagan aron sultihan ang uban.
Kini usa ka pagpamatuod nga katingalahan gihapon karon. Ikaw makahibalo, sama ni Maria Magdalena, nga si Jesukristo buhi. Tungod Kaniya, ang tanang tawo mabuhi pag-usab. Kon kita mosunod ni Kristo, kita makakaplag og tinuod nga kalipay sa kalibotan ug mahinamong magpaabot sa walay kataposang kamaya sa umaabot nga kinabuhi.
Mahitungod sa Pagkabanhaw ni Kristo, si Presidente Dallin H. Oaks nagtudlo:
Ang Pagkabanhaw naghatag kanato sa panglantaw ug sa kalig-on nga molahutay sa mortal nga mga hagit nga giatubang sa matag usa kanato ug niadtong atong gihigugma. Kini naghatag kanato og usa ka bag-ong paagi sa pagtan-aw sa pisikal, mental, o emosyonal nga mga kakulangan nga anaa kanato sa atong pagkahimugso o naangkon sa panahon sa mortal nga kinabuhi. Kini naghatag kanato og kalig-on sa paglahutay sa mga kasub-anan, mga kapakyasan, ug mga kasagmuyo. Tungod kay ang matag usa kanato adunay kaseguroan sa pagkabanhaw, kita nasayod nga kining mortal nga mga kakulangan ug mga oposisyon temporaryo lang. (“Unsa ang Nabuhat sa Atong Manluluwas alang Kanato?,” Liahona, Mayo 2021, 75)
Basaha ug Pamalandongi
Unsa nga mga pagbati ang imong nasinati kon imong hunahunaon ang mahitungod sa Pagkabanhaw ni Jesukristo?
Magkanta
“Kristo Nabanhaw Karon,” Mga Himno, nu.119