Mahitungod sa Plano sa Pagtuon atol sa Pasko sa Pagkabanhaw

“Nasayod Ako nga nangita kamo kang Jesus, nga gilansang sa krus. Wala na siya dinhi: nabanhaw siya” (Mateo 28:5–6).

Kini nga plano sa pagtuon naghatag og inadlaw nga inspirasyon aron sa pagtabang kaninyo sa paglig-on sa inyong pagtuo diha ni Jesukristo niini nga panahon sa Pasko sa Pagkabanhaw. Ang plano naglakip sa mga asoy gikan sa mortal nga pangalagad sa Manluluwas didto sa yuta sa Israel ingon man usab sa Iyang pangalagad didto sa karaang Amerika human sa Iyang Pagkabanhaw. Mahimo kamong modesisyon kon usa o duha niining mga paagi makapalambo sa inyong pagsimba niining panahon sa Pasko sa Pagkabanhaw.

Miingon si Presidente Russell M. Nelson, “Kon mas masayod kita sa pangalagad ug misyon sa Manluluwas—kon mas masabtan nato ang Iyang doktrina ug unsay Iyang gibuhat alang kanato—mas masayod kita nga Siya makahatag sa gahom nga atong gikinahanglan sa atong kinabuhi.”¹

Bisan og ang eksakto nga mga adlaw sa semana diin ang piho nga mga panghitabo sa kasulatan nahitabo nga usahay wala mahibaloi, kini nga inadlaw nga plano nga eskedyul sa debosyonal makatabang sa pagtutok sa inyong mga hunahuna sa mga panghitabo nga nagpalibot sa Pag-ula ug Pagkabanhaw ni Jesukristo. Samtang kamo magtuon, inyong madiskobrehan kon sa unsang paagi nga ang Pag-ula ug ang mga pagtulon-an ni Jesukristo magamit diha sa inyong kinabuhi.

Ang pagbisita sa nabanhaw nga Manluluwas ngadto sa katawhan sa karaang Amerika, nga giasoy diha sa 3 Nephi, kabahin sa mahimayaon nga mensahe sa Pasko sa Pagkabanhaw. Si Elder Gary E. Stevenson midapit kanato sa pagtuon niini nga asoy isip kabahin sa atong kasinatian sa Pasko sa Pagkabanhaw. Siya mitudlo: “Kami naglaom sa paghimo niini nga mga kapitulo diha sa 3 Nephi nga kabahin gayod sa among tradisyon sa Pasko sa Pagkabanhaw ingon nga ang Lucas 2 kabahin sa among tradisyon sa Pasko. Ang Basahon ni Mormon nagpakigbahin sa labing nindot nga istorya sa Pasko sa Pagkabanhaw nga sukad nasugilon. Ayaw kini itugot nga mahimong ang labing nindot nga istorya sa Pasko sa Pagkabanhaw nga sukad wala nasugilon. Dapiton ko kamo sa paghunahuna sa Basahon ni Mormon sa bag-o nga paagi ug sa pagkonsiderar sa talagsaon nga saksi nga gihatag niini sa katinuod sa nabanhaw nga Kristo.”²

Ang mga tudling sa Bag-ong Tugon ug sa Basahon ni Mormon niini nga plano sa pagtuon mahimong makatabang kaninyo ug sa inyong pamilya sa paglig-on sa inyong mga pagpamatuod ni Jesukristo isip atong Manluluwas ug Manunubos. Hunahunaa ang paghisgot og mga panabot gikan niini nga plano sa pagtuon uban sa pamilya ug mga higala nga interesado. Alang sa dugang nga mga kapanguhaan mahitungod sa Pag-ula ug Pagkabanhaw sa Manluluwas, tan-awa ang leksiyon karong tuiga sa Pasko sa Pagkabanhaw Dali, Sunod Kanako o bisitaha ang Easter.ComeUntoChrist.org.

Mubo nga mga sulat

1. Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 39.

2. Gary E. Stevenson, “Ang Labing Nindot nga Istorya sa Pasko sa Pagkabanhaw nga Sukad Nasugilon,” Liahona, Mayo 2023, 8.