Biyernes, Marso 29

Paghusay, Paglansang diha sa Krus, ug Paglubong

“Kay kon inyong pasayloon ang nakasala kaninyo pasayloon usab kamo sa inyong Amahan nga atua sa langit” (Mateo 6:14).

Human sa sunod-sunod nga dili patas nga paghusay, si Jesukristo gihukman og kamatayon pinaagi sa paglansang sa krus. Ang Romano nga mga sundalo mibugalbugal ug mibunal Kaniya ug milansang Kaniya diha sa krus. Apan imbis motunglo kanila, mihangyo si Jesukristo sa Iyang Amahan sa “pagpasaylo kanila; kay wala sila makasabot sa ilang ginabuhat” (Lucas 23:34). Bisan sa Iyang pinakangitngit nga higayon, si Jesus militok og paghigugma ug pagtubos. Sa Iyang himatyon nga ginhawa, si Jesus namulong sa Iyang Amahan. “Tapos na,” Siya miingon (Juan 19:30). Usa ka dili sagad nga pagpamatuod gikan sa usa ka Romano nga senturyon ug niadtong anaa uban kaniya: “Siya gayod ang Anak sa Dios” (Mateo 27:54). Ang pagkaamgo ingon gayod ka makapahingangha karon sa samang paagi nga kini mao kaniadto.

Pagka-2022, si Presidente Russell M. Nelson misugyot nga atong taposon ang panagsungi sa atong personal nga kinabuhi ug mopasaylo ug magtinguha og kapasayloan aron pagtabang kanato sa pagpabilin nga positibo sa espirituhanong paglambo:

Akong sublion ang akong panawagan sa pagtapos sa mga kasungian sa inyong kinabuhi. Magbansay sa pagpaubos, kaisog, ug kalig-on nga gikinahanglan sa pagpasaylo ug sa pagtinguha og kapasayloan. …

… Dapiton ko kamo sa pagtinguha nga taposon ang usa ka personal nga kasungian nga nagpabug-at kaninyo. Aduna pa bay mas haom nga buhat sa pasalamat ngadto kang Jesukristo alang sa Iyang Pag-ula? Kon ang kapasayloan sa karon ingon og imposible, pangayo og gahom pinaagi sa makatubos nga dugo ni Jesukristo sa pagtabang kaninyo. Kon kini inyong buhaton, mosaad ko og personal nga kalinaw ug usa ka kusog nga espirituhanong paglambo. (“Ang Gahom sa Kadasig sa Espirituhanong Paglambo,” Liahona, Mayo 2022, 100)

Basaha ug Pamalandongi

• Mateo 26:59–75

• Mateo 27:1–61

Sa unsang paagi nga ikaw mas mapasayloon sa imong kaugalingon ug sa ubang mga tawo sa imong kinabuhi?

“Pagpasaylo sa Uban: Usa ka Mensahe sa Pasko sa Pagkabanhaw gikan ni Presidente Russell M. Nelson”

Magkanta

“Ako Nagpabilin nga Natingala,” Mga Himno, nu. 114