« សៀវភៅសិក្សាការរៀបចំសម្រាប់សិស្ស មេរៀនទី ៩ ៖ ព្រះយេស៊ូវគ្រីស្ទ ៖ ព្រះប្រោសលោះដ៏ទេវភាពរបស់យើង » សៀវភៅសិក្សាការរៀបចំសម្រាប់សិស្ស មេរៀនទីរឹះនៃការស្តារឡើងវិញ ( ឆ្នាំ ២០១៩ )
« សៀវភៅសិក្សាការរៀបចំសម្រាប់សិស្ស មេរៀនទី ៩ » សៀវភៅសិក្សាការរៀបចំសម្រាប់សិស្ស មេរៀនទីរឹះនៃការស្តារឡើងវិញ
សៀវភៅសិក្សាការរៀបចំសម្រាប់សិស្ស មេរៀនទី ៩
ព្រះយេស៊ូវគ្រីស្ទ ៖ ព្រះប្រោសលោះដ៏ទេវភាពរបស់យើង
មនុស្សមួយចំនួនមើលទៅព្រះយេស៊ូវគ្រីស្ទថាជាគំរូល្អដ៏សាមញ្ញមួយដើម្បីធ្វើតាម អ្នកខ្លះមើលថាជាព្យាការីជំនាន់ដើមមួយអង្គ ហើយខ្លះទៀតថាជាព្រះអង្គសង្គ្រោះនៃពិភពលោកនេះ ។ តើអ្វីជាជំនឿ និងលក្ខណៈទូទៅបំផុតអំពីព្រះអម្ចាស់នៅកន្លែង ដែលបងប្អូនរស់នៅ ? តើអ្វីជាជំនឿ និងការប្រែចិត្តជឿរបស់បងប្អូនអំពីទ្រង់ ? កាលបងប្អូនសិក្សាការនិមិត្ត វិវរណៈ និងបទគម្ពីរដែលព្យាការី យ៉ូសែប ស៊្មីធបានទទួលអំពីព្រះយេស៊ូវគ្រីស្ទ សូមពិចារណាពីរបៀបដែលវាអាចពង្រឹងសេចក្ដីជំនឿ និងទីបន្ទាល់របស់បងប្អូនអំពីទ្រង់ ដែលជាព្រះប្រោសលោះដ៏ទេវភាពរបស់បងប្អូនឲ្យកាន់តែស៉ីជម្រៅ ។
ផ្នែកទី ១
តើ យ៉ូសែប ស៊្មីធ និងការស្ដារឡើងវិញមានសារសំខាន់យ៉ាងដូចម្ដេច ចំពោះការយល់ដឹងរបស់ខ្ញុំអំពីព្រះអម្ចាស់យេស៊ូវគ្រីស្ទ ?
ទំនាក់ទំនងផ្ទាល់ខ្លួនរបស់ យ៉ូសែប ស៊្មីធជាមួយព្រះអម្ចាស់បានចាប់ផ្ដើមកាលយ៉ូសែបនៅជាយុវវ័យ ។ លោកបានសរសេរអំពីការណ៍នោះនៅអាយុប្រហែល ១២ ឆ្នាំ « គំនិតខ្ញុំមានទុក្ខខ្លាំងទៅៗ ដោយសារខ្ញុំជាប់ទោសនឹងអំពើបាបរបស់ខ្ញុំ ។… ខ្ញុំមានអារម្មណ៍យំសោកចំពោះអំពើបាបរបស់ខ្ញុំផ្ទាល់ និងចំពោះអំពើបាបនៃពិភពលោកនេះ » ។…
ក្រោយមក យ៉ូសែបវ័យក្មេង « បានអំពាវនាវសូមព្រះអម្ចាស់នូវសេចក្ដីមេត្តា » ហើយព្រះអម្ចាស់បានមានបន្ទូលទៅលោកក្នុងការនិមិត្តថា ៖ « យ៉ូសែប បុត្រយើងអើយ អំពើបាបបុត្របានអភ័យទោសឲ្យបុត្រហើយ ។ ចូរដើរទៅតាមផ្លូវបុត្រ ដើរតាមច្បាប់របស់យើង និងកាន់តាមបទបញ្ញត្តិរបស់យើងចុះ ។ មើលចុះ យើងគឺជាព្រះអម្ចាស់នៃសីរីរុងរឿង ។ យើងត្រូវគេឆ្កាងដើម្បីលោកិយ ដើម្បីមនុស្សទាំងអស់ដែលជឿលើព្រះនាមយើងអាចមានជីវិតដ៏អស់កល្បជានិច្ច » ។
តាមរយៈបទពិសោធន៍នៃការនិមិត្តដំបូងនេះ យ៉ូសែបបានដឹងដោយខ្លួនឯងថា ព្រះយេស៊ូវគ្រីស្ទ និងព្រះវរបិតាសួគ៌មានក្ដីមេត្តា និងអភ័យ ។ ក្រោយពីសន្ទនាជាមួយនឹងព្រះអម្ចាស់ ហើយទទួលបានការអភ័យទោសដល់អំពើបាបរបស់លោក យ៉ូសែបបានថ្លែងទីបន្ទាល់ថា ៖ « ព្រលឹងខ្ញុំបានពោរពេញដោយសេចក្ដីស្រឡាញ់ ហើយអស់រយៈពេលជាច្រើនថ្ងៃ ខ្ញុំអាចអររីករាយនឹងក្ដីអំណរដ៏អស្ចារ្យ ។ ព្រះអម្ចាស់គង់នៅជាមួយខ្ញុំ » ( « Joseph Smith’s Accounts of the First Vision » Circa Summer 1832 History នៅលើគេហទំព័រ josephsmithpapers.org ) ។
សូមគិតអំពីគ្រានៅក្នុងជីវិតរបស់បងប្អូន ពេលបងប្អូនមានអារម្មណ៍ខ្វល់ខ្វាយស្រដៀងនឹងយ៉ូសែបដែរ ។ បងប្អូនអាចយល់ពីបំណងរបស់លោកដើម្បីទទួលបានការអភ័យ និងក្ដីអំណររបស់លោកក្នុងការដឹងថា ព្រះអម្ចាស់គង់នៅជាមួយលោកផងដែរ ។
ការនិមិត្តដ៏ច្រើនរបស់ យ៉ូសែប ស៊្មីធអំពីព្រះអង្គសង្គ្រោះបានអនុញ្ញាតឲ្យលោកបម្រើជាសាក្សីថ្ងៃចុងក្រោយដ៏មានអនុភាពរបស់ព្រះយេស៊ូវគ្រីស្ទ ។ នៅថ្ងៃទី ១៦ ខែ កុម្ភៈ ឆ្នាំ ១៨៣២ ខណៈធ្វើការលើកំណែព្រះគម្ពីរប៊ីបថ្មីដ៏បំផុសគំនិត ( ដែលស្គាល់ថាជា ការបកប្រែដោយ យ៉ូសែប ស៊្មីធ ) យ៉ូសែប ស៊្មីធ និង ស៉ីឌនី រីកដុន បានឃើញការនិមិត្តមួយដែលពួកលោក « បានមើលឃើញសិរីល្អនៃព្រះរាជបុត្រា គង់នៅខាងស្ដាំព្រះហស្តនៃព្រះវរបិតា » ។ ដោយថ្លែងអំពីព្រះយេស៊ូវគ្រីស្ទ ពួកលោកបានថ្លែងទីបន្ទាល់ថា ៖ « ទ្រង់មានព្រះជន្មរស់នៅ ! »( គោលលទ្ធិ និង សេចក្ដីសញ្ញា ៧៦:២០, ២២–២៣ ) ។
សូមកត់ចំណាំអ្វីដែលសេចក្ដីពិតផ្សេងទៀតអំពីព្រះយេស៊ូវគ្រីស្ទ ដែលព្យាការីបានឃើញនៅក្នុងការនិមិត្តនេះ ។
សិក្សាការរៀបចំសម្រាប់ថ្នាក់រៀន
សូមអាន គោលលទ្ធិ និង សេចក្តីសញ្ញា ៧៦:២៣–២៤ ។
បួនឆ្នាំក្រោយមក ព្យាការីបានថ្លែងទីបន្ទាល់ម្ដងទៀតអំពីការមើលឃើញព្រះអង្គសង្គ្រោះនៅក្នុងព្រះវិហារបរិសុទ្ធខឺតឡង់ ហើយបានប្រកាសថា « ព្រះភក្ត្ររបស់ទ្រង់ភ្លឺជាងពន្លឺថ្ងៃ ហើយសំឡេងរបស់ទ្រង់ដូចជាសូរនៃទឹកច្រើន » ( គោលលទ្ធិ និង សេចក្ដីសញ្ញា ១១០:៣ ) ។
ព្រះអម្ចាស់បានបង្រៀនពួកបរិសុទ្ធថា នៅពេលពួកគេសិក្សាវិវរណៈដែលបានប្រទានតាមរយៈព្រះវិញ្ញាណនោះ « អ្នករាល់គ្នាអាចធ្វើទីបន្ទាល់ថា អ្នកបានឮសំឡេងរបស់យើង ហើយស្គាល់ព្រះបន្ទូលទាំងឡាយរបស់យើង » ( គោលលទ្ធិ និង សេចក្តីសញ្ញា ១៨:៣៦ ) ។
ដោយពិចារណាពីការរួមចំណែករបស់ យ៉ូសែប ស៊្មីធដល់ការយល់ដឹងរបស់យើងអំពីព្រះយេស៊ូវគ្រីស្ទ អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានប្រកាសថា ៖
តាមរយៈទំនាក់ទំនងផ្ទាល់ខ្លួនរបស់លោកជាមួយព្រះអម្ចាស់ ការបកប្រែ និងការបោះពុម្ពព្រះគម្ពីរមរមនរបស់លោក និងការបិទទីបន្ទាល់របស់លោកដោយលោហិតទុក្ករជនរបស់លោក យ៉ូសែប បានក្លាយជាអ្នកទទួលវិវរណៈដ៏មហិមាបំផុតនៃព្រះយេស៊ូវគ្រីស្ទអំពីលក្ខណៈពិតរបស់ទ្រង់ ក្នុងនាមជាព្រះប្រោសលោះដ៏ទេវភាព ។ ( ឌី ថត គ្រីស្តូហ្វឺសិន « Born Again » Ensign ឬ Liahona ខែ ឧសភា ឆ្នាំ ២០០៨ ទំព័រ ៧៩ )
សញ្ជឹងគិតនៅក្នុងការរៀបចំសម្រាប់ថ្នាក់រៀន
ដោយសារតែការនិមិត្ត វិវរណៈ និងបទគម្ពីរដែលបានប្រទានដល់ យ៉ូសែប ស៊្មីធ នោះយើងមានការយល់ដឹងកាន់តែច្បាស់មួយអំពីលក្ខណៈរបស់ព្រះអង្គសង្គ្រោះ ។
-
តើចំណេះដឹងអ្វីខ្លះអំពីព្រះអង្គសង្គ្រោះដែលនឹងបាត់បង់ បើគ្មានព្យាការី យ៉ូសែប ស្ម៉ីធទេនោះ ? តើវានឹងមានឥទ្ធិពលអ្វីខ្លះលើជីវិតរបស់បងប្អូន ប្រសិនបើចំណេះដឹងនោះបានបាត់បង់ ? ( សូមគិតដល់សំណួរទាំងនេះ កាលបងប្អូនបន្ដការសិក្សា ) ។
ផ្នែកទី ២
តើសេចក្ដីពិតដែលបានស្ដារឡើងវិញអ្វីខ្លះអំពីដង្វាយធួនរបស់ព្រះអង្គសង្គ្រោះ ដែលអាចបង្កើនសេចក្ដីជំនឿរបស់ខ្ញុំលើទ្រង់ ?
កំណត់ចំណាំ ៖ កាលបងប្អូនអានវគ្គបទគម្ពីរខាងក្រោម និងការបង្រៀនពីព្យាការី សូមពិចារណាគូសចំណាំសេចក្ដីពិត ដែលទាក់ទងនឹងដង្វាយធួនរបស់ព្រះអង្គសង្គ្រោះ ដែលបងប្អូនចាប់អារម្មណ៍ ។
សេចក្ដីពិតដ៏ច្បាស់លាស់ និងដ៏មានតម្លៃជាច្រើនអំពីដំណឹងល្អ និងដង្វាយធួនរបស់ព្រះអង្គសង្គ្រោះត្រូវបានស្ដារឡើងវិញ តាមរយៈការបកប្រែដោយ យ៉ូសែប ស៊្មីធនៃព្រះគម្ពីរមរមន ( សូមមើល នីហ្វៃទី ១ ១៣:៣៤, ៤០ ) ។
សិក្សាការរៀបចំសម្រាប់ថ្នាក់រៀន
សូមអាន អាលម៉ា ៣៤:១០, ១២ ហើយរកមើលអ្វីដែលព្យាការីអាម៉ូលេកក្នុងព្រះគម្ពីរមរមនបានបង្រៀនសាសន៍សូរ៉ាំមួយក្រុម អំពីពលិកម្មដ៏ធួនរបស់ព្រះអង្គសង្គ្រោះ ។
ប្រធាន រ័សុល អិម ណិលសុន បានពន្យល់ពីអ្វីដែលធ្វើឲ្យដង្វាយធួនរបស់ព្រះយេស៊ូវគ្រីស្ទនិរន្ដរ៍ ៖
ដង្វាយធួនរបស់ទ្រង់គឺនិរន្ដរ៍—ដោយគ្មានទីបញ្ចប់ [ សូមមើល នីហ្វៃទី២ ៩:៧; ២៥:១៦; អាលម៉ា ៣៤:១០, ១២, ១៤ ] ។ វាក៏ជានិរន្ដរដែលមនុស្សជាតិទាំងអស់នឹងត្រូវបានសង្គ្រោះពីសេចក្ដីស្លាប់ដែលមិនចេះចប់ ។ វាជានិរន្ដរក្នុងន័យការរងទុក្ខដ៏ខ្លាំងមហិមារបស់ទ្រង់ ។ វាមានទំហំនិរន្ដរក្នុងពេលវេលា ដោយការបញ្ចប់គំរូដើមពីមុននៃយញ្ញបូជាសត្វ ។ វាមានទំហំអនន្ដ —វាត្រូវធ្វើតែម្ដងសម្រាប់មនុស្សទាំងអស់ [ សូមមើល ហេព្រើរ ១០:១០ ] ។ ហើយសេចក្ដីមេត្តាករុណានៃដង្វាយធួនពង្រីកមិនត្រឹមតែដល់ចំនួនមនុស្សដ៏ច្រើនមហិមាប៉ុណ្ណោះទេ ប៉ុន្ដែវាថែមទាំងដល់ចំនួនដ៏អនន្ដនៃពិភពលោកទាំងឡាយដែលទ្រង់បានបង្កើតផងដែរ [ សូមមើល គោលលទ្ធិ និង សេចក្ដីសញ្ញា ៧៦:២៤; ម៉ូសេ ១:៣៣ ] ។ វាមានចំនួនអនន្ដលើសពីទំហំនៃរង្វាស់ ឬការយល់ដឹងខាងសាច់ឈាមណាមួយរបស់មនុស្សទៅទៀត ។
ព្រះយេស៊ូវគឺជាអង្គតែមួយគត់ ដែលអាចផ្ដល់នូវដង្វាយធួនជានិរន្ដរមួយបែបនោះបាន ដោយសារទ្រង់បានប្រសូតពីម្ដាយជាសាច់ឈាមម្នាក់ និង ពីព្រះវរបិតាដ៏អមតមួយអង្គ ។ ដោយសារតែសិទ្ធិខាងកំណើតដ៏វិសេសនោះហើយ ទើបព្រះយេស៊ូវគឺជាអង្គដ៏និរន្ដរ៍ ។ ( រ័សុល អិម ណិលសុន « The Atonement » Ensign ខែ វិច្ឆិកា ឆ្នាំ ១៩៩៦ ទំព័រ ៣៥ )
សិក្សាការរៀបចំសម្រាប់ថ្នាក់រៀន
ព្យាការីអាលម៉ាក៏បានបង្រៀនសេចក្ដីពិតដ៏សំខាន់ដល់ប្រជាជនគេឌាន អំពីដង្វាយធួនរបស់ព្រះអង្គសង្គ្រោះដែរ ។ សូមអាន អាលម៉ា ៧:១១–១៣ ។
ក្រោយពីដកស្រង់ចេញពី អាលម៉ា ៧ អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់បានបង្រៀន ៖
គ្មានការឈឺចាប់ខាងសាច់ឈាម ការរងរបួសខាងវិញ្ញាណ និងការឈឺចិត្តក្នុងព្រលឹង ការចុកចាប់ ជំងឺ ឬភាពកំសោយណាដែលអ្នក ឬខ្ញុំជួបក្នុងជីវិតនេះ ដែលព្រះអង្គសង្គ្រោះមិនធ្លាប់បានមានបទពិសោធន៍ជាមុននោះទេ ។ នៅក្នុងគ្រានៃភាពទន់ខ្សោយមួយ យើងអាចនឹងស្រែកឡើងថា « គ្មាននរណាម្នាក់ស្គាល់ពីអារម្មណ៍នេះទេ ។ គ្មាននរណាម្នាក់ដឹងទេ » ។ ប៉ុន្តែព្រះរាជបុត្រានៃព្រះត្រាស់ដឹង និងយល់ដ៏ឥតខ្ចោះ ដ្បិតទ្រង់បានដឹង និងរែកបន្ទុករបស់យើងម្នាក់ៗ ។ ហើយព្រោះតែពលិកម្មដ៏គ្មានទីបញ្ចប់ និងដ៏អស់កល្បជានិច្ចរបស់ទ្រង់ ( សូមមើល អាលម៉ា ៣៤:១៤ ) នោះទើបទ្រង់មានការយល់ដឹងដ៏ឥតខ្ចោះ ហើយអាចលាតព្រះហស្ដនៃសេចក្តីមេត្តាកុរណារបស់ទ្រង់មករកយើង ។ ទ្រង់អាចឈោង ពាល់ ព្យាបាល និងពង្រឹងយើងបាន ។ ( ដេវីឌ អេ បែដណា « រែកបន្ទុករបស់ពួកគេយ៉ាងងាយ » Ensign ឬ Liahona ខែ ឧសភា ឆ្នាំ ២០១៤ ទំព័រ ៩០ )
យ៉ូសែប ស៊្មីធបានទទួលវិវរណៈមួយ ដែលភ្ជាប់ការរងទុក្ខដ៏មិនអាចប្រៀបធៀបបានរបស់ព្រះអម្ចាស់ទៅនឹងតម្លៃនៃព្រលឹងទាំងឡាយ ។ ក្រោយពីហៅ អូលីវើរ ខៅឌើរី និង ដាវីឌ វិតមើរឲ្យផ្សាយពីការប្រែចិត្តហើយ ព្រះអម្ចាស់បានណែនាំពួកលោក ។
សិក្សាការរៀបចំសម្រាប់ថ្នាក់រៀន
សូមអាន គោលលទ្ធិ និង សេចក្តីសញ្ញា ១៨:១០–១១, ១៣ ។
ព្រះអម្ចាស់បានមានបន្ទូលបន្ដទៀតអំពីពលិកម្មដ៏ធួនរបស់ទ្រង់ក្នុងវិវរណៈមួយ ដែលបានប្រទានដល់ម៉ាទិន ហារីស ។ ម៉ាទិនបានពុះពារនឹងការអាចបាត់បង់ចម្ការរបស់គាត់ ដើម្បីបង់ថ្លៃសម្រាប់ការបោះពុម្ពព្រះគម្ពីរមរមន ។ នៅក្នុងវិវរណៈនេះ ព្រះអម្ចាស់បានត្រាស់បង្គាប់ម៉ាទិនឲ្យប្រែចិត្ត រួចហើយបានបើកសម្ដែងដំណើររឿងការរងទុក្ខដ៏ឯករបស់ទ្រង់ ។
សិក្សាការរៀបចំសម្រាប់ថ្នាក់រៀន
សូមអាន គោលលទ្ធិ និង សេចក្តីសញ្ញា ១៩:១៦–១៩ ។
កាលបងប្អូនសញ្ជឹងគិតអំពីការរងទុក្ខ ដែលព្រះយេស៊ូវគ្រីស្ទបានរងទុក្ខជំនួសបងប្អូននោះ សូមពិចារណាអាន ឬស្ដាប់ពាក្យនៃទំនុកតម្កើងនេះ « ខ្ញុំឆ្ងល់យ៉ាងអស្ចារ្យ » ( ទំនុកតម្កើង ល.រ. ១១៥ ) ។
តើខ្ញុំអាចស្គាល់ព្រះយេស៊ូវគ្រីស្ទកាន់តែច្បាស់ដោយរបៀបណា ?
នៅក្នុងសៀវភៅកំណត់ហេតុរបស់អ្នក ឬនៅចន្លោះដែលផ្ដល់មក សូមសរសេរសេចក្ដីពិតពីរបីដែលបងប្អូនចាប់អារម្មណ៍ចេញពីវគ្គបទគម្ពីរ និងការបង្រៀននានានៅក្នុងផ្នែកនេះ ក៏ដូចជាគំនិត និងសំណួរផ្សេងៗទៀត ដែលបងប្អូនមានអំពីពលិកម្មដ៏ធួនរបស់ព្រះអង្គសង្គ្រោះ ។ សូមមកកាន់ថ្នាក់រៀនដោយបានរៀបចំខ្លួនចែកចាយសេចក្ដីពិត ដែលបងប្អូនបានរកឃើញ និងការយល់ដឹងនានា ។