“6. Fakahū ʻo e Ngaahi Liliu ki he ʻIunití mo e Ngataʻangá,” Ngaahi Fakahinohino ki he Palani Pule ʻo e ʻApisiasí (2022)
“Fakahū ʻo e Ngaahi Liliu ki he ʻIunití mo e Ngataʻangá,” Ngaahi Fakahinohino ki he Palani Pule ʻo e ʻApisiasí
6.
Fakahū ʻo e Ngaahi Liliu ki he ʻIunití mo e Ngataʻangá
ʻOku ʻoatu ʻe he palesiteni fakasiteikí ha faʻahinga kole pē ki ha ngaahi liliu ki he ʻiunití pe ngataʻanga ʻoku fie maʻú, ke fakahoko ʻa e palani pulé ʻo fakafou ʻi he foomu pepa kolé pe ʻi he polokalama ʻa e takí he ʻinitanetí ki he ngataʻanga ʻoku maʻu ʻi he Maʻuʻanga Tokoni ʻa e Takí mo e Kalaké (LCR). ʻOku ʻi he Tohi Tuʻutuʻuni Fakakātoá, vahe 36 ʻa e ngaahi fakahinohino lolotonga kuo fakangofua ʻe he Kau Palesitenisī ʻUluakí ki hono tokangaekina ʻo e ngaahi liliu ki he ngataʻangá. ʻOku totonu ke vakaiʻi fakalelei ʻe he kau takí ʻa e ngaahi fakahinohino ko ʻení kimuʻa pea toki fakakaukauʻi mo fakahū ʻa e ngaahi liliú, mo kei manatuʻi pē ʻoku totonu ke hoko hono fakamālohia ʻo e Siasí mo hono kāingalotú ko e taumuʻa aofangatukú.
ʻE lava ke faʻa uesia ʻe he ngaahi liliu ʻo e ngataʻanga ʻo e ʻiunití, ha ngaahi meʻa angamaheni pe feohi fakakaungāmeʻa kuo anga ki ai ʻa e kāingalotú. Neongo ko ha foʻi moʻoni ʻi ha Siasi ʻoku tupulekina ke tali lelei ʻa e ngaahi kole ʻi he tupu tokolahi ʻa e mēmipasipí, ka ʻoku ʻikai totonu ke fakahū ʻa e ngaahi fokotuʻu liliu ʻo e ngataʻangá ke feau ʻaki ʻa e ngaahi fiemaʻu pe ngaahi tūkunga ko ē ʻe lava pē ke feau ʻaki hano akoʻi mo tokoniʻi lelei ʻo e kau taki lakanga fakataulaʻeiki mo e kāingalotu fakalotofonuá.
Neongo ko e founga palaní ʻoku fakataumuʻa ki he kahaʻú, ka ko e kole ki he Kōmiti ki he Liliu ʻo e Ngataʻangá mo e Kau Takí ʻoku totonu ke makatuʻunga ʻi he tūkunga lolotonga ʻo e ngaahi ʻiuniti ʻo e Siasí ʻoku kau aí. ʻE lava ke kau ʻi hono fakakaukauʻi ʻo e ngaahi kole ke liliú ʻa e:
-
Fakamālohia ʻa e toʻu tupú, fakasiʻisiʻi ʻa e kavenga fakapaʻanga ki he fefonongaʻakí, fakalahi ʻa e ʻū faingamālie ngāue fakafaifekaú, mo faitokonia ʻa e kāingalotu toulekeleká.
-
Tokangaekina ʻa e ngaahi meʻa hangē ko ha ngaahi tuʻunga fakatuʻutāmaki, kau maʻu lakanga fakataulaʻeiki toulekeleka ʻoku ʻikai lava ke toe ngāue leleí, mo e uesia ʻi ha ngaahi fale nofoʻanga lalahi (kole ki ha ngaahi ngataʻanga ʻoku ʻikai fehokotaki), pea pehē ki ha ngaahi ʻiuniti lalahi mo fakapotopoto ʻo e fefonongaʻakí.
Kātaki ʻo ʻomi ha fakamatala puipuituʻa feʻunga ʻoku fakaʻauliliki ai ʻa e fiemaʻu ke liliu ʻa e ngaahi ʻiunití, hangē ko e ʻuhinga ʻo e huʻunga ʻo e hikifonua ʻa e kāingalotú, hōloa ʻo e kau taki lakanga fakataulaʻeikí, pe nofo vākoví. Kātaki ʻo fakakau mai ha meʻa kuo fai ʻe he kau taki lakanga fakataulaʻeiki fakalotofonuá ke fakaleleiʻi ʻa e ngaahi palopalemá ni, ʻo fakafou ʻi ha ako, akoʻi ʻa e tokāteliné mo ha ngāue fakaetauhi.
ʻOku totonu ke poupouʻi kakato ʻa e ngaahi kolé kotoa ʻe he kau palesiteni ʻo e ngaahi siteiki mo e misiona kotoa pē ʻoku kaunga ki he ngaahi liliu kuo fokotuʻú.