8.

Liliu ʻa e Palani Pulé

ʻOku ngāue ʻa e DTA mo ʻene kau ngāué fakataha mo e Kau Palesitenisī Fakaʻēliá ke tauhi maʻu ha palani fakataʻu-nima. ʻE ala fie maʻu ʻe he Fitungofulu Fakaʻēliá ke toe fakakau mai ʻa e kau palesiteni fakasiteikí ki hono fakatonutonu ʻa e palaní, kapau ʻe fokotuʻu ʻe he kau taki lakanga fakataulaʻeikí pe ʻe ha fakamatala, ha liliu mahuʻinga ki he ngaahi fakafuofuá, ngaahi liliu ʻo e ʻiunití, pe ngaahi ngāue ki he ʻapisiasí.

ʻI he fakalau atu ʻa e taimí, ʻe fie maʻu ke toe fakafoʻou ʻa e palani pulé. ʻOku totonu ke ngāue ʻa e Fitungofulu Fakaʻēliá, ʻi he taʻu ʻe tolu pe fā kotoa pē (pe lahi ange ʻo ka fie maʻu) ʻi he malumalu ʻo e fakahinohino ʻa e Kau Palesitenisī Fakaʻēliá, fakataha mo e kau palesiteni fakasiteikí mo e DTA mo ʻene kau ngāué, ke fakaleleiʻi ʻa e palaní. Ko ha faingamālie lelei ʻeni ke vakaiʻi ai ʻa e ngaahi ngāue ʻoku fakahokó, mo e tokoni ʻa e ngāue ko ʻení ki he maʻulotú, pea fakatonutonu leva ʻa e ngaahi taumuʻá.