ʻOku akoʻi ʻe he Malangaʻaki ʻEku Ongoongoleleí ko e taumuʻa ʻa e kau faifekaú ke “fakaafeʻi ha niʻihi kehe ke nau haʻu kia Kalaisi ʻaki hono tokoniʻi kinautolu ke nau tali ʻa e ongoongolelei kuo fakafoki maí, ʻo fakafou ʻi he tui kia Sīsū Kalaisi mo ʻEne Fakaleleí, fakatomalá, papitaisó, maʻu ʻa e foaki ʻo e Laumālie Māʻoniʻoní, pea kātaki ki he ngataʻangá” (Malangaʻaki ʻEku Ongoongoleleí, 1). Naʻe pehē ʻe ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “ ʻE hoko hoʻo ngāue fakafaifekaú ko ho faingamālie toputapu ke ʻomi e niʻihi kehé kia Kalaisi pea tokoni ke teuteuʻi kinautolu ki he Hāʻele ʻAngaua Mai ʻa e Fakamoʻu픓Ko Hono Teuteuʻi ʻo e Māmaní ki he Hāʻele ʻAngauá,” Ensign pe Liahona, Mē 2011, 49). ʻE lava ʻa e lēsoni ko ʻení ʻo tokoni ki hono teuteuʻi hoʻo kau akó ke kau ʻi he faingamālie toputapu ʻo e ngāue fakafaifekaú.
Kole ki he kau akó ke nau talaatu ha ngaahi ʻekitivitī mo ha ngaahi ngāue ʻoku fakahoko maʻu pē ʻe he kau faifekaú, pea hiki kinautolu ʻi he palakipoé. (ʻE ala kau ʻi he ngaahi talí ʻa e ʻaʻahi uiuí, ako, akoʻi, lotua, pea mo e tokoni.)
Fakaafeʻi ha taha ako ke ne lau ʻa e fakamatala ʻi he puha “Ko Hoʻo Taumuʻá” ʻi he peesi 1 ʻo e Malangaʻaki ʻEku Ongoongoleleí. (Koeʻuhí ko e fuofua fakataha ʻeni ʻa e kalasí, mahalo ʻe ʻi ai ha niʻihi tokolahi ʻo e kau akó, he ʻikai ke ʻi ai haʻanau tohi Malangaʻaki ʻEku Ongoongolelei, mahalo naʻa fie maʻu ke ke tufaki ha tatau ʻo e meʻá ni mo ha ngaahi peesi kehe ʻoku mahuʻinga.)
Hokó, fakaafeʻi ʻa e kau akó ke nau fakafehoanaki ʻa e fakamatala ki he taumuʻa ʻo e ngāue fakafaifekaú mo e lisi ʻo e ngaahi ngāue ʻi he palakipoé, pea ʻeke ange:
ʻOku fakalahi fēfē ʻa e mahino ʻoku tau maʻu fekauʻaki mo e meʻa ʻoku fai ʻe he kau faifekaú, ʻo makatuʻunga ʻi he mahino kia kitautolu ʻa e fakamatala ki he taumuʻa ʻo e ngāue fakafaifekaú? ʻOku founga fēfē hono ʻomi ʻe he taumuʻa ko ʻení ʻa e mahuʻinga ʻo e ngaahi ngāue ʻoku fai ʻe he kau faifekaú?
Ko e konga fē ʻo e taumuʻa ko ʻení ʻokú ne tala e fatongia ʻo e faifekaú, pea ko e konga fē ʻokú ne tala e fatongia ʻo e fiefanongó?
ʻE anga fēfē ke ke hoko ko ha faifekau lelei ange, ʻi hano ʻai e taumuʻa ko ʻení ke hoko ko e tefitoʻi fakahinohino ʻi hoʻo ngāué? (ʻOku ʻomi ʻe he taumuʻá ʻa e fakahinohino ki he ngāue ʻoku fai ʻe ha faifekau. ʻOku tokoni ke siʻi ange e tokanga ʻa e kau faifekaú ki hono fakahoko ʻo e fanga kiʻi ngāué kae lahi ange ki hono fakahoko ʻenau taumuʻa totonú.
Fakaafeʻi ʻa e kau mēmipa ʻo e kalasí ke nau huke ki he peesi 2 ʻo e Malangaʻaki ʻEku Ongoongoleleí, pea kole ki ha taha ako ke ne lau leʻolahi ʻa e palakalafi fakaʻosí, ʻo kamata ʻi he “Kuo uiuiʻi koé” ke tokoni ke mahino lelei ange ki he kau mēmipa ʻo e kalasí ʻa e taumuʻa ʻo e ngāue fakafaifekaú.
Aleaʻi fakakalasi ʻa e ngaahi fehuʻi ko ʻení:
Fakatatau ki he palakalafi ko ʻení, ko e hā kuo pau ke fai ʻe ha taha ke haʻu ai ki he Fakamoʻuí?
Fakatatau ki he palakalafi ko ʻení, ko e hā ʻoku fai ʻe ha faifekau ke tokoniʻi ha niʻihi kehe ke nau haʻu kia Sīsū Kalaisi?
ʻOange ki he kau akó takitaha ha tatau ʻo e fakamatala ke tufa “Ko ʻEtau Taumuʻa ʻo e Ngāue Fakafaifekaú.” ʻOku ʻi he fakamatala ke tufa ko ʻení ha konga ʻo e lea naʻe fai ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá. Fokotuʻutuʻu ʻa e kau akó ki ha fanga kiʻi kulupu, pe fakaafeʻi ke nau fokotuʻu pē haʻanau kulupu. Kole ki he ngaahi kulupú ke nau lau fakataha ʻa e fakamatala ʻoku tufá pea aleaʻi ʻa e ngaahi fehuʻi ʻi he ngataʻangá.
Ka ʻosi hano maʻu ʻe he kau akó ha taimi feʻunga ke ako mo aleaʻi ai e lea ʻa ʻEletā Kulisitofasoní, ui hanau niʻihi ke nau vahevahe ʻenau tali ki he ngaahi fehuʻi ʻoku aleaʻí. Hili ia pea fai ange ʻa e ngaahi fehuʻi ko ʻení:
ʻE founga fēfē haʻo kamata ke tukutaha hoʻo tokangá ki he fakamatala ʻo e taumuʻa ʻo e ngāue fakafaifekaú? (ʻE ala kau ʻi he talí ha taha ʻo e ngaahi meʻa ko ʻení: mahalo naʻa fili ʻa e kau akó ke ako maʻuloto ia, mahalo te nau hiki ia mo fokotuʻu ʻi ha feituʻu te nau lava ʻo sio ki ai he ʻaho kotoa pē, mahalo te nau lotua ha tokoni ke mahino lelei ange ai, pe te nau kumi ha ngaahi ʻelemēniti ʻo e taumuʻa ko ʻení ko ha konga ʻo ʻenau ako folofolá.)
ʻAi ha taha ako ke ne lau leʻolahi ʻa e konga lea ko ʻeni ʻa ʻEletā Tālini H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Elder Dallin H. Oaks
“ ʻOku ʻikai ke tau malanga mo akoʻí ke ‘ ʻomai ʻa e kakaí ki he Siasí’ pe ke fakatokolahi ʻa e kāingalotu ʻo e Siasí. ʻOku ʻikai ke tau malanga mo akoʻí ke fakalotoa ʻa e kakaí ke nau moʻui ʻi ha tuʻunga ʻo e moʻuí ʻoku lelei ange. … ʻOku tau fakaafeʻi ʻa e kakai kotoa pē ke nau haʻu kia Kalaisi ʻaki ʻenau fakatomala mo papitaiso pea mo hilifakinima kae lava ʻo fakaava ʻa e ngaahi matapā ʻo e puleʻanga fakasilesitialé ki he ngaahi foha mo e ngaahi ʻōfefine ʻo e ʻOtuá [vakai, T&F 76: 51–52]. ʻOku ʻikai ha toe taha ia te ne lava ʻo fai ʻeni” (“The Purpose of Missionary Work,” fakamafola fakasatelaite ʻa e kau faifekaú, ʻEpeleli 1995).
Ko e hā ʻoku mahuʻinga ai ke manatuʻi ko hono malangaʻaki ʻo e ongoongoleleí ʻoku fekauʻaki ia mo ha meʻa lahi ange ʻi he tokoniʻi pē ʻo ha taha ke ne hoko ko ha mēmipa ʻo e Siasí? (Vakai foki, 3 Nīfai 11:33–34.)
Ko e hā ha fakakaukau ʻokú ke maʻu ʻi he taimi ʻokú ke pehē ai te ke tokoni ke “fakaava ʻa e ngaahi matapā ʻo e puleʻanga fakasilesitialé” kiate kinautolu te ke akoʻí?
Fakaafeʻi ʻa e kau akó ke nau fakakaukauʻi ʻa e founga te nau ala fakaʻaongaʻi ai ʻa e taumuʻa ʻo e ngāue fakafaifekaú ʻi heʻenau moʻuí, pea ʻeke ange ke nau fakakaukauʻi pe ʻoku tatau ʻa e ʻuhinga ʻo ʻenau ngāue fakafaifekaú mo e taumuʻa ʻo e ngāue fakafaifekau ʻoku ʻi he Malangaʻaki ʻEku Ongoongoleleí. Kole ki he kau akó ke tuku hanau kiʻi taimi ke hiki ai ʻi ha lauʻipepa pe ʻi ha tohinoa ako ha ngaahi ngāue pau te nau ala fakahoko ke vāofi ange ai e ʻuhinga ʻo ʻenau ngāue fakafaifekaú mo e fakamatala ʻo e taumuʻa ko ʻení.
Ko Hono Akoʻi e Tokāteline ʻo Kalaisí
Fakamatalaʻi ange ki he kalasí naʻe fakahā ʻe he Fakamoʻuí ko e taha ʻo e ngaahi tefitoʻi taumuʻa ʻo e Tohi ʻa Molomoná ke ”ʻomi ki he māmá ʻa ʻeku ongoongoleleí [mo e] ngaahi tefitoʻi moʻoni ʻo ʻeku tokāteliné” (T&F 10:62). ʻOku kau ʻi he tokāteline ʻa Kalaisí ʻa e fekau ke tui ʻa e faʻahinga kotoa ʻo e tangatá kia Sīsū Kalaisi ko e ʻEiki mo e Fakamoʻuí, fakatomala mei he angahalá, papitaiso, mo maʻu ʻa e Laumālie Māʻoniʻoní (vakai, 3 Nīfai 11:32). Hiki e meʻa ko ʻení ʻi he palakipoé:
Vahevahe e kalasí ki ha kulupu ʻe tolu. Kole ki ha kulupu ʻe taha ke nau ako ʻa e 2 Nīfai 31:2, 10–21; kole ki he kulupu hono hokó ke nau ako ʻa e 3 Nīfai 11:3–41; pea kole ki he kulupu hono tolú ke nau ako ʻa e 3 Nīfai 27:13–22. Kole ki he ngaahi kulupú takitaha ke nau lau ʻenau ngaahi vēsí mo talaatu ʻa e meʻa ʻoku fie maʻu meiate kinautolu ʻoku nau feinga ke muimui ʻia Sīsū Kalaisí. Te ke lava ʻo poupouʻi ʻa e kau akó ke nau valivali pe fakaʻilongaʻi ʻa e ngaahi moʻoni pau ʻi heʻenau folofolá fekauʻaki mo e tokāteline mo e ongoongolelei ʻo Sīsū Kalaisí.
Ka hili hano maʻu ʻe he kau akó ha kiʻi taimi ke vakaiʻi ai ʻa e ngaahi potufolofola ko ʻení, kole ange ke nau hiki ʻi lalo he fakamoʻoni folofola takitaha he palakipoé ʻa e ngaahi ngāue pau ʻoku fie maʻu mei he kau muimui ʻo Sīsū Kalaisí.
Hili ia peá ke fai ange ha ngaahi fehuʻi hangē ko ʻení:
Kapau ʻe fehuʻi atu ʻe ha taha kiate koe pe ʻoku tui ʻa e kakai Māmongá kia Kalaisi, ʻe tokoni fēfē ʻa e ngaahi potufolofola ko ʻeni ʻe tolu he palakipoé ki hoʻo tali ʻa e fehuʻí?
ʻE founga fēfē haʻo fakamatalaʻi ʻaki hoʻo lea pē ʻaʻaú ʻa e tokāteline pe ongoongolelei ʻo Sīsū Kalaisí ki ha taha ʻoku ʻikai ke ne ʻiloʻi ia?
ʻE ala ʻeke atu ʻe ha kakai ʻe niʻihi pe ko e hā ʻoku toe malangaʻi ai ʻe he kau faifekaú ʻa Sīsū Kalaisi ki ha kakai kuo nau ʻosi tui kia Sīsū Kalaisí? ʻOku tokoni fēfē atu ʻa e tokāteline ʻo Kalaisi, kuo fokotuʻu atu ʻi he ngaahi potufolofola ko ʻeni he palakipoé, ki hoʻo tali ʻa e fehuʻi ko iá?
Fakapapauʻi mei he tali ʻa e kau akó, ʻoku mahino kiate kinautolu ʻoku kau ʻi he tokāteline ʻa Kalaisí ʻa e (1) meʻa kuo fai ʻe Sīsū Kalaisi mo kei fai ke tohoakiʻi kitautolu ki he Tamaí (vakai, ʻAlamā 33:22; T&F 76:40–42) mo e (2) meʻa kuo pau ke tau fai ke maʻu ai ʻa e ngaahi tāpuaki ʻo e Fakalelei ʻa Sīsū Kalaisí, kau ai e maʻu ʻo e tuí, fakatomalá, papitaisó, maʻu e foaki ʻo e Laumālie Māʻoniʻoní, pea mo e kātaki ki he ngataʻangá (vakai, 3 Nīfai 27:16–21).
ʻAi ke to e sio e kau akó ki he fakamatala ʻo e taumuʻa ki he ngāue fakafaifekaú ʻi he palakipoé pea fehuʻi ange:
ʻOku fekauʻaki fēfē ʻa e tokāteline ʻo Kalaisí mo e taumuʻa ʻo e ngāue fakafaifekaú?
ʻI hono aleaʻi ʻe he kau akó e fehuʻi ko ʻení, mahalo te nau fakamatalaʻi ʻa e foʻi moʻoni ko ʻení: ʻOku fakahoko ʻe he kau faifekaú ʻenau taumuʻá ʻaki ʻenau tokoniʻi ʻa e kau fiefanongó ke nau tali ʻa e tokāteline ʻo Kalaisí, fakatupulaki e tuí, fakatomala, papitaiso, maʻu ʻa e foaki ʻo e Laumālie Māʻoniʻoní, pea kātaki ki he ngataʻangá.
Koeʻuhí ke fakaloloto e mahino ʻa e kau akó kuo pau ke ngāueʻi ʻe he kau fiefanongó ʻa e tokāteline ʻo Kalaisí ke maʻu ʻa e ongoongolelei kuo fakafoki maí, ʻai ʻa e kau akó ke nau huke ki he peesi 6 ʻi he Malangaʻaki ʻEku Ongoongoleleí, pea kole ki ha taha ako ke ne lau leʻolahi ʻa e ongo ʻuluaki palakalafi ʻi he konga ʻoku ui “Ko e Ongoongolelei ʻo Sīsū Kalaisí.” Hili ia pea fai ange ha ngaahi fehuʻi hangē ko ʻení ke tokoniʻi hoʻo kau akó ke nau lava ʻo ʻiloʻi ʻa e ʻuhinga ʻoku mahuʻinga ai ke tui ʻa e kau fiefanongó:
Ko e hā ha faʻahinga fakamoʻoni ʻe lava ke ʻilo ai ʻe ha faifekau pe ʻoku tui ha fiefanongo kia Sīsū Kalaisi mo ʻEne Fakaleleí, fakatomala, mo mateuteu ke maʻu ʻa e fuakava ʻo e papitaisó?
Ka hili e tali ʻa e kau akó, fakamatalaʻi ange ʻoku faʻa hohaʻa ʻa e kau faifekaú ke leaʻaki mo fai ʻa e meʻa ʻoku totonú. Neongo iá, ko e meʻa ʻoku mahuʻinga ange ʻi he meʻa ʻoku leaʻaki mo fai ʻe he kau faifekaú ko e tui ʻa e kau fiefanongó ki he meʻa ʻoku akoʻi angé. Ko e taha ʻo e ngaahi poto mahuʻinga taha ʻe lava ke fakatupulaki ʻe ha faifekau ko e ʻiloʻi ʻi he Laumālié pe ʻoku tui moʻoni mo ului ha fiefanongo.
Ko e hā ha faʻahinga fakamoʻoni ʻe lava ke ʻilo ai ʻe ha faifekau pe naʻe ʻi ai ʻa e Laumālie Māʻoniʻoní lolotonga ʻa e lēsoní pea naʻe ongoʻi ia ʻe he fiefanongó?
Ko e hā ʻe lava ke fai ʻe he kau teuteu ngāue fakafaifekaú ke mahino lelei ange ai kiate kinautolu mo nau fakaʻaongaʻi ʻa e tokāteline ʻo Kalaisí? (ʻE ala kau ʻi he ngaahi talí ha taha ʻo e ngaahi meʻa ko ʻení: lotu ʻi he tui ke maʻu ha mahino lahi ange, ako ʻi he folofolá ha ngaahi tafaʻaki pau ʻo e tokāteline ʻo Kalaisí, hangē ko e Fakalelei ʻa Sīsū Kalaisí mo e ngaahi ʻuluaki tefitoʻi moʻoni mo e ngaahi ouau ʻo e ongoongoleleí, talanoa mo ha niʻihi fekauʻaki mo ha meʻa kuo nau fai ke fakatupulaki ai ʻenau tui kia Sīsū Kalaisí, ako ʻa e lotu tāpuaki ʻo e sākalamēnití ke mahino ange ʻa e ngaahi fuakava ʻo e papitaisó, mo e ngaahi meʻa peheé.)
Ka hili hono huluʻi ʻo e foʻi vitioó, fai ange ha ngaahi fehuʻi hangē ko ʻení ke tokoniʻi ʻa e kau akó ke nau fakamatalaʻi ʻa e meʻa naʻe fai ʻe he kau faifekaú ke fakahoko ai ʻenau taumuʻá:
Ko e hā naʻe fai ʻe he ongo faifekau ko ʻení ke tokoniʻi ʻa e fāmili Lōpoló ke nau tupulaki ʻi he tuí? (ʻE ala kau ʻi he ngaahi talí ʻa e ngaahi meʻa ko ʻení: naʻá na poupouʻi kinautolu ke nau lotua ʻa e Tohi ʻa Molomoná, tali ʻenau ngaahi fehuʻí, akoʻi ange ʻa e ʻuhinga ʻoku mahuʻinga ai ke talangofua ki he ngaahi fekaú, fakatukupaaʻi kinautolu ke nau talangofua ki he ngaahi fekaú, tokoniʻi kinautolu ke nau maʻu ʻa e ouau ʻo e papitaisó, fakapapauʻi ʻoku tokoni e uōtí kiate kinautolu, mo fakahinohino kinautolu ki he temipalé.)
Ko e hā ʻoku fakatou hoko ai ʻa e akoʻi mo e fakaafeʻi ʻo e kau fiefanongó ko e konga mahuʻinga ʻo e meʻa ʻoku fai ʻe he kau faifekaú?
Ko e hā ha fakamoʻoni naʻá ke fakatokangaʻi naʻe tupulaki e tui ʻa e kau mēmipa ʻo e fāmili Lōpoló pea naʻa nau ongoʻi ange ʻa e Laumālie ʻo Kalaisí?
Tuku ange ha ngaahi miniti siʻi ke ako ai ʻe hoʻo kau akó ʻa e konga ʻoku ui ko e “Ko hono Tokoniʻi ʻo e Niʻihi Kehé ke Nau Fai ha Ngaahi Tukupā: Ko e Matapā ia ki he Tuí mo e Fakatomalá” ʻi he Malangaʻaki ʻEku Ongoongoleleí, peesi 9. Hili ia pea vahe ʻa e kau akó ke nau tauhoa mo taufetongi ʻi hono fakamatalaʻi ʻenau ongó ʻi hono fakaafeʻi ha niʻihi ke nau tauhi ha ngaahi tukupā. Ko e hā ngaahi tailiili pe hohaʻa ʻoku nau maʻu? Ko e hā ʻoku tokoni ke nau maʻu ai ha lotolahi te nau lava ʻo fai iá? Hili ia pea fai ange ʻa e ngaahi fehuʻi ko ʻení:
ʻE anga fēfē hano tokoniʻi koe ʻe he mahino ʻo e tokāteline ʻo Kalaisí ke ke fakaafeʻi ʻa e kau fiefanongó ke nau fai ha ngaahi tukupā?
Ko e hā naʻe pehē ai ʻe ʻEletā Sefilī R. Hōlani ko e faifekaú ʻoku totonu ke “loto mamahi” ʻi he taimi ʻoku ʻikai fakahoko ai ʻe he kakaí ha tukupā ke lau pe lotua e Tohi ʻa Molomoná?
Fakaafeʻi ʻa e kalasí ke nau fakakaukau loto ki he faʻahinga ongo ʻe maʻu ʻi hano tokoniʻi ʻo e kakaí ke nau fai ha ngaahi liliu mo papitaiso. ʻEke ange pe ʻoku ʻi ai hanau taha kuó ne tokoniʻi ha kaungāmeʻa pe mēmipa ʻo e fāmilí ke haʻu kia Kalaisi, pea fakaafeʻi kinautolu ke nau fakamatalaʻi pe naʻá ne ongoʻi fēfē heʻene tokoni he meʻa ko iá.
Ko e Fatongia Maʻongoʻonga Tahá
Aleaʻi ʻa e founga ʻoku maʻu ai ʻe he kau faifekaú ʻa e mafai ke akoʻi ki he fānau ʻa e Tamai Hēvaní ʻa e ongoongoleleí, pea mo tokoni ke nau maʻu ʻa e ngaahi ouau te ne fakaʻatā kinautolu ke nau maʻu ʻa e ngaahi tāpuaki ʻo e Fakaleleí. Fakaʻaliʻali ʻa e lea ko ʻení pea kole ha tokotaha ako ke ne lau leʻolahi ia ki he kalasí.
ʻĪmisi
Prophet Joseph Smith
“Hili e ngaahi meʻa kotoa kuo leaʻakí, ko e fatongia maʻongoʻonga mo mahuʻinga tahá ko hono malangaʻaki ʻo e Ongoongoleleí” (Siosefa Sāmita, fakaʻaongaʻi ʻi he Malangaʻaki ʻEku Ongoongoleleí, 13).
ʻĪmisi
President Spencer W. Kimball
“ ʻOku mahuʻinga ange hono akoʻi ʻo e ongoongoleleí ʻi he ngaahi ngāue lelei kehé. ʻOku mou ʻi he ngāue maʻongoʻonga taha ʻi he māmaní, pea ʻoku hala ha meʻa ʻi he māmaní ʻe lava ʻo fakatatau ki ai. Ko e meʻanoa pē langa ia ʻo e ngaahi ʻapí mo e hala fakakavakavá. Ko e meʻanoa pē faʻu ia ʻo e ngaahi māmaní ʻi hono fakafehoanaki ki he ngaahi moʻui ʻokú ke langá. ʻOku ʻikai ko ha lavameʻa mahuʻinga e fakahaofi ia e moʻui fakamatelié ʻi hono fakafehoanaki mo e meʻa ʻoku mou faí. Te mou ala hū ki tuʻa ʻi heni ki ha taha ʻo e ngaahi faʻitoká ʻo fokotuʻu ʻa e kau pekiá, ʻo aʻu ki ha lauiafe pe lauimano ʻo kinautolu, ka kuo teʻeki ai ke ke fai ha meʻa ʻe fakatatau mo e meʻa ʻokú ke lolotonga fakahokó ʻi hoʻo fakahaofi ʻa e kakaí” (The Teachings of Spencer W. Kimball [1982], 547).
Kole ki hoʻo kau akó pe ʻe lava hanau niʻihi ʻo vahevahe ʻa e ʻuhinga ʻoku nau pehē ai ko hono malangaʻi ʻo e ongoongoleleí ko e fatongia mahuʻinga taha ia ʻoku tau maʻú. Fakapapauʻi ʻoku mahino ki he kau akó, ʻoku tau tokoniʻi ʻa e niʻihi kehé ke nau maʻu ʻa e ngaahi tāpuaki ʻo e Fakaleleí, ʻi heʻetau malangaʻi ʻa e ongoongoleleí.
Kole ki ha tokotaha ako ke ne lau leʻolahi ʻa e Tokāteline mo e Ngaahi Fuakava18:10, 15–16 kae muimui pē ʻa e kalasí, mo kumi ʻa e ngaahi tāpuaki ʻoku maʻu ʻe kinautolu ʻoku nau malangaʻaki ʻa e ongoongoleleí pea mo nau tali ʻa e ongoongoleleí. Hili ia pea fehuʻi ange leva:
Ko e hā ha niʻihi ʻo e ngaahi tāpuaki ʻoku maʻu ʻe kinautolu ʻoku nau malangaʻaki ʻa e ongoongoleleí pea mo kinautolu ʻoku akoʻi ki ai ʻa e ongoongoleleí?
Fakamatalaʻi ange ʻe lava ke faingataʻa e ngāue fakafaifekaú . ʻAi ha tokotaha ako ke ne lau ʻa e kupuʻi lea ko ʻeni naʻe fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Elder Jeffrey R. Holland
“ ʻOku ou tui ko e ngāue fakafaifekaú ʻoku ʻikai faingofua koeʻuhí ko e fakamoʻuí ʻoku ʻikai ko ha aʻusia faingofua. Naʻe ʻikai teitei faingofua ʻa e fakamoʻuí ʻi ha taimi. Ko e Siasi kitautolu ʻo Sīsū Kalaisí, ko e foʻi moʻoní ʻeni, pea ko Ia ʻa hotau Taki Taʻengatá. ʻE lava fēfē ke tau tui ʻe faingofua kiate kitautolu kae hili iá naʻe ʻikai teitei faingofua kiate Ia? ʻOku hangē kiate au kuo pau ke fakamoleki ʻe he kau faifekaú mo e kau taki faifekaú ha kiʻi taimi ʻi Ketisemani. Kuo pau ke laka atu ʻa e kau faifekaú mo e kau taki faifekaú ʻi ha sitepu ʻe taha pe ua ki he tumutumu ʻo Kalevalé.
“… ʻOku ou tui ʻe lava ke toki omi ʻa e kau faifekaú mo e kau fiefanongó, ke nau omi ki he moʻoni ko ʻení, ke omi ki he fakamoʻuí, ke ʻiloʻi ha faʻahinga meʻa ki he totongi ko ʻeni kuo ʻosi faí, ʻi haʻanau totongi ha meʻa tatau mo e mahuʻinga ko iá,”(Missionary Work and the Atonement,” Ensign, Maʻasi 2001. 15).
ʻE founga fēfē ha tokoni atu ʻa e fakakaukau ko ʻení ʻi he ngāue fakafaifekaú ʻi haʻo foua ʻa e ngaahi faingataʻa ko ha faifekau?
Fakakaukau ke ke ʻoange ʻi he ʻosi ʻa e kalasí ha ngaahi miniti ki he kau akó ke nau hiki ai ʻa e meʻa ne nau ako kau ki he fekauʻaki ʻa e ngāue fakafaifekaú mo e tokāteline ʻo Kalaisí. Poupouʻi ʻa e kau akó ke nau fokotuʻu ha taumuʻa ki he meʻa te nau lava ke fai ke mahino ange ai ʻa e tokāteline ʻo Kalaisí ʻi heʻenau teuteu ki heʻenau ngāue fakafaifekaú. ʻEke ki he kau akó pe ʻoku ʻi ai hanau niʻihi ʻoku nau fie vahevahe ʻenau fakamoʻoní ki he kalasí. Fakahaaʻi hoʻo fakamoʻoni, kapau ʻe ako mo fakahoko ʻe he kau akó ʻa e tokāteline ʻo Kalaisí, te nau hoko ko ha kau faifekau lelei ange.
Fakaafe ke Ngāué
Fakamatalaʻi ange ki he kau akó ʻoku fie maʻu ʻi he teuteu lelei ke ngāue fakafaifekau taimi kakató ha ngāue mavahe mei he loki akó. Ko ia, ʻi he ʻosi ʻa e lēsoní takitaha, te ke ʻoange ha ngaahi ʻekitivitī kuo fokotuʻu mai naʻe faʻu ke ne tokoniʻi kinautolu ke nau mateuteu lahi ange ke ngāue fakafaifekau. Fakatukupaaʻi ʻa e kau akó he taimí ni ke nau fakahoko ha taha pe toe lahi ange ʻo e ngaahi meʻa ko ʻení, ke tokoni ke nau kamata he taimí ni ke kau ʻi he ngāue ʻa e ʻEikí:
Ngāueʻaki ʻa e mītia fakasōsialé, ʻo vahevahe mo ha niʻihi ʻa e ʻuhinga ʻokú ke loto vēkeveke ai ke ngāue fakafaifekaú mo e meʻa ʻokú ke fai ke teuteu aí.
Mamata ʻi ha ngaahi foʻi vitiō ʻe niʻihi ʻoku maʻu he konga ʻo e Ko Hono Fakavaveʻi e Ngāue ʻo e Fakamoʻuí ʻi he LDS.org pea hiki ʻi ha tohinoa ako ʻa e ongo ʻokú ke maʻu ʻi hoʻo fakakaukauʻi ho faingamālie ke kau ʻi he ngāue ʻo e fakamoʻuí.
Fakaafeʻi hao kaungāmeʻa ke mo ō ki he kalasi teuteu faifekaú. (Te ke ala fakahoko ʻa e fakaafe ko ʻení ki he kau akó ʻi he fakaʻosinga ʻo e kalasí takitaha.)
Fakaafeʻi ha taha teʻeki siasi pe kaungāmeʻa ʻoku māmālohi ke akoʻi ki ai ʻa e ngaahi lēsoni fakafaifekaú.