Ko ʻEtau Fie maʻu e Fakaleleí

Talateú

ʻOku mahuʻinga ʻa e Fakalelei ʻa Sīsū Kalaisí ki he palani ʻo e fakamoʻui ʻa e ʻOtuá. Tuʻunga ʻi Heʻene Fakaleleí, ne fakahoko ai ʻe Sīsū Kalaisi ʻa e ngaahi taumuʻa ʻa ʻEne Tamaí ʻaki ʻEne huhuʻi kitautolu mei he mate fakalaumālié mo fakatuʻasinó, ʻo feau ai ʻa e ngaahi fiemaʻu ʻa e fakamaau totonú, mo fakamaʻa kitautolu mei heʻetau ngaahi angahala fakafoʻituituí ʻo makatuʻunga ʻi he fakatomalá. ʻOku toe fakafiemālieʻi foki kitautolu ʻe he Fakamoʻuí ʻi hotau ngaahi vaivaí, foaki mai ha ivi ke tau fakahoko ʻa e ngaahi meʻa he ʻikai ke tau mei lava ʻo fai ʻiate kitautolu peé, pea mo ʻomi ha ʻamanaki lelei te tau lava ʻo toe foki ʻo moʻui mo Ia pea mo e Tamai Hēvaní. ʻOku kau ʻa e kau faifekau taimi kakató ʻi he ngāue ʻo e fakamoʻuí ʻaki ʻenau tokoniʻi ha niʻihi ke nau ʻilo ʻa e founga ke maʻu ai ʻa e ngaahi tāpuaki ʻo e Fakaleleí tuʻunga ʻi he tui kia Sīsū Kalaisí, fakatomala, papitaiso, hilifakinima, pea kātaki ki he ngataʻangá.

Tomuʻa Teuteu

Ako ʻa e ngaahi potufolofola ko ʻení ke mahino lelei ange ʻa e ʻuhinga ʻoku tau fie maʻu ai ʻa e Fakaleleí: Loma 2:23; 2 Nīfai 9:6–10; mo e ʻAlamā 42:9–14.
Ako ʻa e ngaahi potufolofola ko ʻení ke ke ʻilo ha niʻihi ʻo e ngaahi tāpuaki ʻoku maʻu ʻi he Fakaleleí: Mōsaia 3:19; 4:3; 24:12–15; mo e ʻAlamā 5:12–13; 7:11–13.
Ako ʻa e Elder Jeffery R. Holland, “Missionary Work and Atonement,”Ensign, Maʻasi 2001, 8–15.
Ako ʻa e Malangaʻaki ʻEku Ongoongoleleí,peesi 58–59 mo e 68–69.
Teuteu ke huluʻi ʻa e foʻi vitiō ko e “He Lives! All Glory to His Name!” (2.51; konga mei he lea ʻa ʻEletā Lisiate G. Sikoti, Ensign pe Liahona, Mē 2010, 75–78), maʻu ʻi he lds.org/media-library

Ngaahi Fokotuʻu ki hono Akoʻí

ʻUhinga ʻoku Tau Fie maʻu ai ʻa e Fakaleleí

Kamata ʻaki hano fai e ngaahi fehuʻi ko ʻení ki he kau akó:

ʻE anga fēfē ha mahino ki he kakaí ʻoku nau fie maʻu e Fakalelei ʻa Sīsū Kalaisí ʻi heʻenau moʻuí?

Hokó, fakaʻaliʻali ʻa e fakamatala ko ʻení:

“ ʻOku hangē ʻa e ʻikai fuʻu fie maʻu ʻe ha tangata ʻa e meʻakaí kae ʻoua kuo fiekaiá, pea mo e ʻikai ke ne fie maʻu ʻa e fakamoʻui ʻa Kalaisí kae ʻoua kuó ne ʻilo ʻa e ʻuhinga ʻokú ne fie maʻu ai ʻa Kalaisí.

“ ʻOku ʻikai ʻiloʻi feʻunga pe kānokato ʻe ha taha ʻa e ʻuhinga ʻokú ne fie maʻu ai ʻa Kalaisí kae ʻoua kuo mahino mo ne tali ʻa e tokāteline ʻo e Hingá pea mo hono ʻaonga ki he faʻahinga kotoa ʻo e tangatá” (Palesiteni Ezra Taft Benson, A Witness and a Warning [1988], 33).

Hili ia pea fehuʻi ange:

Ko e hā ʻoku tau ʻuhinga ki ai ʻi heʻetau talanoa fekauʻaki mo e Hinga ʻa ʻĀtamá?

Fakaʻaliʻali ʻa e kupuʻi lea ko ʻení pea ʻai ha tokotaha ako ke ne lau leʻolahi ia ki he kalasí:

“Koeʻuhí naʻe kai ʻe ʻĀtama mo ʻIvi … ʻa e fua ʻo e fuʻu ʻakau ʻo e ʻilo ʻo e leleí mo e koví, naʻe kapusi ai kinaua ki tuʻa mei he ʻao ʻo e ʻEikí (vakai, T&F 29:40–41). Ko hono fakalea ʻe tahá, naʻá na foua ʻa e mate fakalaumālié. Naʻá na hoko foki ʻo maʻu ha tuʻunga fakamatelie–ʻo moʻulaloa ki he mate fakaesinó. ʻOku ui ʻa e mate fakalaumālie mo fakaesinó ko e Hinga. …

“ ʻI heʻetau hoko ko e hako ʻo ʻĀtama mo ʻIví, ʻoku tau maʻu ai ha tuʻunga hinga he lolotonga ʻo e moʻui fakamatelié (vakai, ʻAlamā 42:5–9, 14). ʻOku fakamavaheʻi kitautolu mei he ʻao ʻo e ʻEikí mo tau moʻulaloa ki he mate fakaesinó. ʻOku toe tuku foki kitautolu ki ha tuʻunga ʻo e fehangahangai, ʻa ia ʻoku siviʻi ai kitautolu ʻaki e ngaahi faingataʻa ʻo e moʻuí mo e ngaahi fakatauele ʻa e filí (vakai, 2 Nīfai 2:11–14; T&F 29:39; Mōsese 6:48–49)” (Tuʻu Maʻu ʻi he Tuí [2004], 56).

Tokoni ke ʻiloʻi ʻe he kau akó ʻa e ngaahi tokāteline naʻe akoʻi ʻi he kupuʻi lea ko ʻení, ʻaki hono fehuʻi ange:

ʻOku tokoniʻi fēfē kitautolu takitaha, ko e hako ʻo ʻĀtama mo ʻIví, ʻe he Hinga ʻa ʻĀtamá? (ʻOku tau moʻulaloa mo kitautolu foki, ʻo hangē ko ʻĀtama mo ʻIví, ki he mate fakaesinó mo fakalaumālié fakatouʻosi. ʻOku tau moʻui ʻi ha māmani hinga mo moʻulaloa ki he ngaahi faingataʻa ʻo e moʻuí mo e ngaahi fakatauele ʻa e filí. Kuo tuʻusi kitautolu mei he ʻao ʻo e Tamaí pea ʻoku tau fie maʻu e tokoni ʻa e Fakamoʻuí ka tau lava ʻo foki kiate Ia.)

Hiki ʻa e ngaahi fakamoʻoni folofola ko ʻení he palakipoé, pea tuku ange ha ngaahi miniti siʻi ke ako ai kinautolu ʻe he kau akó:

Loma 3:23

2 Nīfai 9:6–10

ʻAlamā 42:9–11, 14

Poupouʻi ʻa e kau akó ʻi heʻenau akó ke nau kumi ʻa e founga ʻoku tokoniʻi takitaha ai kitautolu ʻe he Hinga ʻa ʻĀtama mo ʻIví.

ʻOku fakamatalaʻi fēfeeʻi ʻe he ngaahi potufolofola ko ʻení ʻa e anga hono tokoniʻi kitautolu ʻe he Hinga ʻa ʻĀtama mo ʻIví? (Hiki e tali ʻa e kau akó ʻi he palakipoé. Neongo ʻe ala kehekehe ʻenau talí, kae mahalo te nau hangē ko ʻení: ʻOku tau angahala kotoa pē mo taʻemaʻa ʻi he ʻao ʻo e ʻOtuá; pea tuʻunga ʻi heʻetau angahalá, ʻoku tuʻusi ai kitautolu mei he ʻao ʻo e ʻOtuá; te tau aʻusia ʻa e mate fakasinó; ʻoku tau moʻui ʻi ha māmani hinga pea kuo pau ke tau ikunaʻi ʻa e “tangata fakakakanó” [Mōsaia 3:19].)

ʻEke ki he kau akó pe ʻoku ʻi ai haʻanau fehuʻi fekauʻaki mo e ngaahi tokāteliné mo e meʻa kuo nau akó. Fakaʻatā ʻa e fealēleaʻaki fakakalasí ke nau veteki ʻa e ngaahi fehuʻi ko ʻení. Hili ia pea fehuʻi ange:

ʻOku tokoni fēfē ʻa e ngaahi potufolofola ko ʻení ʻi hono fakamatalaʻi ʻa e ʻuhinga ʻoku tau fie maʻu kotoa ai ʻa Sīsū Kalaisí? ( ʻOku huhuʻi kitautolu ʻe he Fakalelei ʻa Sīsū Kalaisí mei he Hinga ʻa ʻĀtamá pea mei heʻetau talangataʻá.

Fakamatalaʻi ange ko e konga ʻo e palani ʻaloʻofa ʻa e ʻOtuá, hono fakaʻatā kitautolu ʻe he Fakalelei ʻa Sīsū Kalaisí ke tau hao mei he “meʻa fakamanavahē” ʻo e maté pea mo heli (vakai, 2 Nīfai 9:10), ʻa ia ko e mate fakaesinó mo fakalaumālié. Te tau toetuʻu kātoa. ʻE lava ke fufulu kitautolu mei heʻetau ngaahi angahalá ʻi heʻetau fakatomalá, tuʻunga ʻi he Fakalelei ʻa Sīsū Kalaisí. Ka ne taʻeʻoua ʻa Sīsū Kalaisi, he ʻikai ngata pē ʻi heʻetau ʻauhá, ka te tau moʻulaloa ki he tēvoló ʻi he kotoa ʻo ʻitānití.

Vahevahe ha fakamoʻoni nounou ki he fakapotopoto mo e ʻaloʻofa ʻo e palani ʻa e ʻOtuá. Fakamahino ki he kau akó ʻe lava ke ikunaʻi e ngaahi nunuʻa kotoa ʻo e Hingá, tuʻunga ʻi he Fakalelei ʻa Sīsū Kalaisí.

Ko e Mahuʻinga Hono Akoʻi ʻo e Fakaleleí

Fakakaukau ke lau pe huluʻi ʻa e konga vitiō ʻo e fakamatala ko ʻeni meia ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kau akó ke nau kumi ʻa e ʻuhinga ʻoku mahuʻinga ai ke fakatupulaki ʻetau mahino ki he Fakaleleí.

“ ʻI hoʻo manatuʻi ʻe Toetuʻú mo e totongi ne faí pea mo e meʻafoaki ne foaki mai ʻe he Fakaleleí, fakakaukauloto muʻa ki he meʻa ʻoku akoʻi mai ʻe he folofolá fekauʻaki mo e ngaahi meʻa toputapu ne hoko ko iá. ʻE fakamālohia hoʻo fakamoʻoni fakatāutaha ki honau moʻoní. ʻOku ʻikai ko ha ngaahi tefitoʻi moʻoni pē ʻokú ke ako maʻuloto. Kuo pau ke nau hoko ko e konga hoʻo moʻuí, ko ha poupou mālohi ke fakafepakiʻi ʻaki e ngaahi angahala lahi kuo hake mai ki hotau māmaní. …

“Ka naʻe taʻeʻoua ʻa e Fakaleleí, ne ʻikai mei lava ke fakahoko kakato e palani ʻo e fiefia ʻa e Tamai Hēvaní. ʻOku ʻomi ʻe he Fakaleleí ki he taha kotoa ʻa e faingamālie ke ikunaʻi ʻa e ngaahi nunuʻa ʻo e ngaahi fehālaaki ʻi heʻene moʻuí. ʻI heʻetau talangofua ki ha fono, ʻoku tau maʻu ai ha tāpuaki. ʻI heʻetau maumauʻi ha fono, ʻoku ʻikai ha meʻa ʻe toe mei he talangofua kimuʻá ke ne fakafiemālieʻi e ngaahi fiemaʻu ʻa e fakamaau totonú, koʻeuhí ko e fono ne maumauʻí. ʻOku fakaʻatā ʻe he Fakalelei ʻa e Fakamoʻuí kitautolu ke tau fakatomala mei ha talangataʻa pea hao ai mei ha tautea ne mei ʻomi ʻe he fakamaau totonú.

“ ʻOku tupulaki ʻa ʻeku loto ʻapasia mo e houngaʻia ki he Fakalelei ʻa e Tokotaha Māʻoniʻoni ʻo ʻIsilelí, ʻa e Pilinisi ʻo e Melinó, pea mo hotau Huhuʻí, ʻi heʻetau feinga ke maʻu ha mahino lahi ange ki aí. ʻOku ou ʻilo he ʻikai lava ʻe ha ʻatamai fakamatelie ʻo maʻu ha mahino lelei, pe lava ʻe he faʻahinga ʻo e tangatá ʻo fakahaaʻi lelei ʻa e mahuʻinga kakato ʻo e meʻa kuo fai ʻe Sīsū Kalaisi maʻá e fānau ʻa ʻetau Tamai Hēvaní ʻo fakafou ʻi Heʻene Fakaleleí. Ka ʻoku mahuʻinga ke tau takitaha ako ʻa e meʻa te tau lava, ʻo fekauʻaki mo iá. Ko e fakaleleí ko e konga mahuʻinga ia ʻo e palani ʻo e fiefia ʻa ʻetau Tamai Hēvaní ʻa ia ne ʻikai mei lava ʻo fakahoko kapau ne ʻikai ia. ʻE hanga ʻe hoʻo mahino ki he Fakaleleí mo e ngaahi fakakaukau ʻokú ne ʻoatú ʻo toe fakalahi hoʻo ngāue ʻaonga ʻaki ʻa e ʻiló, aʻusia, mo e ngaahi pōtoʻi ngāue ʻokú ke maʻu ʻi he moʻui fakamatelié. …

“ ʻOku ʻi ai ha fie maʻu vivili ke tau fakamālohia ʻa ʻetau mahino ki he mahuʻinga ʻo e Fakalelei ʻa Sīsū Kalaisí kae lava ke hoko ia ko e fakavaʻe mālohi ke langa ai ʻetau moʻuí. …

ʻE fakamālohia ʻe he fakalaulauloto fakamātoato ʻo e folofolá, fakataha mo e fekumi mo e lotu fakamātoató ʻa hoʻomou mahino mo e houngaʻia ʻi Heʻene Fakalelei mahuʻinga faú” (“ ʻOku Ne Moʻui! Ke Lāngilangiʻia Hono Huafá!” Ensign pe Liahona, Mē 2010, 75–76).

Tokoni ke ʻanalaiso ʻe he kau akó ʻa e fakamatala ʻa ʻEletā Sikotí ʻaki hano fai ange ha ngaahi fehuʻi hangē ko ʻení:

Ko e hā e ngaahi konga ʻo e lea ʻa ʻEletā Sikotí ʻokú ne fakamamafaʻi e mahuʻinga ke mahino e Fakaleleí? (Fakapapauʻi ʻoku ʻilo ʻe he kau akó ʻa e ngaahi fakamatala hangē ko ʻení: He ʻikai ngata pe “ ʻi he ʻaonga kiate kitautolu e mamahi ʻa e Fakamoʻuí ʻi he moʻui ko ʻení ka ʻi ʻitāniti kotoa”; “ ʻOku ʻai ʻe Heʻene Fakaleleí ke ngāue kakato e palani ʻo e fiefia ʻa ʻEne Tamai Hēvaní”; “ ʻOku puleʻi ʻe Sīsū ʻa e napangapangamālie ʻi he fakamaau totonú mo e tuʻunga ʻo e ʻaloʻofá ʻo tuʻunga ʻi heʻetau talangofuá”; “ ʻoku foaki ʻe he Fakaleleí ʻa e faingamālie kotoa pē ke ikunaʻi ai ʻa e ngaahi nunuʻa ʻo e ngaahi fehālaaki ne fai ʻi he moʻuí”; mo e “ ʻe tokoniʻi lahi ʻe hoʻo mahino ki he Fakaleleí pea mo e ʻilo ʻokú ne ʻoatu ki hoʻo moʻuí ke ngāue ʻaonga ʻaki e ʻilo pea mo e taukei kotoa pē, kae ʻumaʻā ʻa e ngaahi poto ʻokú ke maʻu ʻi he moʻui fakamatelié.”)
Naʻe fakamahino ʻe ʻEletā Sikoti ko e ngaahi tefitoʻi moʻoni ʻo e Fakaleleí “kuo pau ke mahulu hake ʻi he ngaahi tefitoʻi moʻoni ʻokú ke ako maʻulotó. Kuo pau ke nau hoko ko e konga ʻo ʻetau moʻuí.” ʻE anga fēfē hano ʻai ʻeni ʻe ha taha teu ngāue fakafaifekau ke hoko?

ʻOku tokolahi ha kakai kei talavou ʻoku ʻikai mahino kiate kinautolu ʻa e ngaahi tāpuakí, ʻo mavahe mei he fakamolemoleʻi pē ʻo e angahalá, ʻa ia ʻoku hoko ki heʻenau moʻuí tuʻunga he Fakaleleí. Koeʻuhí ke tokoni ke fakaloloto ʻe he kau akó ʻenau mahino ki he ngaahi tāpuaki ko ʻení, ʻoange ki he kalasí ha kiʻi taimi ke nau ako ai ʻa e ngaahi potufolofola ko ʻení, ʻo kumi ʻa e ngaahi tāpuaki ʻoku maʻu tuʻunga ʻi he Fakalelei ʻa Sīsū Kalaisí: Mōsaia 3:19; 4:3; 24:12–15; ʻAlamā 5:12–13; 7:11–13. Ka ʻosi ha taimi feʻunga, pea kole ki he kau akó ke nau fakamatalaʻi ha niʻihi ʻo e ngaahi tāpuaki lahi ʻo e Fakaleleí. Fakamatalaʻi fakanounou ʻenau talí ʻi he palakipoé.

Fakaʻaliʻali ʻa e fakamatala ko ʻení pea ʻai ha tokotaha ako ke ne lau leʻolahi ia:

“ ʻI he tupulaki ʻa hoʻo mahino ki he Fakalelei ʻa Sīsū Kalaisí, ʻe toe lahi ange ai ʻa e holi te ke maʻu ke vahevahe ʻa e ongoongoleleí mo e niʻihi kehé” (Malangaʻaki ʻEku Ongoongoleleí, 2).

Tokoni ke mahino lelei ange ki hoʻo kau akó e tefitoʻi moʻoni ko ʻení ʻaki haʻo fehuʻi ange:

Ko e hā ʻe tupulaki ai e loto ʻa ha taha ke ne fie vahevahe ʻa e ongoongoleleí ʻi he taimi ʻoku mahino ai kiate ia ʻa e Fakaleleí?

Vahe ʻa e kau akó ke nau ngāue mo ha mēmipa kehe ʻo e kalasí ʻo taufetongi ʻi hono lau leʻolahi ʻa e 1 Nīfai 8:10–12; ʻĪnosi 1:5–9; mo e Mōsaia 27:34–36 mo e 28:1–4. ʻAi ke nau kumi ha sīpinga ʻoku maʻu ʻi he ngaahi potufolofola ko ʻení. Ka hili ha taimi feʻunga, pea fakaafeʻi ha fānau ako ʻe niʻihi ke nau fakamatalaʻi ʻa e sīpinga ne nau maʻú. (Hili hono aʻusia ʻe Līhai,ʻĪnosi, pea mo e ngaahi foha ʻo Mōsaiá ʻa e ngaahi tāpuaki ʻo e Fakaleleí, naʻa nau ongoʻi ha loto holi ke vahevahe ʻa e ongoongoleleí mo tokoniʻi ha niʻihi kehe ke nau maʻu ʻa e ngaahi tāpuaki tatau.

Fai ange ʻa e fehuʻi ko ʻení, ke tokoniʻi ʻa e kau akó ke nau ongoʻi hono moʻoni mo e mahuʻinga ʻo e tefitoʻi moʻoni naʻá ke hiki ʻi he palakipoé:

Kapau ʻoku ʻikai fuʻu fakafoʻituitui, ko e hā ha aʻusia kuó ke maʻu ʻi he Fakaleleí kuó ne fakaʻaiʻai koe ke ke vahevahe ʻa e ongoongoleleí ki ha niʻihi kehe?
ʻOku fakaʻaiʻai fēfē koe ʻe hoʻo ʻilo mo ongoʻi ʻa e Fakaleleí ke ke ʻomi ha niʻihi kehe ke ofi ange kia Sīsū Kalaisi?

ʻOange ha kiʻi taimi ki he kau akó ke nau fakalaulauloto ai pe ʻoku hoko e mahino ʻa e Fakalelei ʻa Sīsū Kalaisí kiate kinautolú ko ha konga hono fakaʻaiʻai kinautolu ke nau ngāue fakafaifekaú, pea mo e meʻa te nau ala fai ke fakatupulaki ai e tuʻunga ʻo ʻenau fakahoungaʻi e meʻa kuo fai ʻe Sīsū Kalaisi maʻanautolú.

Ko hono Tokoniʻi ʻo e Kau Fiefanongó ke Nau Maʻu ʻa e Ngaahi Tāpuaki ʻo e Fakaleleí

Talaange ki hoʻo kau akó he ʻikai ha tokāteline ia te nau akoʻi ʻi heʻenau hoko ko e kau faifekaú ʻoku toe mahuʻinga ange ke mahino ki he kau fiefanongó mo e kau faifekaú ke nau tali ka ko e Fakalelei ʻa Sīsū Kalaisí.

ʻAi ke lau ʻe he kau akó ʻa e 2 Nīfai 2:6–8 mo kumi ʻa e meʻa naʻe akoʻi ʻe Līhai ʻoku totonu ke tau fai ʻaki ʻetau ʻilo ki he Fakaleleí. Ka hili ha tali ʻa ha fānau ako ʻe niʻihi, pea tokoniʻi ke mahino kiate kinautolu ʻa e fie maʻu ke mahino mo tali ʻe he kau fiefanongó ʻa e Fakaleleí ʻaki hano fakaʻaliʻali mo lau ʻa e fakamatala ko ʻeni naʻe fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

“Kuó u fehuʻi ki he kau faifekaú ʻi he ngaahi konifelenisi fakasouní, ʻa ia ko e ngaahi mōmēniti maʻongoʻonga taha ia ʻoku maʻu ʻe kimautolu kau Taki Māʻolungá mo e kau ʻeletā mo e kau sisitā kei talavoú, pe ko e hā ʻoku nau fiemaʻu ʻenau kau fiefanongó ke nau fai ʻi he ʻosi ʻenau talanoa mo kinautolú.

“ ʻOku kalanga atu ʻaki “Ke Papitaiso!’ ʻi ha leʻo mahino.

Te u pehē “ ʻIo,ʻ ʻoku tau fie maʻu ke nau papitaiso, ka ko e hā ʻoku fie maʻu ke ʻuluaki hoko aí?’ …

“… ʻOku meimei ke ʻikai teitei aʻu ʻa e kau faifekaú ia ʻo tala ʻa e ongo meʻa mahuʻinga taha ʻoku tau fie maʻu ʻa e kau fiefanongó ke nau fai kimuʻa pea toki papitaisó: tui ki he ʻEiki ko Sīsū Kalaisí pea fakatomala mei heʻenau ngaahi angahalá. Ka ʻ ʻoku mau tui ko e ngaahi ʻuluaki tefitoʻi moʻoni mo e ngaahi ouau ʻo e Ongoongoleleí ko e: ʻuluakí, Tui ki he ʻEiki ko Sīsū Kalaisí; uá: Fakatomalá; [pea] tolú, Papitaiso ʻi he fakauku ke fakamolemoleʻi ʻa e ngaahi angahalá; faá, Hilifaki ʻo e nimá ke maʻu ʻa e meʻa-foaki ʻo e Laumālie Māʻoniʻoní’ Ngaahi Tefito ʻo e Tui 1:4; ko e tānaki atu hono fakamamafaʻí).

“Kuo pau ke langa ʻe moʻui foʻou ʻa e tokotaha uluí ʻi he tui ki he ʻEiki ko Sīsū Kalaisí mo ʻEne feilaulau huhuʻí–ha fakamoʻoni ko e ʻAlo moʻoni Ia ʻo e ʻOtuá, ʻoku moʻui ʻi he taimí ni, pea ko e matapā moʻoni Ia ki he tākangá, pea ko Ia tokotaha pē ʻokú ne maʻu ʻa e kī ki hotau fakamoʻuí mo e hākeakiʻí. Kuo pau ke muiaki ʻi he tui ko iá ʻa e fakatomala moʻoní, ʻa e fakatomala ʻokú ne fakahaaʻi ʻetau holi ke maʻa mo fakafoʻou pea mo kakató, ʻa e fakatomala te ne fakaʻatā ke tau ʻekea ʻa e ngaahi tāpuaki kakato ʻo e Fakaleleí” (Missionary Work and the Atonement,” Ensign, Maʻasi 2001, 10–11).

Pea fehuʻi ange leva:

Ko e hā kuo pau ke fai ʻe ha taha fiefanongo ke ne ʻekea ai ʻa e ngaahi tāpuaki kakato ʻo e Fakaleleí? (Tui kia Sīsū Kalaisi, fakatomala, pea papitaiso.)

Fakamatalaʻi ange ki he kau akó ʻoku fakamatalaʻi ʻe he Tokāteline mo e Ngaahi Fuakava 20:37 ʻa e ngaahi fie maʻu ki he papitaisó. ʻAi ke lau ʻe he kau akó ʻa e vēsí mo kumi ʻa e meʻa ʻoku totonu ke fai ʻe he kau fiefanongó kimuʻa pea toki papitaisó. Fehuʻi ange:

Ko e hā ha ngaahi meʻa ʻoku totonu ke fai ʻe he kau fiefanongó ʻoku fakahaaʻi ai ʻoku nau fakatupulaki ha tui kia Sīsū Kalaisi? (Te nau fakavaivaiʻi ʻa kinautolu, fakatomala mei heʻenau angahalá, fai ha ngaahi ngāue lelei, mo ha ngaahi meʻa pehē.)
Ko e hā ʻa e fatongia ʻoku fakahoko ʻe he kau faifekaú ʻi hono tokoniʻi ʻo e kau fiefanongó ke nau fakakakato ʻa e ngaahi fie maʻu ki he papitaisó? ʻOku fekauʻaki fēfē ʻeni mo hoʻo taumuʻa ko e faifekau? (Kapau ʻe fie maʻu, fakamanatu ki he kau akó ʻa e ngaahi tefitoʻi moʻoni mei he lēsoni kuo ʻosí.)

ʻOku Fekauʻi e Kau Faifekaú ke Nau Akoʻi ʻa e Fakatomalá

Hiki ʻa e fehuʻi ko ʻení ʻi he palakipoé:

Ko e hā ʻa e meʻa mahuʻinga taha ʻe lava ke fai ʻe he kau faifekaú ke tokoni ʻi hono ʻomi ʻo e fānau ʻa e ʻOtuá kia Kalaisí?

ʻAi ke lau ʻe he kau akó ʻa e Tokāteline mo e Ngaahi Fuakava 18:11–14 mo kumi ʻa e tali ki he fehuʻi ʻoku ʻi he palakipoé. Aleaʻi e tali ʻa e kau akó ki he fehuʻí, pea ʻeke ange:

Ko e hā ʻoku hoko ai ʻa e fakatomalá ko e founga pē ia ʻe taha ʻe lava ai e fānau ʻa e ʻOtuá ʻo maʻu ʻa e ngaahi tāpuaki kakato ʻo e Fakaleleí? (Vakai, Mōsaia 16:13; ʻAlamā 11:37; mo e Hilamani 14:13.)

Hiki ʻa e tali ko ʻení ki he fehuʻi kuo ʻosi fokotuʻu ʻi he palakipoé:

ʻOku fekauʻi ʻa e kau faifekaú ke nau akoʻi ʻa e fakatomalá koeʻuhí ke lava ʻa kinautolu ʻoku nau akoʻí ʻo maʻu ʻa e ngaahi tāpuaki kakato ʻo e Fakaleleí mo kamata ha moʻui foʻou ʻia Kalaisi.

Vaheua e kalasí. ʻAi ha vaheua ʻe taha ʻo e kalasí ke nau ako ʻa e konga ʻoku ui ko e “Ko e Fakaleleí” ʻi he peesi 58–59 ʻo e Malangaʻaki ʻEku Ongoongoleleí. ʻAi e vaheua ʻe taha ʻo e kalasí ʻoku toé ke nau ako ʻa e konga ʻoku ui ko e “ ʻE Lava ke Fakamaʻa Kitautolu mei he Angahalá ʻo Fou ʻia Kalaisi” ʻi he peesi 68–69 ʻo e Malangaʻaki ʻEku Ongoongoleleí. ʻOange ki he kau akó ha ngaahi miniti ke nau lau mo teuteu ai ke akoʻi ha vakai fakalūkufua ʻi ha miniti ʻe ua ʻo e fakamatala naʻa nau laú. ʻAi ke kau ʻi he vakai fakalūkufuá ʻa e kau akó ʻa hono poupouʻi kinautolu ke nau (1) kumi ke ʻilo mo fakamatalaʻi ʻa e ngaahi poini mahuʻinga ʻo e tokāteliné, (2) vahevahe ha aʻusia fakafoʻituitui pe potufolofola ʻokú ne poupouʻi ʻa e tokāteliné, pea (3) fakamoʻoniʻi ʻa e meʻa ʻoku nau akoʻí. Fakamatalaʻi fakanounou ʻa e ngaahi sitepu ʻe tolu ko ʻeni ʻi he palakipoé.

Ka hili hano maʻu ʻe he kau akó ha taimi feʻunga ke teuteu, te ke ala ʻai ʻa e fānau ako mei he kulupu ʻuluakí ke nau tauhoa mo ha taha mei he kulupu ʻe tahá ke na taufetongi ʻi hono fakahoko ʻiate kinaua ʻa e akoʻí. Ka ʻosi ha maʻu ʻe he tokotaha ako kotoa pē ha faingamālie ke akoʻi ha mēmipa kehe ʻo e kalasí, te ke ala fakaafeʻi ha tokotaha ako te ne loto fiemālie ke haʻu ki muʻa he kalasí ʻo akoʻi ʻene fakakaukau fakalūkufuá ki he kalasí. Ka ʻosi ia, fakahīkihikiʻi ʻa e tokotaha ako naʻá ne fai e fakamatalá pea kole ki he kalasí pe ʻoku ʻi ai haʻanau fakamatala fekauʻaki mo e aʻusia ko ʻení. ʻEke ange pe ʻoku ʻi ai haʻanau fehuʻi, peá ke fehuʻi ange:

Naʻe ongo fēfē hoʻo akoʻi mo fakamoʻoniʻi e Fakalelei ʻa Sīsū Kalaisí?
Ko e hā ha ngaahi meʻa naʻá ke ʻilo ʻe ala tokoni atu ʻi he taimi te ke akoʻi ai ʻa e kau fiefanongó fekauʻaki mo e Fakalelei ʻa Sīsū Kalaisí?
Ko e hā ʻokú ke ʻamanaki lelei ai ki hono akoʻi ʻa e Fakalelei ʻa Sīsū Kalaisí ki he niʻihi kehé?

Ko Hono Ngāueʻaki ʻo e Folofolá

Fakamatalaʻi ki he kau akó, te nau lava ʻi heʻenau hoko ko e kau faifekaú ke faiako ʻi ha mālohi lahi ange ʻi he taimi te nau ngāueʻaki ai ʻa e folofolá. ʻAi ha vaheua ʻe taha ʻo e kalasí ke nau fakatotolo he ngaahi potufolofola ʻi he konga “Ko e Fakaleleí” ʻo e puha Ako Folofolá he peesi 59 ʻo e Malangaʻaki ʻEku Ongoongoleleí. ʻAi ʻa e vaheua ʻe taha ʻo e kalasí ʻoku toé ke nau fakatotolo he potufolofola ʻi he puha Ako Folofola he peesi 61 ʻo e Malangaʻaki ʻEku Ongoongoleleí. Poupouʻi ʻa e kau akó ke nau fili ha potufolofola fekauʻaki mo e Fakalelei ʻa Sīsū Kalaisí ʻoku mahino kiate kinautolu pea te nau ongoʻi ʻoku nau taukei feʻunga ke fakamoʻoniʻí. Ka hili hano ʻoange ha taimi feʻunga ki he fānau akó ke nau vahevahe ai, fehuʻi ange:

ʻE anga fēfē haʻo ngāueʻaki e potufolofola naʻá ke filí ke tokoniʻi ha taha ke mahino lelei ange ki ai ʻa e Fakalelei ʻa Sīsū Kalaisí? (Poupouʻi ha fānau ako ʻe niʻihi ke nau tali.)
ʻOkú ke pehē ko e hā ʻoku mahuʻinga ai ke ngāueʻaki ʻe he kau faifekaú ʻa e folofolá ʻi he taimi ʻoku nau faiako aí?

ʻAi ʻa e kau akó ke nau huke ki he konga ʻoku ui ko e “Fakaʻaongaʻi ʻa e Folofolá” he peesi 215 ʻo e Malangaʻaki ʻEku Ongoongoleleí. ʻAi ha tokotaha ako ke ne lau ʻa e ʻuluaki palakalafí, kau ai mo e ngaahi meʻa ʻe fā ʻoku fakaʻilongaʻi atú, pea kole ki he kau mēmipa ʻo e kalasí ke nau fakakaukauʻi ʻa e founga ʻoku tatau ai ʻenau fakakaukau kau ki he mahuʻinga hono ngāueʻaki e folofolá mo e fakamatala ʻi he Malangaʻaki ʻEku Ongoongoleleí.

Talaange ki hoʻo kalasí te nau akoʻi ʻi ha ngaahi miniti siʻi mei heni ha tokotaha ako kehe, ʻo ngāueʻaki e potufolofola ki he Fakaleleí naʻa nau fili kimuʻá. Fakamatalaʻi ange ʻoku ʻi ai ha ngaahi tefitoʻi moʻoni ʻi he Malangaʻaki ʻEku Ongoongoleleí ʻe tokoni kiate kinautolu ʻi heʻenau faiakó. ʻAi ha tokotaha ako ke ne lau leʻolahi ʻa e konga ʻuluʻi tohi siʻisiʻi ʻoku ui ko e “Fakafeʻiloaki e folofolá” ʻi he peesi 216 ʻo e Malangaʻaki ʻEku Ongoongoleleí. ʻEke pe ʻoku ʻi ai ha fehuʻi ʻa e kau akó fekauʻaki mo e sitepu ko ʻení, pea ʻoange ha kiʻi taimi ke nau fakakaukauʻi ai pe te nau fakafeʻiloaki fēfē ʻa e potufolofola naʻa nau filí.

Hokó, ʻai ha tokotaha ako ʻe taha ke ne lau leʻolahi ʻa e konga ʻuluʻi tohi siʻisiʻi ʻoku ui ko e “Lau e potu folofolá” he peesi 216 ʻo e Malangaʻaki ʻEku Ongoongoleleí. ʻOange ha kiʻi taimi ki he kau akó ke nau lau fakalongolongo ai ʻenau potufolofola naʻe filí pea fakaʻilongaʻi ha ngaahi foʻi lea pe kupuʻi lea te nau ala fie maʻu ke fakamatalaʻi ki ha fiefanongo. Hili ia pea ʻai ha tokotaha ako kehe ke ne lau leʻolahi ʻa e konga ʻuluʻi tohi siʻisiʻiʻoku ui ko e “Fakaʻaongaʻi ʻa e folofolá” ʻi he peesi 216. Toe ʻeke ki he kau akó pe ʻoku ʻi ai haʻanau fehuʻi.

ʻOku totonu ke ke fakatātaaʻi ʻa e poto ko ʻení kiate kinautolu, ke tokoni ke ola lelei e faiako ʻa e kau akó mei he folofolá. Fakakaukau ke ke fili ha veesi ʻe taha pe ua mei he Mōsaia 3:7–11 mo e 16–19 ke akoʻi koeʻuhí ke ʻoua naʻá ke fakaʻaongaʻi ha taha ʻo e ngaahi potufolofola naʻe fili ʻe he kau akó. ʻAi ke mahinongofua mo nounou hoʻo fakatātaaʻi ʻa e sitepú ʻe tolu: fakafeʻiloaki, lau, mo fakaʻaongaʻi ʻa e potufolofolá. ʻE ʻaonga ʻa e fakatātā ko ʻení ke ʻoua ʻe ongoʻi mafasia ʻa e kau akó ʻi he meʻa ʻoku fie maʻu meiate kinautolú. Ka ʻosi, pea ʻeke ki he kau akó pe ʻoku ʻi ai haʻanau fehuʻi.

ʻOange ha kiʻi taimi ki he kau akó ke nau teuteu ai ke akoʻi ha potufolofola kuo nau fili ʻo ngāueʻaki ʻa e sitepu ʻe tolu ʻoku ʻi he Malangaʻaki ʻEku Ongoongoleleí. Hili ia pea fakatauhoa ʻa e kau akó mo ha mēmipa kehe ʻe taha ʻo e kalasí, pea ʻai ke na taufetongi ʻi hono fakahoko ʻiate kinaua ʻa e akoʻí. Ko e taimi ʻe ʻosi ai e faiako ʻa e fānauakó, fakamahino ange ko e taimi ʻoku nau ako ai ʻa e folofolá mo e Malangaʻaki ʻEku Ongoongoleleí, ʻe tupulaki honau ivi mo e lotolahi ke akoʻi ʻa e ongoongoleleí.

ʻEke ki hoʻo kau akó pe ʻoku ʻi ai hanau taha te ne fie vahevahe ʻene ongo fekauʻaki mo Sīsū Kalaisí, tautautefito ki he Fakalelei ʻa Sīsū Kalaisí, ke fakaʻosi ʻaki e lēsoni ʻo e ʻaho ní.

Fakaafe ke Ngāue

Fakaafeʻi hoʻo kau akó ke nau fakahoko ha taha pe toe lahi ange ʻi he ngaahi meʻa ko ʻení ke tokoni ke mahino lelei ange kiate kinautolu ʻa e Fakalelei ʻa Sīsū Kalaisí.

ʻI he lolotonga hoʻo ako folofola fakafoʻituituí, fakaʻilongaʻi pe valivali ʻa e ngaahi potufolofola ʻoku tokoni ke mahino kiate koe ʻa Sīsū Kalaisi mo ʻEne Fakaleleí.
Vahevahe hoʻo fakamoʻoni ki he Fakaleleí mo ha taha ʻi ʻapi, ʻi he lotú, pe ʻinitanetí.
Kapau ʻoku faingamālie, peá ke fakamoʻoni ki he Fakaleleí he lolotonga ha faingamālie akoʻi mo e kau faifekau taimi kakató.
Tuku ha taimi ʻi he ʻaho kotoa pē ke ako ai ki he Fakalelei ʻa Sīsū Kalaisí ʻi he folofolá.