Ako ʻaki e Laumālié

Talateú

Koeʻuhí ke tupulaki ʻa e kau faifekaú ʻi he ongoongoleleí mo nofomaʻu ʻi he hala ʻoku fakatau ki he moʻui taʻengatá, ʻoku fie maʻu ke nau fakatupulaki ha natula ke ako folofola. ʻOku fakamoleki ʻe he kau faifekaú ʻi he ngaahi senitā akoʻanga fakafaifekaú ha ngaahi houa ʻi he ʻaho kotoa pē ke nau ako ʻiate kinautolu pē pea mo honau ngaahi hoá. ʻOku fie maʻu kinautolu ʻi he malaʻe ngāue fakafaifekaú ke hoko atu ʻenau ako ʻo e ongoongoleleí ʻi he ʻaho kotoa pē. Kuo pau ke nau fekumi ʻi he “ako pea ʻi he tuí foki” (T&F 88:118) ka nau lava ʻo fokotuʻu ha tānakiʻanga ʻo e ʻilo ki he ongoongoleleí mo fakatupulaki ʻenau ului fakafoʻituituí. ʻOku mahuʻinga ke maʻu ʻe he kau faifekaú ʻa e tānakiʻanga ʻilo ko ʻeni naʻe maʻu ʻi he ako ne tataki ʻe he Laumālié ka nau lava ʻo faiako ʻaki ʻa e mālohí mo fakahoko ʻenau taumuʻá.

Tomuʻa Teuteu

Ako ʻa e Tokāteline mo e Ngaahi Fuakava 8:2–3; 9:7–8; 11:12–17, 21–22, 26–28; mo e 138:1–2, 11
Ako ʻa e Malangaʻaki ʻEku Ongoongoleleí,peesi 19–21, 25–28.
ʻOange ha ngaahi laʻi pepa ke fakaʻaongaʻi ʻe he kau akó kapau ʻoku ʻikai ke ʻi ai haʻanau tohinoa ako.
Mateuteu ke huluʻi ʻa e foʻi vitiō “Advice for Studying the Scriptures” (2:07), ʻoku maʻu he LDS.org.
Teuteu ʻa e fakamatala ke tufa ʻoku ui ko e “ ʻUlungaanga Ako Fakafoʻituitui ʻo e Folofolá,” ʻoku maʻu he fakaʻosinga ʻo e lēsoní.
Mateuteu ke fakaʻaliʻali ha tā ʻo Siosefa mo Hailame Sāmita.

Siosefa mo Hailame Sāmita

Ngaahi Fokotuʻu ki hono Akoʻí

Ko e Mahuʻinga Hono Ako ʻo e Ongoongoleleí

Fakaʻaliʻali ki he kau akó ha tā ʻo Siosefa Sāmita mo hono tokoua ko Hailamé pea kole ange ke fakaava ʻenau folofolá ki he Tokāteline mo e Ngaahi Fuakava 11. Tokoni ke mahino ki he kau akó ʻa e kakano ʻo e vahe ko ʻení ʻaki hano fakamatalaʻi ange naʻe lolotonga hono liliu ʻe Siosefa Sāmita e Tohi ʻa Molomoná, naʻe fakaʻau ʻo mahuʻingaʻia lahi hono tokoua lahi ko Hailamé ʻi he ngāué mo loto ke ne vahevahe ʻa e pōpoaki ʻo e Fakafoki mai e Ongoongoleleí mo ha niʻihi. Naʻe kole ʻe Hailame kia Siosefa ke ne kole ha fakahā maʻana, ʻi heʻene fie maʻu e finagalo ʻo e ʻEikí. ʻOku lekooti ʻa e tali ʻa e ʻEikí ʻi he Tokāteline mo e Ngaahi Fuakava 11. Naʻe ʻi ha tuʻunga tatau ʻa Hailame, ʻi ha ngaahi meʻa lahi, mo e kau mēmipa hoʻomou kalasí, ʻa ia ʻoku nau teuteu ke vahevahe ʻa e pōpoaki ʻo e ongoongolelei kuo fakafoki maí.

ʻAi ha toko ua he kau akó ke na taufetongi ʻi hono lau leʻolahi ʻa e Tokāteline mo e Ngaahi Fuakava 11:15–17 kae muimui pē ʻa e kalasí, mo kumi ʻa e faleʻi naʻe fai ʻe he ʻEikí kia Hailamé. Hili ia pea fehuʻi ange:

Ko e hā naʻe talaange ai ʻe he ʻEikí kia Hailame ke “tatali ʻo fuofuoloasiʻi ange” pea toki vahevahe ʻa e pōpoaki ʻo e ongoongoleleí ki he niʻihi kehé?

ʻAi ʻa e kau akó ke nau lau ʻa e Tokāteline mo e Ngaahi Fuakava 11:21–22 mo e 26, mo kumi ʻa e faleʻi ʻoku kaunga ki he kau teuteu ngāue fakafaifekau he ʻahó ni.

Ko e hā naʻe tuʻutuʻuni ʻe he ʻEikí ke fai ʻe Hailame ʻi heʻene teuteu ke vahevahe ʻa e ongoongoleleí mo e niʻihi kehé? ʻOku ʻuhinga ki he hā ke maʻu e lea ʻa e ʻOtuá? ʻOku ʻuhinga ki he hā ke mataʻikoloa ʻaki e folofola ʻa e ʻEikí ʻi ho lotó?
ʻE tokoni fēfē ʻa e faleʻi ʻa e ʻEikí he ngaahi veesi ko ʻení ki ha taha he ʻahó ni ʻoku teuteu ke ngāue fakafaifekau? (Neongo te nau ala fakaʻaongaʻi ha ngaahi fakalea kehe, ka ʻoku totonu ke ʻilo ʻe he kau akó ʻa e tefitoʻi moʻoni ko ʻení: ʻOku teuteuʻi ʻe he ako ʻo e ongoongoleleí ʻa e kau faifekaú ke nau malangaʻaki ʻa e ongoongoleleí ʻi he Laumālié pea mo e mālohi.)
Ko e hā e ngaahi tāpuaki ʻoku talaʻofa mai ʻe he ʻEikí kiate kinautolu ʻoku “feinga ke maʻu [ʻEne] leá”?

ʻAi ha tokotaha ako ke huke ki he peesi 215 ʻi heMalangaʻaki ʻEku Ongoongoleleí, pea ʻai ha tokotaha ako ke ne lau leʻolahi ʻa e palakalafí ʻoku kamata ʻi he “Ko hoʻo malava ko ia ke faiako ʻaki e mālohi.” Hili ia pea fehuʻi ange:

Ko e hā ha ngaahi fakakaukau ʻi he palakalafí ni ʻokú ne fakamamafaʻi hono mahuʻinga ʻo e ako folofola fakaʻahó kiate kinautolu ʻoku nau fie hoko ko ha kau faifekau leleí? (ʻOku teuteuʻi ʻe he ako folofolá ʻa e kau faifekaú ke nau akoʻi ʻa e ongoongoleleí ʻaki ʻa e mālohi.)

Talaange ki he kau akó ko e toenga ʻo e lēsoní ʻe tukutaha ia ki he founga te nau lava ai ʻo ako ha meʻa lahi ange ʻi heʻenau ako folofola fakafoʻituitui. Poupouʻi ʻa e kau akó ke nau fakalaulauloto ʻi he toenga ʻo e lēsoní ki ha founga ke fakaʻaongaʻi ai ʻa e meʻa ʻoku nau akó ke fakatupulaki ʻa e ola ʻo ʻenau ako folofolá mo hono ako ʻo e ongoongoleleí.

Ko Hono Fakaʻaongaʻi ʻo ha Tohinoa Ako

Fakahinohino ʻa e kalasí ke nau huke ki he peesi x ʻi he talateu ʻo e Malangaʻaki ʻEku Ongoongoleleí. Fakaafeʻi ha toko ua he kau akó ke na lau leʻolahi ʻa e palakalafi ʻe ua ʻi he konga ʻuluʻitohi iiki ʻo e “Tohinoa Akó”. Ka ʻosi e laukonga ʻa e ongo tamaiki akó, fehuʻi ange:

Fakatatau mo e konga ko ʻení, ʻe founga fēfē ha tokoniʻi koe ʻe he tohinoa akó ʻi hoʻo ako ʻa e ongoongoleleí?
Ko e hā ʻe mahuʻinga ai ke lekooti ʻa e ngaahi fakakaukau mo e ngaahi ongo ko ʻeni ʻokú ke maʻu lolotonga hono ako e ongoongoleleí?

Fakakaukau ke ke ʻeke ki hoʻo kau akó pe ʻoku ʻi ai hanau taha ʻoku ʻi ai haʻane tohinoa ako, pea fakaafeʻi kinautolu ʻoku ʻi aí ke nau fakamatalaʻi ʻa e founga kuo ʻaonga ai kiate kinautolu ʻenau tohinoá. Poupouʻi ʻa e kau akó ke nau kamata fakaʻaongaʻi ʻa e tohinoa akó kapau kuo teʻeki ai ke nau fai ia. Fakamanatuʻi ange, ʻe lava pē ke faingofua mo ʻikai ke totongi mamafa e tohinoa akó ʻo hangē ko ha tohinoa kuo fakatakafi, kiʻi pepa, pe ʻū lauʻipepa ʻi ha takafi fefeka. Te nau toe lava foki ke fakaʻaongaʻi ʻa e meʻangāue ki he fakamatalá mo e tohinoá ʻi he LDS.org pe ko ha polokalama (app) hiki fakamatala ʻi ha meʻangāue fakaʻilekitulōnika. Poupouʻi ʻa e kau akó ke nau ʻomai ha tohinoa ako ki he kalasí takitaha ke lekooti ai ʻa e ngaahi fakakaukau, ngaahi ongo, mo e ngaahi ʻilo ʻoku nau maʻu ʻi he kalasí.

Ako ʻaki ʻa e Laumālié

Vahevahe tautau toko ua ʻa e kau akó. Fakaafeʻi ke nau ngāue fakataha ke lau ʻa e palakalafi hono ua he peesi 19 ʻo e Malangaʻaki ʻEku Ongoongoleleí pea toki aleaʻi ʻa e meʻa ʻoku fie maʻu ke hoko ai ha ngaahi aʻusia ako mahuʻinga he folofolá. Ka hili ha maʻu ʻe he kau akó ha taimi ke aleaʻi ʻa e palakalafí, fakaafeʻi ha niʻihi ke nau vahevahe ha niʻihi ʻo e ngaahi tefitoʻi fakakaukau mei heʻenau fealēleaʻakí. Te ke ala fai ha ngaahi fehuʻi hangē ko ʻení:

ʻOku ʻuhinga ki he hā ke ako ʻaki ʻa e “loto moʻoni”? (ʻOku ʻuhinga ʻa e loto moʻoni ke tau taumuʻa ke talangofua pe fakaʻaongaʻi ʻa e meʻa ʻoku tau akó.)
ʻE ala faitokonia fēfē ha taha ʻi haʻane ako ʻa e ongoongoleleí ʻaki ʻa e “loto moʻoní” mo e “fiekaia mo e fieinua ki he māʻoniʻoní”? (Fakakaukau ke ke fai ange ʻa e ngaahi fehuʻi ko ʻení hili hano ʻomai e tali ʻa e kau akó, ke poupouʻi kinautolu ke nau toe fakakaukauʻi ange ʻa ʻenau talí. Hangē ko ʻení, kapau ʻe pehē ʻe he tali ʻa e kau akó ʻe hāsino e loto moʻoní ʻi he founga lotu ʻa ha taha, te ke ala kole ange ke nau fakamatalaʻi ʻa e founga ʻe ala kehe ai e lotu ia ʻa ha taha. Kapau ʻe tali ha taha ako ʻe hāsino ʻi heʻenau ngaahi holí, kole ange ke nau fakamatalaʻi ʻa e foʻi fakakaukau ko iá.)

Kole ki ha kau ako ʻe toko tolu ke nau taufetongi ʻi hono lau leʻolahi ʻa e ngaahi palakalafi ʻi he konga ʻoku ui ko e “Ako ʻi he Laumālie Māʻoniʻoní” ʻi he peesi 20–21 ʻo e Malangaʻaki ʻEku Ongoongoleleí. ʻAi e toenga ʻo e kalasí ke nau muimui pē mo fakaʻilongaʻi ʻa e ngaahi tāpuaki ʻoku tau maʻu he taimi ʻoku tokoniʻi ai kitautolu ʻe he Laumālie Māʻoniʻoní ke tau ako ʻa e ongoongoleleí. Hili ia pea fehuʻi ange leva:

Ko e hā ha ngaahi tāpuaki ʻe lava ke tau maʻu ʻi he taimi ʻoku fakahinohino ai ʻe he Laumālie Māʻoniʻoní ʻetau ako e ongoongoleleí? (Fakakaukau ke ke hiki ʻa e tefitoʻi moʻoni ko ʻení he palakipoé lolotonga e tali ʻa e kau akó: Ko e taimi ʻoku tataki ai ʻe he Laumālie Māʻoniʻoní ʻetau ako e ongoongoleleí, ʻoku tau mau ha maama mo ha mahino lahi ange.)

Lau pe fakaʻaliʻali ʻa e kupuʻi lea ko ʻeni ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, ke tokoni ke mahino lelei ange ki he kau akó ʻa e founga te nau ala fakaafeʻi ai ʻa e Laumālie Māʻoniʻoní ke akoʻi kinautolu he lolotonga ʻenau ako e ongoongoleleí. Fakaafeʻi hoʻo kau akó ke nau kumi ʻa e meʻa te nau lava ʻo fakahoko ke maʻu ha meʻa lahi ange ʻi heʻenau ako e folofolá.

“Koʻeuhí ke tohi ʻa e ongoongoleleí ʻi ho lotó, ʻe fie maʻu ia ke ke ʻiloʻi pe ko e hā ʻa e ongoongoleleí pea mo toe mahino lelei ange kiate koe. ʻA ia ko hono ʻuhingá, kuo pau ke ke ako ia. ʻI heʻeku pehē ʻʻakó,’ ʻoku ou ʻuhinga ki ha meʻa ʻoku toe lahi ange ʻi he laukongá ʻataʻatā pē. Ko ha meʻalelei he taimi ʻe niʻihi ke lau ha tohi folofola ʻi ha vahaʻa taimi tukupau ke ʻiloʻi fakalūkufua ʻene pōpoakí, ka ko e uluí, ʻoku totonu ke ke tokanga lahi ange ia ki he lahi ʻo e taimi ʻokú ke fakamoleki ʻi he folofolá ʻi he lahi ʻo e meʻa ʻokú ke lau ʻi he taimi ko iá. ʻOku ou ʻilo ʻokú ke faʻa lau ha ngaahi veesi he taimi ʻe niʻihi, pea kiʻi mālōlō ʻo fakalaulauloto ki ai, pea toe lau fakalelei ange ʻa e ngaahi vēsí, pea ʻi hoʻo fakakaukau ko ia ki hono ʻuhingá, mo lotua ke mahino, pea mo fehuʻi ʻi ho ʻatamaí, mo tatali ki ha ueʻi fakalaumālie, pea mo hiki ʻa e ngaahi ongo mo e ngaahi ʻilo ʻoku hokó, koeʻuhi ke ke lava ʻo manatuʻi mo ako lahi ange ai. ʻI hoʻo ako ʻi he founga ko ʻení, mahalo he ʻikai te ke lau ha ngaahi vahe pe veesi lahi ʻi ha haafe houa, ka te ke fakaʻataʻatā ai ha potu ʻi ho lotó maʻá e folofola ʻa e ʻOtuá, pea te Ne folofola atu kiate koe” (“ ʻO ka Ke ka Liliu,” Ensign pe Liahona, Mē 2004, 11. Ke maʻu ha ngaahi fakakaukau lahi ange, vakai ki he Lisiate G. Sikoti, “Founga Hono Maʻu ʻo e Fakahā mo e Tataki Fakalaumālie Ki Hoʻo Moʻui Fakatāutahá,” Ensign pe Liahona, Mē 2012, 45–47).

Tokoni ke ʻanalaiso ʻe he kau akó ʻa e lea ʻa ʻEletā Kulisitofasoní ʻaki hano fai ange ngaahi fehuʻi ko ʻení:

Ko e hā ʻa e ngaahi meʻa naʻe pehē ʻe ʻEletā Kulisitofasoni ʻe maʻu ai ha mahino lahi ange ʻo e folofolá?
ʻOku founga fēfē hono fakaʻatā ʻe he ngaahi meʻa ko ʻení ke akoʻi koe ʻe he Laumālie Māʻoniʻoní?
Kuo tokoniʻi fēfē koe ʻe ha taha pe toe lahi ange ʻo e ngaahi tōʻonga ko ʻení ke fakaloloto hoʻo mahino ki he ongoongoleleí?

Fakamatalaʻi ange ʻoku ʻaonga ʻi he taimi ʻoku ako ai ʻa e folofolá ke mahino ʻa e founga ʻoku tau fetuʻutaki ai mo e Laumālie Māʻoniʻoní . Vahevahe ʻa e kalasí ke nau tauhoa (mahalo ko ha ongo hoa tatau pē mei he ʻekitivitī kimuʻá). Hiki ʻa e ngaahi fakamoʻoni fakafolofola ko ʻení ʻi he palakipoé, pea kole ki he kau akó ke nau hiki ia ʻi heʻenau tohinoa akó pe ʻi ha laʻi pepa: Tokāteline mo e Ngaahi Fuakava 8:2–3; 9:7–8; 11:12–14; mo e 138:1–2, 11.

ʻOange ki he kau akó ha taimi ke nau ako ai ʻa e ngaahi potufolofola ko ʻení mo fakaʻilongaʻi ha ngaahi foʻi lea pe kupuʻi lea ʻokú ne fakamatalaʻi ʻa e founga fetuʻutaki ʻa e Laumālie Māʻoniʻoní mo kitautolú. Te nau ala hiki foki mo ha fanga kiʻi fakamatala ʻi heʻenau tohinoa akó fekauʻaki mo e meʻa ʻoku nau ako mei he ngaahi potufolofola ko ʻení. Kole ki he kau akó ke nau aleaʻi mo honau hoá ʻa e meʻa naʻa nau fakaʻilongaʻi ʻi he ngaahi vēsí pea mo e meʻa naʻa nau akó. Ka hili hano ʻoange ha taimi feʻunga, fai ange ʻa e ngaahi fehuʻi ko ʻení:

Ko e hā ha ngaahi foʻi lea pe kupuʻi lea naʻá ke maʻu ʻoku nau fakamatalaʻi ʻa e founga fetuʻutaki ʻa e Laumālie Māʻoniʻoní mo kitautolú? (Hiki e tali ʻa e kau akó ʻi he palakipoé.)
Ne anga fēfē hano akoʻi koe ʻe he Laumālie Māʻoniʻoní ʻi ha taha ʻo e ngaahi founga ko ʻení mo fakalahi hoʻo mahino ki he tokāteline mo e tefitoʻi moʻoni ʻo e ongoongoleleí? Ko e hā haʻo ngaahi aʻusia pau?

Fakaafeʻi ʻa e kau akó ke nau huke ki he peesi 25 ʻo e Malangaʻaki ʻEku Ongoongoleleí, pea ʻai ha tokotaha ako ke ne lau leʻolahi ʻa e ʻuluaki meʻa ʻe fā kuo lisi ʻi he ʻuluʻi tohi ko e “Ngaahi Fakakaukau mo e Ngaahi Fokotuʻu Ki Hono Akó.” Fakakaukau ke ʻeke ange ʻa e meʻa koʻení:

ʻE ala tokoniʻi fēfē ʻe he ngaahi fokotuʻu ko ʻení ke lava ʻe ha faifekau ʻo vahevahe lelei ʻa e ongoongoleleí mo ha niʻihi kehe?
Te ke fulihi fēfē ʻa e ngaahi fakakaukau ko ʻení mo moʻuiʻaki ia he taimi ko ʻeni ʻokú ke hoko ai ko e tokotaha teuteu ngāue fakafaifekau?
ʻE ala tokoni fēfē hono fakaleleiʻi ho poto fakaako folofolá mo ho ʻulungāngá ki hoʻo lavameʻa ko ha faifekau? (ʻOku ngalingali ʻe fakahā ʻe he kau akó ha tefitoʻi moʻoni tatau hangē ko ʻení: ʻI hono fakatupulaki ko ia ʻe he kau faifekaú ʻa e natula ʻo e ako lelei ʻo e ongoongoleleí, ʻe akoʻi kinautolu ʻe he Laumālié, ʻe fakafiefia ange ʻenau aʻusiá, pea te nau toe mateuteu ange ke akoʻi ʻa e ongoongoleleí.)

Vahevahe ʻa e kalasí ki ha ngaahi kulupu tautau toko tolu pe toko fā. Kole ki he ngaahi kulupú takitaha ke nau vahevahe ʻiate kinautolu ʻa e fanga kiʻi ʻuluʻi tohi iiki ʻe ono ʻi he “Ngaahi Fakakaukau mo e Ngaahi Fokotuʻu ki Hono Akó” ʻi he peesi 25–27 ʻo e Malangaʻaki ʻEku Ongoongoleleí, pea ʻai ʻa e kau mēmipa ʻo e kulupú ke nau ako ʻa e fanga kiʻi konga ʻuluʻi tohi iiki kuo vahe angé. Mahalo ʻe ʻi ai ha kau mēmipa ʻe niʻihi ʻo e kulupú ʻe fie maʻu ke nau ako ha konga ʻuluʻi tohi ʻo lahi ange ʻi he tahá. Fokotuʻu ha taki ʻi he kulupú takitaha ke ne taki ʻa e fealēleaʻaki fekauʻaki mo e meʻa naʻe ako ʻe he kau mēmipa ʻo e kulupú pea mo e meʻa te nau lava ke fai he taimí ni ke toe mālohi mo lelei ange ʻenau ako ʻa e ongoongoleleí. Ka hili hano maʻu ʻe he ngaahi kulupú takitaha ha taimi ke fealēleaʻaki aí, ʻeke ange ki he kalasí:

Kuo faitokonia fēfē koe ʻe he ngaahi pōtoʻi fakaako pe ʻulungaanga ko ʻení ke toe lelei ange ai hoʻo ako ʻa e folofoloá?

ʻOange ki he kau akó takitaha ha tatau ʻo e nāunau tufa “Ngaahi ʻUlungaanga Ako Fakafoʻituitui ʻo e Folofolá.” ʻOange ki he kalasí ha taimi ke nau fakakakato ai ʻa e ʻekitivitī ʻi he nāunau tufá.

Ka hili hano ʻoange ha taimi feʻunga, kole ki he kau akó ke nau vahevahe ha faʻahinga fakakaukau pe ʻilo naʻa nau maʻu mei he ngāue ko ʻení. Poupouʻi ke nau muimui pea fakakau ʻa e ngaahi pōtoʻi ako folofola mo e ʻulungaanga ne nau fili ki heʻenau ako fakafoʻituituí. Fakapapauʻi ange ko e taimi te nau fai ai ʻení, ʻe fakamaama ʻe he Laumālie Māʻoniʻoní ʻenau fakakaukaú mo fakatupulaki ʻenau mahino ki he ongoongoleleí.

Tokoni ke mahino ki he kalasí, makehe mei he founga ʻenau akó, ʻoku toe fuʻu mahuʻinga ʻa e taimi pea mo e meʻa ʻoku nau akó ʻi hono tokoniʻi kinautolu ke nau hoko ko ha kau faifekau lelei. ʻAi e kau mēmipa ʻo e kalasí ke nau huke ki he peesi viii ʻi he talateu ʻo e Malangaʻaki ʻEku Ongoongoleleí pea vakai ki he Taimi-tēpile Fakaʻaho ʻa e Faifekaú ʻoku ʻi he konga ki he “Ako Fakatāutaha, Ako mo e Hoá, Ngaahi Fakataha Fakavahé, mo e Ngaahi Konifelenisi Fakasouní.” Hili ia pea fehuʻi ange:

ʻOku fakafōtunga fēfeeʻi ʻe he Taimi-tēpile Fakaʻaho ʻa e Faifekaú hono mahuʻinga e ako ʻo e ongoongoleleí?
ʻOku teuteuʻi fēfē koe he taimí ni ʻi hono ako hokohoko fakaʻaho ʻo e folofolá ki he taimi-tēpile femoʻuekina ʻo e ngāue fakafaifekaú?

Fakaʻilongaʻi ʻo e Folofolá

Kapau ʻoku kei toe hamou taimi feʻunga, fakakaukau ke huluʻi ʻa e foʻi vitiō “Advice for Studying the Scriptures” (2:07) ke tokoniʻi ʻa e kalasí ke nau fakakaukauʻi ha ngaahi founga te nau lava ai ʻo fakaleleiʻi ʻa e founga fakaʻilongaʻi ʻenau folofolá.

Fehuʻi ange ʻi he hili hono huluʻi ʻo e foʻi vitioó:

Ko e hā ha meʻa naʻá ke ako meia ʻEletā Petinā ʻe tokoni atu ke fakaleleiʻi ai hoʻo ako folofolá?
Ko e hā ʻa e taumuʻa hono fakaʻilongaʻi ʻo e folofolá? (Ke tokoni ke ke manatuʻi ʻamui ange ʻa e meʻa kuó ke akó ʻi ha taimi te ke toe fie maʻu ai.)
Ko e hā ʻoku mahuʻinga ai ke maʻu ʻe he kau faifekaú ha founga lelei ke nau manatuʻi ai ʻa e meʻa kuo ʻosi akó?

Moʻuiʻaki ʻa e Meʻa ʻOkú ke Akó

ʻAi ha tokotaha ako ke ne lau ki he kalasí ʻa e ʻuluaki palakalafi ʻi he ʻuluʻi tohi ko e “Moʻui ʻaki e Meʻa ʻOkú ke Akó” ʻi he Malangaʻaki ʻEku Ongoongoleleí, peesi 21. Hili ia pea ʻai ha tokotaha ako ke ne lau leʻolahi ʻa e Sione 7:17. Tokoniʻi ʻa e kau akó ke nau ʻiloʻi ha tefitoʻi moʻoni naʻe akoʻi ʻi he Malangaʻaki ʻEku Ongoongoleleí mo e Sione 7:17 ʻaki haʻo fehuʻi ange:

Ko e hā hano faikehekehe ʻo e ʻiloʻi e folofolá mo e moʻuiʻaki e ngaahi akonaki ʻoku ʻi he folofolá? (Neongo te nau ala fakaʻaongaʻi ha ngaahi fakalea kehekehe, ka ʻoku totonu ke mahino ki he kau akó ʻa e tefitoʻi moʻoni ko ʻení: Ko e taimi ʻoku tau moʻui fakatatau ai mo e ngaahi akonaki ʻo e ongoongoleleí, ʻe fakamoʻoniʻi ʻe he Laumālie Māʻoniʻoní ʻa e moʻoni ʻo e ngaahi tefitoʻi moʻoni ko iá mo ne fakamālohia ʻetau tuí, ʻiló, mo e fakamoʻoní.)

Fakamatalaʻi ange naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá hono mahuʻinga ʻo e ngāueʻi e meʻa ʻoku tau akó. Fakaʻaliʻali ʻa e lea ko ʻení, pea kole ha tokotaha te ne fie lau leʻolahi ia ki he kalasí.

ʻI heʻetau hoko ko ia ko e kau ako ʻo e ongoongoleleí, ʻoku totonu ke tau “fai ʻe [kitautolu] ki he folofolá, pea ʻoua naʻa ngata ʻi he fanongó” (Sēmisi 1:22). ʻOku fakaʻatā hotau lotó ki he ivi tākiekina ʻo e Laumālie Māʻoniʻoní ʻi heʻetau ngāue lelei ʻaki ʻa e tauʻatāina ke filí ʻo fakatatau ki he ngaahi tefitoʻi moʻoni totonú—ʻo tau fakaafea ai ʻa ʻEne akonakí mo Hono ivi fakamoʻoní. (“Leʻo ʻi he Fakakukafi,” Ensign pe Liahona, Mē 2010, 42).

ʻOku ʻuhinga ki he hā ke hoko ko e niʻihi ʻoku nau fai ki he folofolá kae ʻikai ko e kau fakafanongo ʻataʻatā pē?
ʻOku fakaloloto fēfeeʻi ʻe he ngāue “fakatatau mo e ngaahi tefitoʻi moʻoni totonú” ʻa ʻetau mahinó ʻi ha founga ʻoku ʻikai lava ia ʻe he akó ʻataʻatā pē?
Kuo fakafaingamālieʻi fēfeeʻi ʻi hoʻo ngāue fakatatau mo e ngaahi tefitoʻi moʻoní ke ke maʻu ha mahino mo ha fakamoʻoni lahi ange ki ha tefitoʻi moʻoni ʻo e ongoongolelei ʻokú ke feinga ke moʻuiʻakí?

ʻAi ha tokotaha ako ke ne lau ʻa e palakalafi tolu he peesi 21 ʻo e Malangaʻaki ʻEku Ongoongoleleí kae muimui pē ʻa e kalasí, mo kumi ha ngaahi founga kehe ʻoku tokoniʻi ai ʻe he moʻuiʻaki ʻa e ongoongoleleí e loto mo e ivi ʻo e kau faifekaú. Ka hili hono laú, fai ange ʻa e ngaahi fehuʻi ko ʻení:

Ko e hā mo ha ngaahi toe tāpuaki kehe ʻoku maʻu ʻe he kau faifekaú ʻi he taimi ʻoku nau moʻuiʻaki ai ʻa e ngaahi tefitoʻi moʻoni ʻo e ongoongolelei ʻoku nau ʻiloʻi ʻoku moʻoní? (Tokoniʻi ʻa e kau akó ke nau lau ʻa e tefitoʻi moʻoni ko ʻení: ʻI he moʻui ʻaki ko ia ʻe he kau faifekaú ʻa e ongoongoleleí, ʻoku fakatupulaki leva ʻe he Laumālie Māʻoniʻoní ʻenau holi mo ʻenau malava ke vahevahe ʻa e ongoongoleleí.)
ʻI hoʻo teuteu ko ia ke ngāue fakafaifekaú, kuo fakatupulaki fēfeeʻi ʻe he Laumālie Māʻoniʻoní hoʻo loto holi ke ngāué?

Ko Hono Fakaafeʻi ʻo e Kau Fiefanongó ke Maʻu Lotú

ʻOku tokoniʻi ʻe he kau faifekaú ʻa e kau fiefanongó ke nau fakalakalaka ʻo aʻu ki he papitaisó ʻaki hono fakaafeʻi kinautolu ke nau tauhi ʻa e ngaahi tukupaá. Hangē ko ʻení, fakamatalaʻi ki he kau akó ko e taimi ʻoku maʻulotu ai ʻa e kau fiefanongó, te nau lava ʻo maʻu ha fakahā lahi ange ʻi he Laumālie Māʻoniʻoní pea mo loto holi ke ʻunu ʻo ofi ange ki he ʻOtuá. ʻE lava ke tokoni ʻa e maʻulotú ki he kau fiefanongó ke nau maʻu ha fakamoʻoni ki he ongoongolelei kuo fakafoki maí mo teuteu ke papitaiso.

Fakatātaaʻi ʻa e founga ke fakaafeʻi ai ha taha ke maʻulotu. ʻUluakí, vahevahe nounou ʻa e ngaahi tāpuaki ʻoku maʻu tuʻunga ʻi he maʻulotú. Hili ia pea fakaʻaongaʻi e tohi tufa fakafaifekau Ko Hono Toe Fakafoki Mai ʻo e Ongoongoleleí (peesi 22–23) ke fakamatalaʻi ʻa e meʻa ʻoku hoko he lolotonga ʻo e houalotu sākalamēnití. Hili ia pea fakatātaaʻi ʻa e founga fakahoko ʻo ha fakaafe ki ha fiefanongo ke ne maʻu ʻa e ngaahi houalotú. Ka hili hoʻo fakatātāʻí, ʻai ʻa e kau akó ke nau akoako fakahoko ʻa e ngaahi sitepu naʻá ke fakatātāʻí, mo hanau hoa. Tuku kiate kinautolu takitaha ke nau taufetongi ʻi hono vahevahe nounou ʻa e ngaahi tāpuaki ʻoku nau maʻu tuʻunga ʻi he maʻulotú, ke fakamatalaʻi ʻa e meʻa ʻoku hoko he lolotonga ʻa e houalotu sākalamēnití, pea mo fakaafeʻi ha taha kehe ke maʻu lotu.

Fakamoʻoniʻi ʻa e ngaahi tokāteline mo e ngaahi tefitoʻi moʻoni ʻo e ongoongoleleí naʻe fakamatalaʻi ʻi he lēsoní.

Ngaahi fakaafe ke Ngāue

Fakaafeʻi ʻa e kau akó ke nau ʻai e ako fakafoʻituitui ʻo e ongoongoleleí ko ha meʻa ke fakamuʻomuʻa ʻi heʻenau teuteu ke ngāue fakafaifekaú. ʻE ala tokoni ʻa e ngaahi ʻekitivitī ko ʻeni ʻoku fokotuʻu atú ke tokanga ʻa e kau akó ke ako ʻaki e Laumālié:

Fokotuʻu ha ʻulungaanga ako fakaʻaho fakafoʻituitui e ongoongoleleí, ʻo kau ai hono ako mo fakalaulaulotoa e Tohi ʻa Molomoná.
Lotu ʻi he kamataʻanga hoʻo ako fakafoʻituitui e ongoongoleleí ke fakaafeʻi ʻa e Laumālié ke tokoni atu. Kapau kuo teʻeki ai ke ke fai ia, kamata ngāueʻaki ha tohinoa ako he lolotonga hoʻo ako fakafoʻituitui e ongoongoleleí.
Fili ha taha ʻo e ngaahi fakakaukau mo e ngaahi fokotuʻu ki hono ako ʻo e ongoongoleleí ʻoku ʻi he peesi 25–28 ʻo e Malangaʻaki ʻEku Ongoongoleleí, pea fakakau ia ʻi hoʻo ako fakafoʻituitui he uike ní.