11
Aoaoina Atu o le Ata o le Faaolataga (Vaega 2)
Folasaga
O le ata o le faaolataga na tuuina mai ai se Faaola e faatoilalo aafiaga o le Pa’ū o Atamu. E ala mai i le Togiola a le Faaola, ua mafai ai ona tatou faatoilalo le oti, agasala ma le faanoanoa. Ma le isi, o le a tatou toetutu ma o le a toe foi atu e amiotonu i le afioaga o le Atua ma avea ai faapei o Ia. E tatau i faifeautalai faaolioli ona i ai se malamalamaaga manino o le aoaoga faavae o le ata o le faaolataga ma ia saunia e faamatala atu faafaigofie ma molimau atu ma le mana e uiga i ai.
Sauniuniga Muamua
-
Suesue i le Isaia 53:3–5; 1 Korinito 15:20–22; Alema 7:11–13; Alema 11:42–44; Alema 34:8–9; ma le Mataupu Faavae ma Feagaiga 19:15–19.
-
Suesue i le Tala‘i La‘u Talalelei, itulau e 51–54.
-
Sauni e faaali atu le vitio “For God So Loved the World” (4:48), o loo maua i le LDS.org.
Fautuaga mo le Aoaoina Atu
O Le Togiola a Iesu Keriso
A o lei amataina le vasega, tusi mea nei i luga o le laupapa:
“O le [Ioane 3:16] ua aoteleina ai le ata atoa o le faaolataga” (Elder Bruce R. McConkie).
A amata loa le vasega, fai atu i tamaiti aoga e faitau filemu le Ioane 3:16 ma mafaufau pe ua faapefea ona “aotele [e le fuaiupu lenei] le ata atoa o le faaolataga.”
A uma ona maua e tamaiti aoga sina taimi e faitau ma mafaufau loloto ai, valaaulia i latou e talanoaina po o faapefea ona aotele e lenei mau le ata o le faaolataga. A manaomia, atonu e te faitauina atu le faamatalaga atoa e faatatau i le Ioane 3:16 na saunoa i ai Elder Bruce R. McConkie (1915–85) o le Korama a Aposetolo e Toasefululua:
“Atonu o le fuaiupu e tasi lenei e aupito sili ona lauiloa ma mamana o tusitusiga paia ua fofogaina mai. Ua aotele ai le ata atoa o le faaolataga, ua fusia faatasi ai le Tama, le Alo, lana taulaga togiola, o lena talitonuga ia te ia lea e faapea, o le a faia ai e le tagata talitonu galuega amiotonu, ma iu ai i le faaeaga e faavavau mo e faamaoni” (Doctrinal New Testament Commentary, 3 vols. [1965–73], 1:144).
Fai atu i se tamaitiiti aoga e faitau leotele le parakalafa muamua i le vaega “O Le Togiola” i le itulau e 51 o le Tala‘i La‘u Talalelei. Ona fesili atu lea:
-
E faapefea ona e faailoa atu, i se fuaiupu se tasi, le pogai e matuai taua ai le taulaga togiola a Iesu Keriso mo fanau taitoatasi a le Atua? (O tali a tamaiti aoga e tatau ona aofia ai le aoaoga faavae e faapea, o le Togiola a Iesu Keriso ua mafai ai e i tatou uma ona faatoilalo taunuuga o le Pa’ū.)
-
O a taunuuga o le Pa’ū tatou te oo uma i ai? (O taunuuga tetele o le [1] oti faaletino, [2] agasala ma le oti faaleagaga [vavae ese mai mai le Atua], ma le [3] puapuaga ma le faanoanoa.)
A‘o tali mai tamaiti aoga, mafaufau e lisi a latou tali i luga o le laupapa i se koluma i lalo o le ulutala “Taunuuga o le Pa’ū.” Ona faatumu lea o se koluma i le taumatau i le ulutala “Auala ua faatoilalo ai e le Togiola ia taunuuga o le Pa’ū” (pe faaali atu lenei siata e faaaoga ai se isi metotia):
|
Taunuuga o le Pa’ū |
“Auala ua faatoilalo ai e le Togiola ia taunuuga o le Pa’ū |
|---|---|
|
Oti faaletino |
Tala‘i La‘u Talalelei, 51, “O Le Togiola,” parakalafa 2 |
|
Agasala ma le Oti Faaleagaga |
Tala‘i La‘u Talalelei, 51–52, “O Le Togiola,” parakalafa 3–5 |
|
Puapuaga ma le Faanoanoa |
Tala‘i La‘u Talalelei, 51–52, “O Le Togiola,” parakalafa 6 |
Vaevae le vasega i ni vaega taitoatolu, ma tuu atu i vaega taitoatolu uma e suesue se mau se tasi o vaega e tolu o loo i le siata. Fai atu i tamaiti aoga e sauni e faasoa mai pe faapefea ona fesoasoani ia mea sa latou suesueina e faamatala ai le auala e faatoilalo ai e le Togiola a Iesu Keriso ia taunuuga o le Pa’ū. Ta‘u atu i tamaiti aoga, o mau o loo i lenei siata o ni sui o le tele o fuaitau e mafai ona faaaoga e faamatala ai le aoaoga faavae o le Togiola, ma e tatau ona latou suesueina ni fuaitau faaopoopo mo se malamalamaaga loloto atu e uiga i lenei aoaoga faavae. A ua lava loa le taimi e tuu atu ia i latou e suesue ai, valaaulia ni nai tamaiti aoga mai vaega taitoatolu uma o le vasega e faamalamalama mea na latou suesueina ma auala e fesoasoani ai ina ia tatou malamalama i auala e mafai e le Togiola ona faamanuia ai i tatou.
Tuu atu i tamaiti aoga ni nai minute e tusi ai ni nai fuaiupu e aotele pe otooto ai mea latou te mananao e aoao atu i se tagata sailiili e uiga i le Togiola a Iesu Keriso. A mavae ni nai minute, mafaufau e valaaulia ni nai tamaiti aoga e faitau atu i le vasega mea na latou tusiaina.
Valaaulia le Agaga e fesoasoani i tamaiti aoga ia lagona le moni ma le taua o le Togiola a Iesu Keriso e ala i le faaali atu o le vitio “For God So Loved the World” (4:48). Tuu atu i tamaiti aoga e vaavaai mo auala na faaalia ai e Iesu Keriso Lona alofa mo le lalolagi.
A uma ona faaali le vitio, fesili atu:
-
O a nisi o auala na faaalia ai e Iesu Keriso Lona alofa mo isi?
-
E faapefea ona fesoasoani lenei vitio e te talisapaia ai le galuega ma le misiona togiola a le Faaola?
Valaaulia tamaiti aoga e toe vaai i mea na latou tusia e uiga i mea o le a latou mananao e aoao ai se tagata sailiili e uiga i le Togiola a Iesu Keriso. Tuu atu i tamaiti aoga ni nai isi minute e tusi ai ni fuaiupu faaopoopo e aotele ai mea latou te talitonu i ai ma mafai ona molimau i ai e uiga i le Togiola a Iesu Keriso. A uma ni nai minute, tofi ni tamaiti aoga e paga ma se isi tagata o le vasega ma faatino le auala o le a latou molimau atu ai i se tagata sailiili e uiga i le Togiola a Iesu Keriso.
A uma loa ona maua e tamaiti aoga taitoatasi le avanoa e fai ai le faatinoga, faaiu le vaega lenei o le lesona i le fesili atu:
-
Aisea e taua ai i faifeautalai ona faasoa atu e le aunoa a latou molimau e uiga ia Iesu Keriso ma i latou latou te aoaoina? (Atonu e te manao e faamamafa atu, o se tasi o matafaioi a le Agaga Paia o le molimau mai e uiga ia Iesu Keriso [tagai i le Ioane 15:26; 3 Nifae 11:32]; o le mea lea, a tatou molimau atu i isi e uiga ia Iesu Keriso, tatou te valaaulia le Agaga Paia e faamautu a tatou molimau i loto o i latou o loo tatou aoaoina.)
Uunaia tamaiti aoga e mafaufau i mea e mafai ona latou faia, e faalolotoina ai lo latou loto faafetai mo, ma le molimau e uiga ia Iesu Keriso ma Lana Togiola. Faamautinoa atu i tamaiti aoga e faapea, o le faalolotoina o a latou molimau e uiga i le Faaola, o le a latou saunia lelei ai e valaaulia isi e o mai ia Keriso.
O Lo Tatou Taunuuga e Faavavau
Faasino atu tamaiti aoga i le ata o loo maua i le pusa “Ata o le Faaolataga” i le itulau e 54 o le Tala‘i La‘u Talalelei. Valaaulia tamaiti aoga e suesue muamua i le ata ona tusi lea o a latou lava ata e aunoa ma le tilotilo i le Tala‘i La‘u Talalelei. Soo se foliga lava e mafai ona foliga a‘i a latou lava ata, pau lava le mea ia latou faaaofia ai vaega autu o le ata o le faaolataga. Faamanatu atu i tamaiti aoga, e tatau i faifeautalai ona mafai ona faamatala atu i tagata sailiili ia elemene autu o le ata o le faaolataga i ni faaupuga faigofie.
Ina ia fesoasoani i tamaiti aoga ia malamalama i anotusi o loo maua i vaega e tolu o loo totoe o le lesona 2 i le Tala‘i La‘u Talalelei (itulau e 52–53), fai atu i tamaiti aoga e faaalu ni nai minute e faitau ai vaega ma faailoa mai aoaoga faavae, mataupu faavae, ma manatu e tatau ona silafia e tagata sailiili. A o tali mai tamaiti aoga, faaali atu autu o vaega i se siata i luga o le laupapa:
|
O le a se mea e tatau ona iloa e se tagata sailiili? | ||
|---|---|---|
|
O le lalolagi o agaga |
O le Toetu, o le faamasinoga, ma le tino ola pea |
Malo o mamalu |
Atonu e aoga le fai atu i tamaiti aoga e suesue se vaega e tasi i le taimi ma faasoa mai ni aoaoga faavae, mataupu faavae, po o ni manatu na latou iloa a‘o le‘i faasolo atu e faitau le vaega e sosoo ai. Atonu e te valaaulia se tamaitiiti aoga e faamaumau tali a le vasega i lalo o le ulutala talafeagai i luga o le laupapa. Mafaufau e fai atu i tamaiti aoga e kopi le siata i a latou api talaaga mo suesuega ma faatumu a‘o talanoaina e le vasega ia vaega taitasi.
O fesili e pei o nei e mafai ona fesoasoani i tamaiti aoga e iloilo ai mea latou te faitauina.
-
O a aafiaga o a tatou faaiuga iinei i le lalolagi ia i tatou pe a tatou feoti?
-
E mafai faapefea e lo tatou malamalamaaga e uiga i le Faamasinoga ona aafia ai a tatou faaiuga i le taimi nei?
-
E faapefea ona aafia vaega taitasi o lo tatou i ai i le (muai olaga, olaga nei, ma le olaga pe a mavae le olaga nei) i le Togiola a Iesu Keriso?
-
Aisea e taua ai le manino ma le faigofie pe a faailoa atu nei upumoni i isi?
Faamalamalama atu i tamaiti aoga, o se tasi o aoaoga faavae taua o le Toefuataiga e faapea, o loo i ai i fanau a le Atua le gafatia e avea ai e faapei o Ia. Ua tuuina mai e lo tatou Tama Faalelagi agaalofa ia i tatou le faamoemoe e ala mai i le Togiola a Iesu Keriso, e mafai ona tatou alualu i luma ma maua faamanuiaga o le faaeaga (tagai i le “Faaeaga,” i le Tala‘i La‘u Talalelei, itulau e 59). E ui e i ai le aso tatou te faapei ai o le Atua, o le a le aunoa ona tatou tapuai atu ia te Ia. O lo tatou agaigai i luma o le a le suia ai Lona faasinomaga o lo tatou Tama ma lo tatou Atua. (Mo nisi faamatalaga e uiga i lenei mataupu, tagai i le tusiga o le Gospel Topics ua faaautuina “Becoming Like God” i le lds.org/topics.)
Vaevae tagata aoga i ni paga, ma valaaulia paga taitasi e sauni e aoao atu se tagata e uiga i le faamoemoega o le olaga ma le mea e tupu ia i tatou pe a tatou feoti. A‘o latou sauni, e tatau i tamaiti aoga ona tagai i itulau e 51–54 o le Tala‘i La‘u Talalelei po o itulau e 10–15 i le tamaitusi a le faifeautalai O Le Ata o le Faaolataga, pe afai e maua. Uunai tamaiti aoga e faaaoga ia le itiiti ma le tasi le mau a‘o latou aoao atu. Ia uunai foi i latou e faaaoga ata o le ata o le faaolataga ia na latou faia po o le ata o loo i le itulau e 54 o le Tala‘i La‘u Talalelei. Faamalamalama atu, o a latou aoaoga e tatau ona faigofie ma manino ma e tatau ona faaiu i a latou molimau. Ia lava se taimi e faaavanoa mo paga e sauniuni ai e aoao atu, ona valaaulia lea o paga taitasi e tuu faatasi ma se isi paga. Tofi le tasi paga o tamaiti aoga e aoao isi tamaiti aoga e toalua.
A‘o faaiu e paga a latou aafiaga faafaiaoga, fai atu i vaega taitasi e talanoa i fesili nei ia latou lava vaega: O a ni mea sa lelei i le aoaoga? E mafai faapefea ona faaleleia atili ia tamaiti aoga sa faiaoga.
Ona, fesuia‘i lea o matafaioi ma tuu atu i tamaiti aoga o e sa aoaoina e aoao atu i le isi paga o tamaiti aoga. Ia mautinoa e i ai se taimi mo i latou e maua ai ni manatu faaalia. A uma ona faiaoga ia paga taitatasi, valaaulia tagata o le vasega e faasoa mai i le vasega atoa ni malamalamaaga sa‘o ma loloto mai o latou aafiaga.
Pe a lava le taimi, faaiu le lesona i le tuuina atu o lau molimau e uiga i le ata o le faaolataga, pe valaaulia tagata o le vasega e fai foi faapena.
Valaaulia e Faatino
Valaaulia tamaiti aoga e filifili se tasi pe sili atu o gaoioiga nei e galulue ai i fafo atu o le vasega e faaloloto ai o latou malamalamaaga e uiga i le ata o le faaolataga.
-
Faataitai ona tusi le ata o loo i le itulau e 54 o le Tala‘i La‘u Talalelei ma faamalamalama atu elemene autu o le ata o le faaolataga, e faaaoga ai se mau e lagolago ai elemene taitasi.
-
Mafaufau pe faapefea ona e aoao atu le ata o le faaolataga ina ia mafai ona fesoasoani ai i se tagata o le e le‘i leva atu ona maliu se tasi o le aiga po o se tasi e pele ia te ia. Tusi se aotelega po o se auivi puupuu o ou manatu i lau api talaaga mo suesuega.
-
Suesue i se tautalaga e uiga i le Togiola a Iesu Keriso mai se lauga o le konafesi aoao lata mai nei. Faailoa mai ni mataupu faavae mai le lauga o le a fesoasoani e te malamalama lelei ai i le Togiola a Iesu Keriso. Fai se lisi o auala ua faamanuiaina ai oe i aso uma e le Togiola.
-
Tatalo mo le avanoa e faasoa atu ai le ata o le faaolataga i se tasi e mafai ona faamanuiaina e ala i le malamalama lelei i le fuafuaga a le Tama Faalelagi. Ona e faatino lea i le faatuatua ma aoao atu lenei aoaoga faavae e faamanuia ai le olaga o le tagata.