O le Tusi a Mamona o le faamaoniga mamana lea o le paia o Iesu Keriso ma o le faamaoniga foi i le Toefuataiga na auala mai i le Perofeta o Iosefa Samita. Na te taliina “fesili o le loto” (tagai i le Tala‘i La‘u Talalelei, 109) lea o loo i ai i le toatele o fanau a le Tama Faalelagi e ma uiga i o latou olaga. O se vaega taua o le liuaina o le mauaina lea o se molimau mai le Agaga Paia faapea e moni le Tusi a Mamona. E tatau i se faifeautalai faaolioli ona suesue i le Tusi a Mamona i aso uma, ia i ai se molimau patino i le Tusi a Mamona, ma maua se aafiaga i le faasoaina atu o lena molimau i isi.
Sauni e faaali atu le vitio “O Le Tusi a Mamona—o se Tusi mai le Atua” (1:55; o le vaega puupuu mai le lauga a Elder Tad R. Callister, Ensign po o le Liahona, Nov. 2011, 74–76, o loo maua i le lds.org/media-library.
O Le Tusi a Mamona O Le Faamaoniga Mamana Lea o le Paia o Iesu Keriso
Valaaulia tamaiti aoga e vaai i a latou kopi o le Tusi a Mamona, pe uu i luga se kopi e vaavaai mai i ai le vasega. Ona fai atu lea o fesili nei:
Afai e te le‘i iloa se mea e uiga i le Tusi a Mamona, o le a se mea o le a e aoaoina mai le na o le faitauina o le soaulutala (O Se Tasi Molimau ia Iesu Keriso)?
O le a se mea o le a e faamoemoe e maua i totonu o le tusi?
Tuu atu i tamaiti aoga e sue i le itulau autu o le Tusi a Mamona ma faitau le parakalafa lona lua, ia taulai atu i le mea na mananao tusitala o le Tusi a Mamona e faatalitonu ai le lalolagi. Ona fesili atu lea:
O le a le mea na mananao tusitala o le Tusi a Mamona e faatalitonuina ai le lalolagi?
Tusi le faamatalaga lenei i le laupapa: O se faamoemoega tutotonu o le Tusi a Mamona, ia faatalitonu tagata uma o Iesu o le Keriso.
Tuu atu i se tamaitiiti aoga e faitau leotele le vaega ua faaautuina “O Le Tusi a Mamona o loo Molimau mai ia Keriso” i le itulau e 111 i le Tala‘i La‘u Talalelei a‘o mulimuli le vasega i le faitauga, ma vaavaai mo auala ua avea ai le Tusi a Mamona ma se molimau ia Iesu Keriso.
Ona fesili atu lea i tamaiti aoga:
O a ni auala e avea ai le Tusi a Mamona ma se molimau ia Iesu Keriso
Na faapefea ona faamalosia e le Tusi a Mamona lau molimau ia Iesu Keriso?
Valaaulia tagata o le vasega e faasoa atu i le isi tagata o le vasega a latou lava molimau patino e uiga i le Tusi a Mamona, o latou aafiaga i le faitauga ma le tatalo e uiga i ai, po o fuaitau e sili ona fiafia i ai e uiga i le Faaola ma Lana misiona. Ta‘u atu i tamaiti aoga o se tasi o mea aupito sili ona taua e mafai ona latou faia a‘o le‘i ulufale atu i le NAF, o le faitau atoa lea o le Tusi a Mamona ma tatalo e uiga i lona moni. Uunai tamaiti aoga e mulimuli i le fautuaga a Peresitene Ezra Taft Benson i tagata o le Ekalesia e faitau mai le Tusi a Mamona mo le 30 minute i le aso.
O le Tusi Paia ma le Tusi a Mamona e Lagolago e le Tasi le Isi
O a nisi o auala o loo lagolago ai e le Tusi a Mamona ma le Tusi Paia ia le tasi ma le isi”?
Aisea e tatau ai i faifeautalai ona faaaoga uma le Tusi a Mamona ma le Tusi Paia a‘o latou fesoasoani atu i isi e aoao i le talalelei a Iesu Keriso? (E tatau ona atagia mai i tali a tamaiti aoga le upumoni lenei: O le Tusi a Mamona ma le Tusi Paia e galulue faatasi o ni molimau ia Iesu Keriso ma Ana aoaoga.)
Ina ia fesoasoani i le vasega ia malamalama i lenei manatu, fai atu i se tamaitiiti aoga e faitau leotele le 2 Nifae 3:12. Tuu atu i se isi tamaitiiti aoga e faitau leotele le Esekielu 37:15–17. Tuu atu i le vasega e vaavaai mo fuaitau o loo faatatau i le Tusi Paia ma fuaitau o loo faatatau i le Tusi a Mamona. A uma ona faitau nei fuaiupu, fesili atu i le vasega:
E faapefea ona lagolago e nei mau le manatu e uiga i molimau e toalua?
O a ni faamanuiaga na folafolaina mai o se taunuuga o le o mai faatasi o le Tusi a Mamona ma le Tusi Paia?
Ina ia faamalamalama atili le ala e galulue faatasi ai le Tusi a Mamona ma le Tusi Paia o ni molimau ia Iesu Keriso, tuu atu i se tamaitiiti aoga e faitau le faamatalaga lenei mai ia Elder Tad R. Callister o le Fitugafulu, pe faaali le vitio puupuu o le upusii.
Ata
Elder Tad R. Callister
“Ae aisea lava e matuai taua ai le Tusi a Mamona pe afai ua tatou maua le Tusi Paia tatou te aoao ai e uiga ia Iesu Keriso? Pe na e tuufesili pe aisea ua tele ai ekalesia Kerisiano i le lalolagi i aso nei, pe afai e maua mai a latou aoaoga faavae mai lea Tusi Paia lava e tasi? Ona e eseese a latou faauigaga o le Tusi Paia. Ana faapea e tutusa a latou faauigaga, semanu e tutusa lava le ekalesia. E le o se tulaga lenei e finagalo ai le Alii, aua na tautino mai e le Aposetolo o Paulo e faapea, e ‘tasi le Alii, e tasi le faatuatuaga, e tasi le papatisoga’ (Efeso 4:5). Ina ia fesoasoani ia oo mai lenei tasi, ua faatulagaina ai e le Alii se tulafono faalelagi o molimau. Na aoao mai Paulo, ‘E mautu upu uma i le mau a le toalua po o le toatolu‘ (2 Korinito 13:1).
“O le Tusi Paia o se molimau e tasi ia Iesu Keriso; o le Tusi a Mamona o le isi lea. Aisea e matuai taua ai lenei molimau lona lua? Atonu o le a fesoasoani le faataitaiga vaaia lenei: E fia ni laina sasao e mafai ona e tusia e ui atu i se vaega se tasi i luga o se fasipepa? O le tali e le mafaitaulia. A faapea la mo se taimi, o lena vaega e tasi ua faatusa i le Tusi Paia, ma o le faitau selau o na laina sasao e tusia e ui atu i lena vaega e faatusa i faauigaga eseese o le Tusi Paia, ma o na faauigaga taitasi e faatusa i ekalesia eseese.
“Ae peitai, o le a se mea e tupu, pe afai e i ai se vaega lona lua i luga o lena fasipepa, e faatusa i le Tusi a Mamona? E fia ni laina sasao e mafai ona e tusia i le va o nei vaega e lua: le Tusi Paia ma le Tusi a Mamona? E na o le tasi lava. E na o le tasi le faauigaga o aoaoga faavae a Keriso e mafai ona i ai ona o le molimau a nei molimau e lua.
“Ma ua faafia ona fai le Tusi a Mamona ma se molimau faamaonia, faamanino, ma autasi o aoaoga na aoaoina i le Tusi Paia, o lea la e na o le ‘tasi le Alii, e tasi le faatuatuaga, e tasi le papatisoga‘” (“O Le Tusi a Mamona—o se Tusi mai le Atua,” Ensign po o le Liahona, Nov. 2011, 75).
A uma ona faaali atu le vitio po o le faitauga o le upusii, fesili atu:
O le a le taua o le i ai o molimau e lua faaletusi paia ia Iesu Keriso?
O le a se mea ua e aoaoina mai i le lauga a Elder Callister, o le a fesoasoani ia te oe e aoao ai isi i le ala e galulue faatasi ai le Tusi a Mamona ma le Tusi Paia?
O Le Matafaioi a le Tusi a Mamona i le Faapotopotoga o Isaraelu
Ina ia tuuina atu tulaga ia malamalama lelei ai a‘o e aoao atu le mataupu faavae e sosoo ai, atonu e te tuu atu i tamaiti aoga e toe faitau le parakalafa lona lua o loo i le itulau autu o le Tusi a Mamona, ma vase lalo pe valivali le folafolaga e faapea, e mafai e tagata faitau ona “iloa ai foi feagaiga a le Alii, ua lē lafoaiina ese i latou e faavavau.” Faamatala atu o lenei parakalafa ua ta‘ua ai le mea moni e faapea, e ao ona faapotopotoina mai le fanau a le Atua i le aiga o Isaraelu ua faataapeapeina. Faamanatu atu i tamaiti aoga na osia e le Atua ni feagaiga i aso anamua ma Lana fanau. Ae peitai, sa faataapeapeina e le Alii tagata o le aiga o Isaraelu i le lalolagi atoa, o se taunuuga o lo latou amioletonu ma le tetee.
Tofi ni tamaiti aoga e faitau se tasi o fuaitau o mau nei, ma vaavaai mo le auala o le a faapotopotoina mai ai fanau a le Atua. 1 Nifae 10:14; 3 Nifae 16:4–5; or 3 Nifae 20:13. Ona fai atu lea o fesili e pei o [fesili] o loo i lalo, e fesoasoani latou te faailoa mai ai le aoaoga faavae o loo aoaoina i nei fuaitau o mau:
E tusa ai ma nei fuaitau, o le a le mea e tatau ona tupu mo tagata taitoatasi ina ia faapotopotoina mai ai o se vaega o le aiga o Isaraelu? (E tatau ona aumai i latou i le malamalama o Iesu Keriso.)
O le a le matafaioi a le Tusi a Mamona i lenei faagasologa? (E ui atonu e faaaoga e tamaiti aoga ni upu eseese, e tatau ona latou faailoa mai le upumoni lenei: O le Tusi a Mamona e avea o se meafaigaluega e fesoasoani e faapotopoto mai ai le fanau a le Atua, e ala i le fesoasoani ia latou maua se malamalamaaga e uiga ia Iesu Keriso.)
Tusi le faamatalaga lenei, lea na saunoa mai ai ia Elder Bruce R. McConkie (1915–1985) o le Korama a Aposetolo e Toasefululua, e uiga i le matafaioi o le Tusi a Mamona i le faapotopotoina o Isaraelu.
Ata
Elder Bruce R. McConkie
“E faatatau i le faapotopotoina o Isaraelu, o le Tusi a Mamona o le tusi aupito sili lea ona taua ua tusiaina, pe o le a tusiaina. O le tusi e faapotopoto mai ai Isaraelu, ma ua faaali mai ai, i le manino ma le atoatoa, le aoaoga faavae o le faapotopotoina. … O le Tusi a Mamona e mafua ai ona talitonu tagata i le talalelei ma auai i le Ekalesia, ma, e pei ona tatou vaaia i le taimi na muamua atu, o le mana lea e faataunuu ai le faapotopotoina o Isaraelu” (A New Witness for the Articles of Faith [1985], 554).
Ma le isi, fai atu fesili e pei o nei:
E faapefea ona auai faifeautalai i le faapotopotoina o le aiga o Isaraelu? (E ala i le fesoasoani i isi ia suesue ma malamalama i le Tusi a Mamona, ina ia mafai ona latou o mai ia Keriso e ala i le faatuatua, salamo, papatisoga, faamauga, ma le tumau e oo i le iuga.)
Aisea e taua ai le faaaoga e faifeautalai o le Tusi a Mamona a‘o latou fesoasoani atu i isi ia o mai ia Keriso?
O Le Mauaina o se Molimau i le Tusi a Mamona O Se Vaega Taua o le Liuaina
Tuu atu i se tamaitiiti aoga e faitau leotele le tala lenei mai le talaaga o le soifuaga o le Aposetolo o Pale P. Palate (1807–1857), lea sa ia faamatalaina ia lona aafiaga i le faitauga o le Tusi a Mamona mo le taimi muamua.
Ata
Elder Pale P. Palate
“Sa ou susueina ma le naunautai, ma faitau lona itulau autu. Ona ou faitauina lea o molimau a nisi o molimau e faatatau i lona mauaina ma le faaliliuina. Ina ua mavae lenei mea, sa ou amata faitauina ona anotusi mai le amataga. Sa ou faitau i le aso atoa; o le ai, sa o se avega mamafa, sa leai so‘u manao i se meaai; o le moe sa o se avega mamafa pe a oo mai le po, aua sa sili atu ia te a‘u le faitau i lo o le moe.
“A o ou faitauina, sa i o‘u luga le agaga o le Alii, ma sa ou iloa ma malamalama ua moni le tusi, e pei lava lona manino ma le iloagofie o le malamalama ma le iloa e se tagata o loo i ai o ia” (Autobiography o Parley P. Pratt, ed. Parley P. Pratt [1874], 38).
Na faapefea ona aafia Pale P.Palate i le Agaga o le Alii a‘o ia faitauina le Tusi a Mamona?
E mafai ona e faasoa mai se taimi na pai atu ai le Agaga ia te oe a‘o e faitauina se mau po o se fuaitau faapitoa o le Tusi a Mamona?
Valaaulia tamaiti aoga e vase lalo pe valivali ia fuaiupu nei i le Tala‘i La‘u Talalelei, itulau e 110: “O le Tusi a Mamona, a tuufaatasi ma le Agaga, o lau punaoa sili lea ona malosi i le liuaina mai.” Ina ia fesoasoani i tamaiti aoga ia malamalama i lenei upumoni, tuu atu ia i latou e faitau le vaega “O Le Tusi a Mamona e Faalatalata Atu Ai Tagata i le Atua” i le itulau e 114 o le Tala‘i La‘u Talalelei. Ona fesili atu lea:
E tusa ai ma le vaega lenei i le Tala‘i La‘u Talalelei, o a nisi o mea maoti e mafai ona tupu pe a amata ona suesue se tagata i le Tusi a Mamona?
Aisea ua avea ai le fesoasoani i tagata sailiili ia suesue ma maua se molimau e uiga i le Tusi a Mamona, o se tasi o faamoemoega aupito taua a se faifeautalai?
Faamatala atu i le vasega e faapea, e mafai ona latou fesoasoani i tagata sailiili ia lagona le mana liua o le Tusi a Mamona, e ala i le fesoasoani i tagata sailiili e su‘e tali o fesili e sili ona taua o le olaga i totonu o ona itulau. Tuu atu i ni nai tamaiti aoga e auauai e faitau leotele ia parakalafa ma fesili o loo maua i itulau e 113-14 o le Tala‘i La‘u Talalelei. Fesili atu i le vasega mo le uiga o le fuaitau “fesili a le agaga.” Ona talanoaina lea o fesili nei:
O le a le uiga o le fuaitau “fesili a le agaga” ia te oe?
I le laupapa, tusi ai le upumoni lenei:
O aoaoga o le Tusi a Mamona e tali ai fesili a le agaga.
Talanoaina le faamatalaga lenei ma tamaiti aoga:
O le a faapefea ona e faaaogaina le Tusi a Mamona e su‘e ai tali i au fesili a le agaga?
O a ni fesili a le agaga ua e mauaina ia tali i le Tusi a Mamona?
Mafaufau e faaali atu se faataitaiga puupuu i le vasega o le auala e faaaoga ai le Tusi a Mamona e su‘e ai tali i fesili a le agaga. Filifili se fesili e tasi o loo i le lisi i le itulau e 113-14 i le Tala‘i La‘u Talalelei. I le faaaogaina ai o fuaitau o le Tusi a Mamona o loo lisiina faatasi ma le fesili, faaali atu le ala e tali ai e le Tusi a Mamona le fesili ua e filifilia. Mafaufau foi e faaali atu le ala e faaaoga ai le Topical Guide, Bible Dictionary, po o le Taiala i Tusitusiga Paia e su‘e ai tali i fesili. Faasoa atu ou lagona i le vasega e uiga i le ala e mafai ai foi ona fesoasoani le Tusi a Mamona ia i latou ma a latou tagata sailiili ia maua tali i a latou fesili.
A uma ona tuu atu le faataitaiga lenei i tamaiti aoga, valaaulia i latou e mulimuli i le faagasologa lava lea e tasi. Fai atu ia i latou e filifili se fesili se tasi mai le lisi ona toe iloilo lea o le fuaitau o loo avatu faatasi ai i le Tusi a Mamona e su‘e ai aoaoga faavae po o mataupu faavae o loo tali ai le fesili. A uma ona tuuina atu se taimi talafeagai e sauni ai, valaaulia tamaiti aoga e faasoa puupuu atu i se isi tamaitiiti aoga ia mea na latou mauaina. A ua uma loa, ia talanoa i mea nei:
E mafai faapefea ona faaaoga e faifeautalai le Tusi a Mamona e fesoasoani ai i tagata sailiili e su‘e tali i fesili a le agaga?
Ina ia faaali atili le ala e tali ai e le Tusi a Mamona ia fesili a le agaga, faaali atu le vitio “A Book of Mormon Story.” Fai atu i tamaiti aoga e matamata mo le ala e taliina ai e le Tusi a Mamona nisi o fesili a Brother Cook a‘o le‘i auai o ia i le Ekalesia.
A uma le vitio, e mafai ona e fesili atu:
O a nisi o fesili taua na taliina mo Brother Cook ina ua ia faitau i le Tusi a Mamona?
O a ni auala na aafia ai o ia i le mauaina o nei tali?
Valaaulia tamaiti aoga e mafaufau i se fesili taua e faatatau i le talalelei, e mananao i latou po o se uo i se tali i ai. Molimau atu o le a fesoasoani le Alii e tali la latou fesili e ala i le suesue i le Tusi a Mamona.
O le Tusi a Mamona e Faamautuina le Moni o le Toefuataiga.
Valaaulia tamaiti aoga e auauai e faitau leotele le vaega i le Tala‘i La‘u Talalelei ua faaautuina “O Le Tusi a Mamona o le Maa ’Au’au o lo Tatou Talitonuga,” e amata atu i le itulau 109 ma faaauau atu i le siata o loo i le itulau e 110. A o latou faitau, fai atu ia i latou e manatunatu i le saunoaga a Iosefa Samita e uiga i le taua o le Tusi a Mamona. Ona fesili atu lea:
O a ni auala e avea ai le Tusi a Mamona ma se “faavae o le molimau”?
Aisea e te manatu e tetee ai le fili i le Tusi a Mamona ma taumafai e taofi tagata mai le faitauina? (Ona o le maa’au’au o la tatou tapuaiga.)
Faamatala atu e toatele tagata i le lalolagi o e e faafaigata ona talitonu i le tala a Iosefa Samita ma le afuaga o le Tusi a Mamona. E tatau ona saunia faifeautalai e talanoa i masalosaloga a tagata sailiili e uiga i le afuaga paia o le Tusi a Mamona.
Ia faitau faatasi o se vasega le vaega ua faaautuina “Faaaoga le Tusi a Mamona e Tali Atu Ai i Tetee” o loo maua i le Tala‘i La‘u Talalelei, itulau e 115–16. Fai atu i tamaiti aoga e vaavaai mo fautuaga o le a fesoasoani ia i latou e faamalosia ai le faatuatua o tagata sailiili o loo i ai ni atugaluga po o ni masalosaloga. Fai atu fesili e pei o nei, e fesoasoani ai i tamaiti aoga ia iloa se mataupu faavae o loo maua i le latou faitauga:
E tusa ai ma le saunoaga a Peresitene Benson, aisea e taua ai mo se tagata e i ai ni atugaluga e uiga i o tatou talitonuga ona iloa pe moni le Tusi a Mamona?
O a ni auala e mafai ona fesoasoani ai le Tusi a Mamona i se tagata ia fofo ai atugaluga ma masalosaloga faaleagaga?
Ina ia aotele ia mataupu faavae e faailoa mai e tamaiti aoga, atonu e te manao e tusi le mataupu faavae lenei i le laupapa.) O le mauaina o se molimau e faapea e moni le Tusi a Mamona, e mafai ona fesoasoani i tagata sailiili e faatoilalo ai atugaluga ma masalosaloga faaleagaga?
Faaali atu le faamatalaga lenei mai ia Peresitene Gordon B. Hinckley (1910–2008), ma fai atu i nisi o tamaiti aoga e taitoatasi ona faitau leotele se parakalafa se tasi pe lua:
Ata
Peresitene Gordon B. Hinckley
“O taimi taitasi tatou te uunaia ai isi e faitau le Tusi a Mamona, ua tatou faia se galuega lelei mo i latou. Afai latou te faitau i ai ma le agaga tatalo ma se manao moni ia iloa le mea moni, o le a latou iloa e ala i le mana o le Agaga Paia e moni le tusi.
“Mai lena malamalama o le a faapea ona tafe atu ai se tautinoga o le moni o le tele o isi mea. Aua afai e moni le tusi a Mamona, o lona uiga o loo soifua le Atua. …
“Afai e moni le Tusi a Mamona, o lona uiga o Iesu e moni lava o lo tatou Togiola, le Faaola o le lalolagi. O le faamoemoega sili lava o lona faasaosaoina ma le oo mai, e tusa ai ma lana lava faamatalaga e, ‘mo le faatalitonuina foi o Iutaia ma Nuuese, o Iesu o le Keriso, o le Atua Faavavau, ua faaali mai o ia lava i atunuu uma.’ (Itulau autu o le Tusi a Mamona.) …
Afai e moni le Tusi a Mamona, o Iosefa Samita o se perofeta a le Atua, aua sa avea o ia ma se meafaigaluega i aao o le Atua i le auamaia i le malamalama o lenei molimau e uiga i le paia o lo tatou Alii. …
“Afai e moni le Tusi a Mamona, e moni le Ekalesia, aua o le pule lava lea e tasi, sa faapea ona oo mai ai i le malamalama lenei faamaumauga paia, o loo i ai ma e faaali mai ia i tatou i aso nei. O se toefuataiga o le Ekalesia na faatulagaina e le Faaola i Palesitina. O se toefuataiga o le Ekalesia na faatulagaina e le Faaola ina ua ia asia lenei konetineta e pei ona faataatia mai i lenei faamaumauga paia” (“The Power of the Book of Mormon,” Ensign, Iuni 1988, 6).
Mafaufau e fai atu fesili nei:
Aisea e taua ai mo tagata sailiili, faifeautalai, ma tagata [o le Ekalesia] ona maua se molimau o le Tusi a Mamona?
E faapefea ona faamaonia e le moni o le Tusi a Mamona o Iosefa Samita o se perofeta a le Atua? (tagai Mataio 7:13–15).
E faapefea ona fesoasoani lau moloimau o le Tusi a Mamona e faamaonia i lou loto le taua e faavavau o le Toefuataiga?
Mafaufau e faasoa atu la oe lava molimau e faapea, o le Tusi a Mamona o le faamaoniga lea o le moni o le Toefuataiga. Faaiu lau lesona e ala i le valaaulia o ni nai tamaiti aoga e faasoa atu a latou molimau e uiga i le Tusi a Mamona, ma faamatala le mafuaaga latou te fiafia ai e fesoasoani i isi e faitau le Tusi a Mamona ma tatalo e uiga i ai.
Valaaulia e Faatino
Ia faamanatu atu i faifeautalai faaolioli e faapea, o le auala sili ona lelei e sauniuni ai mo se misiona talai, o le amata ona fai o le galuega faafaifeautalai i le taimi lava lenei. Valaaulia tagata o le vasega e faatutu ni sini patino e fai ai mea nei:
Faitau atoa le Tusi a Mamona ma tatalo ia iloa lona moni, e tusa lava pe ua uma ona latou faia i se taimi ua tuanai.
Faavae se faiga masani o le faitau i aso uma mai le Tusi a Mamona?
Faailoa atu i se tasi le Tusi a Mamona i le aluga o le vaiaso o lumanai (a le o le fai atu i le tagata lava ia, pe ala foi i auala o fesootaiga faaagafesootai) ma valaaulia i latou e faitau ma tatalo e uiga i ai.