Saunia mo le Olaga o se Faifeautalai

Folasaga

O le auauna atu i se misiona talai o le talia lea o se valaau e fai ma sui o le Alii o Iesu Keriso. O se misiona o se aafiaga faamalieina ma olioli, ae e aofia ai foi le galue malosi. Ina ia avea ma faifeautalai mataalia, e ao ai i alii ma tamaitai talavou ona saunia e faatuatuaina le Alii pe a latou fetaia’i ma luitau. A o faatutuina e faifeautalai faaolioli ni faamoemoega lelei o le olaga faamisiona, o le a faapea ona latou saunia lelei ai e auauna atu ma o latou “loto, mafaufau, manatu, ma le malosi” atoa (MF&F 4:2).

Sauniuniga Muamua

Suesue i le 2 Nifae 4:19–26 ma le Alema 17:2–3, 9; 26:11–13; 29:10.
Suesue i le Elder David A. Bednar, “Avea ma se Faifeautalai,” Ensign po o le Liahona, Novema 2005, 44–47.
Sauni e faaali atu vitio “Becoming a Missionary, Part 1” (2:26) ma le “Becoming a Missionary, Part 2” (1:01; ata pupuu mai le lauga a Elder David A. Bednar, Ensign po o le Liahona, Nov. 2005, 44–47), o loo maua i le lds.org/media-library.
Sauni e faaali atu le vitio “Tumau i totonu o Laina” (5:10), o loo maua i le youth.lds.org.
Sauni e faaali atu le vitio “Preparation of Gordon B. Hinckley: Forget Yourself and Go to Work” (2:04), o loo maua i le LDS.org.
Ia saunia ia pepa e tufa atu ua faaulutalaina “Faatonuga o le Olaga Faafaifeautalai,” o loo maua i le faaiuga o le lesona.

Fautuaga mo le Aoaoina Atu

Avea ma se Faifeautalai

Amata le lesona i le fai atu i le vasega o fesili nei:

O a ni auala e te faamoemoe e suia ai le sikaili o lou olaga pe a amata lau auaunaga o se faifeautalai?
O le a se mea e mafai ona e amata faia i le taimi nei e sauniuni ai mo na suiga o le sikaili o le olaga?

Faaali atu ma valaaulia se tamaitiiti aoga e faitau le faamatalaga lenei mai ia Elder David A. Bednar o le Korama a Aposetolo e Toasefululua, po o le faaali atu o le vitio puupuu o le faamatalaga. Faamatala atu e faapea, e ui lava sa saunoa atu Elder Bednar i alii talavou i se sauniga perisitua o le konafesi aoao, ae o mataupu faavae sa ia aoaoina atu e faatatau foi i tamaitai talavou.

“I fonotaga ma le autalavou o le Ekalesia i le lalolagi, e masani ona ou valaaulia ai i latou e auai ina ia tuu mai ni fesili. O se tasi lenei o fesili e masani ona fesiligia ai au e alii talavou: ‘O le a le mea e mafai ona ou faia ina ia ou matuai saunia lelei ai e auauna atu o se faifeautalai faamisiona?’ O se fesili faamaoni faapea e tatau i ai se tali mautinoa.

“O’u uso talavou pele, o le mea sili ona taua e tasi e mafai ona e faia ina ia saunia ai mo se valaauga e auauna atu, o le avea lea ma se faifeautalai a o lei taitai ona e alu i se misiona. Faamolemole ia matau mai i la’u tali sa ou faamamafaina le avea nai lo le alu. Sei ou faamalamalamaina atu lona uiga.

“I a tatou faaupuga ua masani ai i le Ekalesia, e masani ona tatou talanoa i le alu i le lotu, alu i le malumalu, ma le alu i se misiona. Ou te fia faamamafa atu faapea, o le masani ona tatou faamamafaina o le alu e misi ai le vaega autu.

“O le autu e le o le alu i le lotu; ae, o le autu o le tapuai atu ma le faafouina o feagaiga a o tatou auai atu i le lotu. E le o le autu o le alu i le malumalu po o le ulu atu i le malumalu; ae, o le autu o le i ai lea i o tatou loto o le agaga, o feagaiga, ma sauniga o le maota o le Alii. O le autu e le o le alu i le misiona; ae, o le autu o le avea ma se faifeautalai ma auauna atu i o tatou olaga atoa ma o tatou loto atoa, mafaufau atoa, manatu atoa, ma le malosi atoa. E mafai e se alii talavou ona alu i se misiona ae le avea ma se faifeautalai, ae le o le mea lea o loo moomia mai e le Alii po o le Ekalesia.

“O lo’u faamoemoe moni mo outou alii talavou o le aua ne’i na ona outou o i se misiona—ae ia avea outou ma ni faifeautalai a o lei taitai ona auina atu a outou pepa o le misiona, a o lei taitai ona e maua se valaauga e auauna atu, a o lei taitai ona vaetofia oe e lau pereistene o le siteki, a o lei taitai ona e ulufale atu i le MTC” (“Avea ma se Faifeautalai,” Ensign po o le Liahona, Nov. 2005, 45).

O le a le mea na saunoa mai Elder Bednar e aupito sili ona taua e mafai ona e faia ina ia saunia ai mo se valaauga e auauna atu i se misiona? (Ia avea ma se faifeautalai ao lei taitai ona e alu i se misiona.)

Tuu atu i se tamaitiiti aoga e faitau le vaega e sosoo ai o le upusii a Elder Bednar, po o le faaali atu o le vitio puupuu o le faamatalaga:

“E matuai manino lava, o le faagasologa o le avea ma se faifeautalai e le manaomia ai le ofuina i le aoga e se alii talavou o se ofutino paepae ma le fusiua i aso uma, po o le mulimulitai i taiala a faifeautalai mo le taimi e moe ma ala ai, e ui lava o le toatele lava o matua e lagolagoina lena manatu. “Ae e mafai ona faateleina lou manao e auauna atu i le Atua (tagai MF&F 4:3), ma e te mafai ona amata ona mafaufau e pei o faifeautalai, ia faitau i mea e faitauina e faifeautalai, ia tatalo e pei o faifeautalai, ia lagona mea e pei ona lagonaina e faifeautalai. E mafai ona e aloese mai aafiaga faalelalolagi lea e mafua ai ona alu ese le Agaga Paia, ma e mafai ona tupu a’e lou lagona mautinoa i le iloaina lea ma le tali atu i uunaiga faaleagaga. O lea upu ma lea upu ma lea mataupu ma lea mataupu, o se mea itiiti iinei ma si mea itiiti iina, e mafai ai ona e faasolosolo atu ai lava ina avea ma faifeautalai o loo e faamoemoe i ai ma le faifeautalai o loo faamoemoe i ai le Faaola” (“Avea ma se Faifeautalai,” 45–46).

Ona fesili atu lea:

E tusa ai ma le saunoaga a Elder Bednar, o a ni auala e mafai ona avea ai oe ma se faifeautalai a’o lei taitai e ulufale atu i le nofoaga autu e aoaoina ai faifeautalai?

A maea ona tali mai tamaiti aoga, tusi le upumoni lenei i le laupapa: E mafai ona avea a’u ma se faifeautalai i le taimi nei i le ala ou te mafaufau ai, manatu ai, ma amio ai. Ina ia faaali atu lenei mataupu faavae, fai atu i tamaiti aoga e su’e i le Alema 17:2–3, 9, 11, ma faamalamalama atu o nei fuaiupu o loo faamatala mai ai atalii o Mosaea, o e sa auauna atu i se misiona i sa Lamana. Valaaulia se tamaitiiti aoga e faitau leotele ia fuaiupu a’o mulimuli le vasega i le faitauga, ma vaavaai mo mea na fai e atalii o Mosaea e saunia ai e aoao atu i le mana ma le pule. Ona fesili atu lea i tamaiti aoga:

O a mea na fai e atalii o Mosaea ina ia mafai ona saunia e aoao atu i le mana ma le pule?
E mafai faapefea e faifeautalai faaolioli ona mulimuli i le faataitaiga a atalii o Mosaea a’o latou sauniuni e avea ma faifeautalai i le taimi nei?

Tuu atu i tamaiti aoga e su’e i le itulau e 147 i le Tala’i La’u Talalelei, ma tuu atu i se tamaitiiti aoga e faitau leotele le parakalafa lona tolu. Fai atu fesili e pei o nei:

E tusa ai ma le tusi o le valaauga o le faifeautalai, o a ni mea ua faamoemoeina faifeautalai e tuuto atu i le Alii, ae o a foi ni mea ua faamoemoeina ia latou faataatiaese?
O a ni faataitaiga o ni “mea tau oe lava ia” e tatau ona faataatiaese e faifeautalai pe a amata a latou auaunaga faafaifeautalai?
O anafea na faamanuiaina ai oe e ala i le faia o osigataulaga ina ia mafai ona auauna ai i le Atua?

O le isi mea e sosoo ai, ia tuu atu i tamaiti aoga se taimi e mafaufau loloto ai, ma tusi i lalo i a latou api talaaga mo suesuega ia tali i fesili nei. Uunaia tamaiti aoga ia maoti ona tusi i lalo mea latou te lagonaina na talanoa atu ai le Agaga Paia ia i latou lava taitoatasi. Ona fesili atu lea:

O a nisi o mea e mafai ona e faia i le taimi nei e amata mafaufau, lagona, ma faatino e pei o se faifeautalai?
E mafai faapefea ona e saunia e faataatiaese ia mea a le tagata lava ia ae tuuto atoa atu lou taimi ma le mafaufau i le tautuaina o le Alii?
E mafai faapefea e le faia o nei mea ona fesoasoani e te saunia ai e aoao atu i le mana ma le pule e pei o atalii o Mosaea?

Uunai tamaiti aoga e tusi i lalo ni sini faapitoa i a latou api talaaga. O manatu e ono aofia ai le suesue i le Tusi a Mamona i aso uma, tatalo i le taeao ma le po, auai i fonotaga uma a le Ekalesia, alu e moe a’o le’i taina le 10:30 i le po, ma le ala i luga i le 6:30 i le taeao, tuuitiitia lo latou faaaogaina o masini eletonika, po o le taumafai ia faateleina le usiusitai i poloaiga.

O Le Tulaga Faatonuina o le Agavaa

Tusi le upu “tulaga manaomia” i luga o le laupapa, ma fai atu i tamaiti aoga e mafaufau i ni tulaga e alagatatau ai ia tulaga manaomia. Tuu atu i tamaiti aoga se taimi e saili ai i le Mataupu Faavae ma Feagaiga 88:74 mo nisi o tulaga manaomia mo le faia o se misiona. Ona fesili atu lea:

O a mea na fautuaina ai e le Alii ia tagata galulue i Lona malo e fai ina ia saunia ai e talai atu le talalelei? (Faapaia i latou lava, faamamā o latou loto, ma faamamā o latou lima.)
O le a le uiga o le ia faapaiaina? (Ia mama, ia agavaa mo le Agaga Paia.)
O le a le mataupu faavae e faatatau i faifeautalai o loo aoaoina i le Mataupu Faavae ma Feagaiga 88:74? (A uma ona tali mai tamaiti aoga, tusi le mea lenei i le laupapa: Ua poloaiina e le Alii ana auauna ia mama.)

Ina ia fesoasoani ia faamalamalama le uiga, o se faifeautalai e tatau ona mama ma agavaa e auauna atu i se misiona, faaali atu le vaega lenei o se lauga na tuuina mai e Elder M. Russell Ballard o le Korama a Aposetolo e Toasefululua, ma valaaulia se tamaitiiti aoga na te faitaua leotele:

“I le avea ai o au ma se Aposetolo a le Alii o Iesu Keriso, ou te valaau atu ia te outou ina ia amata i le taimi nei lava—i le po nei—ina ia matuai agavaa atoatoa. Ia faia nei ni a outou faaiuga ma ia tautino ia te outou lava ma le Atua, e amata atu i le taimi lava lenei, o le a outou taumafai ma le maelega e tausia o outou loto, lima, ma mafaufau ia mama ma le pisia mai soo se agasala o le ola mama. Ia fai nei a outou faaiuga o le a outou aloese mai tusi ma ata mataga e pei o lou aloese mai i se faamai oti, aua foi o le mea moni lava lena. Ia fai nei a outou faaiuga ina ia tetee atu ma le malosi i tapaa, ava malosi, ma fualaau faasaina. Filifili nei ia outou faamaoni. Filifili nei ia avea outou ma ni tagatanuu lelei ma ia usitai i tulafono a nuu o outou aumau ai. Ia filifili e amata atu i le po nei, ona outou tausia le tulafono o le le gavia pe faaaoga gagana mataga e le talafeagai ma se tasi ua umia le perisitua” (“O Se Tupulaga Sili Ona Maoae o Faifeautalai,” Ensign po o le Liahona, Nov. 2002, 47).

Fai atu fesili e pei o nei e fesoasoani ai i tamaiti aoga e iloilo ai le fautuaga a Elder Ballard:

O a poloaiga sa maoti ona ta’ua e Elder Ballard e tatau ona usitaia e faifeautalai faaolioli?
O le a le uiga o le ia “le pisia lou loto, lima, ma le mafaufau, mai soo se agasala o le ola mama”? (Afai e manaomia, atonu e te faatatau atu i le vaega “Mama Atoatoa i Tulaga Feusuai” i le Mo le Malosi o le Autalavou [tamaitusi, 2011], 35–37.)
Aisea o se mea atamai ai le aloese mai ponokalafi e pei o le aloese mai i se faama’i e atiati malie, ma pe mafai faapefea e le aloese mai ponokalafi ona fesoasoani e te mafaufau, lagona, ma amio ai pei o se faifeautalai?

Faaali atu le vitio “Tumau i totonu o Laina” (5:10) e fesoasoani ai i tamaiti aoga ia lagona le moni ma le taua o le agavaa e auauna atu i se misiona. A’o le’i faaalia le vitio, mafaufau e talanoa pe aisea e taua ai laina o tuaoi i nisi o taaloga faapitoa. Talanoa i le eseesega o le va o “totonu o tuaoi” ma “fafo o tuaoi” ma le auala e aafia ai faatinoga a tagata taaalo i laina o tuaoi i le taimi o se taaloga. Ta’u atu i tamaiti e faapea, na saunoa mai Elder Jeffrey R. Holland o le Korama a Aposetolo e Toasefululua, e faatatau i le uiga o le tumau i totonu o laina faaleagaga a’o le’i alu atu i se misiona.

A uma ona matamata le vitio, mafaufau e fai atu i tamaiti aoga ia fesili nei:

O le a le sootaga i le va o le “tumau i totonu o laina” ma le sauniuni e auauna atu i se misiona?
Sa talosaga mai Elder Holland ia i latou o loo i ai i le au a le Alii ia tumau i le au ma aua le o i “fafo o tuaoi.” O le a le uiga o lenei mea ia te oe?
Aisea o le a taofia ai se faifeautalai mai le fesoasoani atu ma le mataalia i isi ia o mai ia Keriso ona o le le salamo i agasala ua mavae?

Tuu atu i tamaiti aoga se taimi e mafaufau loloto ai i o latou lava tulaga o le agavaa e auauna atu i se misiona. Faamalamalama atu i tamaiti aoga e faapea, afai e i ai ni o latou atugaluga e uiga i o latou agavaa, e tatau ona latou sailia le taitaiga i le tatalo faamaoni ma talanoaina nei atugaluga ma o latou epikopo po o le peresitene o le paranesi.

O Sauniuniga Faaletino ma le Faalelagona

Faaali atu le faamatalaga lenei na tuuina mai e le Au Peresitene Sili i le 2002, ma valaaulia tamaiti aoga e faitau filemu: Pe tuu atu i se tamaitiiti aoga e faitau leotele le faamatalaga:

“O le galuega faamisiona o se avanoa mo i latou o e e valaauina e ala i musumusuga e le Peresitene o le Ekalesia. Ua i ai i epikopo ma peresitene o siteki le tiutetauave ogaoga o le sailia lea o tagata agavaa, ma ta’uaogaina, o e ua saunia faaleagaga, faaletino, ma faalelagona mo lenei auaunaga paia ma e e mafai ona fautuaina mai e aunoa ma se mea e taofiofia ai” (tusi a le Au Peresitene Sili, 11 Tes. 2002).

Ona fesili atu lea:

E faaopoopo atu i sauniuniga faaleagaga, aisea o le a manaomia ai e se tagata ona saunia faaletino ma faalelagona e auauna atu i se misiona?

Faaali atu le upusii lenei ma valaaulia se tamaitiiti aoga se toatasi pe sili atu e faitaua leotele:

“Faamalositino soo (i aso uma). O se faifeautalai e tatau ona mafai ona savali i le averesi e ono maila (10 km) i le aso ma vili le uila vilivae i le 12 maila (19 km) i le aso. O faifeautalai faaolioli e le o savavali e sili atu mai na o le taavale i le vasega po o le galuega, e ono mafai ona tiga vae ma mafoefoe pe a taunuu atu i le misiona. … O se faifeautalai e le lava le malosi o le a vaivai i le galuega faamisiona, ma o se faifeautalai e vaivai o le a tele se avanoa e faavaivai ai ma i ai popolega o le soifua maloloina nai lo se faifeautalai e malosi lelei faaletino.

“O faifeautalai faaolioli e mafai ona saunia mo le faigata o le olaga faafaifeautalai e ala i le faatulagaina o se mamanu masani o gaoioiga faamalositino—o le savali, tamoe, po o le tietie uila mo se itula i aso uma. …

“Ia lava le moe. E ui e eseese manaoga o le moe, o le autalavou matutua uma e manaomia le moe mo le fitu i le valu itula i le aso. O le mea lelei lava, e tatau ona latou momoe i le 10:30 i le vaeluapo ma feala i luga i le 6:30 i le 8:00 i le taeao. O le ala ai seia oo i le 2:00 po o le 3:00 i le vaveao ma moe seia oo i le 10:00 i le taeao, o le a tuua ai se tagata ma se lagona lē lava i taimi uma ma manao ai e moe seia oo i le aoauli. … O faifeautalai e ola i se olaga faatulagaina. E momoe i latou i le 10:30 i le afiafi, ae ala i le 6:30 i le taeao i aso taitasi. O lenei faatulagaga o le a faigata, sei vagana e faia e faifeautalai faamoemoeina se faatulagaga talitutusa a o le’i taitai oo mai le valaauga e auauna atu ai.

“Masani e tausami i meaai maloloina. Nai lo le ola ai i meaai suamalie ma lololo, e tatau i le autalavou ona aoao ia fiafia i taumafa e i ai porotini ma meaai e i ai ’alava, e pei o anogase o manu, iokati (yogurt), fualaau faisua, ma fualaau aina. O le inuina foi o le sili atu ma le 12 aunese o vai suamalie i le aso ua ova tele” (Donald B. Doty, “Sauniuniga Faalesoifua Maloloina a le Faifeautalai,” Liahona, Mat. 2007, 64).

Afai e le malosi faaletino se faifeautalai, o a ni aafiaga o lenei mea e mafai ona i ai i le alualu i luma o le galuega, i le soa a le faifeautalai, ma le ola manuia o le faifeautalai lava ia?

Valaaulia tamaiti aoga e mafaufau loloto filemu i fesili nei:

E faapefea ona e faamatalaina au sauniuniga faaletino i le taimi nei e auauna atu ai i se misiona?
O a nisi o mea e mafai ona e faia i le taimi nei e sauniuni ai e faafetaia’i mea e manaomia o se misiona talai?

Ia uunai tamaiti aoga e fai se fuafuaga e amata nei loa ona maua ia lava le moe, ia iai meaai maloloina, ma ia faamalositino ina ia latou maua le malosi atoatoa latou te manaomia ia manuia ai o ni faifeautalai. Pe a lava le taimi, valaaulia tamaiti aoga e tusi a latou fuafuaga i a latou api talaaga mo suesuega:

Tuu atu i se tamaitiiti aoga e faamalamalama auala e tali atu ai le tino i gaoioiga faigata faaletino e pei o le tamoe i luga ma le sau i lalo i ni faasitepu (faateleina ai le tata o le fatu, mamafa ai le manava, afu, lelava maso, ma isi mea faapena). Faamatala atu o popolega faaletino ua na o se tasi lea o ituaiga luitau e feagai ma faifeautalai. Ona fesili atu lea:

E faapefea ona tali atu le tino ma le mafaufau o se faifeautalai i popolega faalelagona pe faalemafaufau lea e oo mai ona o luitau faigata po o faafitauli e le’i mafaufauina?

Faamatala atu e faapea, o faifeautalai uma lava e oo i se ituaiga o popolega faalelagona, lagona o le ma’i manatu i le aiga ma le mafai ona taulima ia tulaga, faanoanoa, po o isi lava lagona e ono tosoina ai i latou i lalo, ma o nei mea o se vaega masani lava o le olaga faafaifeautalai.

Faaali atu le vitio “Preparation of Gordon B. Hinckley: Forget Yourself and Go to Work” (2:04). Uunai tamaiti aoga e vaavaai mo mafuaaga na lagona ai e Peresitene Gordon B. Hinckley le lotovaivai a’o avea ma se faifeautalai talavou i Egelani.

Fesili atu i le vasega:

O a nisi o mafuaaga na lagona ai e Peresitene Hinckley le lotovaivai ina ua taunuu atu i totonu o le misiona?
O le a le mea na faia e Peresitene Hinckley sa fesoasoani ai ia te ia e faatoilalo ai le lotovaivai?

Faamalamalama atu i le vasega e faapea, o nisi o faifeautalai sili ona lelei i tusitusiga paia sa oo foi i le lotovaivai ma isi tauiviga i a latou galuega faafaifeautalai. Tusi mau faasino nei i luga o le laupapa: Ieremia 1:4–9; Alema 17:5; 26:27; ma le Mose 6:31–32. Tuu atu i tagata o le vasega e filifili ma faitau filemu se tasi o fuaitau o mau, ma vaavaai mo luitau na faailoa mai pe na oo i ai tagata taitoatasi na latou faitau e uiga i ai. A o tali mai tamaiti aoga, mafaufau e otooto a latou tali i le laupapa faapenei:

Ieremia 1:4–9. Sa fefe Ieremia ina ne’i le faalogo tagata ia te ia ona sa laitiiti tele o ia.

Alema 17:5; 26:27. Sa puapuagatia Amona ma ona uso a faifeautalai i le tino ma le mafaufau. Sa latou lagona le faigata ma sa sauni e togi le solo.

Mose 6:31–32. Sa popole Enoka o le a leai se tasi e faalogo ia te ia ona sa tuai lana tautala ma sa laitiiti lava foi o ia.

Ona fesili atu lea:

O a ni mea ua e aoao mai i nei tala e tolu e uiga i luitau faalelagona o le talaiga o le talalelei? (A o tali mai tamaiti aoga, atonu e te manao e tusi lenei upumoni i luga o le laupapa.) O luitau faaletino ma faalelagona o se vaega masani o le olaga faafaifeautalai.
O a ni ou lagona o i ai ina ua e faitau i le faamatalaga e faapea, o luitau faaletino ma faalelagona o se vaega masani o le olaga faafaifeautalai?
O a ni auala e aafia ai au sauniuniga e auauna atu i le iloaina e feagai uma lava faifeautalai ma luitau?

Fesoasoani i tamaiti aoga ia malamalama, e toetoe lava o faifeautalai uma e oo i ni luitau faalelagona pe faaletino. O le mea lea, e tatau ai i faifeautalai ona aoao ia iloa auala e taulima ai le popolevale i se auala lelei ma talafeagai i le misiona. E masani lava, o auala lelei e taulima ai le popolevale e aoga i fafo atu i le misiona, e pei o le faaaluina o se taimi na o oe, faalogologo i musika, po o le taaalo i taaloga, e le talafeagai mo faifeautalai ni faiga faisoo. E tatau i faifeautalai ona aoao ia iloa auala e taulima ai le popolevale i auala e faataga i tulafono a le misiona.

Vaevae le vasega i ni vaega laiti ma tufa atu i tamaiti aoga le pepa “Faatonuga o le Olaga Faafaifeautalai”. Tuu atu i vaega taitasi e (1) faitau leotele le vaega muamua, ua faaautuina “Faatonuga o le Olaga Faafaifeautalai,” ma le (2) talanoa pe mafai faapefea ona fesoasoani le nofouta i faatonuga o le olaga faafaifeautalai ia i latou ia saunia lelei ai mo luitau o le olaga i le misiona.

pepa e tufa atu o le Olaga Faafaifeautalai

A ua lava loa le taimi mo vaega e faitau ma talanoaina ai le vaega, fai atu i nisi o tamaiti aoga e faasoa mai nisi o mea autu na talanoaina e o latou vaega. Ona, faaalu lea o se vaega, ni nai minute e faitau ma talanoa ai i le vaega e sosoo ai o le pepa e tufa atu, ua faaautuina “Fetuutuunai i Aafiaga Fou [Adjusting to New Experiences],” ma talanoa e uiga i tulaga masani o fetuunaiga e ono fesoasoani i tamaiti aoga pe a latou ulufale atu i le NAF.

Tepa atu i le Alii mo le Fesoasoani i Luitau

Ina ia uunaia tamaiti aoga e amata ona mafaufau i auala o le a latou taulimaina ai luitau latou te oo i ai i totonu o le misiona, faamatala atu, sa feagai Nifae ma ni lagona o’oo’o o le le atoatoa ma le lotovaivai ma tusia ai e uiga i mea sa ia faia e faatoilalo ai na lagona. Tuu atu i se tamaitiiti aoga e faitau leotele le 2 Nifae 4:17–19. Ona fesili atu lea:

O a ni upu po o ni fasifuaitau sa faaaoga e Nifae e faamatala ai taunuuga o ona vaivaiga?

Fai atu i tamaiti aoga e suesue i le 2 Nifae 4:19–26, ma vaavaai mo mea na fesoasoani ia Nifae e faatoilalo ai ona lagona o le lotovaivai. Ona fesili atu lea:

O a ni fuaitau sa faaaoga e Nifae e faamatala ai auala sa ia faatoilalo ai ona lagona loloto le lelei? (E tatau ona faailoa mai e tamaiti aoga e faapea, sa faalagolago Nifae i le Alii [tagai i le fuaiupu e 19], sa ia manatua mea sa faia e le Alii mo ia i taimi ua mavae [tagai i fuaiupu 20-23], sa ia tatalo malosi [tagai i le fuaiupu e 24], ma sa ia manatuaina le alofa tunoa o le Alii [fuaiupu e 26].)
E mafai faapefea e le manatuaina o le Alii ma Lona agalelei ona fesoasoani ia te oe i taimi o le lotovaivai po o le popolevale?
Sa tatou ta’ua muamua atu i le lesona, o se tulaga masani mo faifeautalai le oo i le atuatuvale faalelagona, lagona o le ma’i manatu i le aiga, ma le le atoatoa, faanoanoa, po o isi lagona e ono tosoina ai i latou i lalo. O le mafaufau atu i mea sa tusia e Nifae i le 2 Nifae 4:19–26, o le a se fautuaga e te tuuina atu i se faifeautalai e oo i nei ituaiga o lagona? (Fesoasoani i tamaiti aoga e faailoa mai le mataupu faavae lenei ma mafaufau e tusi i luga i le laupapa: A faalagolago faifeautalai i le Alii, o le a mafai ona fesoasoani le Alii ia i latou e taulima faatonuga faaletino ma faalelagona o le olaga faafaifeautalai.)

Mafaufau e faasoa atu i tamaiti aoga le saunoaga lenei mai ia Elder Jeffrey R. Holland o le Korama a Aposetolo e Toasefululua:

“Ou te le talitonu e faapea ua faigofie le galuega faafaifeautalai, pe faigofie foi le liuaina, po o le faatumauina, po o le faaauau pea i le faamaoni. Ou te talitonu e tatau ona manaomia ai se taumafaiga, o se mea mai i le taele o o tatou agaga.

“Afai e mafai ona afio mai o Ia i luma i le po, tootuli i lalo, faapau i Ona foliga, sau le palapala mai pu afu uma, ma alaga, ‘Ava, Le Tama (Papa), a mafai ona aveese lenei ipu, ia aveese atu’ [tagai i le Mareko 14:36], e le o se mea e te’i ai, o le faaolataga e le o se mea e faataalo pe faigofie mo i tatou. Afai e te tau mafaufau pe i ai se isi auala faigofie atu, e tatau ona e manatua e le o oe le tagata muamua ua fesili i lena mea. Sa fesiliga e se tasi e sili atu ona maoae ma sili atu ona mamalu i aso lava la ua leva, pe sa le’i i ai se isi auala na faigofie atu.

“O le Togiola o le a aoga i faifeautalai, masalo e sili atu le taua nai lo le aoga i le tagata sailiili. Pe a e tauivi, pe a teenaina oe, pe a tuufeanu atu ia te oe, ma tuli oe i fafo ma isa ma palauvale, ua e oo i le faiga sa faia i le tagata sili ona lelei ua iloa i lenei lalolagi, le tagata e toatasi ua mama ma atoatoa na soifua [i le lalolagi]. Ua i ai le pogai e te tu maualuga ai ma ia faafetai ona ua silafia e le Alo Soifua o le Atua Soifua ou faanoanoaga ma puapuaga uma. Na o le pau lava le auala i le faaolataga, e ala atu lea i Ketesemane ma agai atu ai i Kalevaria. Na pau lava le ala i le faavavau, e ala atu lea ia te Ia—o le Ala, le Upumoni, ma le Ola” (“Galuega Faafaifeautalai ma le Togiola,” Liahona, Oke. 2001, 26).

Ona fesili atu lea:

E tusa ai ma le saunoaga a Elder Holland, o a mafuaaga e tatau ai i faifeautalai ona tutu maualuga i taimi o faigata?

Ta’u atu i tamaiti aoga, pe a feagai ai ma tulaga faigata i totonu o le misiona, e tatau ona latou manatu o le gaulega o loo latou faia o le fesoasoani lea e aumai isi ia Iesu Keriso. Tusi mau faasino nei i luga o le laupapa: Alema 26:11–13; 29:10; ma le Mataupu Faavae ma Feagaiga 18:15–16. Fai i ni nai tamaiti aoga e auauai i le faitauina leotele o nei fuaitau, a’o mulimuli le vasega i le faitauga, ma vaavaai mo mea o loo aoao mai i fuaitau e uiga i le olaga faafaifeautalai. Valaaulia tamaiti aoga e faasoa mai ni malamalamaaga sa’o ma loloto, ona faamautinoa atu lea ia i latou, e ui lava ina faigata le galuega faafaifeautalai ma o nisi taimi e faavaivai loto, ae a tatou galulue e aumai isi ia Iesu Keriso, e faamanuia i tatou e le Alii i le olioli. Mafaufau e fai atu i tamaiti aoga e faasoa mai ni aafiaga na latou oo i ai i lenei mataupu faavae.

Faailoa atu i tamaiti aoga e faapea, mai lea taimi i lea taimi atonu e i ai se latou soa e nafa ma faafitauli o le soifua manuia faalelagona pe faalemafaufau. I tulaga faapena, e tatau ona latou faalogo ma faaali atu le alofa i a latou soa, aua o se uiga faaalia lagolagosua a se soa e mafai ona taua tele i le fesoasoani e foia ia faafitauli. E le tatau ona latou fautua atu e faapea, ana tele le faatuatua o se faifeautalai o loo tauivi o le a faapea ona aluese ai ona luitau.

Faamalamalama atu foi, o nisi o luitau e manaomia ai le fesoasoani faaopoopo mai taitai perisitua ma tagata tomai faapitoa i le manuia faalemafaufau, ma o le tele o misiona e avanoa ai ia tagata tomai faapitoa talafeagai o le soifua maloloina mo faifeautalai. O faifeautalai o e o tauivi faalelagona e tatau ona talanoaina o latou tulaga ma o latou peresitene misiona e iloilo ai po o le a le fesoasoani e ono talafeagai ai.

Ina ia fesoasoani i tamaiti aoga ia mafaufau atili i auala latou te ono taulima ai luitau faaletino ma faalelagona latou te ono feagai i le avea ai ma ni faifeautalai, tuu atu ia i latou ni nai minute e tusi ai e uiga i se taimi sa latou faatoilaloina ai ni tulaga faigata. Ia tulitatao e ala i le fesili atu i tamaiti aoga po o a ni mea na latou aoaoina e uiga i le Alii ma e uiga ia i latou lava mai le aafiaga, ma pe faapefea ona latou faaaogaina le aafiaga e faamalolosia ai i latou i le lumanai.

I le faaiuga, faailoa atu lou talitonuina o au tamaiti aoga ma o latou gafatia ona taulima ia suiga e o mai faatasi ma le olaga faafaifeautalai. Faasoa atu lau molimau e fesoasoani le Alii i tagata taitoatasi o e liliu atu ia te Ia ia taulima faatonuga faaletino ma faalelagona o o latou olaga.)

Valaaulia e Faatino

Valaaulia tagata o le vasega e saunia mo le olaga i le misiona e ala i le faamaeaina o se tasi pe sili atu o gaoioiga nei.

Mafaufau po o le a se mea e tatau ona e faia ia mama ma agavaa ai e auauna atu i se misiona. Afai e manaomia, aveese manatu ma amioga le talafeagai e inosia e le Agaga.
Faatutu ni sini faaletagata lava ia e mulimuli i se polokalama faamalositino i aso uma, ia ai i meaai maloloina, po o le ia atinae se mausa o le moe e mulimuli ai i le faatulagaga o taimi i aso taitasi a le faifeautalai.
Toe faamanatu le tulaga faatonuina o laei mo faifeautalai faamisiona o loo i le LDS.org.
Fai atu i se faifeautalai ua maea le misiona e talanoa i mea sa ia faia e taulima ai le popolevale ma faatoilalo ai luitau o le olaga faafaifeautalai.
Ia talanoaina ma matua po o taitai perisitua ia auala e talanoa atu ai i se soa faifeautalai o le atonu e le tele ni mea e te lua tutusa ai, po o le e faafaigata ona e fesootai i ai.