O Se Tupulaga Sili Ona Maoae o Faifeautalai

Elder M. Russell Ballard

O Le Korama a Aposetolo e Toasefululua

Matou te valaau atu ia te outou, o matou uso Perisitua Arona, ina ia outou tutulai, ia outou faataunuuina mea uma e mafai ona outou faia, ma ia saunia outou ma le atoatoa e auauna atu i le Alii.

O se tasi o tala e sili ona mamana ma aoga mai le Tusi a Mamona, o tagata o le nuu o Amona sa latou osi feagaiga o le a latou le toe faaaogaina ni auupega i le faamaligiina o le toto. Peitai, “ina ua latou iloa le faigata, ma puapuaga … ua onosai ai sa Nifae ona o i latou, ua mutimutivale lo latou alofa, ma ua latou fia fai auupega i le leoleoina o lo latou nuu” (Alema 53:13). Na faatauanau atu Helamana ma ona uso ia i latou ina ia faamamalu pea i la latou feagaiga ma le Alii.

E le o tauina mai e le mau ia i tatou, po o ai na muai tauina atu, e le i osia e o latou atalii lena feagaiga na osia e o latou matua. Ou te fia mafaufau i ai, o se tasi o alii talavou lea na talosaga atu mo le avanoa e faatagaina ai o ia ma lana tupulaga e “faaaogaina auupega, ma [ta’ua] i latou o sa Nifae.

“Ma ua latou osia le feagaiga e tau ina ia saoloto sa Nifae, ioe, e leoleoina le nuu e oo lava i le tuuina atu o latou ola” (Alema 53: 16–7).

O se galuega sa sili atu ona tulaga ese mo se vaega e 2,000 o alii talavou, peitai, o i latou o ni alii talavou tulaga ese. E tusa ai ma le faamatalaga a le mau, “ ua matua totoa foi i le lototele ma le malosi atoa ma le atamai; ae peitai, faauta, ua le gata i lea—o tagata faamaoni i latou i aso uma, i mea uma ua tuuina atu ia te i latou.

“Ioe, o tagata faamaoni ma le faautauta i latou, aua ua aoaoina i latou e tausi i poloaiga a le Atua, ma savavali ma le amio sao i ona luma” (Alema 53: 20–1).

O le vaega o totoe o le tala, o lo o faamatalaina ai le ala na tau atu ai nei alii talavou ma le totoa, i autau a sa Lamana e matutua atu ma tele atu lo latou poto masani nai lo i latou. E tusa ai ma le faamatalaga a lo latou taitai, o Helamana, “na … latou tau e peiseai i le malosi o le Atua; … ma ua faapea ona matua malosi na latou oso atu ai i sa Lamana, ua latou faamatau ai ia te i latou; o le mea lea na tuuina mai ai e sa Lamana i latou lava ia faatagataotauaina” (Alema 56:56).

Sei mafaufau ane i lena mea! O nei alii talavou e le lava se poto masani, ae na saunia lelei i latou i le faaleagaga ma le faaletino, ma na matuai mamana lava, na latou faamatauina ai o latou fili ma iu ina latou tuuina mai i latou lava e faatagataotauaina! E ui lava o le 2,000 uma o alii talavou na manunua i le taua i se taimi se tasi po o se isi foi, ae sa lei fasiotia se toatasi (tagai Alema 57:25). Ma ou te toe sii maia upu a Helamana: “Matou te tuuina atu ai e pei ona tatau i le mana ofoofogia o le Atua, aua latou te faatuatua tele i le mea ua aoaoina ai i latou—e i ai le Atua amiotonu, a e faasaoina i lona mana ofoofogia i latou o e le masalosalo” (Alema 57:26).

Ou uso e, o aso nei o lo o tatou tauina ai se taua, e tele atu auala e sili ai ona matautia, sili atu ona tumu i mea leaga, nai lo le taua i le va o sa Nifae ma sa Lamana. O lo tatou fili e atamai ma e tele ana auala. Tatou te faasaga tau atu ia Lusifelo, le tama o pepelo uma, o le fili o mea lelei ma mea tonu ma mea paia uma. O le mea moni, ua tatou ola i le taimi na valoia e Paulo, o le a “avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amioleaga,

“O e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei,

“… o e ua tele le manao i mea faafiafia a e leai se manao i le Atua;

“O e ua peiseai ua amio Atua, a o le mana ua i lea mea ua latou teena: ia e aloese lava i tagata faapena” (2 Timoteo 3:2–5).

Uso e, e masani ona outou faalogo i nei mea,? Ia te au lava ia, o upu a Paulo ua pei lava o se faamatalaga o mea o lo o tatou vaaia i le televise i po uma.

O “taimi matautia” nei. Ua tatou tau ma le faamaoni mo agaga o tagata. O le fili e le alofa ma e le faavaivai. O lo o ia aveina atu pagota e faavavau i se televave maoae lava. Ma na te le o faaalia mai lava ni foliga o le faavaivai.

A o tatou faaalia le agaga faafetai tele i le toatele o tagata o le Ekalesia o e o lo o faia mea e tele mo le taua mo le upumoni ma le mea sao, ou te fia tau atu ma le faamaoni ia te outou, e le o taitai ona lava. Tatou te manaomia nisi fesoasoani se tele atu. Ma, e pei ona vaavaai atu le nuu o Amona i o latou atalii mo se malosiaga i le taua ma sa Lamana, matou te vaavaai atu ia te outou, ou uso e, talavou o le Perisitua Arona. Matou te manaomia outou. E pei o le 2,000 fitafita totoa a Helamana, o outou foi o atalii agaga o le Atua ma e mafai foi ona faauuina outou i le mana e fausia ai ma leoleoina ai Lona malo. Matou te manaomia ona outou osia feagaiga paia, e pei ona latou faia. Matou te manaomia ona outou usiusitai ma faatuatua atoatoa, e pei ona sa i ai i latou.

O le mea ua tatou manaomia i le taimi nei o se tupulaga sili ona maoae o faifeautalai i le talafaasolopito o le Ekalesia. Tatou te manaomia ni faifeautalai agavaa, talafeagai, saunia ma malolosi i le faaleagaga o e, e pei o fitafita totoa e 2,000 a Helamana, o e “ua matua totoa foi i le lototele, ma le malosi atoa ma le atamai” ma i latou o e “faamaoni i latou i aso uma, i mea uma [ua] tuuina atu ia te i latou” (Alema 53:20).

Faalogo i na upu, ou uso talavou e: totoa, lototele, malosi, atamai, faamaoni. Tatou te le manaomia ni alii talavou e vaivai i le faaleagaga ma le atoatoa se tautinoga. Tatou te le manaomia le na ona faatumuina o se avanoa; tatou te manaomia lou loto atoa ma lou agaga atoa. Tatou te manaomia faifeautalai malolosi, talitonu, ma naunautai o i latou e iloa ona faalogo ma usitai i musumusuga a le Agaga Paia. E le o se taimi lenei mo ni vaivaiga faaleagaga. E le mafai ona matou auina atu outou i se misiona e toe faatoaaga mai ai, e suia mai ai, pe ia maua mai ai se molimau. Ua leai so tatou taimi mo na mea. Matou te mananao ia faatumuina outou i le “faatuatua, faamoemoe, agaalofa ma le alofa, ma le manatu tasi i le mamalu o le Atua” (MFF 4: 5).

I le avea ai o au ma se aposetolo a le Alii o Iesu Keriso, ou te valaau atu ia te outou ina ia amata i le taimi nei lava—i le po nei—ina ia matuai agavaa atoatoa. Ia faia nei ni a outou faaiuga ma ia tautino ia te outou lava ma le Atua, e amata atu i le taimi lava lenei, o le a outou taumafai ma le maelega e tausia o outou loto, lima, ma mafaufau ia mama ma le pisia mai soo se agasala o le ola mama. Ia fai nei a outou faaiuga o le a outou aloese mai tusi ma ata mataga e pei o lou aloese mai i se faamai oti, aua foi o le mea moni lava lena. Ia fai nei a outou faaiuga ina ia tetee atu ma le malosi i tapaa, ava malosi, ma fualaau faasaina. Filifili nei ia outou faamaoni. Filifili nei ia avea outou ma ni tagatanuu lelei ma ia usitai i tulafono a nuu o outou aumau ai. Ia filifili e amata atu i le po nei, ona outou tausia le tulafono o le le gavia pe faaaoga gagana mataga e le talafeagai ma se tasi ua umia le perisitua.

Ma e le na o le pau ia o mea o lo o matou faamoemoeina mai ia te outou, ou uso e, talavou. Matou te faamoemoe ina ia maua sa outou molimau malamalama ma le malosi ma le mausali i le talalelei toefuataiina a Iesu Keriso. Matou te faamoemoe ina ia outou galulue malosi. Matou te faamoemoe tou te osia ma tausia feagaiga. Matou te faamoemoe ia te outou e avea ma faifeautalai e tutusa lo outou matagofie ma lo outou mamalu, ma la tatou savali mamalu.

O nei faamoemoega e maualuluga. Matou te malamalama i lena mea, peitai, matou te le faatoese atu ona o na mea. E atagia mai ai tulaga a le Alii mo outou ina ia outou maua ai le Perisitua Mekisateko, e ulu atu ai i le malumalu, e auauna atu ai o ni faifeautalai, ma ia avea o ni tane ma ni tama amiotonu. E le o i ai se mea fou i na mea, e leai se mea tou te lei faalogo i ai muamua. Peitai, o le po nei, matou te valaau atu ia te outou, o matou uso Perisitua Arona, ina ia outou tutulai, ia outou faataunuuina mea uma e mafai ona outou faia e ala i le ola ai i aoaoga o le talalelei, ma ia saunia outou ma le atoatoa e auauna atu i le Alii.

O le toatele o outou ua outou saunia ma le atoatoa e auauna atu i le Alii, ma matou te faamalo atu i lo outou agavaa ma le naunautai. Mo outou na e lei amataina, ia avea lenei po ma amataga o a outou tapenaga. Afai ua outou iloa o lo o outou manaomia ona agavaa, ia fai loa se faaiuga ina ia faia suiga talafeagai—amata atu i le taimi nei lava. Afai tou te manatu e manaomia ona e talanoa atu i o outou tama ma o outou epikopo e uiga i soo se agasala atonu na outou solia, aua nei toe faatali; ia fai loa i le taimi nei. O le a latou fesoasoani ia te outou ia salamo ma suia ina ia mafai ona outou aveina o outou tulaga o ni tagata o se augatupulaga sili ona maoae o faifeautalai.

Faamolemole ia outou malamalama i lenei mea: o tulaga manaomia mo le auauna atu faafaifeautalai ua siitia maualuga atu. Ua uma aso na o faifeautalai “na o le salamo lava ma alu loa.” Ua outou malamalama i le uiga o lau faamatalaga, a ea, ou uso e, talavou? O nisi o alii talavou ua i ai le manatu sese e mafai ona latou aafia i ni amioga e solia ai le agasala ona salamo lea pe a atoa lo latou 181/2, ina ia mafai ona latou o atu i le misiona pea atoa le 19. E sao lava e mafai ona e salamo i agasala, ae atonu o le a e agavaa pe le agavaa e auauna atu. E sili atu le puipuia o oe lava ia mama, ma amiotonu atoatoa ma le lototoa i le faia o mea faigofie nei e pei o le:

Atiinae se sootaga taua o le tatalo ma lou Tama Faalelagi.
Ia tausia le Aso Sapati ia paia.
Ia faigaluega ma tuuese se vaega o lou totogi i se teuga tupe.
Totogi atoa ma le faamaoni le sefuluai.
Ia tuu itiitia le taimi e faaaluina e taalo ai i taaloga komepiuta. Pe o le a lava le vave e mafai ona e faaumatia ai le fili i se taaloga komepiuta, o le a leai sona aafiaga i le avea ai o oe ma se faifeautalai lelei.
Tuuina atu i le Alii se vaega tele o lou taimi e ala i le suesueina o tusitusiga paia, ma le mauaina o se malamalamaaga e uiga i le savali ofoofogia o le Toefuataiiga ua ia i tatou mo le lalolagi.
Auauna atu i isi ma fetufaai atu i ai lau molimau.

O lea la tama, e i ai sa outou matafaioi taua i lenei sauniuniga. Ua matou iloa o aafiaga sili ona loloto o le fesoasoani atu i alii talavou e faasaunia ai mo le Perisitua Mekisateko, faaipoipoga, ma le avea ma se tama o le aiga. Afai e malamalama o outou atalii i mataupu faavae autu e manaomia e avea ai ma se tama faatuatua, o le a mautinoa lo latou saunia e auauna atu o se faifeautalai faamisiona. O le mea e faanoanoa ai, ua toatele tele tama ua latou lafoaiina lenei matafaioi e faavavau. Ua latou manatu ane, o epikopo ma faiaoga seminare, faiaoga o le Aoga Sa ma Alii Talavou, ma taitai ua sili atu lo latou tulaga e uunaia ai ma musuia ai o outou atalii nai lo i latou lava. E le o le tulaga lena e i ai. E taua taitai faale-Ekalesia i sauniuniga a o outou atalii mo le perisitua ma le avea o ni faifeautalai, o le Ekalesia o se punaoa ia te outou. E le o se suitulaga ia outou aoaoga musuia, taitaiga, ma faaleleiga.

O le mea lea, afai o lo o outou “faateleina ni tulaga” ina ia mafai e o outou atalii ona auauna atu faafaifeautalai, o lona uiga o lo o “matou faateleina” foi ia tulaga mo outou. Afai o lo o tatou faamoemoeina ni mea e sili atu mai ia i latou, o lona uiga, e faapena foi ona matou faamoemoeina ni mea sili atu mai ia te outou ma a outou ava. Ia manatua, fitafita totoa e 2,000 a Helamana na faatuatua aua “ua aoaoina i latou e tausi i poloaiga a le Atua, ma savavali ma le amio sao i ona luma” (Alema 53:21)o na faatonuga na sau mai totonu o o latou fale.

O nisi tama latou te manatu e leai ni a latou aia e fesiligia ai le agavaa o a latou fanau. Ua latou manatu o le matafaioi lea ua patino mo na o epikopo lava. Tama, e le gata ina ia te oe le aia tatau e iloa ai tulaga agavaa o a outou fanau, ua ia te outou foi le matafaioi. O lo outou tiute le iloaina o le tulaga o lo o i ai lau fanau e faatatau i lo latou lelei ma le alualu i luma faaleagaga. E manaomia ona outou maitauina ma le faaeteete ia popolega ma atugaluga latou te fetufaai atu ia te outou. Fesili atu ni fesili patino i a outou fanau e faatatau i o latou tulaga agavaa, ma ia aua nei outou taliaina se isi lava tali e le itiiti ifo nai lo tali patino.

E masani ona faatonuina e epikopo a latou autalavou ina ia talanoa atu i o latou matua e uiga i o latou faafitauli. O lena auala o le mea moni o le faafeagai, e tatau i matua ona faatonuina a latou fanau ina ia talanoa atu i o latou epikopo e uiga i se faafitauli o i ai. E tatau foi ona matuai mataala matua i mea o lo o tutupu i olaga o a latou fanau, e uiga i faafitauli o lo o latou iloaina ae lei iloa e le epikopo. E tatau ona latou fautuaina a latou fanau ma ia o atu faatasi ma i latou i le epikopo pe afai e manaomia lena tulaga mo le salamo atoatoa. I le avea ai ma faamasino filifilia faalelagi o Isaraelu, o le epikopo ma le peresitene o le siteki e iloiloina le agavaa ma faaleleia ni popolega i le avea ai ma sui o le Ekalesia, peitai, o tama, ua ia te outou se matafaioi e faavavau mo le lelei faaleagaga o a outou fanau. Faamolemole ia faaaoga o outou tulaga sao o se fesoasoani, faufautua, ma se taitai perisitua, i le sauniaina o outou atalii e umia le Perisitua Mekisateko ma auauna atu o ni faifeautalai.

O lenei, o sina upu atu mo outou epikopo. Ou te iloaina e toatele alii talavou o i latou e le o i ai ni tama faatuatua i totonu o o latou aiga. I nei tulaga, ia faaaoga punaoa o le Ekalesia ia mautinoa ai o nei alii ua umia le Perisitua Arona ua aoaoina e le usoga Perisitua Mekisateko o e e mafai ona fesoasoani atu i le faasauniaina o i latou mo le galuega maoae e a latou. Ua i o outou luga epikopo ma peresitene o siteki le matafaioi o le fautuaina atu na o nei alii ma tamaitai talavou ua outou manatu ua saunia faaleagaga, faaletino, faalemafaufau, ma lagona e faafetaiaia tulaga moni o le galuega faafaifeautalai i aso nei. Uso e, ia filifili ma le poto ma ia manatua: e le faapea o alii talavou uma e manaomia ona valaauina e auauna ese mai o latou aiga; o nisi e sili atu ona lelei ona auauna atu i lalo o lau taitaiga o ni faifeautalai o le uarota.

Ia te outou o e o lo o galulue i le taimi nei o ni faifeautalai faamisiona, matou te faafetai atu ia te outou mo la outou auaunaga. O lenei po o se taimi lelei mo outou uma taitoatasi e vaavaai ai ma le totoa ia la outou faatinoga ma afai e le o tusa ai lau auaunaga, o le a fesoasoani lau peresitene o le misiona e faia ni suiga talafeagai ina ia avea ai ma se auauna aoga i le Alii o Iesu Keriso.

Ma le mea mulimuli lava, mo outou o e ua maea ona faia misiona, faamolemole ia outou manatua ua faamaeaina a outou misiona ma ua outou saoloto mai ai, ae le o le Ekalesia. Na outou faaaluina ni tausaga se lua e avea ai ma se sui o le Alii o Iesu Keriso. Matou te faamoemoe o le a outou foliga ma amio ai pea faapei o se tasi o Ona soo. Ia foliga pea pei o se soo o Iesu Keriso. Ia amio pea pei o se soo o Iesu Keriso. Aua nei outou mulimuli atu i sikaili ma tifiga a le lalolagi. E sili atu outou nai lo na mea. Afai ua outou see ese mai tulaga na e aoaoina ao avea ma se faifeautalai, ia faia mea talafeagai uma e toe maua ai lou tulaga paleni lelei faaleagaga. O tulafono mo le fiafia ma le faamanuiaina i le maea ai o a outou misiona, e tutusa lelei lava ma le taimi sa outou i ai i le misiona: tatalo malosi, galue malosi, ma ia usiusitai. Ia galue ma le filiga i le sailiaina o ni a outou soa ina ia outou fiafia faatasi ai i le olaga. Ia auauna atu faatasi i le Alii e tausia ma le isi tupulaga e sosoo ai.

Ou uso e, ua ou talanoa atu ma le manino i lenei po. Ou te faamoemoe o lo o mafai ona outou lagonaina le alofa ma le popolega lea e sau mai i le Au Peresitene Sili ma le Korama a Aposetolo Toasefululua ma isi taitai o le Ekalesia, ao matou talosaga atu ina ia saunia nei e auai faatasi ma i matou i le aveatuina o le faamanuiaga o le talalelei toefuataiina i tagata uma o le lalolagi. O outou uma lava taitoatasi o se pele, ma e matou te le mananao ina ia faamanuiaina ma saogalemu outou i lenei taua mo agaga o fanau a lo tatou Tama Faalelagi. Tau ina ia faamanuia le Atua ia te outou i le lototele e “faamaoni i aso uma,” (Alema 53:20) faatasi ai ma se vaaiga e iloa ai po o ai outou, ma po o a foi galuega o lo o i ai i le Alii mo outou tou te faia, ou te tatalo atu ai i le suafa o le Alii o Iesu Keriso, amene.