Tofia e Auauna

Elder Jeffrey R. Holland

O Le Korama a Aposetolo e Toasefululua

Ina ia tausia o tatou aiga ma auauna atu faamaoni i le Ekalesia e aunoa ma le tamoe e sili atu nai lo lo tatou malosi, e moomia ai le atamai, faautautaga, fesoasoaniga mai le lagi—ma sina osigataulaga.

E faatalofa atu i lenei afiafi uso e ma tuafafine. Ou te aumaia ia te outou moomooga alofa mai faifeautalai ma tagata lelei o le Ekalesia o Amerika Latina. E pei ona silafia e le toatele o outou, o Elder ma Sister Dallin Oaks faapea Elder ma Sister Holland ua valaauina e auauna atu i Eria o le Ekalesia i Filipaina ma Chile. Afai o le leo o le lauga o se faailoilo, ua faamaonia ai le matuai naunau lava i le Ekalesia nai lo le mea o loo manatu i ai se tasi. Po o le a lava a outou taumatematega, ou te manatu ua faatagaina a’u e faamautinoa atu ia te outou e faapea matou te le o o atu i nei tofiga mamao, faapea o ni faailo o ni mala po o le lalata mai o le iuga o le lalolagi. Mo i latou na o loo sailia se “faailoga” i nei mea uma, faamolemole ia avea o se faailoga o se Ekalesia aoao ua matagofie, alualu i luma, faatasi ai ma tagata ma faifeautalai o loo faasalalauina i ituaiga ma konetineta. O se olioliga le feiloai ai ma le Au Paia o Aso e Gata Ai i soo se mea, lata mai pe mamao, i le lotoifale po o atunuu mamao ma e matou te faafetai atu ia te outou mo a outou talosaga ma le naunautai i le galuega.

O sea ituaiga auaunaga mai le Toasefululua, o le mea moni lava, e le o se mea fou ma e tatau ona ou faapea atu e tau leai ni luitau a lo tatou augatupulaga i le malaga atu nai lo e na muamua atu ia i tatou. O le mea silisili lava ia te a’u o le i ai lea o Sister Holland i o’u tafatafa, nai lo le tuua o ia i le fale e na te tausia o ia lava ma le ma fanau. Ae le gata foi i lea, ou te le’i alu ou te faigaluega i luga o le ala ina ia maua ai se pasese e alu ai i Santiago. Sa matou felelei mo ni nai itula i le mea o loo matou faamautu ai, i se vaalele saoasaoa faaonaponei nai lo le folau atu i ni vaiaso, po o ni masina, i se vaa-a-lalo e sili ona taugofie. Ou te le’i tuua lo’u aiga a o o’u tigaina mai le maalili ma le fiva, fatafata vaivai po o le mamapala, e ui lava sa ou maua i le flu ma se isi vaega o le matou faigamalaga na tuai ai le vaalele mo se itula. Ou te faamoemoe o na osigataulaga o aso nei, o le a ou agavaa ai ou te tu atu e faafeagai ma Peteru ma Paulo, Polika ma Uilifoti.

E pei ona faia e le toatele o outou, sa ou ola a’e ma faalogo i tala o uluai uso o e na malaga atu i Kanata, Egelani, Scandinavia, konetineta o Europa, o Motu o le Pasefika, Mekisiko, Asia ma isi. Talu ai nei lava na ou faitau ai i le misiona puupuu a Parley P. Pratt i Chile, lea na maliu ma tanumia ai le tamatama a le ulugalii o Pratt i Valparaiso. Sa ou faitau i le tala ia Elder Melvin J. Ballard o le na valaauina e faapaiaina ia Amerika i Saute a o tasi ma fou le misiona i lena konetineta ofoofogia. O le tautua lea na fausia ai se Ekalesia ola ma le tuputupu a’e e le’i aloaiaina le talosagaina pe manatu tele foi i ai. E i ai taimi e matuai ogaoga ai ia faigata ma o nisi taimi e maoae foi lona tau.

Ma e tatou te talanoa e le gata na o na uso o e na uluai o atu ma auauna atu, ae o tamaitai foi o e na lagolagoina i latou—ma e faaopoopo atu ai i le lagolagoina o i latou lava ma a latou fanau, ia le nonofo i le fale ma tausia ma puipuia ia aiga, o le isi vaega lena o le tovine a le Alii lea e sili ona Ia faamamafaina.

I le aso o le a tuuvaaese atu ai lana tane mo lana malaga lona lua i Egelani, sa matuai vaivai ai lava ia Vilate Kimball, na matuai gatete i le tiga, sa le mafai ona ia faia se mea nai lo sina lululima ma lana tane ina ua alu atu ma loimata e faamavae atu. O le la atalii laitiiti o David sa na o le fa vaiaso le matua, ma na o le toatasi le tamaitiiti, e fa tausaga le matua o Heber Parley, sa lava lona malosi e la’uina atu ia vai mo le aiga mamai. I ni itula talu ona malaga ese atu lana tane, sa matuai le toe i ai se malosi o Vilate ma sa tau toe avatu o ia i lona moega.

Sa taufai mamai uma ia Mary Ann Young ma lana fanau ina ua alu atu ia Polika i le misiona lava lea e tasi, ma sa matuai faaletonu foi lava lo latou tulaga tau tupe. O se tasi o faamatalaga faamomoiloto sa faamatalaina ai lona sopoiaina o le Vaitafe o le Misisipi i le maatiati o le taumalulu, o ni ofu manifinifi sa ofu ai, ma afisi lana tama teine a o la o atu i le ofisa o le sefuluai i Navu e talosaga atu i ai mo ni nai pateta. Ona toe foi mai ai foi lea ma le pepe, a o fiva lava, ma toe sopoia le vaitafe matautia, ae aunoa ma se upu na ia tusi atu ai i lana tane e uiga i ni faigata faapena.¹

Ua seasea ona tatou toe feagai ma ni tulaga faapena i aso nei, e ui lava o le toatele o a tatou faifeautalai ma tagata o le Ekalesia o loo ositaulagaina mea e tele ina ia faia ai le galuega a le Alii. A o faapea ona oo mai faamanuiaga ma faasolo ina matua le Ekalesia, tatou te faamoemoe uma lava o le a le matuai faigata le auaunaga e pei ona sa oo i ai nei uluai tagata o le Ekalesia, a o pepese ia faifeautalai i lenei vaitaimi mai Oslo i Osorno ma mai Seattle i Cebu, ua “tofia e auauna.”² Ina ia tausia o tatou aiga ma auauna atu faamaoni i le Ekalesia e aunoa ma le tamoe e sili atu nai lo lo tatou malosi,³ e moomia ai le atamai, faautautaga, fesoasoaniga mai le lagi—ma sina osigataulaga. Mai lava ia Atamu e oo mai i le taimi nei, o le faatuatua moni i le Alii o Iesu Keriso o le sootaga lava lea i le ofoina atu o le taulaga, o nai a tatou taulaga o se faatusa lea o Lana taulaga silisiliese.⁴ Faatasi ai ma lona mafaufau sa taulai atu i le Togiola a Iesu Keriso, sa aoao mai ai e le Perofeta o Iosefa Samita e faapea o se talitonuga faalelotu e le aofia ai feagaiga o le osigataulaga e le mafai ona maua le mana e aumaia ai le folafolaga o le ola faavavau.⁵

Ou te fia fetufaai atu se faataitaiga se tasi mai o tatou nei taimi lea e mafai ona aumaia ai e lo tatou “tofia e auauna atu” ia luitau ma faamanuiaga. Sa faapea atu talu ai nei lava se tuafafine lelei i sana uo pele: “Ou te fia ta’u atu ia te oe le taimi na ou tuu ai le le fiafia i le taimi ma le osigataulaga a lo’u toalua i le avea ai ma se epikopo. Na foliga mai e atamai tele le tulai mai o se ‘tulaga faafuaseia’ i se tagata o le uarota a o ma’ua sauni atu e o faatasi i se mea faapitoa.

“O se tasi aso sa ou faailoa atu ai lo’u le mautonu ma sa malie mai la’u tane e tatau ona ma faamaoniaina, e faaopoopo atu i po o Aso Gafua, e tasi le po faaopoopo i le vaiaso mo na o ma’ua lava. Ia, ua oo mai le po muamua ma te o faatasi ai ma o le a ma feosofi i totonu o le taavale ae tatagi loa le telefoni.

“ ‘O se tofotofoga le mea lenei,’ sa ou ataata atu ai ia te ia. Sa tatagi pea le telefoni. ‘Manatua le ta maliliega. Manatua le ta tafaoga. Manatua a’u. Tuu pea le telefoni e tatagi.’ O le taunuuga ou te le’i ataata ai.

“Sa foliga mai ua lavelavea si o’u toalua i le va o a’u ma le telefoni o loo tatagi. Na ou matuai iloa lelei o lona faamaoni silisili lava e mo a’u ma o loo matuai manao foi o ia i lena afiafi e pei ona ou manao i ai. Ae na foliga mai ua le mautonu o ia i le leo o lena telefoni.

“ ‘E sili lava pe a na ona ou siakia,’ o lana tala lea ma ona mata faanoanoa. ‘Atonu lava e leai se mea.’

“ ‘Afai e te faia, ua le aoga atoa le ta tafaoga,’ sa ou tagi. ‘Na ou iloa lelei lava.’

“Sa ia oomiina lo’u lima ma faapea mai, ‘Ou te toe foi mai,’ ma ia faanatinati atu loa i totonu e tali le telefoni.

“Ina ua le foi vave mai lo’u toalua i le taavale, na ou iloa ai le mea ua tupu. Sa ou oso i fafo mai le taavale, ma ou savali i le fale ma ou alu loa o’u moe. O le taeao na sosoo ai na ia musumusu mai ai sana faatoesega, sa ou musumusu atu foi lo’u taliaina ma o le mutaaga ai foi lena.

“Ae sa ou mafaufau lava i ai. Sa ou iloaina sa faalavelave mai lava le tulaga lea ia te a’u i nai vaiaso na lumanai ai. Ou te le’i tuuaia lo’u toalua, ae sa ou le fiafia. Na tumau pea lea mafaufauga ia te a’u ina ua ou fetaui i se tamaitai i le uarota ou te tau leiloa. Sa ia talosaga mai ma le tau le mautonu mo se avanoa e talanoa ai. Ona ia faamatala mai lea o lona ma’i valea i se isi alii na foliga mai o le a tele sona fiafia e maua ai i lona olaga ua leai se uiga, faatasi ma lana tane e galue faasoloatoa ma ni ana vasega se tele o loo ave i le iunivesite. O lo latou fale e puipui uma. E i ai sana fanau laiti e matuai faigata, pisapisao, ma le ulavavale. Sa ia faapea mai: ‘Sa matuai faaosoosoina lava a’u e tuua lo’u tulaga pagatia o loo i ai, ae ma o ma le tamaloa lenei. O lo’u tulaga na i ai na ou lagonaina ua tatau mo a’u se mea lelei nai lo le mea sa ou i ai. O a’u mafuaaga ia na faatosinaina ai a’u ou te mafaufau e mafai ona ou savali ese mai la’u tane, o la’u fanau, o a’u feagaiga o le malumalu faapea ma la’u Ekalesia ma saili le fiafia ma se tagataese.’

“Sa ia faapea mai: ‘Na mautu le fuafuaga; na malilie foi i ai i le taimi o la’u solaaga. Ae peitai, i sina taimi mulimuli lava, na ta’u mai e lo’u mafaufau ia te a’u e telefoni atu i lou toalua, o la’u epikopo. Ou te fai atu o lo’u “mafaufau” ae ou te iloa o se musumusuga faaleagaga na tuusao mai le lagi. Na toetoe lava a ou le telefoni atu. Na tatagi ai lava le telefoni. Na ou faapea ifo i lo’u mafaufau, “Afai ae le tali mai le epikopo, o se faailoga lena o le tatau ona ou faaauauina la’u fuafuaga.” Sa tatagi pea lava le telefoni, ma e ou te tago atu loa e tuu i lalo le telefoni ae faafuasei ona ou faalogo atu i le leo o lau tane. Sa matuai ootia ai lava lo’u agaga e pei o se uila. E le’i leva ae ou tagi, ma faapea atu, “Epikopo, o oe lena? O a’u ua pagatia. Ou te moomia le fesoasoani.” Na oo mai lau tane ma le fesoasoani ma ua ou saogalemu ai i le aso lenei ona sa ia talia mai lena telefoni.

“ ‘Sa ou toe tepa i tua ma iloa ai sa ou lelava ma faavalevalea ma vaivai. Ou te alofa i la’u tane ma la’u fanau ma lo’u loto atoa. Ou te le mafai ona ou mafaufau i le pagatia o lo’u olaga na semanu e oo i ai e aunoa ma i latou. O taimi sili nei ona faigata mo lo matou aiga. Ou te iloa e oo i tagata uma lava. Ae ua ou faailoa atu nisi o nei faafitauli ma ua faasolosolo lava ina lelei mea uma. E iu lava i le lelei.’ Ona ia faapea mai lea: ‘Ou te leiloa lelei oe, ae ou te fia faafetai atu ia te oe mo le lagolagoina o lau tane i lona valaauga. Ou te leiloa po o le a se tau o lea auaunaga ia te oe, po o lau fanau ae afai o se aso faigata e i ai se tau faaletagata lava ia, faamolemole ia iloa lo’u lotofaafetai e faavavau o le a i ai mo osigataulaga na faia e tagata e pei o oe ina ia fesoasoani ai e laveai tagata e pei o a’u.’ ”

Uso e ma tuafafine, faamolemole ia malamalama o a’u le tagata o loo matuai faamamafaina atu le mafai ona puleaina, ma sili atu ona faigata mea e mafai e a tatou epikopo ma isi taitai ona fai. E sili atu ona ou lagonaina se tele o faigata faalenuu, faalegaluega ma isi lea e aveesea ai matua, e faapitoa ai lava ia tina, mai aiga lea o loo tausia ai fanau ma ua avea ma ni faafitauli sili ona ogaoga i le lalolagi i taimi nei. Ma e talu ai ona o a’u ou te tautu lava i le tatau i taitoalua ma fanau ona maua se taimi paia e faatasi ai ma le tane ma le tama, e faaiva mai le sefulu ona ou aufaatasi ma lena tina e ta’u atu i lona toalua e aua ne’i talia lena telefoni. Ae ou te faafetai foi au ia e pei ona faafetai foi lena tamaitai talavou i lenei taimi i lena alii lelei i lona mulimuli i musumusuga a le Agaga ma tali atu i lona “valaau”—i lenei la tulaga—“o lona valaau e auauna atu.”

Ou te molimau atu o le fale ma le aiga ma le faaipoipoga, o meatotino faaletagata sili ia ona taua i o tatou olaga. Ou te molimau atu i le moomia ona puipuia ma faasaosaoina i latou a o tatou sailia le taimi ma auala e auauna faamaoni ai i le Ekalesia. Ou te faamoemoe e seasea ona i ai ni taimi e feteenai ai nei vaega, pe a tatou oo i se taimi po o se aso po o se po foi o se faalavelave e tulai mai pe a moomia lo tatou tali atu i le tiute ma musumusuga faaleagaga, o na tulaga ou te avatu ai le faamalo i tina uma o e ua nonofo i le leva o le po a o maalili le taumafataga o le afiafi, o alii uma o e kukaina a latou lava taumafataga o le afiafi, ma fanau uma o e na le fiafia i le tolopoina o se tolauapiga po o se taaloga ona o le le’i fuafuaina ona le auai atu se matua (ma e le tatau ona tupu soo lenei mea!) Ou te avatu le faamalo i peresitene uma o misiona ma o latou faletua, o a latou fanau, e oo i ulugalii matutua uma ua valaauina e auauna atu faatasi ma i latou, faapea ma isi o i latou, lea e i ai se taimi latou te misia ai le fananau mai o fanau ma papatisoga, o faaipoipoga ma maliu, o faatasiga faaleaiga ma mea mananaia ina ia tali atu i se “tofiga e auauna atu.” Ou te faafetai atu ia i latou uma o le Ekalesia atoa o e o loo “faia le mea sili latou te mafai” i le fausiaina o le malo o le Atua i le lalolagi e ui i tulaga luitau o loo latou feagai.

Ou te molimau atu i le taulaga ma le auaunaga a le Alii o Iesu Keriso o le na tuuina mai mea uma mo i tatou ma o lena agaga o le foai atu na fetalai mai ai “ia e mulimuli mai ai oe ia te a’u.”⁶ “A fia auauna mai se tasi ia te a’u, ia mulimuli mai o ia ia te au;” na Ia fetalai, “o le mea ou te i ai a’u, e i ai foi la’u auauna: pe a auauna mai foi se tasi ia te a’u, ona viia lea o ia e le Tama.”⁷ O sea ituaiga auaunaga e oo mai ai ni luitau iloga o faaiuga pe faapefea ona fuafuaina mea e tatau ona faamuamua ma le auala sili ina ia avea ai ma soo o loo Ia finagalo ina ia tatou i ai. Ou te faafetai ia te Ia mo Lana taitaiga paia i le fesoasoani ai ia i tatou i le faia o na faaiuga ma lagolagoina i tatou ina ia sailia le auala sao mo i latou uma o loo aafia ai. Ou te faafetai ia te Ia ona ua “ia tauave o tatou tiga ma na tauave o tatou faanoanoa”⁸ ma ua Ia valaauina i tatou e faia nisi o ia lava mea mo isi. I le suafa o Iesu Keriso, amene.