Elder D. Rex Gerratt
O Le Au Fitugafulu

Na lagolagoina Elder D. Rex Gerratt i le aso 5 o Oketopa 2002 e avea ma uso o le Korama Lua a Fitugafulu. “E lei i ai lava se tofiga ua tuu mai ia te au ua ou lagona ai faapea ua ou agavaa e faia, peitai ou te iloa po o ai lava e tofia e le Alii, e saunia foi e le Alii ma fesoasoani mai i ai,” o le saunoaga lea a Elder Gerratt, o se faifaatoaga ma se fai lafumanu leo lemu mai Idaho. “A o ou taliaina valaauga taitasi i lo’u olaga, ou te augani atu lava i le Tama Faalelagi e fesoasoani mai ia te au ina ia ou aoga i Ona aao.”

Na soifua mai Elder Gerratt i Heyburn, Idaho, i le aso 9 Aperila 1936 i ona matua o Donald Wayne ma Ann Bailey Gerratt. Sa soifua a’e i se nuu lata ane o Burley, ma faifaatoaga ai ma lona tama ma lona uso. Sa faaipoipo atu i lana uo sa la masani a o laiti, o Marjorie Crane, i le Malumalu o Idaho Falls i le 1955. E toa 9 o la’ua alo ae 35 a latou fanau.

“Ou te manatua le tele o taeao pe a matou nofonofo ma la’u fanau ma le matou taifau i le poletito i tua o le matou fale, ma talatalanoa a o faamaulu o matou seevae mamafa o le a matou o e tatau le susu ma fafaga manu,” o le toe tomanatu ai lea o Elder Garratt. “Ma te manatu tele ma Sister Gerratt i le ma fanau, ae e tele lava lo ma’ua talitonuga ia i latou aua ua latou iloa galulue malosi ma ua i ai foi a latou molimau i le talalelei.”

O le galue malosi i ona faiva ma lona alaalafaga na tauaaoina ai e Elder Gerratt tulaga faamamaluina e pei o le filifilia o ia e avea ma se tasi o Tagata Iloga Failafumanu a Idaho [Idaho Dairy Hall of Fame], ma Tagata Iloga Failafumanu o Idaho i Sautesasae. Na avea foi o ia ma Faifaatoaga o le Faasao mo le Tausaga.

O ona valaauga i le Ekalesia e aofia ai le Fitugafulu Pule Eria, peresitene o le misiona, sui risone, peresitene o le siteki, epikopo, failautusi o le uarota, ma se faiaoga o aiga. Na fesoasoani nei valaauga e aoaoina ai o ia i le loto faafetai ma le lotomaualalo.

“Pe a tatou iloaina le tele o faamanuiaga tatou te maua mai lo tatou Tama Faalelagi, ma e moni lava o loo taitaia i tatou e Lana perofeta soifua,” na saunoa ai Elder Gerratt, “e ao ina tatou matua faafetai ma tautino atu tatou te faia le mea silisili i soo se mea lava e poloaiina i tatou e fai i Lana Ekalesia.”