Ia Fusi “I Aao o Lona Alofa”
O le a tutupu pea lava mea e le malamalama i ai, peitai, e faapei foi o Nifae, e mafai lava ona tatou iloa e alofa le Atua ia te i tatou … o se mea moni lelei ma taua lena e mafai ona matua lagolagoina ai i tatou!
I le anoanoai o mala ma mea faatiapolo o loo tutupu i le lalolagi i nei ona po, o soo moni lava latou e tumau le faatuatua i se Atua alofa o loo faaalia mai pea Lona finagalo, ma o Lana fuafuaga laveai mo Ana fanau o le mafuaaga lea o mea uma lea e faia e le Atua! (tagai Mose 1:39.) E le gata i lea, o le uiga faaalia o le Atua ma lona malosi e le i’u, ua faamautinoa mai ai Na te “mafaia” moni lava ona fai Lana galuega tele (tagai 2 Nifae 27:20–21; Faaliliuga a Iosefa Samita, Isaia 29:22–23).
O le a tumau foi le faatuatua o soo moni i Lona Alo togiola, o Iesu Keriso lea; ma, o le “faaliliuina mai i le Alii” (3 Nifae 1:22), o le a taunuu lelei atu ai i se “faaliliuina fiafia o a matou amio” (tagai Mosaea 5:2; Alema 5:12–14).
O le mea moni lava, uso e ma tuafafine, ua manumalo Iesu i le taua aupito tele: “E maua foi outou e le puapuaga i le lalolagi, a ia outou loto tetele, ua ou manumalo i le lalolagi” (Ioane 16:33; ua faatusilima mea e faamamafa). O le Togiola ua maea ona faataunuuina, ua aumaia ai le toetutu i se tulaga aoao mo le piliona ma piliona, ma faatula’i ae ai tagata uma mai le tuugamau—e le afaina pe na faapefea ae pe o anafea foi na tatou oo ai iina! O lea la, i se po maninoa, e ui tatou te vaaia ai fetu ua loa ona i ai, ae tatou te le malamalama foi i ai. E le tumau ai. Ae faafetai, o i tatou e faavavau!
E faapena foi, “o i latou e faatuatua faamaoni” (4 Nifae 1:36) o le a tumau le faatuatua i le Toefuataiiga i aso e gata ai ma asiasiga mai le lagi e faaee mai le mana, o ona perofeta ma aposetolo, ma ona tusitusiga paia “malamalama ma le taua” (1 Nifae 13:29). O uluai mataupu faavae o le talalelei e matua fetaui lelei i aso mulimuli.
E le iloa gata, ina ua tulai mai le Ekalesia toefuataiina mai le “pouliuli ma le pogisa,” o mea na foliga mai o ni luitau malolosi, o le a faailoa mai le tulaga ese o le Ekalesia (MFF 1:30.) Ae ui i lea, o le saga gauai atu o a tatou amioga i o tatou talitonuga, e faamanatu atili mai ai pea ia i tatou o tatou tiute faifai pea, o le avea ai ma soo.
O le talalelei toefuataiina, o se vasa e lautele, ma loloto—e le oo i ai lo tatou malamalama. Na te faamalamalamaina, pe o se mea e faatatau i le fuafuaga loloto a le Atua o le atulaulau, po o le faamamafaina o le taua o le legavia ma le faamaoni o le tagata. E na o soo agamalu e mafai ona latou taulimaina lelei se mataupu malosi faapena.
Faatasi ai ma ni mau e tuutaula ma faamautinoaina ai i tatou, e mafai foi ona tatou “faamoemoe atu i le Atua … ona faamafanafanaina ai lea [o i tatou] i [o tatou] puapuaga” (Iakopo 3:1; ua faatusilima mea e faamamafa).
O i tatou foi e mafai ona: “lagolagoina [i tatou] i o tatou tofotofoga ma tiga eseese, … ioe, … e laveai pea o ia [ia te i tatou]” (tagai Alema 36:3, 27; ua faatusilima mea e faamamafa).
Aua ua fetalai mai le Alii, “Ou te alu atu e fai ma muaau ma muliau ia te outou” (MFF 49:27). “O le a ou taitaiina outou” (MFF 78:18).
E le gata foi i lea, ae o le a aumaia e le Atua mo i tatou le faamautinoaga anagata, ma le patino e ala mai i le Agaga Paia (Ioane 14:26; MFF 36:2.) Pe o taimi e to’a ai le tai po o taimi foi e sousou ai, o lo tatou punavai aupito sili lava o faamafanafanaga, o le Fesoasoani lea.
Sa tagi Enoka ona o le amioleaga o tagata i ona vaitaimi, ma o le taimi muamua, “sa le uma lona faanoanoa” (tagai Mose 7:4, 44). Peitai sa oo ina auauai mai faaaliga, sa faaalia ai Iesu o togiolaina le lalolagi, o le Toefuataiiga i aso e gata ai, ma le Afio Faalua Mai. Sa tau atu ai ia Enoka e “tuu ia [lona] faanoanoa, ae fiafia” (Mose 7:44.) E faapena foi ona mafai e aoaoga faavae ma faaaliga ona sii ae i tatou—e oo lava i le lotolotoi o “taua ma tala o taua.” (Mataio 24:6; Mareko 13:7; 1 Nifae 12:2; Mamona 8:30; MFF 45:26). O le mea lea e le tatau ai ona “vaivai [o tatou] mafaufau” (tagai Eperu 12:3; MFF 84:80).
E le tatau ona mamae o tatou uiga o ni soo i le lotovaivai po o le velasia i le la, e le tatau foi ona “mafatia ai [i tatou]” (Moronae 9:25), i lavasiga o le lalolagi e aofia ai ma finauga matuia “tou te feagai” (tagai Alema 32:38).
Atonu tatou te taumafai e aloese mai nisi mea o le olaga, ae, e lei ‘alo Iesu i Ketesemane po o Kalevario. Ae na Ia “faaumaina [Ana] sauniuniga mo le fanau a tagata” (MFF 19:19).
E faatatau la i tofotofoga ma puapuaga, e aofia ai lo tatou faatuatua ma le onosai, e leai se tasi e tuusaunoa mai ai—na o ituaiga eseese o puapuaga (Mosaea 23:21). O nei faatinoga ua fuafuaina e faateleina ai lo tatou malosi e fiafia ma auauna atu ai. Ae peitai e le faapea o le a puipuia atoatoa mai e faamaoni mai mea e tutupu i lenei paneta. O lea, e aoga ona tatou faaaoao i uiga totoa na faaalia e Sataraka, Mesako, ma Apeteniko o e na oo i se tulaga matautia. Sa latou iloa e mafai e le Atua ona laveai i latou. “Ae afai e leai,” sa latou tauto, latou te auauna atu pea lava i le Atua (tagai Tanielu 3:17). E faapena foi, o le tausia o le poloaiga muamua ma le fitu lea e le fiafia i ai tagata, ae e tatau lava ona fai, e mafai ona atagia ai le totoa o tamaitai talavou e toatolu lea na ta’ua mai anamua; sa latou fai atu “leai” i o latou olaga (tagai Aperaamo 1:11).
O le mea lea, e mafai lava ona tatou puapuagatia i soo se itu, ae e leai lava se mea e mafai ona tuueseina mai i tatou mai le alofa o Keriso (tagai 2 Korinito 4:8; Roma 8:35–39); o o tatou atuatuvalega faalelalolagi e le o se vaega o le “galulue ma le naunautai” (MFF 58:27). Ae tusa lava foi, e pei ona pulunaunau mai Peteru, e mafai ma e tatau lava ona tatou lafo atu uma o tatou popolega i le Alii, aua e mautinoa lava e manatu mai o Ia ia te i tatou! (tagai 1 Peteru 5:7). Ioe, uso e ma tuafafine, o lena faatalitali ma le gauai atu e faalagolago i le Atua e faasaolotoina ai i tatou!
Pe a tatou mafaufau i se fofo o o tatou sese faaletagata lava ia, tatou te le feagai ma se mea e poloka ai le auala i le salamo. O se auala e te totogia ona malaga ai lea, ae le o se ala tuufau ma o le faaaogaina o le Togiola a Keriso o le a faasaoasaoaina ai i tatou.
Atonu e tatau ona i ai ni tagata tautala sa’o i o tatou olaga e ta’u maia mea e tatau ona tatou faalogo i ai ina ia tatou tuputupuae ai (Esoto 18:14–24), po o taimi e faafuaseia ai ona malamalama, e pei o le uluai Toasefululua, o e na iu ina faapea atu: “Le Alii e, a matou o ea ia te ai? O ia te oe upu o le ola e faavavau” (Ioane 6:68).
E le gata i lea, sei vagana ua mau faaiuga i tatou, o le a se tatou tala e fai atu i alii ma tamaitai totoa i le Ana o Matini ma le Vaisuamalie? Pe tatou te fai atu ea, matou te faaamuia ia te outou, ae matou te le fia asaina o matou lava vaitafe o puapuaga ma’ati’ati”?
Uso e ma tuafafine, ona ua tofia pe faauuina e le Atua, o lea “e fai [mo i tatou] nei aso,” talu ai “o mea uma e ao ina oo mai i ona aso” (MFF 64:32). E le gata i lea, e ui ina tatou ola i se lalolagi toilalo, ae e lei auina mai i tatou ina ia tatou fano iinei.
Tou te manatua le fetu fou lea na fofogaina mai ai le soifua mai i Peteleema? Ua leva ona i ai i lona tulaga faataamilosaga lena a o le’i susulu mai. Ua faapena foi ona tuuina i tatou i tulaga faataamilosaga faaletagata soifua e faamalamalama ai. O le faamaopoopoga faalelagi e le mo na o le atulaulau, ae faapea foi le galuega a le Atua i lenei paneta. A manatu lava i ai, e lei tatanuina papatusi o le Tusi a Mamona i Peleseuma pe soifua mai Iosefa Samita ina ua mavae ni senituri i Bombay.
O le tulai mai o na Tuaa “faitofa” na Faavaeina e pei o fetu o le aniva, ma latou tusia le Faavae matagofie o Amerika—o ona aia ma puipuiga e faatatau i “tagata uma,” e le o se mea foi na faafuaveta (MFF 101:77-78, 80). Sa faaigoa e le tasi tusi talafaasolopito ia o tatou Tuaa na Faavaeina “o le augatupulaga aupito ofoofogia o tagata lautele i le talafaasolopito o le Iunaite Setete, po o se isi lava malo” (Arthur M. Schlesinger, The Birth of the Nation [1968], 245). Na faaopoopo mai le isi tusi talafaasolopito, “E matua taua lava pe a mafai ona tatou iloa le afuaga mai o le mapuna a’e o nei taleni mai se tafu’e e na o le lua ma le afa miliona tagata e nonofo ai” (Barbara W. Tuchman. The March of Folly: Frp, Troy to Vietnam [1984], 18).
Peitai e i ai lava nisi e sili atu ia i latou se atua e le tumau. Mo se faataitaiga, sa iloa e Lamana ma Lemuelu le laveaiina faavavega o Isaraelu anamua mai autau malolosi a Farao, ae sa muimui i la’ua ma sa fefefe ina ua lu’iina e si nei Lapana e na o sina malosi itiiti sa i ai. E mafai ona pumoomoo o tatou manatu ma popole ifo i le tagata lava ia. O le Atua lava ia, o le e puleaoao i galuega fesootai a fetu o le aniva, o fetu, ma lalolagi, na poloaiina i tatou ina ia tatou tautino atu e i ai foi Lana pule i o tatou ola (tagai MFF 59:21). Pe le i ta’u maia ea ia i tatou, pe le faitaulia ea se manu iti e pa’u i le eleele, ma o [tatou ] lauulu uma ua faitaulia? (tagai Mataio 10:29–30; MFF 84:80). E silafia e le Atua mea uma! E pei lava ona silafia e le Alii Ana foafoaga e tele, e silafia ma alofa foi o Ia i soo se faapotopotoga—ioe, Na te silafia ma alofa o Ia i tagata uma lava! (tagai 1 Nifae 11:17).
Mafaufau i Lana fetalaiga faalaeiau ia Mose—“Ua ou iloa oe i lou lava igoa, ua alofagia foi oe e au”—[na fetalai atu foi] ia Iosefa: “O lo’u Atalii Pele lenei. Faalogo ia te Ia!” (Talafaasolopito—Iosefa Samita 2:17).
E leitioa aioi mai le Tupu o Peniamina ia te i tatou ina ia talitonu, ua le iloa e tagata mea uma e mafai ona silafia e le Atua” (tagai Mosaea 4:9). O le le amanaiaina o faaaliga e uiga i le malosi ofoofogia o le Atua, ua pei lava o le taalo faasamasamanoa ma le fiafia i poloka laupapa, o lo o i ai mataitusi o le alafapeta, e aunoa ma le iloaina o fatuga po o solo lavelave a Siekisipia, na fatu mai i lena lava alafapeta.
E “le’i masalosalo” le Tama o Aperaamo i folafolaga paia o fanau, aua na “mautinoa e ia e mafaia e le [Atua], ona faia mea ua folafolaina atu” (Roma 4:20–21). Talosia ia tatou matua “gauai atu atoatoa foi ma le mautinoa.”
O upu nei a Anselm o ni matua’i fautuaga lelei: “Talitonu ina ia mafai ona e malamalama,” nai lo le “malamalama[ ina ia mafai] ona e talitonu” (St. Anselm, trans. Sidney Norton Deane [1903], 7).
Uso e ma tuafafine, e ui ina tatou ola i se taimi o le “vāvāō,” e mafai lava ona tatou tutu i nofoaga paia ma le le faagaeetia (tagai MFF 45:32; MFF 87:8). E ui ina tatou ola i se taimi o le malosi o amioga le pulea, ae e mafai lava ona tatou maua lena filemu i totonu, lea tatou te le malamalama i ai (tagai Filipi 4:7). O le a tutupu pea lava mea e le malamalama i ai, peitai, e faapei foi o Nifae, e mafai lava ona tatou iloa e alofa le Atua ia te i tatou … o se mea moni lelei ma taua lena e mafai ona matua lagolagoina ai i tatou! (1 Nifae 11:17).
E mafai faapefea ona tatou iloa o loo silafia ma alofa mai le Atua ia te i tatou? O loo Ia ta’uina mai ia te i tatou i tusitusiga paia—e faapena foi i lo tatou faitauina ma le faamaoni o faamanuiaga na tuuina mai i Lona alofa tunoa i o tatou olaga. Ae o le mea sili, Na te ta’u maia ia i tatou i se leo itiiti ma le malu o le Agaga! (tagai Alema 34:38; MFF 78:17–19).
O le “suiga tele” lea e manaomia e se soo, atonu o nisi taimi, e foliga mai o se tietiega lola faaeletise—e pei o faaaliga e faagaeetia ai lea e aumaia le kalave o le vaaiga lotomaualalo. Sa faapena Mose o le na “pa’u i le eleele” ma faapea mai, “O le tagata o se mea noa, o se mea ou te lei mafaufauina lava” (Mose 1:9–10). Peitai, ona oo mai ai lea o le malelega paia e faamautinoa ai: “O lau galuega ma lou mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39).
Ae peitai, o se “suiga tele” o se galuega faigata tele, ma o se galuega e atili ona faigata ona o le gauai atu i uunaiga pepelo a tagata o le lalolagi. Ua faatele naua ona tatou faaitiitia lo tatou malosi gafatia ona o lo tatou pupu i mea faatauvaa o le lalolagi. E seasea ona tatou saunia mo faaaliga faafuaseia. Mafaufau—i se vaega agaga o i tatou taitoatasi e faavavau moni lava, ma, sa tatou faatasi ma le Atua i le amataga! (tagai MFF 93:29, 33).
E moni e le mafai ona tatou malamalama atoatoa i nei mea uma i le taimi nei! E moni e le mafai ona tatou iloa le uiga o mea uma i le taimi nei. Ae e mafai ona tatou iloa, i le taimi nei lava, e silafia ma alofa le Atua ia te i tatou taitoatasi!
Ae, uso e ma tuafafine, o le a la le mea o loo taofia ai i tatou mai le iloaina ma alolofa atili ia te Ia? O lo tatou mumusu e lafoai uma a tatou agasala—ae mafaufau, nai lo le faia o lena mea, ua lava na o sina vaega e totogi pe lafoai. E faapena foi, o lo tatou mumusu e faaumatia o tatou manao i Lona finagalo ae mafaufau, nai lo le faia o lena mea, a tau lava ina tatou iloa Lona finagalo—ua lava lea! (tagai Mosaea 15:7).
Na molimau mai le Perofeta o Iosefa Samita e faapea o le Atua, “A o le’i tino mai,” … na fuafuaina le mea atoa e faatatau i le fogaeleele; … sa silafia e le [Atua] … le loloto o le amioleaga o le a i ai le fanauga a tagata, o o latou vaivaiga ma mea e malolosi ai, … o le tulaga o malo uma ma … o latou taunuuga… . ma sa lava ma totoe le sauniuniga na [Ia] faia mo le togiolaina [o tagata]. (Teachings of the Prophet Joseph Smith, p. 220.)
O se vaega o le “sauniuniga ua lava ma totoe” a le Atua, e aofia ai ni tagata le atoatoa e pei o oe ma au, o loo tautino atu i le faasusulu atu ma tautua i o tatou tulaga ma tofiga, ma lo tatou iloaina o lo o fusia i tatou uma “i aao o Lona alofa” (MFF 6:20).
I le suafa o Iesu Keriso, amene!