Ia Taitasi ma Avea o se Tagata ua Sili Atu ona Lelei
E i ai se avanoa mo le faaleleia atili o olaga i aso taitasi… . Pe o a lava a tatou galuega, pe o a foi o tatou tulaga, e mafai ona tatou faaleleia atili i tatou lava, ma a o tatou faia, e i ai sona aafiaga i olaga o i latou tatou te mafuta.
Oka se matagofie o lenei konafesi, o’u uso e ma tuafafine. Pe a tatou taliu atu i o tatou fale ma a tatou gaoioiga i aso taitasi, ua tatau ona taitasi i tatou ma avea o se tagata ua sili atu nai lo le tulaga sa i ai i le amataga o le konafesi.
Sa matua lelei sauniuniga a i latou uma sa tomatauina i tatou. Sa musuia talosaga. Sa matagofie foi musika.
Ae o le mea e pito i sili ona taua, o mea e tupu ae i totonu o i tatou taitoatasi ona o lenei konafesi. O au lava ia, ua ou faia se faaiuga e malosi atu i lo’u lava loto, ia avea au o se tagata e sili atu ona lelei nai lo le tulaga sa ou i ai muamua. Ou te faamoemoe o le a tele atu lou agalelei i soo se tasi ou te feiloai i ai atonu o mafatia. Ou te faamoemoe o le a tele atu lou fesoasoani ia i latou o lo o manaomia le fesoasoani. Ou te faamoemoe o le a ou agavaa teisi atu mo lo outou faatuatuaga. Ou te faamoemoe o le a avea au o se tuaoi ma se uo ua lelei atu nai lo le mea sa i ai. Ou te faamoemoe o le a avea au ma se tasi ua lelei atu o le Au Paia o Aso e Gata Ai, ua i ai se malamalama faaopoopo o itu matagofie o lenei talalelei ofoofogia.
Ou te tuuina atu se lu’i ia te outou taitoatasi, o e e mafai ona lagona mai lo’u leo, ia outou tulai ae i le tulaga paia ua i totonu ia te outou [o se atalii/afafine o le Atua]. Pe ua tatou iloa moni ea le uiga o le avea o se atalii/afafine o le Atua, ma le i ai i totonu o i tatou o se natura faaleatua?
Ou te talitonu ma lo’u loto atoa o le Au Paia o Aso e Gata Ai, le lautele o i latou o ni tagata lelei. Afai tatou te ola i mataupu faavae o le talalelei e tatau ona avea i tatou o ni tagata lelei, aua o le a tatou limafoai ma agalelei, faaaloalo ma e le manatu faapito, e loto fesoasoani ma aapa atu ia i latou ua mafatia. E mafai ona tatou tanu i lalo le natura faaleatua ma natia ina ia le faaalia i ituaiga olaga tatou te ola ai, pe tatou te aumaia foi i luma ma avea e pei o se malamalama e susulu i mea uma tatou te fai.
Ua i ai se avanoa mo le faaleleia atili o o tatou olaga i aso taitasi. Pe o a lava a tatou galuega, pe o a foi o tatou tulaga o i ai, e mafai lava ona tatou faaleleia atili i tatou lava, ma a o tatou faia lea, o le a i ai sona aafiaga i olaga o i latou ua siomia ai i tatou.
Tatou te le tau faamatalaina atu i tagata o i tatou o ni Au Paia o Aso e Gata Ai. E le tatau lava ona tatou faalialiavale i lea tulaga, pe manatu faasausili i soo se itu. O ia ituaiga o amioga e le tusa ai ma le Agaga o Keriso lea e tatau ona tatou taumafai e faaaoao i ai. O lena Agaga e mau i le loto ma le agaga, i se tulaga e le leoa ma e le faalialiavale o o tatou olaga.
Ua ia i tatou uma ni tagata ua tatou moomoo e fia faataitai i ai, ua latou atinaeina se uiga o se faataitaiga o le matagofie o le talalelei ua latou faatinoina i a latou amio, e aunoa lava ma se upu, i o latou olaga.
E mafai ona tuutuu teisi i lalo o tatou leo. E mafai ona tatou faafoi atu le lelei i e agaleaga mai. E mafai ona tatou ataata pe a vave ona oso le ita. E mafai ona tatou amio pulea ma loto pulea ma lafoai i nuu le aina soo se tauemuga e fai mai ia i tatou.
Ia avea i tatou ma se nuu fiafia. O le fuafuaga a le Atua, o se fuafuaga o le fiafia. O le a faigofie le ala, o le a tuuitiitia le popole, o luitau foi o le a faigofie pe afai tatou te atinaeina le agaga o le fiafia.
Tatou galulue malosi teisi atu e faataunuu o tatou tiute o ni matua. O le aiga, o le iunite faavae lea o nuu. O le aiga o le faalapotopotoga faavae lea o le Ekalesia. Ua matou matua popole lava i le tulaga o i ai olaga o o tatou tagata, o ni tane ma ni ava, faapea foi le avea ai o ni matua ma fanau.
Ua matua tele naua le faitio ma le vaavaai masei ma le ita atoa ai ma le leoleoa. Ua matautia lava le mamafa o atugaluga tatou te lagona i aso taitasi. O tane e o mai i le fale mai galuega i aso taitasi, ua le lavava ma itaitagofie. O le mea e leaga ai, o le toatele foi o tina e faigaluega. E feagai foi i latou ma luitau matuia atonu e taugata atu nai lo tupe latou te maua. Ua tuutia’i tamaiti e saili a latou lava faafiafiaga, ae o le tele o na faafiafiaga e le lelei.
Ou uso e ma tuafafine, e tatau ona tatou galulue i o tatou tiutetauave o ni matua, e pei e faalagolago i ai mea uma o le olaga, aua o le mea moni lava e faalagolago lava i ai mea uma o le olaga.
Afai tatou te toilalo i o tatou aiga, ua tatou toilalo foi i o tatou olaga. E leai se tagata e toilalo i lona aiga, e manuia moni. Ou te talosagaina outou alii, i se tulaga patino, ia nonofo ma mafaufau pe o faapefea ona faataunuuina o outou tiute o ni tane ma ni tama, ma ulu o aiga. Tatalo mo se taitaiga, mo se fesoasoani, mo se faatonuga, ona mulimuli ai lea i musumusuga a le Agaga e taitai ai oe i tiute aupito taua o tiutetauave uma, aua e faavavau faavavau lava taunuuga o lau taitaiga o lou aiga.
Ia faamanuia atu le Atua ia te outou a’u uo pele. Ia ia te outou le agaga o le filemu ma le alofa i soo se mea tou te i ai. Ia i ai le toafilemu i o outou olaga. E pei lava ona ou fai atu i o tatou tupulaga talavou i le tele o eria, ia atamamai, ia mama, ia faamaoni, ia faafetai, ia lotomaualalo, ia loto tatalo. Ia outou tootutuli i le tatalo i luma o le Silisiliese, ma faafetai atu ia te Ia mo Ana faamanuiaga sautualasi. Ona outou tutulai ae ai lea ma fetuleni atu i luma o ni atalii ma afafine o le Atua, e faataunuu Ona faamoemoega e faavavau, ia taitasi le tagata ma lona ala, o la’u tatalo lea ma le lotomaualalo, o o’u alofaaga na ma faamanuiaga mo outou, i le suafa paia o Iesu Keriso, amene.