O Le Ekalesia a le AAG o le Lotu Aupito Sili lea Ona Saosaoa le Tuputupu Ae i le Iunaite Setete.

I se suesuega e faia i tausaga tai 10 uma, ua ta’ua mai ai O Le Ekalesia a Iesu Keriso o le Au Paia o Aso e Gata Ai, o le lotu aupito sili lea ona saosaoa le tuputupu ae i le Iunaite Setete i tausaga e 1990 e oo mai i le 2000.

Na faaalia foi i lea suesuega o lotu e sili ona televave le tuputupu ae, o ekalesia e faautauta i le vafealoai—ma o lotu e sili ona telegese le tuputupu ae, o ekalesia e tuufau le vafealoai. O le saosaoa ua i ai le tuputupu ae e 19.3 pasene, lea o loo taulamua ai le Ekalesia i lotu faautauta i le Iunaite Setete. O isi lotu ua televave le tuputupu ae o Ekalesia a Keriso, o Faapotopotoga a le Atua, ma le Ekalesia Katoliko Roma.

Sa faia e le Ofisa o Suesuega a Glenmary, o se faalapotopotoga suesue ma auaunaga faale-vafealoai a le Katoliko, se suesuega e ala i tali na maua mai faalapotopotoga faalelotu e 149. Talu ai o tusigaigoa a le Iunaite Setete e le sailia ai ni faamatalaga tau lotu, o lea na manatu ai o lenei suesuega o se fuafaatatau aupito maopoopo lea ua i ai e uiga i tulaga tau lotu i le Iunaite Setete.

E tusa ai foi ma lea suesuega, o le Ekalesia o le faalapotopotoga e tulaga ono i lona tele i le Iunaite Setete, ma e sili Iuta i nuu e “aupito lolotu o setete,” e sili ona maualuga pasene o tagata e talitonu faalelotu (75 pasene). O Provo, i Iuta na faailoa mai o le aai lea e sili ona maualuga pasene (90 pasene) o lona faitau aofai e auai i se faalapotopotoga faalelotu se tasi mai le 149 o lotu o i ai.