O Mea Malie ma le Fiafia
E mafai ona tatou lagonaina le fiafia i aso uma o o tatou olaga, e ala mai i mea iti tatou te faia, ma e atoatoa lo tatou fiafia pe a tatou tausia poloaiga a se Atua alofa.
Pe tusa o le fa masina talu ai, na ou maua ai se tofiga e auauna atu ai i Bogota, Kolomupia, ma o atu ai loa e nonofo ai iina. I se tasi aso, ao ou taumafai e sue le auala e agai atu i le falesa o lau uarota fou, sa ou tu ai i se paka e fesili mo se faasinoga o le auala.
Sa mafai ona ou vaai atu i le tele o aiga o lo o fiafia i se taeao susulu manaia o le la. Sa ou tutu ai i lea mea mo sina taimi, ma matamata atu i tamaiti ao latou taaalo fiafia i le paka. Sa susulu faapitoa o latou foliga, o o latou alafau lanu piniki i le la ma taumafaiga sa latou faia e taufetuli ma taaalo faatasi. Sa latou fefaauoai atu o le tasi i le isi.
Sa mafai ona ou iloa, sa matuai faafiafiaina lava i latou. Ao ou matamata atu ia i latou ma le totoa, sa ou iloaina ai, e sili atu nai lo le na o le faafiafiaina, o nei tamaiti laiti ma le mama, sa latou maua le fiafia moni lava.
Mulimuli ane, ao alu atu lau taavale i le falesa, na toe foi ou mafaufauga i le taimi na papatisoina ai au i le Ekalesia. Na sau sau uo ua leva, ma fesili mai ia te au, pe o le a se mea ua ou maua iina, ua ese mai. Sa ou tali atu, “Ua ou mauaina le fiafia moni.” O lea na ia faapea mai ai, “E leai se mea e tau o se fiafia moni—na o ni nai taimi fiafia.”
Sa ou malamalama, e lei iloa e lau uo lelei le eseesega o mea malie ma le fiafia. O le mea na ia ta’ua o “ni nai taimi fiafia” o le mea moni o ni nai taimi sa i ai ni mea malie. O le mea na te lei iloaina i lea taimi, o le fiafia e sili atu nai lo na o ni mea malie. O mea malie, ua na o sina taimi e oo mai ai, ae o le fiafia o se mea e tumau mo se taimi umi.
O le toatele o tagata i lenei lalolagi, latou te le malamalama i le eseesega o mea malie ma le fiafia. O le toatele latou te taumafai e sue le fiafia e ala i mea malie, peitai o nei mea e lua e eseese uiga.
Sa ou tilotilo i le lomifefiloi e sue mai ai uiga o nei upu taitasi.Mea malie o le taalo, ulaga, faiagaga, sosia o faafiafiaga, o mea e talie ai, ulavale, faataalo, o le tele o taimi e pisapisao ai. Fiafia o le malie, olioli, faagaeetia, ma le lotomalie.
Sa aoaoina au, ina ua tuanai lou avea ma se tasi o le Ekalesia, o lo o i ai se eseesega tele o mea malie ma le fiafia. Sa ou aoaoina, ao lei oo i lou papatisoga, o lo o i ai se fuafuaga a le Alii mo le faaolataga o Lana fanau uma (2 Nifae 2:9). Ma o lenei Fuafuaga, e faalagolago i mea tatou te ausia i lenei Lalolagi, o le a tatou toe foi atu ai i le afioaga o lo tatou Tama Faalelagi ma nonofo faatasi ma Ia e faavavau, i se tulaga o le fiafia e faavavau.
O mea malie ma le fiafia, e lelei uma, peitai, o le mea mautinoa lava o le fiafia e sili atu ona taua ona sailia. O le fiafia e mafai ona aofia ai foi mea malie, ae o mea malie lava latou, e le faamautinoaina ai lo tatou mauaina o le fiafia moni.
I le Luka, mataupu e 15, tatou te maua ai le faataoto i le atalii faamaumauoa. I lea faataoto, na talosaga atu le atalii laitiiti i lona tama, ina ia tuu atu ia te ia lana vaega o le tofi o oa. Ma na faapea ona faia e le tama, ona alu atu ai lea o lenei alii talavou i le lalolagi, i le sailiga o le mea na ia talitonu o le fiafia moni. Sa amata ona ia maua ni taimi fiafia ma, i le taimi atoa sa i ai ana tupe, sa siomia o ia e le toatele o tagata, o i latou o e na tautino ane o i latou o ana uo. Ina ua uma ona faaaluina ana oa, i fiafiaga sa latou i ai ma i latou na faapea o ana uo, ona latou le toe mananao lea e avea o ia ma a latou uo, ma na tuua ai o ia e aunoa ma se sene. Ona, oo lea ia te ia le tele o puapuaga ma faanoanoaga. Na amata ona ia faigaluega i se alii i le fafagaina o puaa, ma talu ai ona o lona matelaina i le fiaai, sa ia taumafai ai e ai e oo lava i atigi mea e aina e puaa. Sa ia mafaufau i auauna a lona tama ua faulai a latou areto ma ua totoe, ae ua leai se mea e tasi ma ia e ai.
Sa tonu ia te ia o le a toe foi atu i lona tama ma talosaga atu mo se galuega e fai ai o ia ma se tasi o ana auauna faigaluega. Na ia toe foi atu ma le salamo i mea uma sa ia faia, ma o lona tama, o se tagata amiotonu, na faafeiloaia o ia o se atalii faapitoa. Sa ia malamalama mulimuli ane, o i tonu lava e maua ai le fiafia, i se olaga faigofie faatasi ma lona aiga.
O i latou uma o e sailia le fiafia atoatoa, e mafai ona latou mauaina i totonu o le talalelei a Iesu Keriso, o loo aoaoina i Lana Ekalesia. O aoaoga faavae a Keriso, ua aoaoina ai i tatou, e mafai ona avea i tatou ma vaega o le Ala Sili o le Fiafia ua Ia saunia mo i tatou uma, o Ona atalii ma afafine. Pe a tatou tausia ana poloaiga, ua faamanuiaina i tatou ma tatou iloa ai le fiafia moni. Ua tatou iloa o le fiafia e maua mai i le faia o mea laiti lea e fesoasoani ai ia i tatou e tuputupu ae faaleagaga, e faateleina ai lo tatou faatuatua ma molimau. O mea laiti tatou te faia i o tatou olaga i aso taitasi, e pei o:
Tatou te maua le fiafia pe a tatou tatalo i taeao ma po taitasi, pe a mafai ona tatou lagonaina e faafofoga mai le Alii ia i tatou ma e naunau lava o ia e faamanuia, faamagalo ma fesoasoani mai ia i tatou. Tatou te maua le fiafia pe a tatou lagonaina uunaiga a le Agaga Paia i o tatou olaga—a o tatou lagonaina le Agaga i lo tatou faia o filifiliga taua o le olaga. Tatou te maua le fiafia pe a tatou malaga atu i le fale i le maea ai o se aso pisi ma le lelava i le galuega, i lima o o tatou aiga ao latou faaalia mai le alofa ma le talisapaia o i tatou. Tatou te maua le fiafia e talatalanoa atu i a tatou fanau, ma fiafia faatasi o se aiga, ma faatasia i po o afiafi faaleaiga. I se aotelega, e mafai ona tatou lagonaina le fiafia i aso uma o o tatou olaga, e ala mai i mea iti tatou te faia, ma e atoatoa lo tatou fiafia pe a tatou tausia poloaiga a se Atua alofa, o le e manatu tele mai mo i tatou.
O le fiafia moni e maua mai le tausia o poloaiga a le Atua. Ua aoaoina i tatou i le 2 Nifae 2:25 e faapea, “Na pau Atamu ina ia i ai tagata, ua ola tagata ina ia latou maua le olioli” po o se isi faaupuga, ina ia latou maua le fiafia.
Ua ou molimauina lenei fiafia i olaga o le toatele o tagata o le Ekalesia. I ni nai vaiaso taluai, sa ou maua se tofiga e pule faamalumalu ai i se konafesi a se siteki i Cali, Kolomupia. Sa ou feiloai atu ai se alii talavou faapitoa lava iina, o se tagata o le Ekalesia, o se faataitaiga lelei o le uiga o le fiafia moni.
O lona igoa o Fapiano. E auai lona aiga i le Ekalesia, ma na ia aoao e uiga i le fuafuaga o le fiafia ao avea o ia ma se tamaitiiti laitiiti. I le 1984, ina ua 3 ona tausaga, sa nonofo ai Fapiano ma lona aiga i se fale e latalata i se magaala togavaoa. O lena magaala na fai ma auala o le tele o pasi o le taulaga.
I se tasi aso, ina ua ia vaaia le pa o matala mai, na taumafai ai si alii laitiiti o Fapiano e sopoia le magaala ma lavea ai i se pasi. E faafetaia le agalelei o le Tama Faalelagi, na faasaoina mai Fapiano mai le faalavelave. Na auina atu o ia e ona matua i ni falemai eseese se tolu, ma na faailoa mai ai e le mafai ona latou togafitia o ia. Sa faaauau pea ona latou saili mo se fesoasoani ma, ina ua maua le fesoasoani faafomai talafeagai, sa faalelelei tele le manatu na tau ane e uiga i se avanoa e toe manuia ai o ia. Ina ua maea le tele o le mau taotoga, na faailoa ane e alii fomai i le aiga, o faaletonu i ona vae ma ogavae na ogaoga tele, ma ina ia faasaoina o ia, o lea e tatau ai ona tipi ese lona vae taumatau.
Na amataina e si alii laitiiti o Fapiano se olaga ese i lea lava taimi, e aunoa ma le isi ona vae. Na ia aoaoina lemu le faapaleniina o lona tino ma savali e aunoa ma le fesoasoani a tootoo. Sa ia alu atu i le aoga ma maua mai ai le lagolago a ona faiaoga ma uo. O nisi tagata sa masani ona latou taufaifai ia te ia, ae na vave ona ia aoao, e aua le amanaiaina a latou ulaga na faia ia te ia.
Sa manao o ia e auai atu i gaoioiga faaletino uma, ma sa ia auai atu i ai i le tele o taimi. E ui lava ina sa faigata ona maua se manumalo, ae sa ia lototele lava ma saunia e auai atu i ai.
O lo o auauna atu nei Fapiano o se fesoasoani i le faalapotopotoga a Alii Talavou o le latou siteki. E auai atu o ia i vasega o le inisititiuti, ma e malosi tele o ia i le au peresitene o le aoga. E taalo o ia i le pasiketipolo ma le soka. E taalo Ping-Pong foi o ia faatasi ma ana uo mai le inisititiuti. E tietie o ia i se uila vilivae ma faia mea uma e mafai ona faia e se alii talavou. E faigaluega o ia o se tagata galue fua e aunoa ma se totogi, i le aoaoina o le Igilisi i se faalapotopotoga e tausia tamaiti matitiva.
E manao lava Fapiano e auauna atu i ona uso a tagata ma le Atua ma lona malosi atoa. E foliga fiafia lava o ia ma o taimi uma e fesoasoani atu ai i se tasi e manaomia se fesoasoani. O Fapiano o se alii talavou e matuai fiafia lava. Faatasi ai ma se malosiaga maoae lea e ala mai i lona faatuatua ma le faamoemoe i le Atua, ua avea ai Fapiano ma se faataitaiga maoae i tagatanuu o lona nuu.
Na ala mai lona fiafia i le taumafai lea e ola agavaa i aso uma, ma usitai i poloaiga a le Atua. Na te faamanatuina mai ia te au se mau o lo o maua i le Mosaea 2:41, “Ma o lea foi, o lou manao, ia outou mafaufau i le manuia ma le fiafia o i latou o e tausi i poloaiga a le Atua. Aua faauta, ua manuia i latou i mea uma, i le faaletino, atoa ma le faaleagaga; afai foi ua latou tutumau e oo i le iuga, e talia i latou i le lagi, ina ia latou mau faatasi ma le Atua i le fiafia e le iu. E! ia manatua, ia manatua lava, ua moni lava nei mea, aua na fetalaia mai e le Alii le Atua.”
O le usitaia o poloaiga a le Atua , o le a tatou ola fiafia ai i le faavavau atoa. Ua fetalai mai le Alii i le Alema 41:10 “o le amioleaga e le o le fiafia lea.”
I le avea ai o au ma se auauna a le Atua, ma se tasi o Lana Ekalesia, ou te valaauliaina ai outou ina ia outou maua le fiafia moni e ala i le usitaia o Ana fautuaga, e ala i le tausia o Ana poloaiga, ma usiusitai i upu a Ana perofeta soifua.
Ou te iloa, o se tasi o mea e i ai sona aafiaga tele i lo tatou fiafia o le usitaia lea o lapataiga a perofeta soifua o e o lo o taitaiina i tatou i totonu o lenei Ekalesia.
E i ai lau molimau o lo o soifua le Atua, o Iesu o le Keriso lo tatou Faaola ma le Togiola. Sa Ia tuuina mai lona soifua faapelepele mo i tatou uma taitoatasi. Ou te iloa o Iosefa Samita o se perofeta a le Atua. Ua ou iloa lenei mea ma lou loto atoa. Ou te iloa o le Tusi a Mamona o le afioga a le Atua, ma e mafai ona taitaiina atu ai i tatou i ala o le fiafia.
Ou te iloa o Peresitene Gordon B. Hinckley o se perofeta a le Atua i aso nei, ma o lo o aoao maia i tatou ma le alofa ma le onosai i le ala e mafai ai ona tatou maua le fiafia i lenei olaga ma le olaga a sau.
O nei mea o se vaega o la’u molimau o le upu moni, ma ou te tuuina atu nei mea ia te outou, ou uso e, ma tuafafine, i le suafa o Iesu Keriso, amene.