Julie Bangerter Beck
Fesoasoani Muamua, Au Peresitene Aoao o Tamaitai Talavou

Sa tatau ona i ai se ma auala e fesoasoani ai i le ma fanau e aoao ai pe faapefea ona galulue,” o le saunoaga lea a Tuafafine Julie B. Beck, o le fesoasoani muamua lea sa faatoa lagolagoina nei i le au peresitene aoao o Tamaitai Talavou. “E le i i ai se matou faatoaga, o lea la sa le mafai ai ona latou tatauina ni povi. O Musika o le matou povi lena.”

E faapei foi ona aoaoina e lana lava fanau e toatolu le ala e galulue ai i le taina lea o le piano, sa faapena foi ona aoaoina e Tuafafine Beck le olioli o le galue ma le auauna atu i lona tuputupu ae i le totonugalemu o se fanau e toa 11. Na soifua mai i le aso 29 o Setema 1954 i ona matua o William Grant ma Geraldine Hamblin Bangerter, ma sa soifua ai o ia i Granger, i Iuta, ma São Paulo, i Pasila, i le mea sa avea ai lona tama ma peresitene o le misiona.

Sa faauu Tuafafine Beck i le Iunivesite o Polika Iaga, ma sa maua sona faailoga i mataupu e faatatau i aiga. I le aso 28 o Tesema 1973, sa faaipoipo ai o ia ia Ramona P. Beck i le Malumalu o Sate Leki. O loo soifua i latou i Alpine, i Iuta, ma e toalua o la’ua alo tamaitai ma se atalii e toatasi, ma e toatolu le fanau a le la fanau. O gaoioiga e aupito sili ona fiafia i ai Tuafafine Beck o lona aiga. “O le ma fanau o a ma uso silisili ia,” o lana saunoaga lea.

E tele ni tofiga sa umia e Tuafafine Beck i le Aualofa ma Tamaitai Talavou, ae e i ai se vaega faapitoa i lona loto mo tamaitai talavou o le Ekalesia, ma ua ia silafia foi le taua o le matafaioi o le galue malosi ma le auauna atu i o latou atiinaega faaleagaga.

“O loo ou teuina pea lava la’u lipine o loo su’i i ai mea na ou faataunuuina i tausaga e lua sa ou i ai i le Ofagapi,” o le saunoaga lea a Tuafafine Beck, a o ia ta’ua polokalama a le Ekalesia i le taimi o talavou ai o ia. “O lo’u fiafia ia e galue ina ia ou maua uma taui a Tamaitai Talavou.”

O loo ia te ia se naunautaiga mo le polokalama fou a le Ekalesia mo tamaitai talavou—o le Alualu i Luma o le Tagata Lava Ia. Sa galue auauna o ia i le au ofisa aoao o Tamaitai Talavou, ma sa galue ai foi i le toe faafouina o le polokalama o le Alualu i Luma o le Tagata Lava Ia.

“Ou te manatu o le polokalama o le Alualu i Luma o le Tagata Lava Ia, e fesoasoani ai i tamaitai talavou ia malamalama ma ola ai i le tausiga o ana feagaiga o le papatisoga,” o le saunoaga lea a Tuafafine Beck. “Ma ou te talitonu afai e mafai ona ia malamalama ma tausia ana feagaiga o le papatisoga, o le a saunia foi o ia e osia ma tausia feagaiga i le malumalu.”