Ua Tofia ni Taitai Fou, Ua Fofogaina Mai Foi Tulafono ma Aiaiga

I le faasalalauga o le konafesi aoao lea na oo atu ai i se pasene aupito toatele o le Ekalesia, na fofogaina ai e Peresitene Gordon B. Hinckley ni suiga o tulafono ma aiaiga, ma sa lagolagoina ai foi e tagata o le Ekalesia ia se au peresitene aoao fou o Tamaitai Talavou, o nisi o le Au Pulega Aoao fou, ma uso fou o le Au Peresitene o le Au Fitugafulu ma le au peresitene aoao o le Aoga Sa.

O le Konafesi Aoao Lona 172 Faaleafatausaga, o le konafesi aoao muamua lea ua faasalalauina i vaega o Asia, Ausetalia, Europa i Sasae, ma le Pasefika i Saute. E silia ma le 5,000 falelotu ua faatotogaina e avatu ai faasalalauga a le Ekalesia, ma maua ai e le 90 pasene o tagata o le Ekalesia faasalalauga faasatelite o le konafesi aoao. E le gata i lea, ae sa faasalalauina tuusao mai foi sauniga i luga o le Initoneti.

I le konafesi ia Oketopa 2002, sa lagolagoina ai se au peresitene aoao fou o Tamaitai Talavou. Na tofia le Tuafafine o Susan W. Tanner e avea ma peresitene aoao o le faalapotopotoga a Tamaitai Talavou. O le Tuafafine ia Julie B. Beck sa tofia e avea ma fesoasoani muamua, ma Tuafafine Elaine S. Dalton e avea ma fesoasoani lua.

Na faamalolo mai le au peresitene aoao o Tamaitai Talavou le Tuafafine o Margaret D. Nadauld ma ona fesoasoani o Tuafafine Carol B. Thomas ma Tuafafine Sharon G. Larsen.

E toalima isi Au Pulega Aoao fou na tofia i le Korama a le Au Fitugafulu: O Elder Craig C. Christensen, Elder James M. Dunn, Elder Daryl H. Garn, Elder D. Rex Gerratt, ma Elder Spencer V. Jones.

Na faamalolo mai foi i le Korama Lua a le Au Fitugafulu ia Elder Richard D. Allred, Elder Athos M. Amorim, Elder L. Edward Brown, Elder Earl M. Monson, ma Elder Jerald L. Taylor.

E 21 foi Fitugafulu Pule Eria na faamalolo ai. O i latou na faamalolo, e 11 na galulue auauna i le Iunaite Setete a o isi na galulue i Atenitina, Ausetalia, Polivia, Pasila, Egelani, Siamani, Iapani, Korea, Peru, ma Uruguay.

Sa lagolagoina foi Elder Dieter F. Uchtdorf e avea ma se tasi o le Au Peresitene o le Au Fitugafulu, ma sa lagolagoina Elder Val R. Christensen e fai ma fesoasoani lua i le au peresitene aoao o le Aoga Sa. O Elder Ben B. Banks o le Au Fitugafulu ua avea nei o se Pulega Aoao faamalolo faamamaluina, ma ua faamalolo mai foi mai le Au Peresitene o le Au Fitugafulu, ma ua faapea foi ona faamalolo mai Elder Richard J. Maynes o le sa avea ma fesoasoani lua i le au peresitene aoao o le Aoga Sa ina ia mafai ai ona faataunuu isi tofiga.

O le taimi o le lotu a le au perisitua, sa fofoga mai ai e Peresitene Hinckley ni suiga o o isi tulafono ma aiaiga, ma toe faamamafa mai ai tulafono ma aiaiga i le taimi nei ma le tulaga e ola ai. Ina ua silafia le mamafa o le avega o loo tauaveina e taitai o le perisitua, o lea na fofoga mai ai e Peresitene Hinckley, e amata atu i le aso 1 o Novema 2002, o le a tailua tausaga e aoga ai le pepa faataga o le malumalu ae le tasi, e faaitiitia ai le aofaiga o taimi e faaalu e taitai i le faiga o faatalanoaga.

Na ia fofogaina mai ai foi o polokalama faamavae a faifeautalai, o le a na o le faifeautalai lava o le a alu e fai sana lauga i se sauniga faamanatuga, ma e le toe fuafuaina foi e tagata o le aiga lena sauniga pe auai foi i le faatinoina o le polokalama. Sa faamanatu mai ai e Peresitene Hinckley i tagata o le au paia, e le tatau ona toe faia ni faiga toonaiga mo faifeautalai.

Sa talosagaina ai foi e Peresitene Hinckley ia taitai o nuu ma alaalafaga ina ia latou aloaia le manao o tagata o le Ekalesia e faia a latou afiafi faaleaiga, e ala lea i le faaavanoaina o le afiafi o le Aso Gafua e aua nei faia ai ni gaoioiga faaleaoga ma isi polokalama. Sa ia tulei saunoa foi e aloese mai le fai aitalafu, ola le mama, ma le sauaina po o le faia faatautala o fanau.