Faataitaiga Lelei e Mulimuli I Ai
O i tatou uma o loo ola i le lalolagi i aso nei e moomia ni faatulagaga e fua i ai la tatou amio—po o ni faataitaiga foi e mulimuli i ai.
I le tele o tausaga ua mavae sa ou maofa ai i le faavaa o se tasi o lomiga a le tatou Ekalesia lea na vaaia ai se toe gaosiga maoae o le ata vali a Carl Bloch. O le vaaiga sa i le mafaufau o le tusiata faapea—ma se auala tomai o le aao o le Matai—na valiina ai le ata i luga o se laupapa, o loo atagia ai ia Elisapeta, le ava a Sakaria, o loo faafeiloai atu ia Maria, le tina o Iesu. O le a maua uma ni a la tama—e fananau mai o ni vavega.
O le atalii na fanau mai ia Elisapeta na lauiloa o Ioane le Papatiso. O Ioane, e pei foi o Iesu, le tama a Maria—e laitiiti lava ni faamaumauga na tusia i o la tausaga a o laiti. O se fuaiupu e tasi o loo ta’uina mai ai ia i tatou mea uma tatou te iloa i le olaga o Ioane mai lona fanau e oo atu i lana galuega: “Ua tupu le tama,ma ua malosi lona loto, sa i le vao o ia, seia oo i le aso na faaalia ai o ia ia Isaraelu.”1
E puupuu lava le savali a Ioane. Na ia talai atu le faatuatua, salamo, papatisoga i le faatofuina, ma le tuuina atu o le Agaga Paia e se tasi o i ai le pule e sili atu nai lo ia. “E le o le Keriso a’u nei,” na ia ta’u atu ai i ona soo faamaoni, “a ua … auina mai lava a’u e muamua ia te ia.”2 “O a’u nei le papatiso atu ia te outou i le vai; a o le maliu mai e silisili o ia ia te a’u … : na te papatiso ia te outou i le Agaga Paia ma le afi.”3
Ona faia lea o le papatisoga o Keriso e Ioane le Papatiso. Na molimau mulimuli ane ia Iesu, “E le’i tu mai i e na fananau i fafine se sili ia Ioane le Papatiso.”4
O i tatou uma o loo ola i le lalolagi i aso nei e moomia ni faatulagaga e fua i ai la tatou amio—po o ni faataitaiga foi e mulimuli i ai. Na tuuina mai e Ioane le Papatiso se faataitaiga atoatoa o le lotomaualalo moni, e pei ona ia faatatau soo i Le o le a mulimuli mai—le Faaola o tagata uma.
O le aoao e uiga i isi o e na faatuatua i le Atua ma mulimuli i Ana aoaoga e musumusu mai pea i o tatou agaga, “Ina soia, ma ia outou iloa o a’u lava o le Atua.”5 A o latou fuafua e tausia Ana poloaiga ma faatuatua ia te Ia, sa faamanuiaina i latou. Pe a tatou mulimuli i a latou faataitaiga, o le a faamanuiaina foi i tatou i o tatou aso ma o tatou taimi. E avea i latou uma ma se faataitaiga e mulimuli i ai.
E fiafia i tatou uma lava i le tala matagofie e uiga ia Aperaamo ma Isaako o loo maua i le Tusi Paia. Ai lava se faigata naua ia Aperaamo, le usiusitai i le poloaiga a le Atua, ina ia ave lona atalii pele o Isaako i le nuu o Moria, e tuuina atu ai o ia iina e fai ma taulaga mu. Pe mafai ea la ona sei e manatu i le mafatia o lona agaga a o ia faaputuputu maia fafie mo le afi ma malaga atu i le nofoaga ua filifilia? O le mea moni, ai sa lutia lona tino i le tiga ma mafatia lona mafaufau a o ia “fusifusi Isaako … ma faaee ia te ia i le fata i luga o fafie. Ona aapa … atu lea o lona lima ua tago atu i le polo o le a fasioti lona atalii.” Matua matagofie le malelega ma le matua talisapaia o lona oo mai: “Soia le oo lou lima i le tama, aua foi e te faia se mea e tasi ia te ia: aua ua ou iloa nei ua e mata’u i le Atua, ina ua e le taofia lou atalii, o lou atalii e toatasi.”6
E agavaa ia Aperaamo e avea ma se faataitaiga o le usiusitai e le fesiligia.
Afai e i ai soo se tasi o i tatou ua lagona ua sili atu ona luitau nai lo lona malosi e faafetaiaia ai, ia faitau o ia e uiga ia Iopu. O le faia o lea mea, o le a tupu mai ai le lagona, “Afai e mafai e Iopu ona onosaia ma faatoilalo, o le a faapena foi au.”
O Iopu o se tagata “sa’o ma le amiotonu” o le na “mata’u i le Atua, ma ‘alo’alo ese i mea leaga.”7 E faaaloalo i lana amio, e tele lona tamaoaiga, sa feagai ia Iopu ma se tofotofoga e mafai ona faaumatia ai soo se tasi. Sa aveesea ana meatotino, sa teena o ia e ana uo, na puapuagatia o ia i le faaletino, na ootia o ia ina ua leai lona aiga, na uunaiina o ia e “faifai i le Atua, ma oti ai.”8 Na ia teenaina lenei faaosoosoga ma faailoa mai le taele o lona loto mama, “Faauta, o i le lagi le molimau ia te a’u, o i luga foi le ua i ai le mau ia te au.”9 “Aua ua ou iloa o loo soifua le na te togiolaina a’u.”10
Na avea Iopu ma se faataitaiga o le onosai e le faatapulaaina. O le taimi nei tatou te faatatauina ai i latou o e faapalepale ua mauaina “le onosai o Iopu.” Na ia saunia se faataitaiga mo i tatou e mulimuli ai.
O se “tagata amiotonu ma le sa’o i e tupulaga ma ia,” o le na “feoai ma le Atua,”11 o le perofeta lea o Noa. Na faauuina i le perisitua a o laitiiti, “na avea ma failauga o le amiotonu ma folafola atu le talalelei a Iesu Keriso, … na aoaoina atu le faatuatua, salamo, papatisoga, ma le mauaina o le Agaga Paia.”12 Na ia lapatai mai o le toilalo e faalogo ma usitai i lana savali o le a aumaia ai le lolo i luga o i latou o e faalogo i lona leo, ae latou te le usiusitai i ana upu.
Na faalogo ma usitai Noa i le poloaiga a le Atua e fau se vaa, ina ia mafai ona faasaoina ai o ia ma lona aiga mai le faatafunaga. Na ia mulimuli i faatonuga a le Atua ina ia faapotopotoina i totonu o le vaa ia meaola ta’ilua uma, ina ia mafai foi ona faasaoina i latou mai le lolo.
Na saunoa ia Peresitene Spencer W. Kimball: “I lena taimi sa leai ni faailoga o ni timuga ma se lolo… . O lapataiga a [Noa] na manatu nisi e faavalevale… . O se mea valea le fausia o se vaa i luga o le laueleele matutu atoa ma le la o loo susulu ma o loo gasolo pea le olaga e pei ona masani ai! Ae peitai na mavae atu aso ma taimi… . Na oo mai lologa. O e na le usiusitai … na malelemo. O le vavega e faatatau i le vaa na mulimuli mai i le faatuatua na faaalia i le fausiga o le vaa.”13
Sa ia Noa le faatuatua e le maluelue e mulimuli i poloaiga a le Atua. Ia tatou faia ia faapea. Ia tatou manatua o le atamai o le Atua e foliga mai i nisi taimi o se mea faavalevalea i tagata; ae o le lesona sili lava e mafai ona tatou aoaoina i le olaga nei, afai e fetalai mai le Atua ma tatou usiusitai, o le a sa’o pea i tatou.
O Ruta o se faataitaiga o le avea ma se tamaitai. I le lagonaina o le loto faavauvau o le tina o lona toalua o Naomi—o le sa mafatia i le maliliu o lana fanau tama uma e toalua, o lagona tiga o le tuua toatasi lea na matuai ootia ai le loto o Naomi, na memumemu atu ai e Ruta se faaupuga iloga o le faamaoni: “Aua e te finau ia te au ina ia ou tuulafoai ia te oe, ia le mulimuli atu ia te oe: aua o le mea e te alu i ai, ou te alu ai foi; o le mea e te nofo ai, ou te nofo ai; e fai lou nuu mo’u nuu; e fai lou Atua mo’u Atua.”14 O aga a Ruta na faaalia ai le moni o ana upu.
O le tumau pea o le faamaoni o Ruta ia Naomi, na faaipoipo atu ai o ia ia Poasa lea na avea ai o ia—o le tagataese ma o se tagata Moapi ua liliu mai—ma tinamatua o Tavita, ma o se tasi, e tupuga mai ai lo tatou Faaola o Iesu Keriso.
O le a ou liliu atu nei i se perofeta maoae o le Tusi a Mamona—o Nifae, le atalii o Liae ma Sarai. Sa faamaoni ma usiusitai o ia i le Atua, sa lototele ma toa. Ina ua tuuina atu i ai le tofiga faigata o le aumaia lea o papatusi apamemea mai ia Lapana, sa le’i muimui o ia, ae na ia faailoa atu, “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou.”15 Atonu o lenei aga o le lototele na musuia ai se tasi e tusia se fuaiupu o le fautuaga mo i tatou o loo maua i le viiga, “O le Ai Uamea”:
Ia Nifae, le tagatavaai anamua,
Na oo mai i ai se faalepo mai le Atua… .
Pipii i le ai uamea, le “ai uamea;
E malosi, pupula, ma moni.
O le ai uamea o le afioga a le Atua;
O le a taitai saogalemu ai i tatou.16
O Nifae o se faataitaiga o le naunautai e tumau.
E leai se faamatalaina o faataitaiga atoatoa mo i tatou e mulimuli i ai e aunoa ma le aofia ai o Iosefa Samita, le uluai perofeta o lenei tisipenisione. Ina ua faatoa 14 ona tausaga, sa alu atu ai lenei alii talavou lototele i se togavao, lea na taua mulimuli ane ua paia, ma maua ai se tali i lana tatalo faamaoni.
Ona faaauau mai ai lava lea o sauaga o Iosefa ina ua ia faamatalaina atu i isi le tala i le faalepo mamalu na ia mauaina i totonu o lena togavao. Ae peitai, e ui lava sa ulagia ma inosia o ia, ae sa ia tumau. Sa ia faapea mai, “Sa ou vaai i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia, ua ou fefe e faia lena mea.”17
Sa auauai pea, le feagai ai ma faigata e toetoe a le motusia ae peitai sa taitaia pea o ia e le aao o le Alii, sa faavaeina e Iosefa le Ekalesia a Iesu Keriso o le Au Paia o Aso e Gata Ai. Na ia faamaonia le lototele i mea uma na ia faia.
I le taufaaiuiuga o lona soifua, a o taitaieseina atu o ia faatasi ma lona uso o Ailama i le Falepuipui o Karefasi, sa ia tu atu ma le lototele e tali i le mea ua iloa e aunoa ma se masalosalo o le a tupu ia te ia, ma sa ia faamaufaailogaina lana molimau i lona toto.
A o tatou feagai ai ma tofotofoga o le olaga, ia tatou faataitai pea i le lototele mausali na faaalia e le Perofeta o Iosefa Samita.
O lea ua tu mai o tatou luma i aso nei se isi perofeta a le Atua—o la tatou pele o Peresitene Gordon B. Hinckley. O loo pulefaamalumalu o ia i se aofia sili ona tele o le Ekalesia—e le gata i fuainumera ae o atunuu—i lo tatou talafaasolopito. Ua asiasi atu o ia i atunuu e le’i asiasia muamua e le Ekalesia ma ua asiasi atu foi i taitai o malo ma tagata o le Ekalesia i le lalolagi atoa. O lona alofa mo tagata ua sopo atu i papupuni o gagana ma aganuu.
Faatasi ai ma le faalepo faaperofeta, na ia amataina ai le Tupe Faaagaga mo Aoga, lea ua fesoasoani ai i tagata ina ia o ese mai le mativa i le tele o vaega o le lalolagi ma saunia ai tomai ma aoaoga lea e faaagavaaina ai alii ma tamaitai talavou mo le mauaina o ni galuega e totogi lelei. O lenei fuafuaga musuia ua tuuina atu ai se faamoemoega ia i latou o e na lagonaina le leai o se faamoemoega mo i latou e faaleleia ai o latou tulaga ae o lea ua maua nei se avanoa mo se lumanai manuia.
Sa galue ma le le faavaivai ia Peresitene Hinckley ina ia aumaia faamanuiaga paia i tagata o le Ekalesia i le lalolagi atoa e ala lea i le sauniaina o malumalu lea e mafai ona oo uma atu i ai i latou. O loo ia te ia le malosi e siitia ai i luga i se tulaga maualuga ia tagata uma mai soo se ituaiga, e tusa lava po o le a le talitonuga faalelotu latou te auai. O ia o se faataitaiga o le faamoemoe e le toilalo, ma tatou te faaaloalogia o ia o se perofeta, tagata vaai, ma se tali faaaliga.
O uiga tutusa o loo umia uma e nei alii ma tamaitai sa ou taua e mafai ona avea ma se fesoasoaniga taua ia i tatou a o tatou feagai ai ma faafitauli ma faigata o loo i o tatou luma atu. Ou te fia faatinoina atu i le faamatalaina lea o le mea na oo i ai le aiga o Jerome Kenneth Pollard o Oakland, Kalefonia.
Ia Me na te’a nei, a o malaga atu ia Elder Taavili Joseph Samuel Pollard i le ofisa o le misiona i le aso mulimuli o lana misiona i Zimbabwe, sa faafuaseia lava ona taavilivili le taavale a le misiona sa ia aveina ma taia i se laau. Sa mafai e se tagata na ui ane ai ona faasaoina le soa a Elder Pollard, ae o Elder Pollard, o le sa matapogia, sa mau ai i totonu o le taavale, lea sa talali ma mu. Sa fano ai ia Elder Pollard. Na maliu lona tina i le valu tausaga ua tuanai, ma, sa na o lona tama sa tausia toatasi le aiga. O loo i ai se uso o loo auauna atu i le Misiona a West Indies.
Ina ua taunuu atu le tala o le maliu o Elder Pollard i lona tama, sa faapea loa ona telefoni atu lenei tama lotomaualalo—o le ua maliu lona toalua—i lona atalii o loo auauna atu i le Misiona a West Indies e faailoa atu ia te ia le maliu o lona uso. I luga o lenei laina telefoni, sa usu faatasi ai e le Uso o Pollard ma lona atalii, e ui i le loto faavauvau, ia le pese “O A’u Se Atalii o le Atua.”18 A o le’i faaiuina le talanoaga, sa faia e le tama se tatalo i le Tama Faalelagi, e faafetai atu ai ia te ia mo Ana faamanuiaga ma sailia Lana faamafanafanaga paia.
Na taua mulimuli ane e Uso Pollard e faapea na ia iloa o le a sologa lelei lava lona aiga, aua e malolosi a latou molimau i le talalelei ma le ata o le faaolataga.
O’u uso e ma tuafafine, i lenei tisipenisione ofoofogia o le atoatoaga o taimi, a o tatou faimalaga ai i le olaga ma feagai ai ma faigata ma luitau o le lumanai, ia tatou manatua ia faatulagaga a nei faataitaiga ina ia mulimuli i ai lea na ou faatatau i ai i le taeao nei. Ia tatou maua le lotomaualalo mama o Ioane le Papatiso, le usiusitai e le fesiligia o Aperaamo, le onosai e le faatapulaaina o Iopu, o le faatuatua le maluelue o Noa, o le faamaoni e tumau o Ruta, o le naunautai e le masuia o Nifae, o le lototele mausali o le Perofeta o Iosefa Samita, ma le faamoemoe e le toilalo o Peresitene Hinckley. O le mauaina o ia uiga o le a avea ma se olo o le malosi ia i tatou i o tatou olaga atoa.
Ia taitaiina pea i tatou e le Faataitaiga silisili, a le tama a Maria, le Faaola o Iesu Keriso—o lona soifua lea ua saunia ai se faataitaiga atoatoa mo i tatou e mulimuli i ai.
Na soifua mai i se fale o manu, na tofa i se faatanoa vao, na Ia afio mai le lagi ina ia soifua i le lalolagi e pei o tagata ola ina ia faavaeina le malo o le Atua. I le taimi o Lana galuega i le lalolagi, na Ia aoaoina ai tagata i le tulafono maualuga. O Lana talalelei mamalu na toe suia ai le mafaufau o le lalolagi. Na Ia faamanuiaina e mamai; Na Ia faasavavali i pipili, faapupula i tauaso, ua faalogo e na tutuli. Na Ia toefaatuina mai foi le oti ina ia ola.
O a ni uiga sa faaalia i Lana savali o le alofa mutimutivale, i Ana afioga poto, i Ana lesona e uiga i le olaga? E toaitiiti i latou sa talisapaia o Ia. Sa latou mulumulu Ona aao. Sa latou aoao i Lana afioga. Sa latou mulimuli i Lana faataitaiga.
E toatele foi i latou o e sa faafitia o Ia. Ina ua fesiligia e Pilato, “Se a foi le mea ou te faia ia Iesu o le ua igoa ia Keriso?”19 sa latou alalaga, “Faasatauro ia te Ia.”20 Sa latou faatauemu ia te Ia. Sa latou avatu le vineta ia te Ia ia inu ai. Sa latou upuleaga ia te Ia. Sa latou ta ia te Ia i le u. Sa latou tuufeanu ia te Ia. Sa latou faasatauroina o Ia.
Mai lava i le gasologa o augatupulaga, e tutusa lava le savali na tuuina mai e Iesu. Ia Peteru ma Aneterea i auvai o le Vai Matagofie o Kalilaia na Ia fetalai atu ai, “Mulimuli mai ia te a’u.”21 Ia Filipo o anamua na oo mai i ai le valaau, “Mulimuli mai ia te a’u.”22 I le sa Levi o le sa aoina lafoga na oo mai i ai le faatonuga, “Mulimuli mai ia te a’u.”23 Ma, ia te oe ma a’u, afai ta te faalogo lelei, o le a oo mai i ai lea lava valaaulia tutusa, “Mulimuli mai ia te a’u.”
O la’u tatalo i lenei aso ina ia tatou faapea ona faia. I le suafa paia o Iesu Keriso, amene.