“Ina Ia Tasi i Latou ia i Tatou”
O le mea moni lava o le a le mafai ona tatou tasi ma le Atua ma Keriso, sei iloga tatou te avea o Laua finagalo ma faamoemoe, e fai ma o tatou faanaunauga sili ia
Ao tau faaiuiu Lana galuega i lenei lalolagi, ma le iloa “ua oo mai ona po” (Ioane 13:1), na faapotopoto faatasi ai e Iesu Ana Aposetolo i se afeafe aupitoaluga i Ierusalema. Ina ua maea la latou paseka ma Lona mulumuluina o o latou vae ma le aoaoina o i latou, na fofogaina ai e Iesu se tatalo faaeaina o le alofa tunoa, mo nei aposetolo, ma i latou uma o e o le a faatuatua ia te Ia. Na ia tatalo atu i le Tama i upu nei:
“E le faapito lau tatalo mo i latou nei, a o i latou foi e faatuatua ia te au ona o la latou upu;
“Ina ia tasi i latou uma; faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua: ina ia talitonu le lalolagi ua e auina mai au.
“O le manuia foi ua e foai mai ia te au, ua ou foai atu ia te i latou; ina ia tasi o i latou, faapei o i taua ua tasi:
“O au o i totonu ia te i latou, o oe foi o i totonu ia te au, ina ia faaatoatoaina i latou ia tasi” (Ioane 17:20–23).
E maeu le matagofie pe a mafaufau atu ua valaauliaina i tatou e avea ma se vaega faaatoatoaina ia tasi lea o lo o i ai i le Tama ma le Alo. E mafai faapefea ona tupu lenei mea?
O le mafaufau loloto i lenei fesili, ua manino mai ai e tatau ona tatou amata atu ia tasi totonu o i tatou lava. Ua faia i tatou i ni vaega se lua o le tino ma le agaga, ma o nisi taimi tatou te lagonaina ai le le tutusa po o feteenaiga foi. Ua faamalamalamaina o tatou agaga i le iloa o le malamalama o Keriso (tagai Moronae 7:16; MFF 93:2), ma tali atu ai ma le mautinoa i musumusuga a le Agaga Paia ma naunau e mulimuli i le upumoni. Peitai o manaoga faaletino ma faaosoosoga e mafai ona faatumuina ma taitaia le agaga, pe a faatagaina le tino e gauai atu i ai. Fai mai Paulo:
“O lenei, ua ou iloa peiseai se tulafono, ua ia te au; pe a ou loto atu i le lelei e fai, ua ia te au le leaga.
“Aua ou te fiafia i le tulafono a le Atua i le tagata i totonu:
“Aua ua ou iloa le tulafono ese i ou tino, o lo o tau le taua i le tulafono a lou mafaufau, ua fai foi au ma tagata o taua i le tulafono a le agasala o lo o i ou tino” (Roma 7:21–23).
Na faaalia foi e Nifae ni lagona talitutusa faapenei.
“Ae ui i le agalelei tele lava o le Atua i le faaali mai ia te au o ana galuega sili ma le ofoofogia, ua tagi ai lou loto: Aue! O au o le tagata malaia! E moni, ua faanoanoa lou loto ona o lou tino. Ua faanoanoa lou agaga ona o au amioletonu.
“Ua siosiomia au ona o tofotofoga ma agasala ua faigofie ona taumaileia ai au” (2 Nifae 4:17–18).
Peitai, o le manatuaina o le Faaola, na tautino mai ai e Nifae lenei faaiuga mautinoa: “Ae ui lava i lea, ua ou iloa Le ua ou faalagolago i ai” (2 Nifae 4:19). O le a le uiga o lana saunoaga?
O Iesu foi na avea ma se tagata o le tino ma le agaga, a ua le gauai atu o Ia i tofotofoga. (tagai Mosaea 15:5). E mafai ona tatou liliu atu ia te Ia ao tatou sailia le tasi ma le filemu i totonu ia i tatou lava aua ua silafia e Ia. E malamalama o Ia i tauiviga, ma na te silafia le ala e manumalo ai i tauiviga. E pei ona fai mai Paulo: “Aua e le ia te i tatou se faitaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia” (Eperu 4:15).
O le mea sili ona taua, e mafai ona tatou tagai atu ia Iesu e fesoasoani e toe faatuina mai le tasi i totonugalemu o o tatou agaga, pe afai ua tatou gauai atu i le agasala ma faaumatia ai lo tatou filemu. E lei leva ona maea Lana augani o le alofa tunoa ina ia mafai ona tatou “faaatoatoaina i le tasi,” ona tigaina ai lea o Keriso ma tuuina atu Lona soifua e togiolaina ai agasala. O le mana o Lana Togiola e mafai ona soloiesea ai taunuuga o agasala. Pe a tatou salamo, o Lana togisala o le alofa tunoa e tauamiotonuina ma faamamaina ai i tatou. (tagai 3 Nifae 27:16–20). E pei lava tatou te lei faia, e pei lava tatou te lei gauai atu i faaosoosoga.
Ao tatou taumafai i aso taitasi ma vaiaso taitasi e mulimuli atu i ala o Keriso, e puipuia e o tatou agaga lona malosi ma le mafai e faatoilaloina ai o tatou tagata o le lalolagi, ma o le a faatoilaloina le taua o totonu, ma o le a le toe faalavelave mai faaosoosoga. O lo o i ai se fiafia sili sili atu i le va o le faaleagaga ma le faaletino, seia oo ina toe liua o tatou tino faaletino, i upu a Paulo, mai “auupega a le amioleaga” i “auupega a le amiotonu i le Atua.” (tagai Roma 6:13).
O le avea ia tasi i totonu ia i tatou lava, e faasaunia ai i tatou mo le faamanuiaga sili atu o le avea ia tasi ma le Atua ma Keriso.
Na maua e Iesu le faaatoatoaina ia tasi ma le Tama, ona o le gauai atu o Ia lava, i le tino ma le agaga, i le finagalo o le Tama. O lana galuega e manino lava lona faamoemoega, aua foi sa le finagalo o Ia e faavaivaia pe faalavelaveina lo la tasi ma le Tama. Na fetalai Iesu e faatatau i Lona Tama, e faapea, “Ou te faia pea lava o mea lelei ia te ia” (Ioane 8:29).
Talu ai ona o le finagalo o le Tama, o lea na gauai atu ai Iesu, seia oo lava ina maliu, “ua faaumatia foi le loto o le Alo i le finagalo o le Tama” (Mosaea 15:7).
E le o sina mea faatauvaa lenei mea. O lena puapuaga na Ia fetalai ai, “na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le ipu oona, ae teena—
“Ae ui i lea, ia i le Tama, le viiga, ma na ou inu ma faaumaina ai au sauniuniga i le fanau a tagata” (MFF 19:18–19).
O nei faamatalaga ua faaalia ai o le faamoemoega atoa o le Faaola, ina ia faamamaluina le Tama. O le Tama ua i “totonu” o le Alo i le tulaga o le mamalu ma le finagalo o le Tama, ua nao lea le faamoemoega ma le finagalo o le Alo.
I le taimi o le Paseka Mulimuli faatasi ma Ana Aposetolo, na fetalai atu ai le Faaola, e faapea:
“O au nei o le vine moni, a o lou Tama o le galue vine ia.
“O la uma lava o ia te au e le fua, e aveeseina e ia: a o la uma e fua, e teuteu e ia, ina ia fua mai ai atili” (Ioane 15:1–2).
Atonu o le a le mafai ona tatou vave iloaina le ala e faataunuu ai le aveesega, po o a foi osigataulaga e manaomia ai. Ae afai o le a fesiligia faatasi i tatou ma le taulealea mauoa, “Se a se mea o toe ou te lei faia?” (Mataio 19:20), o le tali a le Faaola o le a tutusa lava: “Mulimuli mai ia te au” (Mataio 19:21); ia fai ma ou soo e pei ona fai Au ma soo o le Tama; ma ua avea foi o ia “e pei o se tamaitiiti, ua fia usiusitai, ma agamalu, ma faamaualalo, ma onosai, ma ua tumu i le alofa ma le fia gauai i mea ua silafia e le Atua e tatau ona faatiga ai [outou], e pei lava ona gauai le tamaitiiti i lona tama” (Mosaea 3:19).
Na saunoa malamalama Peresitene Poliga Iaga e uiga i o tatou luitau ina ua ia saunoa mai:
“Ina ua maea ona tauina atu ma faia mea uma, ma ua maea ona Ia taitaiina nei tagata mo se taimi umi, tou te le o silafia ea, o le o lava lo outou talitonuina atoatoa o le Atua? Pe o mafai ea ona outou silafia lena mea? Atonu tou te fesili mai foi, ‘Uso Polika, o e silafiaina ea lenei mea?’ Ioe, e mafai ona ou iloa, e i ai nisi tulaga e le lava ai lo’u talitonuina o ia ua ou faalagolago i ai.—Aisea? Aua foi e le o ia te au le mana, ona o lou tulaga faaletagata soifua, o lea tulaga na oo mai ia te au ona o le pau… .
“ … O nisi taimi, e tuputupu ae ai se mea i totonu ia te au, e … vaseina se laina tuaoi i le va o ou manao ma le finagalo o lou Tama Faalelagi; o se mea e le faaatoatoaina ai le tasi o ou manao ma le finagalo o lou Tama oi le lagi.
“ … E tatau ona [tatou] lagonaina ma malamalama, i se mamao e gata mai ai, i se mamao e mafai e le tulaga pau o le tagata ona tuuina mai, i se mamao e mafai ona tatou mauaina ai le faatuatua ma le atamai e malamalama ai ia i tatou lava, o le finagalo o le Atua o le o lo o tatou auauna atu i ai, o lo tatou manao lea, ma e leai lava se isi mea tatou te mananao i ai, i le taimi nei po o le faavavau” (Deseret News, 10 Sept. 1856, 212).
O le mea moni lava o le a le mafai ona tatou tasi ma le Atua ma Keriso, sei iloga tatou te avea o Laua finagalo ma faamoemoe, e fai ma o tatou faanaunauga sili ia. O lea usiusitai e le mafai ona ausia i se aso se tasi, peitai e ala mai i le Agaga Paia, o le a aoaoina ma taitaiina i tatou e le Alii, pe afai tatou te naunau i ai, seia oo i le taimi tonu, e mafai ona faapea mai ai ma le faamaoni, o Ia ua i totonu ia i tatou, e pei o le Tama o i totonu ia te Ia. E i ai taimi ou te lagonaina ai le fefe e mafaufau i mea atonu o le a manaomia, ae ou te iloa, na o le faaatoatoaina o le tasi, e mafai ona maua ai le faaatoatoaina o le fiafia. E le mafai ona faamatala atoatoa atu lou agaga faafetai ua valaauliaina au ina ia tasi ma na tagata paia ou te faaaloalo ma tapuai i ai, o lou Tama Faalelagi ma le Togiola.
Talosia ia faafofoga le Atua i le tatalo o le alofa tunoa a le Faaola, ma taitaiina i tatou uma ina ia tasi ma i La’ua, o lau tatalo lea, i le suafa o Iesu Keriso, amene.