Tama, O E Ala?
Pe i ai ea se taimi e mafaufau ai ou atalii pe o e moe, pe a oo i mea e aupito sili ona taua ia te i latou?
I se taimi e le i mamao atu, sa matou o atu ai ma Elder Pace ma Elder Condie matou te fono ma le Au Peresitene Sili. Ina ua matou ulufale atu i le potu, sa silasila totoa mai Peresitene Hinckley ia i matou ona soisoi lea ma faapea mai, “E mafai faapefea e ni toeaiina faaulusina ona avea ma Au Peresitene o Alii Talavou o lenei Ekalesia?” Na pau lava le matou tali o le, “O oe lava na e valaauina i matou, Peresitene.”
Alii talavou, ou te faamoemoe ua outou sagisagi fiafia i le “Polokalama O Le Perisitua Arona, Faataunuuina O Lo Tatou Tiute i le Atua.” Ua maea ona faatomatau atu i le Au Perisitua Arona uma i le lalolagi atoa. Ua fuafuaina [lea polokalama] ia faamanuiaina ai outou i le faaleagaga, faaletino, faale-vafealoai, faalelagona, ma faalemafaufau. E aanoa lava tulaga o lo o manaomia, ma e matua tatau ai lava ona outou galulue i le mea e gata mai ai lo outou mafai. O le a mafai ai ona outou faatutuina ni sini faaletagata lava ia, ma faataunuuina ai faatasi ma le fesoasoani mai o outou matua ma o outou taitai lelei tele. O lo o i ai se sagisagi fiafia matagofie e faatatau i lenei polokalama, i le Ekalesia atoa. Matou te mananao ia te outou uma taitoatasi ina ia maea tulaga manaomia uma ma maua ai le “Taui o le Tiute i le Atua” lea o lo o matua manaomia tele.
I ni tausaga se tele ua mavae, sa ou aveina ai lo’u atalii e toatasi lava, i lana uluai malaga faatolauapiga ma fagotaga—sa na o ia o se tamaitiiti. Sa tifato itu o le tofe ma sa faigata ona faaifoifo i lalo i le mea e i ai le vaitafe. Ae sa lelei le fagotaga. O taimi uma lava e mau ai se i’a i la’u matau, ou te tuu atu ai le ofe i lea alii sagisagi fiafia, ona ia toso maia lea o se i’a manaia a o ususu i le fiafia. Sa amata ona matou toe fe’aei i luga o le gutu o le vanu, i le paolo ma le malu o le afiafi. Sa a’e faatopetope o ia i luga o le mauga ma muamua atu ia te au, ma sa ia tuu maia se lu’i, “Se tope mai Tama, ou te matea e mafai ona ou mua ia te oe i luga.” Sa ou faalogo i le lu’i, ae sa ou faagalogalo i ai ma le atamai. Sa foliga mai o la e lele si ona tino faaauiti, ma sa maulu ma pasi atu i soo se mea sa tu i le ala, ae o a’u laa uma lava taitasi na foliga mai o sa’u toe laa ona oti ai lea, ma sa taunuu o ia i le tumutumu ma tauvalaau faamalosiau mai ia te au. Ina ua maea le matou meaai o le afiafi, sa ma tootutuli e tatalo. Sa sii ae malie si ona leo itiiti i le lagi e faamanu atu mo le aso. Ona ma o ifo ai lea i totonu o le ma moega taga, ma e lei umi ona fetuleiai ma taufalo, ae ou faalogoina si ona tino faaauiti ua faapupuu ma lagolelei mai ia te au mo se mafanafana ma le saogalemu i le po. A o ou tilotilo ifo i lou atalii i ou autafa, sa faafuasei ona gatolo a’e se alofa tele i lo’u tino ma oo ai ina loimata o’u mata. Ma, i lena lava taimi, sa tuu ae ai si ona lima laitiiti e opo ai au ma faapea mai, “Tama.”
“O au, atalii,”
“O e ala?”
“Ioe, atalii, o lea ou te ala.”
“Tama, e faamiliona ma tiliona lo’u alofa ia te oe!”
Ma o le taimi foi lea na moe ai o ia. Peitai, sa ou ala i le po atoa ma faailoa atu la’u faafetai tele mo se faamanuiaga ofoofogia ua faafoliga mai i se tamaitiiti.
Ua matua nei lo’u atalii ma ua fai foi lona atalii. E i ai nisi taimi matou te o toatolu ai matou te fagogota. A ou vaai i le atalii ulu mumu lea o lo’u atalii, i tafatafa o lona tama, ou te manatuaina ai lava foliga o lena mea matagofie i tausaga ua leva. O le fesili, sa fesili ai o ia ma le loto mama, “Tama, o e ala?” o lo o tagitagi pea i lo’u loto.
Ou te tuuina atu foi i tama uma, lenei lava fesili faatupu manatu, “Tama, o e ala?” Pe i ai ea se taimi e mafaufau ai ou atalii pe o e moe, pe a oo i mea e aupito sili ona taua ia te i latou? Ou te fia fautuaina atu e tele vaega e iloa ai pe o tatou “ala” po o “momoe” i manatu o o tatou atalii.
Muamua: O lo tatou alofa i le Atua ma le taliaina o la tatou matafaioi o le taitai o le aiga, i le tausia lea o Ana poloaiga. I ni nai tausaga ua mavae, ina ua maea se konafesi faalesiteki, sa uunaia au ou te asiasi i se uso faaleperisitua sa pau ese mai le Ekalesia. Ma te o atu o galue o ia i lana faatoaga. Sa ou alu atu ma faapea atu ia te ia, “Le uso pele, ua auina mai au e le Alii o Iesu Keriso e vaai oe. O au o Elder Hammond, o se tasi o Ana auauna.”
Sa fai se ma feopoaiga abrazo faa-Latina ma ulufale atu loa i si ona tamai fale manaia. Sa ia valaau atu i lona toalua ma lana fanau laiti e toatolu e o mai. Sa nonofo ifo i lalo ni alii talavou aulelei se toalua ma se teineitiiti lalelei, i talaane o lo latou tama ma le tina. Sa ou fesili atu i tamaiti pe o le a lava se mea o latou mananao ai i le taimi lenei, e sili atu nai lo se isi lava mea i le lalolagi. Sa tali mai le atalii matua, “Maimau e pe ana mafai ona matou toe o uma faatasi o se aiga i le Lotu, semanu o le a matou matua fiafia lava—ma tutumu i le faafetai.” Sa ma faamatala atu i ai o lo o matua manaomia lava i latou e le Faaola ma e alofa o Ia ia te i latou. Sa tuuina atu i ai a ma molimau ona matou tootutuli ai lea ma tatalo. Sa tatalo le tama. Sa tagi le tina. Ua toe foi uma nei i latou. Ua mitamita le fanau i lo latou tama, ma ua fiafia nei i latou.
E tatau ona galulue tama uma o le Ekalesia o ni peteriaka i o latou aiga. E ao ia te ia ona taulamua i le taitaia faaleagaga o le aiga. E le tatau ona ia faamatuu atu pe lafoai atu ona tiutetauave i le tina. E tatau ia te ia ona valaau lona aiga mo tatalo faaleaiga, o afiafi faaleaiga, faitauga tusitusiga paia, ma faatalanoaga faatama i nisi taimi. O ia na te puipui, o ia o le leoleo, ma le sosia agalelei o aoaiga. O le tama lava e tatau ona taitai, tuufaatasia ma faamausali le iunite faaleaiga i lona taliaina lea o le perisitua a le Atua ma tali atu i valaauga ma avanoa paia e o faatasi ma le pule o le perisitua. O ana fegalegaleaiga ma le Atua ma Lona Alo o Iesu Keriso, o se tasi o moli taiala e taitai ai ona atalii ma afafine i vaega matagiā o le olaga.
Afai o se soo moni o Iesu Keriso le Tama, ona mulimuli lea o atalii ia te ia e faapei ona mulimuli mai le po i le ao. “Tama, o e ala?”
Lona lua: O a tatou fegalegaleaiga ma a tatou ava—tatou fanau. Mafaufau i isi mea uma tatou te fai, i le ala tatou te taulimaina ai o tatou taitoalua, e ono aafia tele ai amio a o tatou atalii. Afai e tausalaina le tama i le soona lafo o faamatalaga i lana soa pe sauaina foi, o le a le fiafia ona atalii ia te ia ona o lea mea, atonu foi o le a inoino ai ia te ia. Peitai, ua lava le mata’ituina, a latou matutua foi ma faaipoipo, latou te ono mulimuli foi i le mamanu lava lea e tasi o le faasaua ma fai faatautala o latou taitoalua. O lo o i ai le tulaga manaomia faanatinati i o tatou nuu mo ni tama e faaaloalo i a latou ava ma taulimaina faapelepele, ma le alofa i latou.
Talu ai nei lava sa ou faalogo ai i se tama o lau ma le le mafaufau lona toalua lalelei, ma le atamai fai mai e “valea” ma “gutu valea” i se tulaga e aupito i sili ona maasiasi ai, ona o si ona sasi laitiiti. Sa faalogologo i ai le fanau, ma sa maasiasi ma fefefe ona o si o latou Tina. Sa faalumaina o ia i luma o i latou sa sili ona alofa i ai. E ui lava ina sa avatu i ai se faamaualaloga ma se faamagaloga, ae ua tumau lava ona i ai le tiga ma le maasiasi i se taimi ua le magafagafa ai.
E le mafai ona faamoemoe e faamanuiaina o tatou olaga e le Agaga o le Alii, pe afai e faifai pea lo tatou ita, leai se lagona [alofa] ma agaleaga ia tatou paaga. E le mafai ona tatou faamoemoe e atinae e o tatou atalii le faaaloalo ma le agamalu i o latou tina, pe afai tatou te le avatu i ai faataitaiga e tatau ai. Na saunoa Peresitene Tavita O. Makei, “O le mea aupito taua e mafai e se tama ona fai mo lana fanau, o le alofa lea i lo latou tina” (sii mai le Theodore Hesburgh, Reader’s Digest, Ian. 1963, 25; in Richard Evans’ Quote Book [1971], 11). “Tama, o e ala?”
Lona tolu: Ia saunia ma tuu atu aoaiga tonu ma ia taitai ma le alofa. Ua tele naua taimi, ona o lo tatou le fiafia ma le vaivai, tatou te sii a’e ai o tatou lima e fasi a tatou fanau, ae e masani lava ona tatou faia ona o le taumafai e puipuia lo tatou lava faamaualuga manatu faapito. E manaomia e tamaiti taitasi ona aoao le amio. E le gata ina latou manaomia lea tulaga, ae latou te faamoemoe ia fai, latou te mananao foi i ai. O le aoaiga e maua ai le taitaiga ma aoao atu ai le amio pulea, ae o aoaiga uma lava e tatau ona i ai le lagona o le faamasinoga amiotonu ma le alofa mama.
A o ou tamaitiiti, sa tuu mai e lo’u Tina ua oti lana tane se aoaiga aupito matuia e tatau ai. Fai mai a ia, faatasi ma ona loimata, “La’u tama e, ua ou matua le fiafia tele ia te oe.” Sa le mafai ona ou tatalia le mafatia o lo’u loto. E le mafai ona ogaoga se tiga o ni ta se afe o se sasa [i lo’u tino]. Sa ou iloaina o lea ituaiga aoa’iga, e na o sona alofa mama lava e mafai ai ona fai mai ia te au, aua afai e i ai se mea sa ou mautinoa, o le alofa lea o lo’u tina mo au. Sa tonu ia te au, ou te le toe faatupuina lava se le fiafia ma se loto nutimomoia o se Tina ua pei se agelu. Ou te talitonu ua manuia lea a’u faaiuga.
A manatu i le aoaiina o le fanau, Tama, o e ala?
Tama, e matua taua tele le taulimaina lelei i o tatou olaga o luitau sa ou ta’ua, pe afai tatou te mananao e faatagata matutua o tatou atalii i le faaleagaga ma lagona. Afai tatou te faia, ona latou le maasiasi ai lea ia i tatou, ma o le a latou le maasiasi foi ia i latou lava. O le a avea i latou ma tagata o le mamalu, faaaloalo, e tutumu i le alofa, e naunau e auauna atu i le Faaola ma gauai atu o latou manao ia te Ia. Ona tatou olioli ai lea i le mea moni, o a tatou fanau e faavavau. O le a latou faapea mai, “Tama, o e ala?
Ma o le a tatou tali atu foi, “Ioe, lo’u atalii e, o lea ou te ala.”
I le suafa o Iesu Keriso, amene.