Ia Saoloto mai Avega Mamafa
E tatau lava ona e talitonu na ofoina mai e le Faaola Lona soifua ina ia mafai ai ona e faia suiga o loo manaomia i lou olaga, o suiga e maua ai le filemu.
E toatele outou o loo pagatia i le tauaveina o avega mamafa e aunoa ma se mafuaaga tatau aua tou te lo o tatalaina o outou loto i le mana faamalolo o le Alii. Talosia ia avea lenei savali, e uunaia ai outou ina ia outou lagonaina le uunaiga a le Agaga Paia e faia na suiga e mafai ai ona faasaolotoina ai outou mai avega lofituina. Sa folafola mai e le Faaola, “Ou te … faamama foi avega ua faaeeina i o outou tauau, ina ia … outou le lagona ai lava i o outou tua … ; ou te faia foi lenei mea … ia outou mautinoa lava o au o le Alii le Atua, ua asiasi atu i lo’u nuu i o latou puapuaga.”1 O le a ou tautala atu muamua ia te outou o lo o pagatia ona o a outou filifiliga sese, ona ou tuu atu ai lea o ni fautuaga mo outou ua mafatia ona o mea na fai e isi ia te outou.
Sa i ai se taimi sa nofo mai i luma o la’u kesi se alii loto faavauvau, ma lona ulu sa faagaugau ifo i lalo ma pupuni ai ona mata i ona lima, ma sa tagi masusu ona o taunuuga le maalofia o le solia soo o poloaiga a le Atua. Sa fai mai o ia ma le faanoanoa tele: “Ua ou le iloa le mea a fai. Ua mamafatu mea uma. Ua ou le lava solasola. Ua leai se filemu, leai se fiafia. A ou tatalo, e leai foi se isi e faalogo mai. O le a la le aoga?”
Ua leva ona ou iloaina o ia. Sa taumafai ona matua faapea foi ma nisi e avatu i ai se taiala, ae sa le faamanuiaina. Ona o ana lava filifiliga, o lea ua motusia mai ai i mea moni semanu e fesoasoani ai ia te ia. Na te le i atinaeina le faatuatua i le Matai po o le mana foi o le tatalo. O ana faaiuga sa faavae i mea e vave faamalie ai ona faanaunauga. Na te faagalogalo i faafitauli po o le talapepelo foi e uiga i ia mea. Sa ia faaaogaina le agalelei o matua ma uo e taumafai ai e faatopetope ai ona foia ona luitau. Na te le iloiloina aafiaga o lona olaga a taeao, ona o taunuuga o ana faaiuga i le aso.
A o lagona lo’u loto faanoanoa ona o ia, sa ou iloa ai e le o vaai atu o ia i le tulaga moni o i ai le lalolagi—o se nofoaga o le olioli ma le fiafia, o faigauo moni o lo o i ai le faatuatua ia Iesu Keriso ma le usiusitai i Ana aoaoga e valaaulia ai le Agaga Paia e uunaia ai faaiuga sao. O loo ola o ia i se siosiomaga ua pulea e faatosinaga a Satani. E le o mulimuli o ia i fautuaga poto aua e le mafai ona ia iloa i lona lalolagi, e mafai ona faamanuiaina o ia i lenei fautuaga poto. O lenei vaaiga faaluafesasi o le olaga o le mea moni lea ia te ia. O lenei vaaiga faaluafesasi na amatalia ina ua ia gauai atu o ia i tofotofoga poto a Satani pe a fai atu “Fai loa. Tago e tofo. E le iloa lava e se isi. O lou ola. Ola oe i le mea e te manao ai. E le mafai ona latou faamalosia oe. Ua i ai lava lau faitalia.”
O nei uunaiga ma se manao e fiailoa mea ua faasaina, na taitai atu ai o ia i se ala sa foliga e ese le manaia. Sa faasee mai i galu e faamalie ai ona manaoga ma tuinanau ma lona le iloaina o taunuuga seia oo ina tafia mai i le apitagalu ma utia ai i tulaga le maalofia o poloaiga a le Atua. O le mea lena ua afua ai le tiga, faanoanoa, ma le loto faavauvau. Ona saunia foi lea e Satani o se isi fautuaga: “E leai se auala e te toe foi ai. Ua sili ai lava le fai pea o le mea sa e faia. E leai se aoga e te taumafai ai e sui.” Ona o ana agasala, ua le mafai ai ona ia iloa atu se auala e sola ese mai ai i ona toilalo. Na te le iloaina ia meafaigaluega o lo o manaomia mo se olaga fou, i lona siosiomaga o loo i ai nei. O lona lalolagi saisaitia ma le matautia, sa foaina i le solia lea o tulafono o le faavavau, ia na afua mai i le manao i se faamaliega vave o le tuinanau.
Pe o e i ai i se tulaga faapena? Pe na e faia ni mea ua e moomoo nei maimau e pe ana e le faia? Pe faigata ea ia te oe ona e iloa se auala e foia ai ou faafitauli? Pe foliga mai ea e i ai lava se mea mamafa matuia tusa lava po o le a lou taumafai e taupunipuni? O le aafiaga o lagona malolosi po o faatosinaga, atonu e i ai ni taimi e foliga mai ua mapu. Ae a oo i taimi paganoa e masani ona oo mai e toe vaai faalemafaufau ai i ai, ona e iloaina ai lea e le o le olaga lea na e manao e te oo i ai. Atonu e te tomumu leotele ua tuulafoaiina oe e au uo e oo lava i le Alii, ae o taimi o le maninoa e te iloa ai o oe lava na e tuulafoaiina i latou. Se, faamolemole, fai nei loa lava lau faaiuga e toe sue lou ala e toe foi ai i le filemu faafouina ma le olioli lea e mafai ona suia ai fiafiaga faapasitaimi o le agasala, ma tiga ma le tuulafoaiina lea a mulimuli mai ai. Ua outou faamaonia mea o loo aoao mai e tusitusiga paia: “o le amioleaga e le o le fiafia lea.”2 Galue nei ia e mauaina le olioli tumau mai le ola ai lea i se olaga mama ma le tumu i faamoemoega.3
Ou te iloa e mafai ona e sola ese mai faatosinaga faafoe a le tiapolo, ma filifili o le agasala ua noatia ai lou olaga. O lena fesoasoani e manaomia ai lou taliaina o se vaifofo atonu e matua ese lava mai ou aafiaga faaletagata o i ai i le taimi nei. O le a manaomia ai oe e te faaaogaina le faatuatua i se Tama o i le Lagi e alofa ia te oe. Atonu e te le malamalama nei i ai, ae e tatau lava ona e talitonu na ofoina mai e le Faaola Lona soifua ina ia mafai ai ona e faia suiga o loo manaomia i lou olaga. O suiga e maua ai le filemu ma le manuia na e foliga mai i taimi uma e le mafai ona e mauaina. Ia e talitonu e mafai ona e faatoilaloina le siosiomaga faavauvau o loo e ola ai, e ala lea i lou talitonu e i ai se isi auala e sili atu ona lelei. E tatau ona e sailia le fesoasoani mai i isi tagata o e malamalama ma ola ai i lena ala e sili atu, tusa lava pe le o mafai ona e vaai atu nei i ai. O le a manaomia ai i lea tulaga lou aoao ma usitai i aoaoga a le Alii. O le taimi lava e te tautino atu ai atoatoa e faia lena suiga, o le a e iloa ai e le faigata e pei ona foliga mai ai i le taimi nei.
O taunuuga tiga o le agasala, na tuu lava i ai i le fuafuaga o le fiafia e se Tama agaalofa o i le Lagi, ina ia aua ai nei e mulimuli i lena ala matautia i le olaga. O le tagata agasala e le gata ina pagatia ai i lenei olaga, ae o agasala foi e lei faamagaloina e ala i le salamo moni o le a mafua ai ona mafatia i le isi itu o le veli.4
O loo taumafai Satani e faatalitonu i tatou, e mafai ona nana le agasala mai isi, ae o ia lava lea e faamatua’ia le faaalia o agasala i tulaga e sili atu ona faamaasiasi ai. O lona faamoemoega o le faapologaina lea o fanau a le Atua. O ana faaosoosoga faatosina mananaia uma, o le faamoemoega lava o le faataumaoiina lea o tagata taitoatasi. O le mea moni, e tatau lava ia i tatou uma taitoatasi ona salamo e le aunoa ma usiusitai ina ia mafai e le meaalofa a le Faaola ona faamalie iuga o le faamasinoga, aua e oo lava nai sese laiti o mea sese na tatou faia po o le le faia foi o mea sa tatau ona fai.
O le a tauaveina e le Faaola i Ona lava luga taunuuga o au agasala pe afai e te salamo nei loa. Afai e te le salamo nei, o le a e mafatia ai lava oe.
Talanoa i lou epikopo. O le a ia faaali atu ia te oe pe faapefea ona salamo ma o le a fesoasoani foi ia te oe ia fai. A o e tatalo ma faatino, o le a taitaiina atu oe i isi o le a lagolagoina oe.5 O le salamo o se faagasologa o le faamamaina. E faigata, ae e i ai lona iuga, o se iuga viia e i ai le filemu ma le faamagaloga faafouina ma le vavega o se amataga fou. O le tautau atu o amioga sese, o se laasaga taua lea ae e le o se salamo atoatoa lea. O le a faamatala atu auiliili e lou epikopo le mea e tatau ona e faia. O le a ou ta’ua ni vaega se lua o le salamo e aumaia ai le mana faamalolo. O le tasi o lo o maua lea i le fetalaiga lea a le Matai:
“Aua o au o le Alii e le mafai ona vaai atu i le agasala ma faatagaina ai sina mea itiiti lava;
Ae ui i lea, o le salamo ma faia poloaiga a le Alii o le a faamagaloina.”6
O loo faamamafa mai e le mau e le mafai e le Alii ona faatagaina le agasala, peitai, Na te faamagaloina le tagata agasala ua salamo ona o Lona alofa atoatoa. O loo aoao mai ai foi e le gata ina taua le tausia o se poloaiga sa e solia, ae o le usitai i poloaiga uma, o le a e maua ai le mana faaopoopo ma le lagolagoina o le faagasologa o lou salamo.
O le isi vaega taua o le salamo o le iloaina lea o le matafaioi a le Faaola e ala i Lana Togiola. E moni, o le Togiola lena ua mafai ai ona salamo. Pe a e tatalo ma manatunatu loloto i le matafaioi a Iesu Keriso o lou Faaola ma le Togiola, o le a e maua ai le uunaiga tele ma le faamalosiauga e fesoasoani ai ia e salamo. Mulimuli i le faataitaiga lenei a Alema:
“Ua … i ai au i le tiga matua tele lava ma le puapuaga o le agaga; na ou le maua foi le faamagaloina o au agasala, seia uma ona ou tagi atu i le Alii o Iesu Keriso i le alofa. Ae peitai, faauta, na ou tagi atu ia te ia, ona ou maua ai lea o le filemu i lo’u agaga.
“ … Ua ou tuuina atu lenei mea ia te oe ina ia e aoao i le poto, ina ia ou aoaoina atu ia te oe e leai se tasi ala, po o se tasi mea e mafai ona faaolaina ai tagata, ua na o Keriso lava. Faauta, o ia o le ola ma le malamalama o le lalolagi.”7
O le a e maua le fesoasoani i lou suesue lea i le faamatalaga maoae o le tulaga manaomia o le salamo, ma pe mafai faapefea foi ona maua e pei ona apoapoai atu Alema i lona atalii fai agasala o Korianetona i le Tusi a Mamona.8 O le talitonu i le ala sili o le fiafia ma le gafatia e le Faaola ona faataunuu o Ana folafolaga, e mafai ai ona aveesea le pogisa o le agasala ma toe faafoi atu ia te oe le olioli i se olaga agavaa, faatasi ai ma le talitonuina o oe e i latou e pele ia te oe, pe afai na faia i le ala o le Alii. Aua nei tuua’ia isi i au mea sese. Ia e salamo ma le lotomaualalo, aua ua tusia, “E avae o ia e ia lava e fai ma taulaga ona o agasala, e faatoatoa ai iuga o le tulafono ia te i latou uma o e o i ai i le loto momomo ma le agaga salamo, ae leai se tasi e mafai ona faaatoatoaina ai iuga o le tulafono.”9 Faamolemole, fai sau faaiuga e te salamo, nei loa.
Atonu o loo e tauaveina se avega mamafa o ni lagona ua faamanualia e se tasi na tauga lona faatausuai ia te oe. O lau tali atu foi i lena faatausuai, atonu na le manino ai lou mafaufau ma ua e lagona ai ua tatau lava ona e faatalitali i lena tagata e faatoese mai ina ia uma ai lou tiga. Sa faamalamalama e le Faaola e le o le auala lea, ina ua Ia poloai mai:
“Aua o le le faamagalo atu i lona uso i ana solitulafono ua ta’usalaina i luma o le Alii; aua e i ai pea ia te ia le agasala sili ona mamafa.
“O Au le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.”10
Aua e te saga tauaveina le avega o le faatausuai. Ole atu ma le faamaoni mo se faamagaloga mai le na faatausuai ia te oe, tusa lava pe e te manatu e leai sau mea sese na fai. O lena taumafaiga o le a mautinoa ai lou maua o le filemu, ma e ono amatalia ai le faamalologa o se le femalamalamaa’i matuia.
Afai o e saoloto mai se agasala matuia, aua nei e pologa fua i taunuuga o agasala a se isi tagata. O le avea ma se ava, tane, matua po o se tasi e pele, e mafai ona e lagonaina le alofa mo se tasi ua i ai i le au ‘ona ma le ta’ui o le agasala. Peitai, e le tatau ona e tauaveina i ou lava luga se lagona faapea e i ai sau feau i na amioga. A uma ona e faia o mea e tatau ona fai e fesoasoani ai i le ua e alofa i ai, ona e tuu atu lea o le avega i aao o le Faaola. Ua Ia valaaulia oe e te faia lena mea, ina ia mafai ona e saoloto mai le popole fua ma le loto mafatia.11 A e faia lenei mea, e le gata ina e maua le filemu ae o le a e faatinoina foi lou faatuatua i le mana o le Faaola, e sii ese mai ai le avega o agasala mai se e pele ia te oe, e ala lea i le salamo ma le usiusitai.
O outou na ua ma’ila’ila o outou lagona ona o le agasala mataga o le faasaua po o le fai faatautala. O le faasaua po o le fai faatautala faalemafaufau, faaletino, po o le faale-feusuai, e mafai ona afua mai ai ni taunuuga tumau sei vagana ua faamaloloina e le Alii. E mafai ona aofia ai le fefe, loto mafatia, inoino ia te oe lava, ma se faateleina o le le talitonuina e isi, ma avea ai ma papupuni o le faamalologa. O lou sauaina po o le faia faatautala o oe ona o se osofaiga le tonu o lou saolotoga ae e te le manao ai. O le faamasinoga tonu, ua saunia ai e le Alii se ala mo oe e faatoilaloina ai taunuuga faataumaoi o le sauaina. O lena fesoasoani e mafai ona amata mai i fautuaga a matua, o taitai o le perisitua, ma pe afai foi e manaomia, le fesoasoani a tagata po o faufautua agavaa faapitoa. Peitai, e le tuli ina fautuaina oe i lou olaga atoa. O le faamalologa atoa lava ia e ala mai i lou faatuatua ia Iesu Keriso ma Lona mana ma le matafaioi, e ala i Lana Togiola, e faamaloloina ai manua o le sauaina fua ae le tatau ai. Atonu o le a faigata ia te oe ona talitonu i ai ona o ou lagona o i ai i le taimi nei. Ua ou molimauina le ala na faamaloloina ai e le Faaola ni tulaga sauaina mataga faapena. Mafaufau i le mana o le Togiola.12 Tatalo ia malamalama pe mafai faapefea ona faamaloloina oe.13 Saili le fesoasoani mai lou epikopo ina ia mafai ai e le Alii ona faasaoloto oe mai se avega e te le i matua’ia.
O le faaiuga, [o la’u tautalaga], afai ua uunaia oe ia e saoloto mai avega na matua’ia e oe lava ia po o isi foi, o na uunaiga o se valaaulia mai le Togiola. Ia faia nei loa lava. E alofa o Ia ia te oe. Na Ia ofoina mai Lona soifua, ina ia faasaolotoina oe mai avega e le tatau ai. O le a fesoasoani o Ia ia te oe e faataunuuina. Ou te iloa o loo ia te Ia le mana e faamalolo ai oe. Amata nei loa. I le suafa o Iesu Keriso, amene.