Susan Winder Tanner
Peresitene Aoao o Tamaitai Talavou

Ona o lea sa auauna atu e le gata i le Peraimeri i le uarota ma le siteki, o Tamaitai Talavou, ma le Aualofa, o lea ua silafia ai e Susan W. Tanner e i ai se sootaga o nei faalapotopotoga.

“E aoao e teineiti le ‘O Au o se afafine o le Atua.’ Ma o le tulaga lena e taitai atu ai i latou i le ‘O i matou o afafine o lo matou Tama Faalelagi, e alofa ia i matou, ma e matou te alolofa foi ia te Ia.’ Ona tatou oo mai ai lea i le ‘E le uma le alofa,’ ma e tatou te lagona ai ua aui i tatou i le alofa,” o lana saunoaga lea. “Ou te manatu o loo i ai le lotogatasi atoatoa i laasaga taitasi, faatasi ai ma se malamalama faateleina ma le tulaga tatou te gafatia ai a o tatou tuputupu ae.”

O le avea ai ma peresitene aoao faatoa tofia mo Tamaitai Talavou, o lea ua uunaia ai Tuafafine Tanner o le a fesoasoani atu i tamaitai talavou ia malamalama i lo latou tulaga i le fuafuaga a le Tama Faalelagi.

Na soifua mai o ia i le aso 10 o Ianuari 1953 i Granger, i Iuta, i ona matua o Richard W. ma Barbara Woodhead Winder, ma sa soifua ae Tuafafine Tanner i se faatoaga tele o lafumanu. Sa maua mulimuli ane lona faailoga i mataupu tau i le tagata soifua mai le Iunivesite o Polika Iaga, lea na la feiloai ai ma John S. Tanner. Sa faaipoipoina i laua i le Malumalu o Sate Leki i le aso 3 o Setema, 1974. Na avea ai lea o Tuafafine Tanner ma tausiaiga ma faiaoga ta piano. Sa nonofo le aiga o Tanner i Provo, Iuta, ma e toalima o la’ua alo ma a latou fanau e toatolu.

A o nonofo lo latou aiga i Pasila, i le mea sa faiaoga ai lona toalua i le polokalama a le Iunaite Setete e faaauau ai aoga a o latou tagatanuu i isi nofoaga, sa maua ai e Tuafafine Tanner se malamalamaaga i le polokalama a Tamaitai Talavou. Sa aoao e lana fanau teine matutua e toalua le autu a Tamaitai Talavou i le faa-Potukale. “Sa ou manao matou te aoaoina faatasi ma i la’ua,” o lana tala lea. “Ina ua ou taumafai e tauloto le autu, sa matua oo ifo i lo’u loto le savali. O au o se afafine o le Tama Faalelagi, ma e alofa o Ia ia te au. Ma talu ai ua ou iloa lenei mea, ua ou alofa lava ia te Ia ma ou manao e faaali atu e ala i a’u taga ou te alofa ia te Ia.

“O loo i ai tonu iina i le autu a Tamaitai Talavou le savali i lona faasologa tatau,” na ia toe saunoa ai. “Ou te manao i tamaitai talavou o le Ekalesia ina ia latou iloa e mafai ona avea lena ma faavae o a latou molimau, o a latou taga, ma o latou olaga.”