Ou Te Alu i Mea E Te Tofia
O le atoatoaga o [lo tatou] liuaina i alii ma tamaitai o le Atua e tupu i a tatou galuega e faia i totonu o Lona tovine
O la’u lauga e aumai mai se viiga lea na musuia ai ia auauna faamaoni a le Alii mo le tele o augatupulaga:
Atonu e le o mauga
Po o vasa sousou naua,
Atonu e le o taua fita
Ua manaomia a’u e le Atua.
Ae a Ia tofia o a’u nei
I mea ou te le iloa,
Ou te talia le Alii e ma le fiafia:
O le mea ua e tofia.
(“Ou te Alu i Mea E te Tofia,” Viiga, nu. 169)
Na tusia e se tamaitai tusisolo e le o se Au Paia o Aso e Gata Ai, o nei upu o loo faaalia ai le tautinoga a fanau faamaoni a le Atua i augatupulaga uma.
O Aperaamo, o le na taitaiina atu ia Isaako i lena faigamalaga faaootia loto i le Mauga o Moria, sa faamaoni e alu i le mea na finagalo le Alii e alu i ai (tagai Kenese 22). E faapea foi ia Tavita ina ua ia tu atu i luma o ‘au a Isaraelu e tali atu i le luitau a le sauai o Koliata (tagai 1 Samuelu 17). O Eseta, na musuia foi e laveaiina ona tagata, sa savali i se ala o le oti ina ia luitauina le tupu i ona lotoa i totonu (Eseta 4–5). “Ou te Alu i Mea E te Tofia ai A’u le Alii e” o le uunaiiga lea mo Liae ina ia tuua ia Ierusalema (tagai 1 Nifae 2), faapea foi i lona atalii o Nifae, ina ia toe foi atu e aumai ia faamaumauga taua (tagai i le 1 Nifae 3). E faitau selau isi faataitaiga mai tusitusiga paia e mafai ona tagatagai i ai.
O nei agaga faamaoni uma sa latou faaalia le usiusitai i le poloaiga a le Alii ma lo latou faatuatua i Lona mana ma Lona agalelei. E pei ona faamatalaina e Nifae, “Ou te alu atu ma faia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou” (1 Nifae 3:7).
E soo se vaipanoa o i tatou uma, faapea o tatou manatunatuga o uluai taimi, ua tatou maua ai ia faataitaiga musuia o le auaunaga usiusitai ma le faamaoni a le Au Paia o Aso e Gata Ai. O se tasi o auaunaga sili ona lauiloa o Peresitene J. Reuben Clark. Ina ua mavae le silia ma le 16 tausaga o avea ai ma se fesoasoani muamua maoae, sa toe faatulagaina ai le Au Peresitene Sili ma sa valaauina ai loa o ia e avea ma fesoasoani lua. I le tuuina atu o se faataitaiga o le lotomaualalo ma le naunautai e auauna atu lea na aafia ai ia augatupulaga, na ia saunoa atu ai i le Ekalesia: “O le galuega a le Atua, e le taua po o fea e te galue ai, ae taua le auala e te auauna atu ai. O le Ekalesia a Iesu Keriso o le Au Paia o Aso e Gata Ai, e galue le tagata i le mea e tofia i ai, o lea foi tulaga e le sailia e se tasi pe teena foi” (i le Conference Report, Ape. 1951, 154).
E faapea foi lona taua, e ui lava e le o masani ona vaaia ma le faalogoina, ia le fia miliona o tagata o le Ekalesia o e o loo galulue nei ma lea lava foi faatuatua ma le naunautai i nofoaga taumamao o le tovine a le Alii. O a tatou faifeautalai matutua faamaoni o loo maua mai ai nisi o faataitaiga sili ua ou iloa.
Talu ai nei lava sa ou iloiloina ai ia ni pepa a faifeautalai e silia ma le limasefulu o ni ulugalii matutua. O nei ulugalii uma ua uma ona ave ni a latou misiona a le itiiti ifo po o le faatolu ina ua latou tauaaoina a latou pepa mo se isi valaauga. O o latou fale e mai soo se mea mai Ausetalia i Arisona, po o Kalefonia i Misuri. O o latou tausaga e mai le 60 ma le 70 e oo atu lava i le—ia e leai se afaina. O se tasi ulugalii, o e ua ofoina mai i laua lava mo se misiona lona fitu, ua uma ona auauna atu i le Lotoa o le Malumalu, i Alaska, i Niu Sila, i Kenya, ma Ghana. Sa auina atu i foi i laua i Filipaina. E tele faataitaiga faapea e mafai ona faamatalaina atu.
O finagalo faaalia o taitai perisitua i luga o pepa o misiona a nei ulugalii o ni molimau ia o le auauna atu ma le ositaulaga. Ou te sii maia nisi o ia manatu:
“Naunau e alu i soo se mea, e faia soo se mea i soo se umi e moomia.”
“O faataitaiga sili [nei] o tagata o le Ekalesia o e ua tuuina atu o latou ola i le Alii.”
“O le a o atu i soo se mea e finagalo le Alii [ma] te o i ai,” na tusia e se isi ulugalii. “Ma te tatalo ina ia auina atu i ma’ua i le mea o loo moomia ai i ma’ua.”
O finagalo faaalia o taitai perisitua e faatatau i tulaga agavaa o nei ulugalii ua maua ai ma se aotelega o le galuega o loo faia lelei e a tatou faifeautalai matutua.
“E lelei tele o ia i le amataina ma le faatinoina o polokalama ma le taitaiga.”
“E faatumuina i le olioli i la’ua pe a talosagaina e ‘fausia’ ma atinae, o lea atonu e talafeagai ai so la tofiga i se eria tau atiae o le ekalesia. E naunau e auauna atu i soo se vaega e valaauina ai.”
“O le a sili atu ona aoga lo la galulue faatasi ma [tagata e le toaaga] ma tagata liliu mai nai lo totonu o ofisa.”
“E alolofa i le autalavou ma o loo i ai se meaalofa ia i laua.”
“La te lagonaina le lelei o le la galulue ma e fiafia foi e tuuina atu aoaoga faaletaitai ma galuega faaaumea.”
“E le malosi pe televave i le faaletino, ae le faapena la i le tulaga faaleagaga po o le galuega faafaifeautalai.”
“O ia moni lava o se faifeautalai. O lona igoa muamua o Nifae ma e pei foi ona uiga o le tagata o loo igoa ai. O ia o se tamaitai tulaga ese, e avea pea lava ma se faataitaiga lelei. O le a faia soo se mea e valaauina ai. O le la misiona lona lima lenei.” (Sa la auauna atu muamua i Guam, Nigeria, Vietname, Pakistana ma Sigapoa, ma Meleisia. I le tuuina atu ia i laua o sina malologa mai na nofoaga faigata sa auauna atu ai, sa valaauina ai lena ulugalii e auauna a le Alii e galulue i le Malumalu o Navu.)
O se isi ulugalii na saunoa mo nei toa manumanu ina ua la tusia: “O le a o i soo se mea ma faia soo se mea e talosagaina ai. E le o se osigataulaga, ae o se avanoa.”
O nei faifeautalai matutua ua tuuina atu se aofaiga faapitoa o le osigataulaga ma le tautinoga. E faapea foi i a tatou peresitene o misiona ma peresitene o malumalu ma a latou soa faamaoni. Ua tuua uma o latou fale ma aiga ina ia auauna atu i le taimi atoa. E faapea foi ona faamaonia i le autau o faifeautalai talavou, o e na tolopoina nisi mea o le olaga ae faatofa atu i le aiga ma uo ma auina atu (e masani lava i a latou lava tupe) e auauna atu i soo se mea e tofiaina ai e le Alii e ala mai i Ana auauna.
Ou te alu i mea e te tofia, le Alii e,
Po o mauga, toafa, vasa,
Au afioga ou te alaga,
Avea a’u pei na e tofia.
(Viiga, nu. 169)
E faitau miliona isi o loo auauna mai o latou fale i le ofoina atu o o latou taimi e auauna atu ai. E faapea foi i au epikopo e 26,000 ma au peresitene o paranesi ma au peresitene faamaoni o korama ma le Aualofa, Peraimeri ma Tamaitai Talavou o e o loo auauna atu faatasi ma i latou i lalo o le latou taitaiga. E faapea foi i le fia miliona o isi—o faiaoga faamaoni i uarota, paranesi, siteki, ma itu. Ma mafaufau i le fia selau afe o faiaoga o aiga ma faiaoga asiasi o e o loo faataunuuina le poloaiga a le Alii ina ia “leoleo pea i le ekalesia, ma le faatasi ai ma le faamalosia o i latou” (MFF 20:53). O i latou uma nei e mafai ona aofia ai faatasi i lenei fuaiupu musuia:
A i ai ni upu alofa
Iesu ou te tautala;
I se tasi ua se mai le ala
O ia ou te sailia.
Le Faaola e, ia taitai mai,
I le ala fita, pogisa,
O lau savali ou te alaga:
Ou te fai au afioga.
(Viiga, nu. 169)
E pei ona aoao mai e le perofeta-tupu o Peniamina, “Pe a i ai i [tatou] i le galuega a o [tatou] uso ua na ona i ai i [tatou] i le galuega a lo [tatou] Atua” (Mosaea 2:17). Na ia lapataiina foi i tatou ina ia “faia nei mea uma i le poto ma le auauai lelei, aua e le tatau ona momoe vave le tagata ia silia le malosi ua ia te ia” (Mosaea 4:27).
E luitauina i tatou e le talalelei a Iesu Keriso ina ia tatou liua ai. E aoaoina ai i tatou i mea e tatau ona tatou faia ma maua ai avanoa tatou te oo atu ai i le mea o loo finagalo lo tatou Tama Faalelagi ia tatou oo i ai. O le atoatoaga o [lo tatou] liuaina i alii ma tamaitai o le Atua e tupu i a tatou galuega e faia i totonu o Lona tovine.
O loo i ai sa tatou aganuu maoae o le auauna atu ma le le manatu faapito i totonu O le Ekalesia a Iesu Keriso o le Au Paia o Aso e Gata Ai. E mautinoa lava, o se tasi o uiga tulaga ese o lenei Ekalesia o le leai lea o ni a tatou faifeau faapolofesa pe totogiina i totonu o a tatou faapotopotoga e fia afe i totonu o risone o siteki, itu, ma misiona o loo vaavaaia i latou. O se vaega taua o le fuafuaga a le Atua mo Lana fanau, o le taitaiga ma le galuega a le Ekalesia e faatinoina lea e Lana fanau o e o loo ofoina atu o latou taimi mo le galuega a le Atua ma o latou uso a tagata. Latou te usiusitai i le poloaiga a le Alii ina ia alolofa ia te Ia ma auauna atu ia te Ia (tagai Ioane 14:15; MFF 20:19, 42:29, 59:5). O le auala lenei e saunia ai alii ma tamaitai mo le faamanuiaga faatumutumuina o le ola faavavau.
Ae, o loo i ai lava se avanoa e faaleleia atili ai a latou tautinoga. Pe a ou fesili atu i peresitene o siteki mo ni fautuaga i ni mataupu e tatau ona ou tautalagia i konafesi a siteki, e masani ona ou faalogo e uiga i tagata o e teenaina ia tofiga o le ekalesia po o le taliaina foi o tofiga ae toilalo e faataunuu o latou tiutetauave. O nisi e le o naunautai ma faamaoni. O le mea lava lena e i ai. Ae o lenei mea e le mafai ona le aunoa ma ni taunuuga.
Na fetalai le Faaola i le eseesega o le va o le faamaoni ma le le faamaoni i faataoto maoae e tolu o loo tusia i totonu o le mataupu e 25 o le Mataio. O le ‘afa o malo na valaaulia na taofia i fafo mai le tausamaaga o le faaipoipoga ona e le’i saunia i latou ina ua taunuu atu le faatoafaiava (tagai Mataio 25:14–30). O le auauna le aoga o le na le galueaina ia taleni na tuuina atu ia te ia e le Matai na le faatagaina ona ulufale atu i le fiafia o le Alii (Mataio 25:1–13). Ma ina ua afio mai le Alii i Lona mamalu, na Ia tuueseeseina ai ia mamoe o e na auauna atu ia te ia ma o latou uso a tagata mai oti, o e le’i auauna atu. E na o i latou o e na “faia i le tasi e aupito itiiti o o’u uso nei” (Mataio 25:40) o e o loo i Lona itu taumatau o le a fai mo latou tofi le malo ua saunia a o le’i faavaeina le lalolagi (tagai Mataio 25:31–46).
O’u uso e ma tuafafine, afai e le o atoatoa lau tautinoga po o lou naunau atu, faamolemole ia e mafaufau pe o ai lea e te musu e te auauna i ai, pe faatuatuanai foi i ai, pe a e teena se valaauga pe e te taliaina foi, folafola atu i ai, ma e le faataunuuina. Ou te tatalo ina ia tatou mulimuli uma i lenei folafolaga musuia:
E i ai se mea o i lalo nei
O le lalolagi tele naua
Ou te galue ai i lalo nei
Mo Iesu le Faaola.
(Viiga, nu. 169)
Na faaali mai e Iesu le ala. E ui lava sa Ia inu i le ipu sili ona oona lea na tau atu ai i Ketesemane ma Kalevario (tagai MFF 19:18), ae na Ia usiusitai lava i le Tama, “Ae aua le faia lo’u loto a o lou finagalo” (Luka 22:42).
Na Ia muai aoaoina mai:
“Ai se tasi e fia mulimuli mai ia te au, aua ne’i usiusitai o ia ia te ia, a ia ave e ia lona satauro, i le mulimuli mai ai ia te au.
“Aua ai se fia faasaogalemuina lona ola, e maumau ai ia te ia: a o le faamaumau lona ola ona o a’u, e maua ai e ia.
“Aua se a le aoga i le tagata pe afai na te maua le lalolagi uma, ae maumau lona ola? Se a foi se mea e avatu e le tagata e togiola a’i lona ola?” (Mataio 16:24–26).
E moomia ona tatou manatua le faamoemoega o lo tatou auauna atu i isi. Afai e na o le faataunuuina ai o sina vaega o Lana galuega, e mafai lava e le Atua ona auina mai “agelu e tele,” e pei ona aoao atu ai e Iesu i se tasi taimi (tagai Mataio 26:53). Ae o le a le ausia ai le faamoemoega o le auaunaga na Ia faamatalaina. Tatou te auauna atu i le Atua ma o tatou uso a tagata ina ia avea ai e faapei o fanau o e mafai ona toe foi atu e mau faatasi ma o tatou matua faalelagi.
Ou te faamoemoe ia te oe ma lou,
Alofa mai ia te au,
Lou finagalo e fai ma lo’u loto:
Ou te usitai ia te oe.
(Viiga, nu. 169)
Pe tusa o le sefulu tausaga talu ai, sa ou faitau ai i se tusi mai se faifeautalai ua maea lana misiona o le sa faamatalaina lenei tulaga o le matuai liua i le auauna atu i le Alii i lona olaga. Sa ia tusi atu e faafetai ia i latou o e na taitaia lana galuega faafaifeautalai “mo le manatunatu e auina atu a’u i le mea na moomia ai e le Alii nai lo le mea na foliga mai ia te a’u ua talafeagai.” Na sau o ia, o lana tala lea, “mai se tulaga faasausili, e faatautava po o ai e sili le atamai.” A o le’i faia sana misiona sa aoga o ia i se tasi o iunivesite maualuga i le itu i sasae o le Iuneite Setete. Fai mai o ia:
“Ou te matea o se lagona o se mea e tatau ona faia ma lou manao ia aua ne’i suia mai le tulaga o loo i ai, sa ou faatumuina ai a’u pepa o le [misiona] ma auina atu i totonu, ma sa ou matuai makaina ai ma le faaeteete le koluma o loo faailoa atu ai le matua manao e auauna atu i se isi atunuu ma se gagana e ese mai ai. Sa ou matuai faaeteete ina ia faailoa atu ai o a’u o se tamaitiiti aoga o le gagana faaRusia ma e matuai gafatiaina le lua tausaga e talai ai i tagata Rusia. Sa ou mautinoa e leai se komiti e teenaina ni tulaga agavaa faapea, sa ou faatali ma le mautinoa o le a ou fiafia i le matagofie o le maitauina foi o se isi aganuu.”
Na te’i o ia ina ua maua se valaauga e auauna atu ai i se misiona i totonu o le Iunaite Setete. E leai ma se mea na te iloa e uiga i le setete o le a ia auauna atu ai, se’i vagana ai o totonu o lona lava atunuu e tautatala faaIgilisi nai lo le alu atu i fafo e tautala ai i le gagana sa ia aoaoina, ma sa ia faapea mai, “O tagata o le a matou galulue atonu o le a matuai valelea lava.” Sa faaauau lana tala, “Na toetoe lava a ou teenaina le valaauga, ma ou lagonaina e sili atu ai ona faamalieina au pe a tusia lo’u igoa i Pisikoa po o se isi mea.”
Ae o le mea e lelei ai, na maua e lenei alii talavou le lototele ma le faatuatua e talia ai le valaauga ma mulimuli i le taitaiga ma le fautuaga a lona peresitene lelei o le misiona. Ona amata loa lea o le vavega o le alualu i luma faaleagaga. Na ia faamatalaina faapenei:
“Ina ua amata ona auauna atu i tagata le aoaoina o [lenei setete], sa ou matuai tauivi mo ni nai masina, ae na iu lava ina ua amata e galuega lelei a le agaga ona soloia i lalo ia papuipui o le faamaualuga ma le le talitonu lea sa matuai afifiina ai i latou i lo’u agaga. Na amataina se vavega o le liuaina ia Keriso. O le lagona o le moni o le Atua ma le faavavau o le usoga faauso o alii uma na amata ona faateteleina le malosi mai i lo’u mafaufau fesouaiina.”
Sa le’i faigofie, na ia tautino mai ai, ae o aafiaga a lana peresitene o le misiona faatasi ma lona alofa ua tupu mo tagata na ia auauna atu i ai, na mafai ai ona tupu.
“O lo’u manao e alofa ma auauna atu i tagata o e na ou manatu i ai o ni a’u uo, ma e toetoe lava o nisi e matuai taua lava ia te a’u, sa faatupulaia le faamalosia. Sa ou aoaoina ai le lotomaualalo mo le uluai taimi i lo’u olaga; sa ou aoaoina ai le uiga o le faia o a tatou faaiuga i tagata [e aunoa ma le faalagolago i] ni mea taua o le olaga. Sa amata ona ou faalogoina le tupu a’e i totonu o lo’u loto o se alofa i agaga o tagata ia na matou o mai faatasi iinei i le lalolagi” (tusi i le Au Pulega Aoao, Fep. 1994).
E faapena le vavega o le auauna atu. E pei ona tusia e le tamaitai tusisolo:
Ae a Ia tofia o a’u nei
I mea ou te leiloa,
Ou te talia le Alii e ma le fiafia:
O le mea ua e tofia.
(Viiga, nu. 169)
Ou te molimau atu ia Iesu Keriso, o le o loo faailoilo mai ia i tatou Lona ala ma Lana galuega, ma tatalo ina ia tatou maua le faatuatua ma le tautinoga e mulimuli ai i le mana ina ia avea ai faapei o le mea o Ia finagalo i ai, i le suafa o Iesu Keriso, amene.