E Iloga Ea e Maua e Ia le Faatuatua i le Lalolagi?
E faatoa mafai ona tatou maua le mana e maua ai faamanuiaga o loo tatou sailia pe a ogatasi lo tatou faatuatua ma le finagalo o lo tatou Tama Faalelagi.
O se usuga matagofie tele lea o le pese maoae, “Se Tagata Mativa Faanoanoa,” ma o le pese foi lea sa faananau i ai le Perofeta o Iosefa ma lona uso o Ailama. E maeu le matagofie o le lagiina e le aufaipese ma le faaili.
Ou te tatalo ia ou maua le Agaga o le Alii e pei ona i ai i lenei konafesi, ina ia mafai ai ona ou tautala atu i mea o le a aoga i tagata o le Ekalesia ma i latou e le auai i le ekalesia. Ua ou lagonaina lava lo’u lotomaualalo i lenei tofiga ua tuuina mai.
O le aso ou te tuuina atu ai se fesili na tuuina mai e le Faaola i le toeitiiti 2,000 tausaga talu ai: “Pe a sau le Atalii o le tagata, e iloga ea e maua e ia le faatuatua i le lalolagi?”1
Uluai Mataupu Faavae o le Talalelei
O le a le faatuatua moni? O le faatuatua ua faauigaina “o le talitonuga ma le faalagolago ma le faamaoni i le Atua; … o le talitonu maumaututu lea i se mea e leai se faamaoniga.”2 Matou te talitonu o le “faatuatua o le faamoemoe lea i mea e le o vaaia, a ua moni ia … , ma e tatau ona faavae ia Iesu Keriso. O le mea moni lava, tatou te talitonu o le “faatuatua ia Iesu Keriso o le uluai mataupu faavae lea o le talalelei.”3
O le Faatuatua o se Tina ua Oti Lana Tane
E i ai i latou e mafai ona aoaoina i tatou e faatatau i le faatuatua pe afai tatou te tatalaina o tatou loto ma mafaufau. O se tagata faapea o se fafine lea na maliu lana tane. Sa tuua na o ia e tausia lana tama, sa ia taumafai e sailia ni auala e tausia ai o ia, ae sa ola o ia i se vaitaimi o le tetele o le oge. Sa tau leai ni meaai ma e toatele na fano ona o le fia aai.
Ina ua tau uma atu meaai sa maua, sa faapena foi ma se avanoa e ola ai lenei fafine. O aso uma lava, sa vaavaai atu ai o ia ma le faanoanoa a o faasolosolo ina uma atu nai meaai sa ia te ia.
Sa faamoemoe mo se faaolatotoga, ae sa siliga tali i seu, sa iloa e le fafine ua oo mai le aso ua toe tasi ai lava se aiga e maua i meaai o loo totoe.
O le taimi lea sa oo atu ai se tagata ese ma tuuina atu se talosaga i se mea e le mafai i se tagata ona ole atu ai i se taimi faapea. “Se’i aumai,” sa ia fai atu ai ia te ia, “se fasi areto.”
Sa faliu atu le fafine i le tagata lea ma faapea atu, “O loo soifua Ieova lou Atua, e leai se potoi areto ia te au, ua na o le luutaga o falaoa i le kate, ma sina suauu itiiti i le fagu.” Sa ia ta’u atu i lea tagata o loo alu o ia e tunu e saunia ai le la meaai mulimuli ma lana tama, “ma te aai ai, ona ma oti lea.”
Na te leiloa o le tagata o loo i ona luma o le Perofeta o Elia, na auina atu e le Alii. O le mea na sosoo ai na tauina atu e le perofeta i le fafine atonu o se mea e maofa ai i latou i aso nei o e le malamalama i le mataupu faavae o le faatuatua.
“Aua e te fefe,” sa ia faapea atu ai ia te ia, “ae muamua ona e fai se potoi areto itiiti ma a’u, ma aumai ai ia te au; e mulimuli ane ona e faia lea ma oulua ma lau tama.”
Mata e mafai ona e vaai faalemafaufau i ni ona mafaufauga atonu sa i ai? O le a se lagona na oo ia te ia? Sa le maua se taimi e tali atu ai o ia ae faaauau le tala a le tagata ese lea. “Aua ua faapea ona fetalai mai o Ieova le Atua o Isaraelu, E le uma le kate falaoa, e le faaitiitia le suauu i le fagu, seia oo i le aso e foaiina mai ai e Ieova le ua i le laueleele.”
Ina ua uma ona faalogo le fafine i lenei folafolaga faavaloaga, sa alu atu loa ma le faatuatua ma faia e pei ona poloaiina ai e Elia. “Ua latou aai ai, o ia ma Elia, ma lona aiga, ua tele aso. Sa le uma le falaoa i le kate, sa le faaitiitia foi le suauu i le fagu, e tusa ma le afioga a Ieova na fai atu ai Elia.”4
E tusa ai la ma le manatu o tagata i aso nei faapea ua atamamai, o le talosaga a le perofeta e foliga mai e le talafeagai ma e manatu faapito foi. E manatu le au atamamai i o tatou aso, o le tali a le fafine ua oti lana tane e foliga mai e faavalevalea e le faautauta. E mafua uma mai lava ona ua masani ona tatou aoao e faia ia faaiuga e faavae i mea tatou te vaaia. Tatou te faia faaiuga e faalagolago i faamaoniga o loo i o tatou luma ma mea e foliga mai e sili ona tatou mananao i ai.
O le “faatuatua,” i se isi itu, “o le autu lea o mea o loo faamoemoe i ai, o le faamaoniga o mea e le o vaaia.”5 O le faatuatua e fesoasoani ia i tatou ia talitonu i mea o loo mamao pe le mafai ona iloa atu. “O lo outou faatuatua e le tatau ona faalagolago i le poto o tagata, ae o le mana o le Atua.”6
Toilalo e Faaaoga le Faatuatua
Ua tatou matele i ai i aso nei, lo tatou le faalagolago tele i le faatuatua e pei ona tatou faalagolago atu i lo tatou lava malosi e fuafuaina ma foiaina ai faafitauli. Afai tatou te mamai, o vailaau i ona po nei e mafai ona aoga e faia ai vavega o faamalologa. E mafai ona tatou faimalaga i mea mamao i se taimi puupuu. Ua faigofie ona tatou maua ia faamatalaga ua 500 tausaga talu ai lea semanu e avea ai ma aloalii se tagata sili ona mativa.
Faatuatua Moni
“E ola le tagata amiotonu i le faatuatua,”7 e pei ona ta’u mai ia i tatou i totonu o tusitusiga paia. Ou te toe fesili atu lava po o le a le faatuatua?
E i ai le faatuatua pe a tuufaatasia le matuai mautinoa i se mea e le mafai ona tatou vaai atu i ai ma galuega e matua ogatusa lelei ma le finagalo o lo tatou Tama Faalelagi. A aunoa ma ia mea uma e tolu—muamua, matuai mautinoa; lona lua, galuega; ma lona tolu, ia matuai usitai—a aunoa ma ia vaega e tolu o lona uiga e na o ni mea faafoliga mea uma ua ia te i tatou, o se faatuatua vaivai ma le le aoga. Se’i o’u talanoa atu i tulaga manaomia nei e tolu o le faatuatua.
Muamua, e tatau ona i ai lo tatou mautinoa i se mea tatou te le o mafai ona vaaia. Ina ua pa’i atu ia Toma i tulaga o fao ma tago lona lima i le itu o le Faaola toetu, sa ia tautino atu, ua ia talitonu.
“Ua fetalai atu Iesu ia te ia, Toma e, ua e talitonu aua ua e vaai mai ia te au: amuia o e le vaai mai, ae talitonu mai pea.”8
Na ta’ua foi e Peteru na upu ina ua ia faaviivii atu i uluai soo i lo latou faatuatua ia Iesu Keriso. Na ia faapea atu:
“E le o iloa atu outou ia te ia, a ua alolofa ia te ia; e le o vaai atu nei foi ia te ia, a o loo faatuatua ia te ia, tou te olioli ai ma le fiafia e le matalatalaina, e silisili ese lava:
“E maua foi le iuga o lo outou faatuatua, o le faaolaina lea o outou agaga.”9
Lona lua, ina ia faia e lo tatou faatuatua se eseesega, o lea e tatau ai ona tatou galulue. E tatau ona tatou faia mea uma i lo tatou malosi, ina ia suia ai talitonuga faasamasamanoa ia avea ma faatuatua ola aua e moni lava, “e mate le faatuatua pe a leai ni galuega.”10
I le 1998, na lapataia ai e Peresitene Gordon B. Hinckley ia le Au Paia o lenei ekalesia faapea le lalolagi atoa. Na ia tuuina mai foi lena lava lapataiga i le po anapo i le sauniga faale-perisitua. Na ia saunoa mai: “Ua ou fautuaina atu, ua oo mai le taimi e faatulagaina lelei ai o tatou aiga. Ua toatele naua o tatou tagata e faaaoga a latou tupe maua uma e ola ai. O le mea moni o nisi o loo ola i tupe nono… . Ua ou popole i aitalafu o loo tulai mai e tatau ona toe totogi i ni aofaiga tetele, lea o loo faamalumalu mai i luga o tagata o le atunuu, e aofia ai ma o tatou lava tagata.”11
Uso e ma tuafafine, ina ua fofogaina nei upu faavaloaga, sa faapea ona galueaiina loa e nisi tagata faamaoni o le Ekalesia lo latou faatuatua ma gauai atu i le fautuaga a le perofeta. Ua matuai faafetai lava i latou i le taimi nei ona o mea na latou faia. O isi, atonu sa talitonu e moni le mea sa saunoa mai ai le perofeta ae sa leai se faatuatua, e oo lava i sina faatuatua e pei o le itiiti o le fatu o le sinapi. O le taunuuga, o isi o loo puapuagatia i mea tautupe, o faigata faaletagata ma faaleaiga.
Lona tolu, o le faatuatua o se tasi e tatau ona matuai usitai atu i le finagalo o lo tatou Tama Faalelagi, e aofia ai Ana tulafono o le natura. O se tamai manulele e lele atu i se afa fulifao e mafai ona talitonu e mafai ona ia lele atu agai i le matagi, ae o le upumoni lava ia, o le taunuuga e na te le mafaia.
Pe ua sili atu ea lo tatou atamamai nai lo le tamai manulele? Ua masani ona manatu nisi tagata o le faatuatua i lenei lalolagi e sili laitiiti atu lava nai lo le faaseseina gofie. O se mea e faanoanoa ai le vaai atu i le auala o loo naunau ai nisi tagata e taliaina mea ua lauiloa ma teori ae ua teenaina po o le manatu faatauvaa foi i mataupu faavae e faavavau o le talalelei a Iesu Keriso. O se mea e matuai faanoanoa tele ai le naunau o nisi tagata ina ia vave ona oo atu i ni amioga faavalevalea po o le le taupulea ma le talitonuga o le a i ai se taimi o le a aveeseina ai i latou e le Atua mai taunuuga matautia o a latou gaoioiga. Latou te ole atu foi mo faamanuiaga o le lagi ma le iloa lelei i o latou loto o mea o loo latou faia e tetee i le finagalo o le Tama oi le Lagi.
E faapefea ona tatou iloa o loo matuai usitai atu lo tatou faatuatua i le finagalo o lo tatou Tama Faalelagi ma Na te faamaoniaina le mea o loo tatou sailia? E tatau ona tatou iloa le afioga a le Atua. O se tasi o mafuaaga tatou te suesueina ai tusitusiga paia ina ia iloa ai feutagaiga a le Tama Faalelagi ma le tagata talu mai le amataga. Afai o manaoga o o tatou loto e feteenai ma tusitusiga paia, ona le tatau lea ona tatou sailia.
O le mea e sosoo ai, e ao ona tatou faalogo ma usiusitai i fautuaga musuia e tuuina mai e perofeta o aso e gata ai.
E le gata i lea, ae tatau ona tatou mafaufau loloto ma tatalo ma saili le taitaiga a le Agaga. Afai tatou te faia faapea, ua folafola mai e le Alii, “O le a ou faaali atu ia te oe i lou mafaufau ma lou loto i le Agaga Paia e oo atu ia te oe ma o le a tumau i lou loto.”12
E faatoa mafai ona tatou maua le mana e maua ai faamanuiaga o loo tatou sailia pe a ogatasi lo tatou faatuatua ma le finagalo o lo tatou Tama Faalelagi.
Mataupu Faavae o le Mana
A tatou malamalama lelei i ai ma faatinoina le faatuatua moni, o le a avea le faatuatua ma se tasi o mana sili ma le ofoofogia o le faavavau. O se malosiaga e sili atu nai lo le mea tatou te manatu i ai. “O le faatuatua … na faia ai mea uma i le afioga a le Atua.”13 O le faatuatua na vaeluaina ai ia vai, faamaloloina ai ma’i, faafilemu ai e amioleaga ma faataunuuina le faaolataga.
O lo tatou faatuatua e faalagolago uma i ai o tatou olaga faaleagaga. E tatau ona avea ma punaoa sili ona taua o o tatou olaga. O le faatuatua ua le na o se mea tatou te talitonu i ai; o le faatuatua o se mea lea tatou te ola ai.
Manatua afioga a le Faaola: “Afai ua e mafaia ona faatuatua, e mafaia mea uma lava i le ua faatuatua.”14 “O le talitonu mai ia te au, e faia lava e ia o galuega ou te faia; e fai foi e ia mea e sili i ia mea.”15
Aoaoina Atu o le Mataupu Faavae
O i latou o e savavali i le faatuatua o le a lagonaina i o latou olaga le taialaina i le malamalama ma faamanuiaga o le lagi. O le a latou malamalama ma iloa mea e le mafaia e isi. O i latou o e le savavali i le faatuatua e manatunatu faapea o mea i la le agaga e faavalevalea aua o mea i la le agaga e faatoa mafai ona malamalama i ai e ala i le agaga.16
O faaaliga mai le lagi e faamaufaailogaina mai le malamalama i ai o i latou o e le talitonu. “Aua afai e leai se faatuatua i le fanauga a tagata,” na ta’u mai e Moronae ia i tatou, “e le mafai le Atua ona faia se vavega ia te i latou; pe a na ia le faaalia ai o ia lava ia te i latou ina seia muamua ona latou faatuatua.”17
Ae peitai, i le talafaasolopito atoa, e oo lava i taimi o le le malamalama ma le amioleaga sa i ai lava i latou o e sa mafai ona sopoloa la latou vaai i le pouliuli ona o le faatuatua ma iloa mea e pei ona i ai moni lava. Na faaalia e Moronae e faapea,“Sa i ai foi nisi e toatele ua faapea ona matua malosi lo latou faatuatua … ua le mafai ona taofia [i latou] mai tua o le ufimata, a ua vaaia e o latou mata o mea na latou vaaia i mata o le faatuatua, ma ua latou fiafia ai.”18
O o tatou fale e tatau ona avea ma malutaga o le faatuatua. E tatau i tina ma tama ona aoao atu ia mataupu faavae o le faatuatua i a latou fanau. E mafai foi e matua o matua ona fesoasoani atu. Pe a ou auai atu i se faatasiga faaleaiga, ou te taumafai e faaalu se taimi, pe a talafeagai ai, e fai ai ni a matou faatalatalanoaga taitoatasi ma nisi o fanau a la’u fanau. Ou te nofo i lalo ma tuuina atu ni nai fesili ia i latou. “O a mai oe?” “O a mai le aoga?”
Ona, ou fesili atu lea i ai po o a ni o latou lagona e uiga i le talalelei ma le moni o le Ekalesia lea e matuai taua lava ia te a’u. Ou te taumafai e sailiili le loloto o lo latou faatuatua ma a latou molimau. Afai ou te maitauina se vaega o loo le mautonu ai, ona ou fesili atu lea ia i latou, “Pe e te taliaina se lui mai lou tamamatua?”
Ona ou fautua atu lea i ai e ao ona latou faitauina ia tusitusiga paia i aso taitasi, ma fautuaina i latou ina ia tootutuli i taeao ma afiafi uma e tatalo faatasi ma lo latou tama ma lo latou tina, ma fai foi tatalo a le tagata lava ia. Ou te apoapoaiina foi i latou e o i sauniga faamanatuga. Ou te apoapoai foi i ai, ia tausia pea i latou ia mama ma atoatoa, ma ia auai i a latou fonotaga uma, ma le vaega mulimuli, o se tasi o isi mea, ia taumafai lava ia malamalama i musumusuga a le Alii.
O nisi taimi pe a uma se talanoaga faapenei, e tilotilo mai ai le tama tama a lo’u afafine i o’u mata ma tuu mai se fesili, “E mafai loa la ona ou alu tamamatua?” E tamoe ese atu o ia mai o’u lima ona ou mafaufau ai lea, “Pe lelei ea le mea lea na ou faia?” O le mea moni na lelei, aua o le aso na sosoo ai na ia fai mai ai, “Faafetai lava mo si a ta talanoaga puupuu lea na fai.”
Afai tatou te faalatalata atu ia i latou ma le alofa nai lo le otegia ma le saili sese, o le a tatou iloaina ai o le a faateleina le faatuatua o a tatou fanau o se taunuuga o aafiaga ma le molimau a se tasi e alofa i le Faaola ma Lana Ekalesia paia.
Tofotofoga
O nisi taimi e foliga mai ai e leaga le lalolagi. O nisi taimi e tofotofoina ai lo tatou faatuatua. O nisi taimi tatou te lagonaina ai ua tapunia le lagi mai ia i tatou. Ae peitai e le tatau ona tatou faanoanoa ai. E le tatau ona tatou tuulafoaiina lo tatou faatuatua. E le tatau ona aveesea lo tatou faamoemoe.
I nai tausaga ua mavae, sa amata ai ona ou maitauina ua amata ona faigata ona ou iloaina atu mea o loo siomia ai a’u. Sa ou popole ai aua ua oo lava i mea faigofie e pei o le faitauina o mataitusi i a’u tusitusiga paia ua faasolo ina faigata. Sa ou taumanatunatu po o le a le mea ua tupu i nei matauila ae pe ua le mafai foi e kamupani ona gaosia mea e pei ona sa i ai i tausaga ua mavae.
Sa ou suia ia matauila i ni matauila e sili atu ona malamalama. Ae sa tau le malamalama foi. Sa ou faitioina le leaga o le fuafuaina o moli ma matauila. Sa oo lava foi ina ua ou fesiligia pe ua tau mou atu le pupula o le la ae oo mai loa ma le manatu ia te au faapea o le faafitauli e le o le tele o le malamalama i totonu o le potu—atonu o le faafitauli o o’u lava mata.
E le’i leva lena, sa ou alu atu loa i le fomai mata o le na faamautinoaina mai ia te a’u faapea e le taitai lava ona oo le pogisa i le lalolagi. O se ‘afu’afu i lo’u mata ua mafua ai ona tau le iloa atu se malamalama. O le mea moni lea o le a outou silafia ai lo’u matua. Sa ou tuuina atu lo’u faatuatua i aao o lenei tagata tomai aoaoina, sa aveesea le ‘afu’afu, ma faauta! Sa toe malamalama la’u vaai! E le’i mou atu lava le malamalama, e na o lo’u malosi e iloa ai le malamalama, sa tuuitiitia.
O lenei mea na aoaoina ai a’u i se upumoni taua. E masani lava a foliga mai ua tau pouliuli le lalolagi, ma foliga mai ua tau mamao ese atu le lagi, tatou te saili e faitioina ia mea uma o loo siomia ai tatou ae o le mafuaaga tonu o le pouliuli atonu o le tau leai lea o se faatuatua i totonu ia i tatou.
Ina lototele ia. Ia faatuatua ma ia mautinoa. O le a le tuulafoaiina lava outou e le Alii.
Na folafola mai e le Alii afai tatou te “sailiili ma le filiga ma tatalo e le aunoa, ia talitonu lava foi, ona galulue faatasi ai lea o mea uma mo lo outou lelei, pe afai tou te savavali sa’o.”19
Ou te iloa e faapei foi o Alema i aso anamua, “o i latou uma o e faalagolago i le Atua, e lagolagoina i latou i o latou tofotofoga, ma o latou tiga, ma o latou puapuaga, e faaeaina foi i latou i le aso gataaga.”20
O lo tatou Tama Faalelagi o se tagata mamana, o le mataisau o mea uma lava ma o loo taitaia Lana galuega. Atonu e i ai nisi taimi tatou te oo ai i le faanoanoa, tiga, ma le faavauvau; e ui lava tatou te taumafai ina ia malamalama i tofotofoga o le faatuatua ae ua valaauina i tatou ina ia tutumau; e ui lava ina foliga mai le olaga e pogisa ma faanoanoa—o le faatuatua lava tatou te maua ai le talitonuga atoatoa o loo i ai se Tama Faalelagi alofa i o tatou tafatafa.
E pei ona folafola mai e le Aposetolo o Paulo, “O lenei ua tauamiotonuina i tatou i le faatuatua, o lea ua tatou lelei ai ma le Atua ona o lo tatou Alii o Iesu Keriso.”21
Ma o le a i ai se aso, o le a tatou iloa atoatoa atu ai le malamalama mai le pouliuli. O le a tatou malamalama ai i Lana fuafuaga e faavavau, o Lona alofa tunoa, ma Lona alofa.
“Peitai a sau le Atalii o le tagata, e iloga ea e maua e ia le faatuatua i le lalolagi?”
Atonu, i le avea ai ma tagata o le Ekalesia ia faatuatua ma o tatou loto atoa, ia liua o tatou faamoemoe ma talitonuga i galuega, ma saili ina ia ogatasi ma le finagalo o le Alii, o le tali i le fesili a le Alii i le 2,000 tausaga ua mavae, e matuai malosi lava o le “Ioe, o le a Ia maua le faatuatua. O le a Ia maua le faatuatua ia i latou o e latou te tauaveina i o latou luga Lona suafa. O le a Ia mauaina i latou o e o loo ola i Ana mataupu faavae paia.”
Molimau
Ou te molimau atu o loo fetalai mai lo tatou Alii ma le Faaola o Iesu Keriso ia i tatou uma i aso nei e ala mai i lo tatou perofeta, tagatavaai, ma le talifaaaliga, o Peresitene Gordon B. Hinckley. Ou te molimau atu o le talalelei na toefuataiina i lona atoatoa e ala mai i le Perofeta o Iosefa Samita. O le faatuatua, o se mana e faavavau o se meaalofa mai lo tatou Tama Faalelagi mo tagata uma. Ou te molimau atu ai i lenei upumoni e faavavau i le suafa o Iesu Keriso, amene.