Ua Faaalia le Agaga Faafetai o le Peresitene o Kana mo le Auaunaga i Tagata Soifua.

I se fonotaga ma le Au Peresitene Sili, sa faaalia ai e le peresitene o le Malo o Kana, o John A. Kufuor, le agaga talisapaia mo le fesoasoani atu mo tagata soifua ma tulaga faalelotu i lona atunuu. “Matou te manatu ia te outou o se vaega o Kana,” o lana saunoaga lea ia Peresitene Gordon B. Hinckley; Peresitene Thomas S. Monson, Fesoasoani Muamua i le Au Peresitene Sili, ma Peresitene James E. Faust, Fesoasoani Lua i le Au Peresitene Sili, i sana asiasiga i le Aai o Sate Leki i le masina o Setema.

I sana asiasiga i le Iunaite Setete e auai i le Fonotaga Aoao a Malo o le Taupulega, sa asiasi ane ai Peresitene Kufuor faatasi ma nisi o taitai i Iuta, e talanoaina ai atiinaega faaletamaoaiga, ma taitai faalemalo ma taitai o afioaga i le lotoifale. A o i ai o ia iina, sa asiasi atu o ia i taitai o le Ekalesia ma maimoaina ai nofoaga eseese o le Ekalesia, e aofia ai le Lotoa o le Uelefea, o le Lotoa o le Malumalu, ma le Nofoaga Autu mo Konafesi.

Sa faafetaia e Peresitene Kufuor le Ekalesia mo taumafaiga e fesoasoani ai i tagata soifua, ma le auaunaga i mea tau galuega i lona atunuu. E silia ma le 140 galuega fesoasoani mo tagata soifua na tauaaoina e le Ekalesia i Kana i le 15 tausaga ua mavae.

Na talifuaitau atu i ai Peresitene Hinckley e ala i lona valaauliaina o Peresitene Kufuor i le faletatala o le Malumalu o Accra i Kana, ua faatulagaina i le tautoulu o le 2003. Sa ia faafetaia foi Peresitene Kufuor mo le lagolagoina o le Ekalesia.

“O se asiasiga na matua faamanuiaina, ma sa maua ai foi se avanoa e faaali atu ai le agaga faafetai ma le agaga talisapaia,” o le saunoaga lea a Elder H. Bruce Stucki o le Au Fitugafulu, o se tasi sa avea ma Peresitene o le Eria a Aferika i Sisifo.

E lima siteki o le Ekalesia iina, ma se faitau aofai o le au paia pe tusa ma le 20,000 i Kana. O loo fauina i le taimi nei se malumalu iina, ma se fale mo i latou e malaga mamao mai i le malumalu, o se fale autu o le siteki, ma se fale mo ofisa o le eria.