Valaauina e le Atua
Ua uma ona tuuina mai ia i tatou ia le mana sili o le perisitua. Ua faamanuiaina ai i tatou taitoatasi ma maua ai foi faamanuiaga mo o tatou aiga.
O loo faapea mai le Mataupu Faavae e lima o le faatuatua, “Matou te talitonu e ao ina valaauina le tagata e le Atua, i le valoaga, ma le faaee atu o lima, o e o i ai le pule, e talai atu ai le talalelei ma faia sauniga o i ai.”1
O se tasi o valaauga sili ona taua o le perisitua, o se valaauga e moomia ona taulai atu pea i ai la tatou vaai, o loo i totonu lea o o tatou fale ma aiga. Uso e, i le avea ai ma tama ma peteriaka i o tatou aiga, “I le fuafuaga paia, … [tatou] te pulefaamalumalu i o [tatou] aiga i le alofa ma le amiotonu ma o i [tatou] e tuuina atu mea e manaomia o le olaga ma le puipuiga mo o [tatou] aiga… .
“O le tane ma le ava ua i ai le tiutetauave paia e alofa ma tausi e le tasi le isi ma a la fanau… . Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea e nonofo ai. O tane ma ava—tina ma tama—o le a latou tali atu i le Atua mo le faataunuuina o nei mea e ao ona faia.”2
O loo tatou ola i se lalolagi o loo matuai moomia ai le taitaiga amiotonu e faavae lea i mataupu faavae faatuatuaina.
I totonu o la tatou Ekalesia, ua aoaoina i tatou, i la tatou lava auala tulaga ese, i mataupu faavae sao o le taitaiga, o loo taitaia e le pule a le perisitua. Ou te talitonu e toalaiti lava nisi o i tatou o loo iloaina le malosi o le perisitua atoa ma lona faamanuiaina. O le tele lava ona tatou aoao i le umiaina o le perisitua ma malamalama i lona faagaoioiga, o le tele foi lena ona tatou talisapaiaina o faamanuiaga ua tuuina mai e le Alii ia i tatou.
Na faailoa mai e Ioane Teila i se tasi taimi:
“O le a … faapuupuu atu la’u tali, [o le perisitua] o le malo o le Atua, pe i le lalolagi po o le lagi foi, aua o le mana ma le pule o le perisitua o loo pulea ai mea uma lava i le lalolagi ma le lagi, [ma] o le mana foi lena o loo taofia ai ma tausia mea uma. E pulea ai mea uma—e taitai ai mea uma—e lagolago ai mea uma—ma e i ai lana faia i mea uma na faia e le Atua atoa ma upumoni.
“O le mana o le Atua ua tuuina atu i agaga i le lagi atoa foi ma tagata i le lalolagi… . Pe a tatou taunuu atu i le malo selesitila o le Atua, o le a tatou vaai ai i se faatulagaga atoatoa lelei, o loo i ai se malo e aupito sili ona faatulagaina lelei, ma pe o fea lava na atinae ai na mataupu faavae i le lalolagi, i le tele sa faasalalau ai ma faaaoga ai, na pau foi lena o le tele na latou maua ai faamanuiaga ma le faaolataga i le fanauga a tagata; ma pe a oo ina taliaina le malo o le Atua e le salafa o le lalolagi, ma a oo ina tali mai le tatalo a Iesu, lea na ia aoao atu i ona soo, ma oo mai le malo o le Atua i le lalolagi, ma faia lona finagalo iinei e pei ona faia i le lagi, ae seiloga ua oo i le taimi lena, ona malo ai lea o le alofa aoao, le manuia, le toafilemu, ma le lotogatasi.”3
Ua tuuina mai e le Alii ia i tatou se faalepo o le mea e mafai ona oo i ai le perisitua a o Ia taitaiina Ana Aposetolo, o e na tauaveina le galuega ina ua mavae Lona maliu. Na ia faailoa atu ia i latou: “Ua le filifilia a’u e outou, a ua filifilia outou e a’u, ua ou tuuina atu outou ia outou o, ma ia outou fua mai ni fua, ma ia tumau o outou fua; ina ia foaiina atu ia te outou e le Tama mea uma lava tou te ole atu ai ia te ia i lo’u igoa.”4
O se tasi faamanuiaga e maua mai le perisitua o le mauaina lea o le avanoa e auai atu ai i se korama. O se korama a le perisitua o loo aofia ai se vaega patino o alii o loo umia le tofi lava e tasi o le perisitua, ua faatulagaina ina ia atoatoa ona fesoasoani atu i le fausiaina o le malo o le Atua.
Na tuuina mai e Peresitene Stephen L. Richards i se tasi taimi ia i tatou se faauigaga e tolu ona vaega i le uiga o se korama a le perisitua. Na ia saunoa faapea o le korama a le perisitua e tolu lava mea e i ai: “muamua, o se vasega; lona lua, o se faalapotopotoga; ma lona tolu, o se iunite o auaunaga.”5
Na aoaoina a’u i le auala e galulue ai se korama i nei vaega e tolu i le tele o tausaga ua mavae a o o’u auai atu i se fonotaga a le vaega a faitaulaga sili i se tamai nuu i le itu i saute o Wyoming. O le lesona i lena vaiaso e faatatau lea i le faamaoniaina ma le faapaiaina. Na matuai iloga lava i le amataga o le lesona le saunia lelei o le faiaoga e aoaoina le usoga. Ona tulai mai lea o se fesili na uunaia ai se tali lea na suia atoa ai lava le faamoemoega o le lesona. I le tali atu i le fesili, sa saunoa ai se tasi o uso: “Ua ou faalogo atu ma le naunautai i le lesona. Ua oo mai le manatu i lo’u mafaufau e faapea o le faamatalaga o loo tuuina mai e le umi ae leiloa pe afai tatou te le sailia se faatinoga e faataitai ai le lesona o loo tuuina mai i o tatou olaga i aso taitasi.” Ona ia faatuina atu lea o se fuafuaga e faatinoina e le korama.
O le po ua mavae, na maliu ai se tasi o le nuu. O lona faletua e auai i le Ekalesia, ae o ia e le’i auai. Sa asiasi atu lenei faitaulaga sili i le tina ua maliu lana tane ma tuuina atu i ai se faamafanafanaga. Ina ua tuua le fale ina ua mavae lana asiasiga, sa tau atu lana vaai i le faatoaga matagofie a le uso ua maliu. Sa tele lona ola ma ana galuega sa tuuina atu i ai i le atinaeina. Ua saunia le alafafa mo le seleseleina; e le o toe mamao ae saunia foi ia fatu mo le seleseleina. O le a faapefea ona taulimaina e lenei tuafafine vaivai ia faafitauli ua faafuasei ona oo atu ia te ia? O le a ia moomia se taimi e tau faatulaga ai o ia mo ona tiutetauave fou.
Ona ia faatuina atu lea i le vaega ina ia latou faatinoina le mataupu faavae sa aoaoina—e ala lea i le galulue faatasi ma le tina ua oti lana tane ina ia faagaoioia pea lana faatoaga seia oo ina mafai e le tina ma lona aiga ona sailia se vaifofo tumau. O le fonotaga atoa sa faaaluina lea i le faatulagaina o le galuega e fesoasoani ai i le tina.
A o matou tuua le potu o le vasega, sa i ai se faalogona lelei sa i ai i le usoga. Sa ou faalogo i se tasi o i latou o faapea sana faamatalaga a o alu atu i fafo i le faitotoa, “O le galuega tonu lava lenei o loo tatou moomia ina ia toe galulue faatasi ai lenei vaega.” Sa aoaoina se lesona; sa faamalosia se usoga, sa faatulagaina se galuega fesoasoani ina ia lagolagoina ai se tasi o loo moomia le fesoasoani.
O nei la mataupu faavae o loo aoaoina ai i tatou ina ia faaaogaina i se korama, e le na o se korama e faaaogaina i ai, ae mafai foi ona faaaogaina nei lava mataupu faavae i le taitaiga faaleperisitua i totonu o le aiga. Ua poloaiina i tatou mai le lagi ina ia “tausia a [tatou] fanau i le malamalama ma le upumoni.”6 Afai e le tausia e tama a latou fanau i le malamalama ma le upumoni ona le fiafia lea o le Alii ma o le a mulimuli mai ai le ta’usalaina. O le savali lenei:
“Ae moni ou te fai atu ia te oe, la’u auauna … , o loo i ai pea oe i lenei ta’usalaga;
“E te le’i aoao lau fanau i le malamalama ma le upumoni, e tusa ma poloaiga; ma o le amioleaga o loo i ai pea le mana ia te oe, o le mafuaaga foi lea o lou puapuagatia.
“Ou te tuu atu foi nei ia te oe le poloaiga—afai e te fia laveaiina ia e faatulaga tonu lou lava aiga, aua o ia mea e tele e le sa’o i lou aiga.”7
E tatau pea i le Ekalesia ona faatumauina lona faatauaina o le aiga. E moomia ona tatou aoao atu le manatu o le fausiaina o ni augatupulaga faamanuiaina o tagata o e faaipoipo i totonu o le malumalu ma faamaoni ai i a latou feagaiga. E moomia ona tatou aoao atu ia aoaoga faavae ma ia malamalama i le sootaga i le va o le alualu i luma faaleagaga ma le aiga. Tatou te mananao ina ia manino ona taunuuga: ia valaaulia tagata e o mai ia Keriso ma tumau e oo i le iuga.
O se tasi o uluai poloaiga na tuuina atu i le alii ma le tamaitai, “O le mea lea e tuua ai e le tane lona tama ma lona tina, ae faatasi atu i lana ava; ona avea ai lea o i laua ma tino e tasi.”8
Na faauuina e le Atua i Lana fuafuaga paia ia le faaipoipoga ina ia faataunuuina ai Lana iunite faavae o faalapotopotoga—o le aiga lea. O se tasi o uluai mataupu faavae na Ia aoaoina atu ia Atamu ma Eva o le atinaeina lea o se sootaga o le galue. O loo taua e tusitusiga paia:
“Ma sa oo ina valaau atu Atamu ma Eva, lana ava, i le suafa o le Alii, ma sa oo ina la faalogoina le siufofoga o le Alii ua fetalai mai ia i laua mai le itu i le Faatoaga o Etena, ae sa la le’i vaai atu ia te ia; aua ua aveeseina i laua mai ona luma.
“Ona tuuina atu lea e le Alii ia i laua ni poloaiga, ia tapuai atu i le Alii lo la Atua, ma tuuina atu uluai manu o a laua lafu mo se taulaga e osi atu i le Alii. Ma sa usiusitai lava Atamu i poloaiga a le Alii.”9
Ona poloaiina lea e le Alii o tatou uluai matua faalelalolagi ina ia aoaoina a laua fanau e uiga i le usiusitai i Ana tulafono ma “sa viia e Atamu ma Eva le suafa o le Atua, ma sa la faailoa atu ia mea uma i o la atalii ma afafine.”10
Na aoaoina i tatou e Peresitene Spencer W. Kimball e uiga i le natura e faavavau o le aiga:
“E faigofie lava le fua; o mea foi o loo faaaogaina e laiti, e ui ina tele ia fetuunaiga i vaega taitasi.
“Muamua, e tatau ona i ai le ala sao ma le tonu agai i le faaipoipoga, lea e mafaufau ai i le filifilia o se toalua o le e toetoe lava atoatoa ma i ai tulaga uma ia e faatauaina e ia. Ona tatau lea i na tagata e toalua ona o atu i le fata faitaulaga o le malumalu ma le iloaina e tatau ona la galulue malolosi i lenei tuufaatasiga ina ia faamanuiaina.
“Lona lua, e tatau ona i ai le le manatu faapito, ia faagalo le tagata lava ia ae faaautu mea uma i le olaga faaleaiga ma faia mea uma mo le lelei o le aiga atoa, ae lafoai lou lava tagata.
“Lona tolu, e tatau lava ona faaauauina e le aunoa le tulaga o faauoga atoa ma le faaalia o le alofa faamaoni, agalelei, atoa ma manatunatuga loloto ina ia faaolaolaina pea le alofa.
“Lona fa, e tatau ona matua tausia ma ola atoatoa i poloaiga uma a le Alii e pei ona faamatalaina mai i le talalelei a Iesu Keriso.”11
E tatau ona avea ia aiga ma se taula, o se sulufaiga, o se nofoaga o le saogalemu, o se nofoaga fiafia e mafai e aiga ona mau faatasi ai, o se nofoaga e alofagia ma mafai ona alofagia ai fanau. I totonu o le aiga, e tatau i matua ona aoaoina atu i a latou fanau ia lesona silisili o le olaga. E tatau ona avea le aiga ma nofoaga tutotonu o tomai faalelalolagi o se tasi, lea e tuufaatasia lelei ai le alofa ma le fefaaaloaloai.
E lona lua atu i le taua o le avea ma ni soa e faavavau o le avea lea ma ni matua faalelalolagi. E tatau i tama ma tina ona mafaufau i o latou matafaioi i lenei tiutetauave maoae. Na aoaoina mai e la’u fanau ia te a’u se lesona sili i le tele o tausaga ua mavae. Na malaga ese mai lo matou aiga mai Kalefonia e agai atu i Niu Ioka lea sa ou taliaina ai se tofiga i se kamupani fou. Sa amata la matou faiga o le sailia o se fale fou i le vaavaai lea i nuu e taulalata ane i le taulaga. Ae peitai, sa faasolosolo atu pea lava ina ua matou mamao ese mai le taulaga e saili ai se fale i se vaiaai e fetaui lelei ma o matou manaoga. Sa matou maua se fale matagofie e fai si maomao ese mai le Aai o Niu Ioka. O se fale e tasi le fogafale o loo tu lotolotoi ai i le matagofie o le togavao o Connecticut. O le tofotofoga mulimuli lava a o le’i faatauina le fale o lo’u tietie atu lea i le nofoaafi i le Aai o Niu Ioka e vaai ai po o le a le umi e alu atu ai le nofoaafi. Sa ou alu ma toe foi mai ma le faanoanoa. O le malaga e tasi e ta’i itula ma le afa le alu e faapena le toe foi mai. Sa ou savali atu i totonu o le potu o le faletalimalo lea o loo faatalitali mai ai lo’u aiga mo a’u e tuu atu i la’u fanau se faaiuga.
“E pule outou pe tou te mananao i le fale po o le tou tama,” sa ou fai atu ai. Sa ou ofo i le latou tali, “Matou te mananao i le fale. E le tele lava sou taimi e te i ai i le fale.” Sa ou te’i. O le mea na ta’u mai e la’u fanau ia te a’u e sa’o. Sa moomia ona ou salamo muamua. Sa manaomia e la’u fanau se tama e i ai i le fale i le tele o taimi. Na i’u ina ua matou taunuu atu i se maliliega ma faatauina ai se fale e latalata atu i le taulaga, toe puupuu le taimi e alu ai i le nofoaafi. Sa ou suia a’u fuafuaga faalegaluega ina ia lava so’u taimi ou te i ai faatasi ma lo’u aiga.
I le gasologa o augatupulaga, sa poloaiina ai e le Alii Ona tagata ina ia aoaoina a latou fanau i le upumoni ma le amiotonu. Matou te uunaiina outou ina ia faapotopoto faatasi mai o outou aiga mo tatalo faleaiga, suesueina o le talalelei, mo galuega faaleaiga, ma gaoioiga faaleaiga. Matou te aioi atu ia te outou ina ia outou talatalanoa faatasi ma o outou aiga ma uunaia i latou ina ia auai i le faiga o faaiuga taua e pei o le fuafuaina o gaoioiga faaleaiga.
Na aoao mai Peresitene Polika Iaga, “O le perisitua … o le faatulagaga atoatoa lelei lea o se malo, ma o lea foi e mafai ai ona faasaoina le aiga i le tino mai le leaga uma ua aafia ai nei i latou, ma mautinoa ai lo latou fiafia tele mulimuli ane.”12
Ua uma ona tuuina mai ia i tatou ia le mana sili o le perisitua. Ua faamanuiaina ai i tatou taitoatasi ma maua ai foi faamanuiaga mo o tatou aiga; o loo faamanuiaina ai foi ia korama o loo tatou auai atu i ai; o loo faamanuiaina ai faapotopotoga o loo valaauina i tatou e auauna atu i ai; ma o loo faamanuiaina ai foi le lalolagi o loo tatou nonofo ai. E moomia ona tatou aoao ina ia mulimuli ma le amiotonu i mataupu autu ma aoaoga ua uma ona tuuina mai e le Alii ia i tatou o e umiaina Lana perisitua paia. Ua fautuaina i tatou:
“O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa.
“O le faatamala e le ta’uaogaina e tumau, o le foi na te le aoao lana tiute ma faaalia ua le faamaonia o ia o le a le ta’uaogaina e tumau.”13
Ia faamanuia i tatou e le Alii, i le avea ai ma tagata o Lana Ekalesia ina ia mafai ona tatou iloa o se faamanuiaga le i ai o le perisitua i le lalolagi ma mafai ona faaaogaina mo le manuia o o tatou aiga ma tagata uma. Ia tatou alualu i luma ma malamalama i lo tatou sootaga i le Atua lo tatou Tama Faavavau ma le perisitua ua Ia tuuina mai ia i tatou, o la’u tatalo lea i le suafa o Iesu Keriso, amene.