Mo Alii o le Perisitua

Peresitene Gordon B. Hinckley

O outou na alii o loo umia lenei perisitua taua, ia fusi atu i o outou agaga. Ia outou agavaa mo lena perisitua i taimi uma ma tulaga uma.

O’u uso pele, ou te tautala atu i lenei po ma lo’u faanaunauga ou te fesoasoani atu. Ou te tatalo i le Agaga o le Alii ina ia taialaina ai au.

Ou te le tau ta’uina atu ia te outou ua avea i tatou ma se Ekalesia tele ma le lavelave. Ua matua tele naua polokalama a le Ekalesia, ma ua matua lautele lava le tulaga ua tatou au atu i ai, ma ua faigata ai ona malamalama i ai. O i tatou o se Ekalesia e le totogia le au taitai. Oka se ofoofogia ma le matagofie o lena mea. E ao ona tumau ai pea faapena. E le tatau ona avea o se galuega e totogi e oo lava i sina mea itiiti. Ae ua tatou iloa lava o le avega faaletaitaiga, e matua mamafatu lava i o tatou epikopo ma peresitene o siteki faapea foi ma isi. O le malamalama la i lena tulaga moni, ua a’e ai se tofa i le Au Peresitene Sili ma le Toasefululua, e faia ni fonotaga, o nisi o nei fonotaga e uumi ma malie, e i’u ane ua matou talatala auiliilia le Ekalesia, ona toe tuufaatasi ai foi lea. O le manulauti o lo matou faamoemoe, o le vaavaai lea pe mata e i ai ni polokalama e mafai ona faamuta. Peitai, a o matou faavasegaina ma lauiliuina, e le tele ni mea sa matou manatu e faataatia ese. A faataatia ese se tasi, e pei lava ua e foa’ia se tasi o lau fanau. E le mafai ona outou faia lena mea. Peitai, ou te manao e faamautinoa atu ia te outou, ua matou iloa lelei avega o loo outou tauaveina ma le taimi o loo outou faaaluina ai. O le sauniga faale-perisitua lenei, ou te fia ta’ua ni nai mataupu ua uma ona matou soalaupuleina. Ou te manatu o le a outou maitauina ai, ua tatou laa i luma, e ui atonu pe itiiti.

O le a ou tautala atu i ni nai mataupu eseese.

Ua matou fuafuaina o le a amata atu i le aso 1 o Novema, o le a lua tausaga e aoga ai le pepa faataga o le malumalu ae le tasi. O le a faaitiitia ai le taimi o epikopo ma peresitene o siteki ma o latou fesoasoani e faaalu i le faiga o faatalanoaga mo pepa faataga o le malumalu. Ioe, afai e i ai se taimi ua le agavaa ai se tagata o umia le pepa faataga e alu ai i le malumalu, ona avea loa lea ma tiutetauave o le epikopo po o le peresitene o le siteki e aveese mai le pepa faataga o lena tagata.

Ae e tusa ai ma le poto masani ua i ai i le Ekalesia, e le tele ni tulaga faapena. O lea la, o le polokalama lea o le a i ai. E amata atu i le aso muamua o Novema, tusa lava pe o le a le aso o loo tusia i le pepa faataga, o le a faaopoopo i ai le isi tausaga e tasi. O lona uiga o le a tailua tausaga ma faafou pepa faataga nai lo le taitasi tausaga o loo i ai nei. Matou te faamoemoe o le a fesoasoani lenei mea. Ua matou talitonu e aoga.

O le isi mataupu.

Ua saunoa atu Elder Ballard e faatatau i faifeautalai. Ou te ioe i le mea na ia saunoa atu ai. Ou te faamoemoe o le a talia ma agavaa o tatou alii talavou ma tamaitai talavou, ma tauaveina le lu’i ua ia faatuina. E tatau ona tatou siitia le tulaga faatonuina o le agavaa ma tulaga manaomia o i latou e o atu i le lalolagi o ni avefu’a a le Alii o Iesu Keriso.

E ese le malie o le tatou tu ma aga masani i le Ekalesia. E fai se faamavaega mo faifeautalai e malaga ese atu. O nisi uarota ua avea lea mea ma faafitauli. Ona o le toatele o faifeautalai o le a tuuvaa atu ma faifeautalai foi ua toe taliu mai, o le tele lava o sauniga faamanatuga i le Aso Sa ua alu i faamavaega ma faataliga.

E leai lava se isi i le Ekalesia e fai se faamavaega pe a ulu atu i se auaunaga faapitoa. E leai ni a tatou sauniga faamavae faapitoa mo se epikopo fou, o se peresitene o le siteki, o se peresitene o le Aualofa, o se Pulega Aoao, po o se isi lava e mafai ona ou manatua. E tatau la i se a ona fai ni faamavaega mo faifeautalai?

Ua tasi moemoe le tofa i le Au Peresitene Sili ma le Toasefululua, ina ua uma ona fefulifulisa’i faalaau mamafa le tofa ma le faautaga ma talosaga, ua tatau ona faia ni suiga.

O le a tuu atu i le faifeautalai o le a malaga se avanoa e lauga ai i se sauniga faamanatuga mo le 15 pe 20 minute. Ae o le a le tofia matua ma uso ma tuafafine e lauga foi latou. Atonu pe lua pe sili atu foi faifeautalai e lauga i le sauniga lava lea e tasi. O lea sauniga, e fuafua e le epikopo ma pulefaamalumalu ai foi, ae le fuafuaina e le aiga. E leai se musika faapitoa po o se isi lava ituaiga mea faapena.

Matou te iloa o le a matua le fiafia le tele o aiga. Sa auai tina ma tama, o uso ma tuafafine, ma uo i le faatinoina i aso ua mavae. Matou te talosaga atu ina ia outou taliaina lenei faaiuga. Afai o i ai se faamavaega ua uma ona fuafuaina ma faatulaga i le taimi nei, e mafai ona faatino pea. Ae, e le tatau ona toe fuafuaina lea tu masani mo le lumanai. Ua matou talitonu, pe afai e manatunatu lelei i ona itu uma, o se faaiuga poto lenei. Faamolemole, ia outou taliaina, o’u uso pele. Ou te avatu foi lenei talosaga i tuafafine, aemaise lava o tina.

Matou te faamoemoe foi o le a le faia ni faiga toonai pe a maea le sauniga faamanatuga lea na saunoa ai le faifeautalai. Atonu e mananao tagata o le aiga e potopoto faatasi. Matou te le teena lena itu. Peitai, matou te talosaga atu ia aua nei faia ni taumafataga po o ni toonai faitele e valaaulia ai se anoano o tagata.

O le galuega faafaifeautalai o se aafiaga matagofie tele e i ai ona lava faamanuiaga matagofie. Ma a oo ina toe taliu mai le faifeautalai i lona aiga ma lana uarota, e mafai foi ona toe tuu i ai se avanoa e lauga ai i se sauniga faamanatuga.

O le isi mataupu.

Sei ou tuuina atu se lipoti puupuu e uiga i le Tupe Faaagaga mo Aoga lea sa amatalia i le tausaga ma le afa talu ai i le konafesi ia Aperila. Ua matua mauaa ma alualu i luma le polokalama i le taimi nei. Ua tele se tatou teugatupe na foai mai e tagata faatuatua o le Au Paia o Aso e Gata Ai. Matou te faamoemoe o le a tele nisi foai o le a aumai, ina ia mafai ai ona fesoasoani atu i le toatele naua o i latou e alagatatau ona fesoasoani i ai.

O le taimi nei, e 5,000 alii ma tamaitai, o le toatele lava o i latou e talavou, ua aooga nei ae na semanu latou te le maua lea avanoa. Manatu i taunuuga o le faaaoogaina o nei tagata. Ua ofoina atu i nei Au Paia o Aso e Gata Ai faatuatua se apefa’i e mafai ai ona latou fe’a’ei ese mai le tulaga mativa sa soifua ma ola ai i latou ma o latou aiga na muamua atu. Ua matua faateleina lava le tulaga e gafatia ai ona tele atu ni tupe latou te maua. Ua faalauteleina foi lo latou malosi e avea ai ma taitai. O le a avea i latou ma alii ma tamaitai lelei, o tagata o le Ekalesia o le a faataunuuina ona polokalama i se tulaga e lei mafaufauina muamua.

Ou te fia avatu se faataitaiga. O le uluai tamaitai talavou lava na maua se faaunegatupe [mai le tupe faaagaga lea], ua maea nei le tausaga o ana aoaoga, ma ua toe talosaga mai nei mo le faatupeina o lana toe tausaga o lana aoga. O loo aoga ina ia avea ma fomai nifo.

O le taimi muamua sa faigaluega ai o ia i se faleaiga, ma e $130 lona totogi i le masina. Ua faamoemoe nei a maea lana aoga i se taimi e le o toe mamao, ona maua lea o lana $650.00 i le masina e amata ai—o se faaopoopoga vave e 500 pasene. O le a siisii pea lea aofaiga a o gasolosolo tausaga.

Oka se eseesega ofoofogia e faia e ni nai tala pe a faaaogaina tatau. Ia, fetagofi la’ia e faatele lena mea i le 5,000. O se mea aupito ofoofogia pe a mafaufau i ai. Ua maua nei e tamaiti aoga ni aoaoga e avea ai o ni enisinia, o tagata faapitoa mo faamatalaga tau komepiuta, o faufautua faapisinisi, faufautua faatausima’i, o faufautua faa-komepiuta, o tausima’i, faigaluega i le falemai, o le au fai polokalama komepiuta, enisinia komepiuta, mamanu laei, tausitusi, faieletise, faiaoga Igilisi, o fai falaoa, pule o falitalimalo, ma mamanu kalafi, ma ua na o sina vaega iti lena.

E le uma avanoa, ma o le mea ua tulai mai nei, o se matua vavega ofoofogia lava.

O le isi mataupu ou te fia ta’ua o afiafi faaleaiga. Ua matou popole ona o lenei polokalama taua tele, ua tau mou malie atu ona ua loa tausaga. Uso e, e leai se isi mea e sili atu ona taua nai lo o outou aiga. O lenei polokalama, na amata i le 1915, ua 87 nei tausaga talu ai, ina ua uunaia e Peresitene Iosefa F. Samita le Au Paia o Aso e Gata Ai ina ia faataatia ese se afiafi se tasi o le vaiaso, e faapatino lava i le aiga. O le taimi lea e aoao atu ai, e faitau ai tusitusiga paia, e atiinaae ai taleni, e talanoaina ai mataupu faaleaiga. E le o se taimi e o ai i ni taaloga faaafeleti po o se isi lava ituaiga mea. E moni, afai e i ai se gaoioiga faaleaiga faapena i nisi o taimi, e le afaina lava. Ae a o faateleina gaoioiga faanatinati o o tatou olaga, o lea e matua taua ai lava ona nonofo i lalo tama ma tina faatasi ma a latou fanau, ma tatalo faatasi, aoao i latou i ala a le Alii, talatalanoa i a latou faafitauli faaleaiga, ma tuu atu i tamaiti e faaali ane a latou taleni. Ua faamalieina lava au, o lenei polokalama na auala mai i faaaliga a le Alii e tali mai ai i se tulaga e manaomia e tagata o le Ekalesia.

Afai na i ai se tulaga na manaomia ai i le 87 tausaga talu ai, o lena tulaga manaomia ua matua faateleina lava i le taimi nei.

Sa faia le faaiuga mulimuli ane, o le a taatia lava le afiafi o le Aso Gafua mo lenei gaoioiga faaleaiga. O nofoaga sa toatele tagata o le Ekalesia ma taitai o aoga ma isi e faamamaluina lea polokalama, latou te lei faatulagaina ni gaoioiga e faia i lena afiafi.

O le taimi nei, e foliga mai ua faatuputeleina le agaigai atu e faatulaga mea e fai i le po o le Aso Gafua. Matou te talosaga atu ma le faaaloalo, i taitai o aoga lautele ma isi, ia tuu mai le afiafi lenei e tasi i le vaiaso e faataunuu ai lenei polokalama masani taua. Matou te talosaga atu ina ia aua nei faatulagaina ni mea e fai, e manaomia ai le faaalu ai o taimi o le fanau i afiafi o Aso Gafua. Ua matou talitonu, o le a latou iloaina e sili ona taua le maua e le aiga o le avanoa, e taitasi i vaiaso pe a itiiti, e faatasitasi ai e aunoa ma le feteenai ai o lo latou faamaoni. Matou te faafetai lava pe afai o le a latou galulue faatasi i lenei faamoemoe. Ma e matou te uunai atu, i ni faaupuga e aupito sili ona malolosi e mafai ai, ia matua manatu mamafa tama ma tina i lenei avanoa ma le lu’i e avea ai le afiafi o le Aso Gafua ma se taimi e paia i le aiga.

Sa ou maua ni valaaulia e auai atu i ni faatasiga eseese faalenuu i Aso Gafua. Sa ou teena uma ma le agaga talisapaia nei valaaulia, ae na ou avatu ai ma se faamalamalamaga, ua ou faapolopoloina le Aso Gafua o se taimi mo afiafi faaleaiga. Ou te faamoemoe o le a outou faia foi lea lava mea e tasi.

O le isi mataupu.

Uso e, ou te toe fia faamamafa atu le taua o le ola faalagolago o le tagata ia te ia lava, o le pitolaau a tagata taitoatasi o le Ekalesia faapea foi le aiga.

E leai se tasi o i tatou e iloa pe o afea e oo mai ai se mala. O ma’i, o manu’a, o le le toe faigaluega, e ono aafia soo se tasi o i tatou.

E maoae la tatou polokalama faauelefea ma fale o loo teu ai mea e gaosi mai i fatu i vaega eseese. E taua lo tatou faia o lenei mea. Peitai, o le nofoaga sili lava e teu ese ai ni nai meaai, o totonu lea o o tatou aiga, faatasi ai ma sina fasitupe e teu. O le polokalama aupito sili faauelefea, o la tatou lava uelefea.

Ou te le valoia se mala o loo foufou mai. Ou te faamoemoe o le a leai. Ae e tatau ona faafoeina o tatou olaga e le faautauta. O tagata uma lava e i ai o latou lava fale, e tatau ona iloa e manaomia le i ai o se inisiua nei mu. Matou te faamoemoe ma tatalo o le a leai lava se mu. Ae ui o lea, tatou te totogiina inisiua e toe faatupe ai nei tulai mai sea faalavelave matautia.

E tatau foi ona tatou faia faapea i le uelefea faaleaiga.

E mafai ona tatou amatamata i nai mea iti. E mafai ona tatou amata teu ni meaai mo le vaiaso, ma faasolosolo malie atu ai lava ona teu mo se masina, ona sosoo ai lea ma le tolu masina. O loo outou tautala atu nei e faatatau i meaai e faaaoga soo. Ua outou silafia uma lava, e le fou lena fautuaga. Ae ou te popole ona e toatele naua ua manatu, o le teuina o ni meaai mo se taimi umi, e le mafai ona oo i ai se malosi ona latou le faia ai lava lea o se taumafaiga e fai ai.

Amata i sina mea itiiti, o’u uso e, ona faasolosolo malie ai lava lea ona faaputu seia pa’ia le faamoemoega talafeagai. Ia teu foi e le aunoa sina tupe itiiti, ma o le a e maofa i lona faateleina.

Aloese mai le faia o aitalafu ma ia faasaolotoina mai oe lava i le noataga matautia e afua ona o le aitalafu.

Ua matou faalogo soo i le mokesi ta’ifaalua i luga atu o faaunegatupe e le’i uma ona totogi. O lea foi ua ta’u mai ia te au, e i ai foi mokesi taifaatolu.

Ia pulea lelei outou i mataupu o le faaalu o tupe, o mea nono, o faiga e oo ai ina gau ma le mafatia e maua ai.

Ia, o le mea mulimuli, o’u uso e, ou te toe fia foi lava i se mataupu sa ou tautala atu ai muamua, lea foi na ta’ua e isi tootoo o le tatou konafesi. Ou te tautala i le amio pulea mama o tagata o le Ekalesia.

Ua toatele naua ua lavelavea i le mataupega o le legavia ma ona fua oona matuitui e puna mai ai. Ou te fia fai atu i tamaiti o loo faatasi mai i lenei po—o alii talavou—i le gagana aupito malosi e mafai ona ou tautala atu ai, ia taumamao outou mai amioleaga faatiapolo. Ua outou iloa le mea e sa’o ma le mea e sese. E le mafai ona outou faaaogaina le faavalevalea e fai ma ‘alofaga o amio e le manaomia.

E mafai faapefea ona e manatu e te auai i ni faiga le mama ona e alu lea i le galuega faamisiona e fai ma sui o le Alii o Iesu Keriso? E te manatu e mafai ona e agavaa e te alu i le Maota o le Alii, e te faaipoipo ai mo le olaga nei ma le faavavau, pe afai na e auai i le faatinoina o na ituaiga faiga mataga?

Ou te aioi atu ia te outou, a’u uo talavou pele, e aloese mai na ituaiga o amioga. O le a le faigofie. O le a manaomia ai le loto pulea. E malolosi ma faatosina tofotofoga tou te feagai. O tofotofoga a se fili poto. E te manaomia le malosi e maua mai i tatalo.

O ese mai mea faa-ponokalafi o le Initoneti. E na ona toso faatata ai o outou i lalo. E mafai ona tata’i atu ai outou i le faatafunaga.

Aua lava nei galo o loo outou umia le perisitua a le Atua. Ina ua faaee e Ioane le Papatiso le Perisitua Arona ia Iosefa Samita ma Oliva Kaotui, sa ia ta’ua o lenei perisitua “o lo o i ai ki o asiasiga ma galuega a agelu, ma le talalelei o le salamo, ma le papatisoga i le faatofuina mo le faamagaloina o agasala” (MFF 13).

Tou te mananao i asiasiga ma galuega a agelu?

O asiasiga ma galuega o le a aumaia ai taui e le mafaatusalia. Filifili le ala maualuga po o le talalelei e ui ai, ona faamanuiaina lea o outou e le Atua ma “ona taitaiina lea [o outou] e le Alii ma tali atu i [a outou] tatalo” (tagai MFF 112:10).

O outou na alii ua matutua, ou te tuuina atu foi le talosaga lava lea e tasi ma lea foi lapataiga. O nai mea iti lava e amata ai ae tau atu ai i mala matautia. Tatou te feagai i taimi uma. Ua matua taatele naua ia i tatou le loto tiga, o le ita, o talitonuga sese, ma faaipoipoga ua tatala.

Ou te toe fia ta’ua lava se mataupu sa umi sa’u tautalaga i ai i le taimi ua fano. Ou te tautala atu e uiga i le mataga o le agasala faatufanua o le faasaunoa ma le faia faatautala o fanau.

E le mafai ona tatou taliaina lena mea. Matou te le taliaina lava. Soo se tasi e saua i se tamaitiiti, e tatau ona faia se fono a’oa’i faale-Ekalesia faapea foi ma se faaiuga faaletulafono.

O le faasaunoa i fanau o se faatausuai lea i le Atua. Sa fetalai Iesu i le matagofie ma le lotomama o tamaiti. Mo soo se tasi o loo lilifa atu i se faiga e ono oo atu ai i le sauaina po o le faatautala o le fanau, ou te fai atu i le gagana e aupito malosi e mafai ona ou tautala atu ai, ia pulea lau amio. Saili mo se fesoasoani ae e te le’i faamanu’alia se tamaitiiti ma faamatagaina ai oe lava.

O outou na alii o loo umia lenei perisitua taua, ia fusi atu i o outou agaga. Ia outou agavaa mo lena perisitua i taimi uma ma tulaga uma.

Afai tou te faia lena mea, o le a outou olioli i le “manuia mai le Atua, o loo silisili lava i mea uma e manatu i ai” (Filipi 4:7).

Ia faamanuia atu le Atua ia te outou, o’u uso pele o le perisitua, o talavou ma e ua matutua. Tama, fai se faataitaiga lelei mo a outou fanau. Tamaiti, vaavaai atu i o outou tama mo le poto ma le taitaiga ma le malamalama.

Oka se maoae o folafolaga a le Alii ia i latou e savavali i le faatuatua. Ou te tuuina atu au faamanuiaga, o o’u alofaaga, ma la’u molimau. Oka se malosiaga maoae ma le ofoofogia mo le lelei, o loo i ai i lenei perisitua pe afai tatou te tutu faatasi ma fetuleni atu i luma ma le lotogatasi. Ia faamanuia mai le Alii ina ia tatou faia faapea, ou te tatalo atu ai ma le lotomaualalo i le suafa o Iesu Keriso, amene.