O le Leo o le Fiafia mo a Tatou Fanau
O la tatou matafaioi lenei, o lo tatou avanoa lenei, e aoao atu ai ma le filiga ma molimau atu ia tatou fanau i le moni o le talalelei a Iesu Keriso.
Ou te fiafia tele i faailoga upu ofo! E masani ona ou faaaogaina pe a tusia ni au faamatalaga pupuu ia te au lava faapea foi i isi. O se auala e faaalia ai le naunautai ma se tautinoga. O se tasi o mau e sili ona ou fiafia i ai ua faamamafaina i se faailoga upu ofo:
“O lenei, se a se mea ua tatou faalogo i ai i le talalelei ua tatou maua? O se leo o le fiafia!” E 14 isi faailoga upu ofo o loo i ai i le vaega o totoe o le fuaiupu ma isi fuaiupu e fa o loo sosoo mai ai. E faitauina i ni nai vaega:
“O le leo o le alofa mutimutivale mai le lagi; ma se leo o le upumoni mai le eleele … o le leo o le … tala fiafia o le olioli sili… .
“ … O le mamalu o le siufofoga ua tatou faalogoina mai le lagi, o lo o talai mai i o tatou taliga, le mamalu, ma le faaolataga … !”1—i se faailoga upu ofo.
E mafai ona tatou faalogoina se leo e mafua ai ona tatou lagonaina le faamoemoe tele ma le olioli i o tatou lava olaga. O le olioli ia tatou molimau i le Faaola, e mafai ona faamamafaina i soo se vaega o o tatou olaga, ao tatou saili atu ina ia o mai ia Keriso.
Ae faapefea a tatou fanau? Latou te lagonaina ea faailoga malolosi o le olioli ma le faamoemoe i totonu o le talalelei? Ina ua uma se lesona i le peraimeri e uiga i le Uluai Faaaliga a Iosefa Samita, na tuuina atu i le vasega e tusia ni ata e ave i le fale ma fetufaai atu i o latou aiga. Sa aoaoina tamaiti i le pogisa na osofaia ai Iosefa ao lei afifio ifo le Tama ma le Alo. Na tago atu se teineitiiti e ono tausaga i le vali uliuli ma amata loa ona tusi lana ata. Sa ia valiina le pito i lalo e agai i luga o le itu e tasi o le pepa, i le lanuuliuli na mafai ona ia valiina ai. Ina ua fesili atu le faiaoga ia te ia e uiga i le ata, sa ia faapea mai, sa ia tusia le ata o Iosefa Samita ao i ai i le pogisa.
Na fesili atu le faiaoga: “E te iloaina, ina ua faaali mai le Tama Faalelagi ma Iesu, na alu ese uma le pogisa? E sili atu ona mamana le Tama Faalelagi ma Iesu, nai lo Satani, ma o le a Laua puipuia oe.” Na toe liliu atu le teineitiiti i lana pepa. I le tulimanu pito i luga, sa ia tusia ai ni auivi o ni tagata se toalua; ona sui lea o lana vali lanu uliuli i le lanu samasama malosi lava, ma na ia faatumuina ai le vaega na totoe o le laupepa i le malamalama.
O le malamalama lea, o le malamalama o le talalelei toefuataiina—o se “leo o le fiafia”— e mafai ona fesoasoani atu ai matua ia latou fanau ina ia latou iloaina. O le fili e moni lava, peitai e mafai ona lagonaina e tamaiti le filemu ma le olioli a o latou faaaogaina le faatuatua ia Iesu Keriso. O le a le mafai ona iloa e a tatou fanau lenei malamalama, sei vagana ua tatou aoao atu ia i latou le talalelei.
Ua poloaiina e le Alii matua ina ia “taitaiina a [latou] fanau i le malamalama ma le upumoni.”2 Ua ia poloaiina foi i tatou ina ia aoao a tatou fanau “ia tatalo ma savavali tonu i luma o le Alii,”3 ma “ia malamalama i le mataupu o le salamo, ma le faatuatua ia Iesu Keriso, … ma le papatisoga ma le meaalofa o le Agaga Paia.”4 E mafai ona tatou fesoasoani e saunia o latou taliga, mafaufau ma loto ina ia latou iloa “le leo o le fiafia” ma naunau ia agavaa mo le mauaina o le olioli faavavau pe a tatou aoaoina atu upumoni o le talalelei.
O le faataitaiga o lenei mea o lo o maua i le Tusi a Mamona. Na aoaoina Enosa e lona tama, “i le ma le aoaiga ma le apoapoaiga a le Atua.” O lenei faamanuiaga maoae na mafua ai ona folafola mai e Enosa, “Ia faamanuina lava le suafa o lou Atua, ona o lena mea.”5 Na faamatalaina e Enosa, “ma ua tuia lava lou loto i upu na fai mai e lou tama, na ou faalogo soo lava e uiga i le ola faavavau ma le olioli tele o le au paia.”6
Na faamatala mai e sau uo se aafiaga na ia oo i ai ao laitiiti lava o ia i se paranesi o le Ekalesia, lea sa na o ia ai le teineitiiti o le peraimeri. O vaiaso taitasi uma, e faia ai e lona tina se peraimeri i totonu o le latou fale i le aso e tasi ma le taimi foi e tasi. E tulimatai atu ai lava o ia ma le fiafia i le taimi la te nonofo faatasi ai ma lona tina i luga o le nofoa ma aoao i le talalelei a Iesu Keriso ma le ala e tatau ona ola ai i le talalelei. O tala tusitusia ma le faaeteete na faamaumauina e lona tina i se tamai api, na faaalia ai, o le peraimeri sa faia i le fale, e masani ona faia ai tatalo, pese, faapea ma se lesona.
O le faanaunauga o le loto o lenei tina, ina ia mafai e lana tama teine laitiiti ona faatupulaia se molimau ia Iesu Keriso ma ia lagona e ia le olioli i le talalelei. Sa ia tuuina atu i lana tama teine le mea sa sili ona taua ia te ia ao avea o ia ma se teineitiiti. O lenei teineitiiti laitiiti, ua avea nei ma tina o le faatuatua ma le feagaiga, ua toe tepa atu i tua i le taimi o lona laitiiti faatasi ai ma se agaga talisapaia loloto o le naunautai ma le tautinoga o lona tina ina ia aoao atu ia te ia e uiga i le Faaola. O le filiga o lenei tina na avea ma aafiaga faafiafiaina i lana tama teine—ma se faailoga upu ofo.
Ua manino le fofogaina mai e Perofeta soifua o o tatou tiute paia o le aoaoina o a tatou fanau.7 O se tusi na tuuina mai e le Au Peresitene Sili, ua faatonuina ai i tatou ina “ia tuu atu le faamuamua aupito maualuga i tatalo faaleaiga, o afiafi faaleaiga, suesue ma aoao i le talalelei, ma gaoioiga lelei faaleaiga. E ui i lea, tusa pe o le a le taua ma le talafeagai o isi gaoioiga, e le tatau ona faatagaina e suitulaga i tiute ua faatonuina mai e le Atua, ia e na o matua ma aiga e mafai ona faia lelei ai.”8
Ioe, e mafai ona televave le olaga mo matua, ma ua faapena ai foi mo le fanau. E faigofie ona faapea atu ua le lava se taimi e faia ai mea uma. I le tepa atu i tua i se taimi ua tea vave atu, ua mafai nei ona ou iloa, o aso taitasi sa faatumulia i ni nai taimi taua laiti e tumu i avanoa e fesoasoani ai i a tatou fanau ia lagonaina le “leo o le fiafia” i totonu o le talalelei. O tamaiti latou te aoao mai i taimi uma lava mai ia i tatou. Latou te aoaoina mea taua, mai mea tatou te filifili e fai faapea foi i mea tatou te filifili e tuu. O tatalo le fuafuaina lelei, o tatalo faaleaiga e seasea ona faia, o suesuega i tusitusiga paia, ma afiafi faaleaiga, o le a le lava lea e faamalolosia ai faaleagaga a tatou fanau. O fea o le a aoaoina ai e tamaiti le talalelei ma tulaga e pei o le legavia, amiotonu, ma le faamaoni, pe afai latou te le aoaoina i le aiga? O nei uiga e mafai ona faamalolosia i le lotu, peitai o matua o i latou ia e sili atu ona latou mafaia ma sili atu ona lelei i le aoaoina atu o nei mea ia latou fanau.
O le malamalama po o ai nei tamaiti ma mea latou te mafai ona faia i le malo o le Atua, e mafai ona fesoasoani ai ia i tatou e maua ai se naunautaiga sili atu e faafetaiaia ai luitau ma se onosai sili atu—ma se alofa foi e sili atu. O le a fesoasoani mai le Alii ia i tatou i le aoaoina o a tatou fanau, pe afai o le a tatou faia mea uma tatou te mafaia. E faavavau aiga, ma e finagalo le Faaola ina ia faamanuiaina i tatou i le aoaoina o fanau. Ao tatou saili atu mo le Agaga, e mafai ona tatou maua le faamafanafanaga, taitaiga, ma le faamalosiauga tatou te manaomia i le faataunuuina o matafaioi ma maua ai faamanuiaga o le avea ma ni matua.
O polokalama musuia mai le lagi a le Ekalesia faapea ma i latou ua valaauina e aoao atu ia tatou fanau, e mafai ona fesoasoani ia i tatou. Ma te lagonaina ma lou toalua le agaga faafetai i epikopo, taitai perisitua ma taitai o ausilali, faiaoga o aiga ma paga asiasi, o e na fesoasoani e faamalolosia lo maua aiga. E tusa lava pe i ai ni tamaiti i totonu o o tatou lava aiga pe leai foi, o i tatou taitoatasi e mafai ona tatou faia ni sao taua i le fesoasoani atu i matua.
O tamaiti e mafai ona latou aoaoina mea taua o le malo. Pe a tatou faalogo atu ia i latou, e mafai ona tatou malamalama lelei i le ala o lo o latou faaaogaina ai mea ua latou aoaoina e uiga i le talalelei. Na faamalamalama atu e se tama i lona afafine e fa tausaga le matua, na toeitiiti o le aso atoa na faaaluina e le aiga, i le faamamaina o le fale ma ua mama uma lava potu sei vagana ai le potu e tasi.
Na ia fesili atu ia te ia, “E te iloaina o le fea potu e le o mama?”
“O lo’u potu,” na ia tali faavave atu ai.
“E te iloaina se tasi e mafai ona fesoasoani i le faamamaina o lou potu?” sa ia fesili atu ai, ma le manatu, o le a ia tali mai e mafai ona ia faia.
Nai lo lena, sa ia tali mai, “Vaai oe Tama, ou te iloa, soo se taimi lava e te fefe ai, pe popole, pe e te manaomia ai se fesoasoani, e mafai ona e tootuli i ou tulivae ma ole atu i le Tama Faalelagi e fesoasoani mai.”
E matagofie i le maitau pe a tatou faalogologo atu ia tatou fanau, ma e mafai foi ona latou aoao mai i tatou. Na fetufaai mai e se tama se aafiaga na ia maua mai i lona afafine e valu tausaga le matua. Sa ia faapea mai, “Ao ou manatunatu i lau tautalaga mo lau lauga i le lotu faamanatuga e faatatau i le ‘Avea faapei o Tamaiti Laiti,’ sa ou fesili atu i lou afafine pe aisea e manaomia ai ona avea i tatou faapei o tamaiti laiti. Sa ia tali mai, ‘Aua o i tatou uma lava o tamaiti laiti e faatusaina ia Iesu, ma o tamaiti laiti e lelei o latou mafaufau.’”
Na faateia o ia i le vaega mulimuli o lana tali, ma ia fesili atu ai pe aisea tatou te manaomia ai se mafaufau lelei. Na ia tali mai, “Ina ia mafai ona tatou vaai faalemafaufau ia Iesu i le Faatoaga o Ketesemane ma luga o le satauro, ma o le taimi tatou te fetagofi atu ai i le faamanatuga, e mafai ona tatou mafaufau ai e uiga ia te Ia.”
Ua faia e le Faaola le faataitaiga mo i tatou, e pei ona faia i mea uma, i le ala e tatau ona tatou alolofa ma aoao ai a tatou fanau. Ina ua faaali atu o Ia i Sa Nifae i le konetineta o Amerika, ua tau mai e tusitusiga paia ia i tatou, ao Ia fetalai atu i tagata, “ua tagi o ia, … ua ave foi e ia o latou tamaiti taitoatasi ma faamanuia ia te i latou, ma ua tatalo i le Tama mo i latou.”9
Na saunoa Peresitene Gordon B. hinckley, e faatatau i lea tulaga, “Ua leai lava se isi vaaiga faaootia loto ma le matagofie i tusitusiga paia uma, nai lo ia upu faigofie ua faamatala ai le alofa o le Faaola mo fanau laiti.”10
O le ki i le ausiaina ma le lelei o le aoaoina o le talalelei i totonu o le aiga, o le valaauliaina lea o le Agaga o le Alii ina ia faatasi ma i tatou. O nisi o lapataiga sili ona lelei na ma maua mai ma lou toalua i nisi o taimi faigata o le tausiaina o le ma fanau, o le faia lea o mea uma e mafai e valaauliaina ai ma faatumauina ai le Agaga i totonu o lo matou aiga. E le mafai ona aoaoina e tamaiti mea faaleagaga ma mauaina ni lagona faaleagaga e aunoa ma le taitaiga a le Agaga.
I le avea ai ma matua, e mafai ona tatou fetufaai atu a tatou molimau ia Iesu Keriso i taimi uma ia tatou fanau. O le tuuina atu o se molimau, a le o taimi o afiafi faaleaiga, po o se taimi o faia ai se aoaoga, o le a valaaulia ai le Agaga. Ua faapea foi ona faatonuina i tatou e Peresitene Boyd K. Packer ina “ia aoao o tatou tupulaga talavou e tuuina atu a latou molimau—ia molimau atu o Iesu o le Keriso, o Iosefa Samita o se Perofeta a le Atua, ma e moni le Tusi a Mamona”11
Ua faamautinoa mai e Peresitene Gordon B. Hinckley ia i tatou, “I olioliga uma o le olaga, e leai se mea e tutusa ma le fiafia faalematua. I tiute uma tatou te feagai ai, e leai se tiute e sili atu ona mamafa. O le tausia o fanau i le siosiomaga o le alofa, saogalemu ma le faatuatua, o le lui sili lea ona taua.”12
Ou te iloa—ma se faailoga upu ofo—e mafai e tamaiti ona maua se molimau e ala mai i le Agaga e aumaia ai le talitonuga maumaututu ma le tautinoga i o latou loto. Ou te molimau atu o la tatou matafaioi lenei, o lo tatou avanoa lenei, e aoao atu ai ma le filiga ma molimau atu ia tatou fanau i le moni o le talalelei a Iesu Keriso, ina ia mafai foi ona latou lagonaina le “leo o le fiafia.” I le suafa o Iesu Keriso, amene.