Ma le Paia o le Loto
O taimi uma lava tatou te aapa atu ai ma le alofa, onosai, agalelei, limafoai, ua tatou faamamaluina foi a tatou feagaiga i lo tatou faapea atu, “O Au lenei, auina atu au.”
E ui lava ina sili atu ona toatele lo tatou faitau aofai nai lo uso o le Aualofa na i ai i Navu, ae e tutusa lava le agaga o la tatou mafutaga. E faapei foi o i tatou, sa latou sii a’e, faafailele ma musuia e le tasi le isi; sa latou taufai tatalo o le tasi mo le isi; sa latou faapaiaina a latou meatotino uma mo le Ekalesia. Sa faamatalaina e Peresitene Hinckley i tatou “o se vaituloto tele o le faatuatua ma galuega lelei … o se taula o le naunautai ma le faamaoni ma le faataunuuga.”1 E maeu le ofoofogia, pe o tatou i ai i le Nofoaga Autu mo Konafesi, po o le falelotu i Mekisiko, po o se paranesi i Litunia, o i tatou lava o uso i Siona o lo o i ai se galuega tele e ao ona fai. Ma e tatou te aufaatasi e faia, a o taitaia e se perofeta a le Atua! Ou te faamoemoe o outou lagonaina lo’u alofa ia te outou—o le alofa lava lea matou te auau faatasi ai ma o’u fesoasoani, o e ua avea ma faamanuiaga tele ia te au.
O le faapea mai sa ou lofituina ina ua tofia au e Peresitene Hinckley e galue auauna o se peresitene aoao o le Aualofa, e matua le lava lava lena faaupuga! Mata tou te le malamalama i ai? Peitai, sa ou tali atu i se leo gatete, “O Au lenei, auina atu au.” Ina ua iloa e sa’u uo Iutaia mea e manaomia i lo’u valaauga, sa tilotilo mai o ia e faapei o au ua valea ma sa fesili mai, “Bonnie, aisea o le a e faia ai lena mea?” (O taimi foi faapenei, e masani ona ou fesili ai lava au i lena mea e tasi!) Peitai e na o le tasi lava le mafuaaga sa ou faia ai: Ua uma ona ou osi feagaiga ma le Alii, ma ua ou iloa le mea o lo o manaomia ai. E le gata i lea, sa ou iloaina o outou ma au, o le a galulue faatasi; ma o lo’u naunau atu sa avea ai au ma sui o i tatou uma.
E tele senituri, sa tutulai mai ai tamaitai amiotonu ma auai i le galuega a Keriso. E toatele outou e lei leva ona papatiso; o lo o momosi a outou feagaiga i o outou loto, o lo o mu’amu’a foi a outou taulaga. Pe a ou mafaufau ia te outou, ou te manatua ai lava ia Priscilla Stains mai Wiltshire, i Egelani. E sefuluiva tausaga o Priscilla ae auai i le Ekalesia i le 1843. Na o ia lava. Sa sola faanana o ia i le po e papatiso; aua sa matua ogaoga sauaga o ona tuaoi, ma le le fiafia o lona aiga. Sa ia tusia: “Sa matou faatalitali seia oo i le vaeluaga o le po … ona matou agai atu ai lea i se vai e kuata maila le mamao. O iina na matou maua ai le vai … ua liu aisa, ma sa tata e le alii faifeautalai le aisa e fai ai se avanoa tele e fai ai le papatisoga… . E leai se tasi vagana ai lava le Atua ma Ana agelu, ma ni nai molimau toaitiiti sa matou tutu i le auvai o le vai, sa faafofoga i la’u feagaiga; ae i le taaligoligoa o lena valuapo, sa foliga mai ua faalologo uma le natura ae tusitusi e agelu sa faamaumauina a matou upu, i le tusi a Ieova.”2
O ana upu, “E leai se isi na o le Atua ma ana agelu … na faafofoga i la’u feagaiga,” na tuia ai lo’u loto, aua e faapei foi o Priscilla—tusa po o le a lo tatou matutua, o lo tatou malamalama i le talalelei, po o le umi ona tatou i ai i le Ekalesia—o i tatou uma lava o tamaitai o le feagaiga. O se fasi fuaitau lena e masani ona tatou faalogo ai i le Ekalesia, ae o le a lona uiga? E faamatalatala faapefea e feagaiga pe o ai i tatou ma pe o faapefea foi ona tatou ola?
O feagaiga—po o folafolaga mausali i lo tatou va ma le Tama Faalelagi—e taua mo lo tatou atinaega e faavavau. O lea laasaga ma lea laasaga, Na te aoaoina ai i tatou ina ia avea e faapei o Ia e ala i le valaauina o i tatou e auai i le faatinoga o Lana galuega. O le papatisoga tatou te osi feagaiga ai e alolofa ia te Ia ma o tatou loto atoa, ma alolofa foi i o tatou uso ma tuagane e pei ona tatou alolofa ia i tatou lava. O totonu o le malumalu tatou toe osi feagaiga ai foi e usiusitai, ia le manatu faapito, faamaoni, faamamalu, ma agaalofa. Ua tatou osi feagaiga e ositaulaga ma faapaiaina a tatou mea uma. O le agaigai i luma e ala i le pule o le perisitua, o lo tatou tausia o a tatou feagaiga e aumaia ai faamanuiaga e faatutumu ai a tatou ipu seia taumasuasua. E faafia ona e manatunatu o au feagaiga e le na o le olaga nei e aafia ai, ae fesootai atu ai oe i le Lagi? O le osia o feagaiga o se faailoga o se loto naunautai; o le tausia o feagaiga o le faailoga lea o se loto faamaoni.
E foliga mai e ese le faigofie pe a tatou faitauina, a ea? O le mea moni, o le faatinoina, o iina tatou te faamaonia ai po o ai moni i tatou. O le mea lea, o taimi uma lava tatou te aapa atu ai ma le alofa, onosai, agalelei, limafoai, ua tatou faamamaluina foi a tatou feagaiga i lo tatou faapea atu, “O Au lenei, auina atu au.” E masani lava ona tatou tautalatala lemu i nei upu, e le faalauiloaina i se faaili pu.
O anafea na osi feagaiga ai se isi tagata ma le Alii ma faamanuiaina ai lou olaga, ma aumaia ai le filemu, ma faafaileleina ai lou agaga? A o ma faamisiona ma lo’u toalua i Egelani, sa ma vaaia ai le toatele o alii ma tamaitai faifeautalai sa faaaafiaina tonu o latou soifua i feagaiga a tamaitai agavaa. Sa tumu au i le faafetai i tina, o tamaitai, o tuafafine o tama ma uso o tina, o faiaoga—e faapei foi o le toatele o outou—o e ua avea le tausia o a latou feagaiga ma ala ua oo atu ai faamanuiaga i isi, i auala na latou aoaoina ai na faifeautalai mo le lumanai.
O feagaiga e le gata ina faatauanauina malie i tatou e fai mea e le masani ona tatou faia ma agai atu ai i se atinaega fou, ae e taitai mai ai foi isi e faia lea lava mea. “O galuega na outou vaai i ai ua ou faia, ia faia foi e outou.”3 O Lona tausi feagaiga foi e uunaia ai i tatou.
O feagaiga e laveai mai ai i tatou i puapuaga e le manaomia. Mo se faataitaiga, a tatou usiusitai i taitaiga a le perofeta, ua tatou tausia a tatou feagaiga. Ua ia fautuaina i tatou e aloese mai le fai aitalafu, ia i ai pea lava pea se sapalai o meaai, ma ia ola faalagolago le tagata ia te ia lava. O le ola e tusa ma mea tatou te maua, e faamanuiaina ai i tatou e sili atu i lena usiusitai. E aoao mai ai ia te i tatou le loto faafetai, amio pulea, o le le manatu faapito; e maua ai le filemu mai le mamafatu o mea tautupe, ma le puipuiga mai le matapeapea i mea o le lalolagi. O le faatutumuina pea o a tatou lamepa o lona uiga, o tulaga e le maalofia e le taofia ai avanoa e fai atu ai ma le naunautai “O Au lenei, auina atu au.”
O le faafouina o a tatou feagaiga e faaosofia ai ma faafouina se agaga ua vaivai. O Aso Sa Taitasi, pe a tatou aai ma feinu i le faamanatuga, o le a le mea e tupu i o tatou loto pe a tatou faalogo e le aunoa i upu “ia manatua pea o Ia”?4 Pe sili atu ea so tatou lelei i le vaiaso e sosoo ai, i le toe taulai atu lea i mea e sili atu ona taua? Ioe, tatou te feagai ma mea faigata; ioe, o le faia o na fetuutuunaiga e faavaivai tagata. Peitai, pe ua outou manatunatu ea pe na faapefea ona ola mai o tatou uso sa tuliesea mai Navu, a o le toatele sa savavali i le savaliga atoa? Ina ua vaivai o latou vae e savavali, o lo latou naunau e tausi a latou feagaiga sa faaauau ai! O a nisi mea e mafai ai ona maua lea ituaiga malosi faaleagaga ma le faaletino?
O feagaiga foi e puipuia ai i tatou mai le “felafoaiina, ma feaveaiina i matagi uma lava o mataupu, i le pepelo o tagata, i togafiti leaga ua saunia e faasese ai.”5 O tamaitai o le feagaiga e tutu ma le mausali pe a fai mai e lelei mea leaga, ae leaga le mea lelei. Pe o totonu o le potuaoga i le kolisi, po o le galuega, po o le matamata i polokalama fou a “tagata popoto faapitoa” i le TV, o le manatuaina o a tatou feagaiga, e taofia mai ai i tatou mai le taitai seseina.
O feagaiga e mafai ona saogalemu faaleagaga ai i tatou ma i latou tatou te alolofa i ai, ma saunia ai foi faaleagaga e ala lea i le faamuamua o mea e tatau ona faamuamua. Mo se faataitaiga, a oo mai i aiga, tatou te le manaomia le manatu faapito ma le faasoesa mai. Ua mou atu aso sa tafulufulu ai faatamaitiiti, e toaitiiti lava nisi o lo o maua na aso o le susulu o le la lea sa ou iloaina a o ou tuputupu ae i se faatoaga. Sa saunoa mai Peresitene Hinckley ia te i tatou: “O a tatou faafitauli, toetoe o faafitauli uma, e mapuna a’e i aiga o tagata… . Afai e tatau ona i ai se suiga, … e tatau lava ona amata i le aiga. O iina e aoao ai mea moni, e atiinae ai le amiosa’o, e toto ai le amio pulea, ma faafaileleina ai le alofa.”6
Uso e, e manaomia e le Alii ia tamaitai e aoaoina fanau ia galulue ma aoao ma tautua ma talitonu. Pe o ni a tatou fanau totino, po o ni fanau a nisi, e tatau lava ona tatou tutulai ma le naunautai ma faapea atu: “O Au lenei, auina atu au e vaai lau fanau, e faamuamua i latou, e taiala ma puipui i latou mai le leaga, ia ou alofa i ai.”
E i ai nisi taimi tatou te feagai ai ma le tausiga o a tatou feagaiga pe a foliga mai e leai se mafuaaga talafeagai e faia ai. Sa ou faalogologo i se uso nofofua o faamatala se mea na oo ia te ia e tusa ai ma le “faalagolago atoatoa i le Alii.” Na oo lona olaga i le mea na te lei mafaufauina. Tou te masani i lena faaupuga? O le vaitaimi matuia lenei na taitai atu ai i le faalagolago atoatoa i le Alii, na iloga i le fesuiaiga o galuega, o le mamafatu o mea tautupe, o le felafoaiina i manatu faalelalolagi. Ia faafofoga la i le mea sa na ia faia. Sa latou talanoa ma isi uso i lana uarota, na ia iloa ai, o la foi e tau saili e na uso le filemu e maua mai i le talalelei. Sa ia talosagaina se faamanuiga faale-perisitua. Sa ia faataunuuina ma le lototele lona valaauga. Sa ia suesue ma taumafai e tuuina atu ma le atoatoa lona alofa, faafetai ma le talitonuga maumaututu ia Iesu. Sa ia tatalo. “Sa ou tagi atu i le Alii,” na ia fai mai ai, “ma ta’u atu ia te Ia o le a ou faia soo se mea lava Na te poloaiina ai au.” Na ia faia nei mea uma e ui lava i na faigata [sa ta’ua i luga]. Tou te iloa la le mea na tupu? Leai, e le faapea na te’i ua tu atu i lona fale sana soa e faavavau. Ae, na oo atu le filemu i lona loto, ma sa lelei atu le mea na oo i ai lona olaga.
Uso e, tatou te tausia a tatou feagaiga pe a tatou fetufaai atu i isi lo tatou atamai i lenei olaga, e faamalosiau ai i se tasi, pe a faiaoga asiasi ma se soa faamaoni, pe a tatou fesoasoani i se uso talavou ia na iloaina, o ona manatu o le a faamanuiaina ai i tatou i le Aualofa. E mafai ona tatou faia lena mea!
Ina ua laasia le vasa Atelani e le tamaitai talavou o Priscilla, lo tatou uso Peletania na liliu mai i le 1843, sa faauo atu ia te ia se tamaitai matua pe talitutusa lava ma lona tina. Sa lagona e lenei tina matua se faanaunauga mumu e faataunuu feagaiga sa ia osia. Ina ua latou tuta i le uafu i Navu, sa i ai o ia i tafatafa o Priscilla. Sa la mafuta atu i le au paia a le Atua, ma le lototoa ma le loto talitonu.7
O le faamaoni faaleagaga e tausia a tatou feagaiga e maua mai i le tumau ona suesue i tusitusiga paia, tatalo, auauna atu, ma le ositaulaga. O ia laasaga faigofie e faafaileleina ai o tatou agaga ina ia mafai ai ona tatou faapea atu, “Auina atu au e fesoasoani i se uso ma sana pepe fou; auina atu au ou te faiaoga fesoasoani i se tamaitiiti aoga o lo o manaomia se fesoasoani; auina atu au sei ou alofa i se tagata e le lotu. Auina atu au i le mea e te manaomia ai au, pe a e manaomia au.”
Ua valaauina i tatou e le Alii e faia mea uma tatou te faia ma le “paia o le loto.”8 O le paia o se taunuuga lea o le ola ai i feagaiga. Ou te fiafia lava i upu o le pese lenei ma lagona ou te maua mai ai:
Faapaia mai a’u;
Ia taumafai pea,
Onosai i tiga,
Faanoanoa i sese,
Ia faatuatua,
I le Faaola,
Fiafia e auauna;
Tatalo aoga.9
O le paia e oso vave mai ai upu nei “O Au lenei, auina atu au.” Ina ua osia e Priscilla Stains lana feagaiga faavaluapo i lena vai ua liu aisa, sa tulai atu o ia i se ola fou, o ona lavalava na toetoe a malo i le aisa, ae na mafanafana lona loto i le olioli: “Sa lei i ai se toe faliu i tua,” na ia fai mai ai. “Sa … ou agai atu mo le mauaina o le taui o le ola e faavavau, ma sa ou faalagolago i le Atua.”10
Peresitene Hinckley, faatasi ai ma uso o le Aualofa i le lalolagi atoa, ou te tautino atu ia te oe, matou te tutu faatasi o ni tamaitai o le feagaiga ma gauai atu i lou siufofoga. I le vaoā gagana eseese, faafofoga mai i upu a uso taitasi o le Aualofa a o matou faapea atu, “O Au lenei, auina atu au.”
Talosia ia taitaia i tatou e a tatou feagaiga taitoatasi o lo o fusia ai i tatou ma lo tatou Tama Faalelagi, ia puipuia ai i tatou, faapaia i tatou, ma mafai ai ona tatou faia foi faapena mo Ana fanau uma, ou te tatalo atu ai i le suafa o Iesu Keriso, amene.