Elder Daryl H. Garn
O Le Au Fitugafulu
A o avea Daryl H. Garn ma se faifeautalai i Kanata i Sisifo, sa asiasi atu i ai lona peresitene o le misiona i lana eria. Sa seasea lava vaai Elder Garn i le peresitene o le misiona ona o le tele naua o le misiona, o lea sa avea ai lenei asiasiga ma se mea sili ona faapitoa.
“Ina ua faaiu le molimau a Peresitene Arave, sa ia faapea mai na ia iloaina lelei na mea nai lo se isi lava mea,” sa tomanatu ai Elder Garn, “ma sa molimau mai le Agaga i lo’u mafaufau e moni lava—e mafai ona e iloaina lelei mea o le Agaga pe sili atu foi nai lo se isi mea ua e iloa.”
Talu mai lava lena aso, sa lagolagoina ai Elder Garn o se uso o le Korama Lua a le Au Fitugafulu, sa ia saga silafiaina ai pea lava pea le moni o le molimau a lona peresitene o le misiona. Na ia toe manatuaina ni nai tausaga mulimuli ane ai, a o ia faatalitali i se konafesi faalesiteki i Ohio, sa musumusu atu ai le Agaga o le a tofia o ia i le au epikopo o le latou uarota. Sa faatoa lua vaiaso talu ona auai o ia i se aoga faafomai nifo, ae a o le i uma le aso, ae fofoga aloaia mai loa le tofiga e Peresitene Spencer W. Kimball (1895–1985), a o avea o ia ma uso o le Korama a Aposetolo e Toasefululua.
“Na saunoa mai Elder Kimball, ‘Uso Garn, ua tofia oe e le Alii i lenei tofiga, ma afai e te faamuamua mea e tatau ona faamuamua, o le a Ia faamanuiaina oe,’ ” na toe tomanatu ai Elder Garn. Ua ia lagona o lona auauna atu ma le maelega i ona valaauga—ia e aofia ai le avea ma se epikopo, peresitene o le siteki, peresitene o Alii Talavou, fautua maualuga, ma le Fitugafulu Pule Eria—na lagolagoina ai o ia i vaega uma o lona soifua.
Fai mai lona faletua o Irene, e naunau lava o ia [lona alii] e le aunoa e faamuamua le Alii, ma e talia foi e ia soo se valaauga—tusa lava pe o se valaauga e fesoasoani i le fale pe taitai se uarota—e fai mai lava o ia ma le lotomalie, “O le mea tonu lava lena ou te manao e fai!”
Na soifua mai Elder Garn i le aso 28 o Tesema 1938 i Tremonton, i Iuta, i ona matua o Uel ma Lolita Hodges Garn. Na faaipoipo i la’ua ma Irene Hall i le aso 19 o Tesema 1961 i le Malumalu o Logan Iuta. E toaono o la’ua alo ae 19 a latou fanau. Sa tutupu ae lo latou aiga i Mesa, Arizona.