Gauai Atu i Faatosinaga a le Agaga Paia
O nei uunaiga tatou te lagonaina, e afua mai i se punavai faalelagi ma afai o le a tatou mulimulitaia, o le a fesoasoani tatou te tumau ai i le ala sao, ma o le a puipuia ai i tatou mai faatosinaga leaga ma auala matautia
Sa tausia au e ni matua alolofa i totonu o se aiga, na aoaoina ma faatinoina ai ni uiga, na tapenaina ai le ala mo lou feiloai atu i le Ekalesia ma lou taliaina o mataupu faavae o le talalelei. Na ou papatiso i le masina o Aokuso i le 1959, ae lei leva ona tuanai lou aso fanau o le 19 o o’u tausaga. Ao ou manatunatu loloto i mea na tutupu ao lumanai lou liliu mai, na ou manatuaina ai se aafiaga na oo ia te au ao ou laitiiti.
Sa lata mai i le fale sa ou nofo ai ao ou tamaitiiti, se fale tele lava. Sa tu i se fanua matagofie, sa siomia i se mea sa ou manatu, o se pa maualuga lava na faia i fasi laupapa manifinifi ma lauiti, masalo e ono futu le maualuga. Ou te manatuaina lou tilotilo atu i pupu i pito na toulu ese ai fasi laupapa. Sa pei lava o le tilotilo atu i se mea vaai mamao i se isi lalolagi e ese mai. O le mutia na matagofie lona moaina, ma se togalaau sa tausia lelei, ma se tamai faatoaga fualaau aina na foliga mai ai o se parataiso mo le fale uiga ese. O le mea e leaga ai, o le avanoa e fiafia ai i lea vaaiga, e masani ona puupuu ona o le taifau leoleo o le ituaiga o taifau Peretania, na te leoleoina le faatoaga, ma e vave lava ona ia iloaina soo se tasi e tutu latalata atu i fafo o le pa. E ui lava ina sa nonoa le taifau feai i totonu o le faatoaga, o le malosi o lana sosogi ao sau agai i le pa, na mafua ai ona ou aluese mai ma le fefe, ao faafoliga i lou mafaufau se mea e ono fai e le taifau ia te au.
Sa nonofo i lea fale, se ulugalii faiaoga o le Susuga a Lyons ma lona Faletua. E ese lava o laua uiga, ma na foliga mai sa laua fiafia i le na o i la’ua i lo la fale. O le isi mea e mataina ai, o le Susuga a Lyons e leai sona lima taumatau, ae na te faaaogaina se faamatau uamea e lala mai i lalo o le lima o lona peleue. I lou mafaufau faatamaitiiti, na mafai ona ou vaai faalemafaufau i le Susuga a Lyons o tuliina au, ma maua mai, e ala lea i le louina mai o le kola o lou ofu ma aveina au faapagota.
Ou te manatuaina se tasi taeao o Aokuso, pe o le 10 po o le 11 o ou tausaga, ina ua tuanai se po matagi lava, sa faafetaui ai au e au uo, ao ou tuua lo matou fale. Na foliga mai sa latou matuai fiafia lava i se mea ma fesili mai, “Na e lagonaina le matagi anapo?”
Ina ua ou fai atu sa ou lagonaina, na faaauau ona latou tauina mai ia te au le mea na latou iloaina—na lelea ese ni vaega o le pa sa siomia ai le fale o le aiga o Lyons i le matagi. Sa ou le malamalama pe aisea ua mafua ai lo latou fiafia tele ona o lea mea, ma ou fesili atu i ai e faamalamalama mai pe taua i se a.
Sa faateleina lo latou sagisagi mai ma faapea mai: “Ua mafai nei ona maua lo tatou avanoa i le toga apu!”
Sa ou faaeteete pea lava ma toe fesili atu, “ Ae faapefea ia Misi Lyons?”
E le o i ai Misi Lyons ma le Faletua i le fale, o lo o malaga e asiasi i o laua aiga.”
“Ao fea le maile?” o lou fia iloa lea.
“O la ua ave e le aiga i le fale e vaavaai ai meaola seia toe foi mai,” o le tali mai lea.
O le mea mautinoa lava, sa faia e au uo se suesuega maeaea. O lea, ina ua ou talitonu ia latou upu, sa matou o atu loa mo lo matou faamoemoe. Ina ua matou taunuu i le fanua, sa matou feaei loa i laau ma tau mai fua o apu, ma faatutumu ai a matou taga faapea foi ma totonu o o matou mitiafu. Na faatopetope ma tatavale lou fatu, ona sa ou fefe lava nei oso faafuasei mai le taifau po o le alii o Lyons, po o laua uma foi i le faatoaga ma maua ai i matou. Na matou taufetuli mai le toga apu i se nofoaga tuufua, i se togavao lata ane, ma ina ua uma ona to o matou sela, sa amata lona ona ai a matou apu.
O le vaitaimi lea o Aokuso, e lei pula lelei ai apu mo le faaaogaina. O le mea moni sa oona i le tofo, peitai e lei mafai e le oona ona taofia i matou mai nei apu lanumeamata, ao matou faaaogaina ma le fiafia o matou taui, na faia i luga o faatosinaga ua le mafai nei ona ou faamatalaina. Ina ua uma le aiina faaatuatuvale o se vaega tele o a matou apu, sa faamalieina au i le na o le taitasi lava o le u i apu uma ma lafoai mea na totoe i le vaivao lata ane. Na vave mou ese atu le malie, ina ua amata lemu lava ona tali mai o matou tino i le tele o apu na tatope ona matou aiina. O le aafiaga faakemikolo i le va o le suavai o le laualo ma apu moto, na mafua ai ona ou lagonaina le tiga o lou manava ma le faafaufau. Ao ou saofai ma lou salamo ona o le mea na ou faia, sa ou iloa ai, na sili atu ona ou le mautonu ona o ni lagona sa ia te au, nai lo apu moto.
O lagona o le le fiafia ona o le iloaina lea e sese la’u mea ua fai.
Ina ua faatu mai e au uo ina ia matou osofaia le faatoaga, sa ou lagonaina le le mautonu, peitai sa leai sou lototele ou te fai atu ai e ‘leai’ o lea na ou le faaalia ai ou lagona. Ma, ina ua uma ona faataunuuina lea fuafuaga, sa faatumulia au i le faanoanoa. O lou faanoanoaga, ona sa ou le amanaia musumusuga na lapataia ai au i le sese o au amioga.
O pa faaletino ma malosiaga i le itu i fafo, e mafai ona taofia mai ai i tatou mai le uia o auala sese; peitai o lo o i ai foi se faalogona i totonu o i tatou taitoatasi, o nisi taimi e faamatalaina ai o le leo filemu ma le itiiti,1 ma afai o le a tatou iloaina ma usiusitai i ai, o le a fesoasoani lea, e taofia mai i tatou mai le gauai atu i faaosoosoga.
I ni tausaga mulimuli ane, na i ai se aafiaga tele o le saunoaga a Peresitene Boyd K. Packer ia te au, ina ua ia aoao mai e faapea, “ E le mafai ona tatou faia se mea sese e aunoa ma le laasiaina muamua o se lapataiga.” Ou te mafaufau i lena mea na tupu ma isi foi taimi faapena—o lagona ma manatu e oo mai, ao tatou mafaufau i taunuuga o a tatou amioga.
Ua faalauteleina e le Perofeta o Mamona la tatou vaaiga i le faapogai o na faalogona i upu nei: “Ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga.”2
O le manatu ua i ai ia i tatou uma lenei meaalofa o le taitaiga, ua faamaonia mai e le Evagelia a Ioane, o lo o tusia ai e uiga i le Faaola, “O [Ia] o le malamalama moni lea, na te faamalamalamaina tagata uma lava i lona maliu mai i le lalolagi.”3
O nei uunaiga tatou te lagonaina, e afua mai i se punavai faalelagi ma afai o le a tatou mulimulitaia, o le a fesoasoani tatou te tumau ai i le ala sao, ma o le a puipuia ai i tatou mai faatosinaga leaga ma auala matautia.
I ni nai vaiaso talu ona mavae lea aafiaga i apu, sa ou alu atu ai matou te tafafao ma au uo i se togavao lata ane, ma le faamoemoe o le a matou faia ni gaoioiga po o ni taaloga. Ina ua ou taunuu atu, o lo o latou faaputuputu faatasi mai. Sa ou vaaia le asu o lo o alu ae i o latou luga ma na ou iloaina lelei le manogi o se tapaa ola. Na aumaia e se tasi o i latou se pepa sikaleti, ma sa latou ulaina. Sa latou valaauliaina au ina ia ou faatasi atu ia i latou ae na ou teenaina. Sa latou tauanau mai pea ia te au, ma faapea mai o lou musu e alu atu, o se faailoga o lou palaai. O a latou ulaga na avea ma taufaifaiga, faatasi ai ma ni faamatalaga faalumaluma. Peitai e leai se mea na mafai ona latou tau mai pe faia na mafai ona faaosoina au e suia lou mafaufau. Ou te lei ola ae ma se malamalama o le talalelei toefuataina ma sa leai se mea na ou iloa e uiga i le Upu o le Poto, ae sa taofia au e se lagona mai i totonu, e le tatau ona ou faatasi atu ia i latou.
Ao ou savalivali i le fale ma ou tomanatu i le filifiliga na ou faia, sa ou lagonaina ni faalogona lelei i totonu. E ui lava ina ua le taulau ou faamoemoega o lena aso, ma ou taumafai ai e suesue se mea e faaaluina ai lou taimi e aunoa ma au uo, sa ou iloaina ai se mea e uiga ia te au lava—e uiga i le puna o le fiafia moni ma se malosiaga mautinoa e oo mai, i le faia o le filifiliga sao, e tusa lava pe o a tulaga po o iuga e oo mai.
O le faaaliga na maua e Iosefa Samita ua faamalamalamaina ai faamanuiaga e o mai faatasi ma le pipii mau atu i lenei puna o taitaiga, i totonu o nei fasi fuaitau o mau: “E tuuina atu foi e le Agaga le malamalama i tagata taitoatasi e oo mai i le lalolagi; o le lalolagi foi e faamalamalamaina ai e le Agaga tagata taitoatasi o e gauai i le leo o le Agaga.”4
E le gata ina aumaia e lenei fuaiupu se molimau faaopoopo, e uiga i lo tatou mauaina uma o se avanoa i lenei puna o taitaiga faalelagi, ae ua faapea foi ona faamamafa mai ai le manaomia ona tatou faalogo ma usitai i musumusuga tatou te maua. O le folafolaga o lo o mulimuli mai ai, e taua tele ia te au: “O tagata uma foi o e gauai i le leo o le Agaga e o atu i le Atua, o le Tama lava lea.”5
O nei musumusuga, o nisi taimi ua taua o mafaufauga, peitai, ua faamalamalama atili mai, o le Malamalama o Keriso, e le gata ina fesoasoani ia i tatou e filifili ai le mea sao ma le mea sese, pe afai o le a tatou mulimuli i ai, o le a latou taitaiina atu i tatou i le puna o le malamalama lea e afua mai i le faatasi mai o le Tama ma le Alo.6
Na folafola mai e le Faaola i Ona au soo, “Afai tou te alofa mai ia te au, ia outou tausi mai i au poloaiga. Ou te fai atu foi i le Tama, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau; O le Agaga lea e tupu mai ai le upumoni.”7 Sa ia toe faamalamalama mai foi lenei meaalofa “o le Fesoasoani, o le Agaga Paia lea.”8 E mafai e se tasi ona maua faaaliga a le Agaga Paia ae o le meaalofa o le Agaga Paia, e tuuina atu i ai, ma na o le pau lava le ala e tuuina atu i ai, o le faaee atu lea o lima pe a uma ona papatisoina.9
Ua ou aoaoina e talisapaia ma le atoatoa le mafuaaga ua tusia ai e uiga i Ona au soo i le Itu Lalolagi i Sisifo, “Ma ua latou tatalo i mea sili ua latou mananao i ai, ua latou mananao foi ia foaiina mai ia te i latou le Agaga Paia.”10
O Ia o le avefeau maoae o le upumoni.
A ou toe manatunatu i aafiaga i lou olaga, ua manino mai ia te au, o le tele o filifiliga—o nisi na foliga e laiti i na taimi, ao nisi na faafaigata ona o lo latou taua tele—na mafua ai ona ou ausia se tulaga maualuga o le faaleagaga, pe ana ou le gauai atu i galuega alofa a le Agaga Paia.11
A aunoa ma lenei meaalofa mamana, e le mafai ona tatou malamalama i le faamoemoega o le olaga po o le fuafuaga sili a le Tama Faavavau.12 Aua, “e le mafai ona iloa e tagata ona ala uma. Ua leai se tagata ua iloa ona ala sei iloga ua faaalia mai ai ia te ia.”13
O le a le lava le na ona faalagolago i manatu ma le faaaogaina o le atamai: “E leai foi se tagata e mafaia ona faailoa atu ia mea, aua o ia mea e na ona vaaia ma malamalama i ai i le mana o le Agaga Paia, e tuuina atu e le Atua i e alolofa ia te ia, ma faamamaina i latou lava i ona luma.”14
E le mafai ona ou mauaina ni upu e faailoa lelei atu ai ou lagona e uiga i le Malamalama o Keriso ma le meaalofa o le Agaga Paia. O nei mea o se “sulu lea i ou vae, ma le malamalama i lou ala.”15
Ia tatou mafaufau i le olega a le Faaola i le Tama, e uiga i le Toasefululua i le laueleele o Nuumau, ua faaalia i upu nei:
“Le Tama e, ou te faafetai atu ia te oe, ona ua e foaiina mai le Agaga Paia ia te i latou nei ua ou filifilia; ona o lo latou faatuatua mai ia te au ua ou filifilia ai i latou mai le lalolagi.
“Le Tama e, ou te tatalo atu ia te oe, ia e foaiina mai le Agaga Paia ia te i latou uma o e faatuatua i a latou upu.”16
I lenei lalolagi gaogaosa o puapuaga, e mafai ona tatou maua le mautinoa ma olioli i le toafilemu o le mafaufau i le talitonu lea i aoaoga a perofeta ma le mafutaga a le Fesoasoani. Ona tatou iloa ai lea o Iesu Keriso o le Alo o le Atua, le Faaola o le lalolagi.17
Ou te tautino atu lau molimau i nei upumoni i le suafa o Iesu Keriso, amene.