Na Auina Mai Outou Uma Mai le Lagi
O outou o se vaega matagofie o tagata soifua. O la outou matafaioi o ni tuafafine, e faapitoa ma tulaga ese i le galuega a le Alii. O outou o failelele ma tausitama.
O’u tuafafine pele, ua lofituina au i lagona ona o lo outou faatasi mai, ma ua faalotomaualaloina ai lava au. Tatou te matua faafetai ma aloa’ia le susu mai o Peresitene Hinckley ma Peresitene Monson i le aso. Ua matua faagaeetiaina foi i tatou i musika a le aufaipese. O le tatalo a Tuafafine Sainz ua valaaulia ai faamanuiaga a le Alii mo i tatou. Ua maoae foi savali musuia a Tuafafine Bonnie Parkin, Tuafafine Kathleen Hughes, ma Tuafafine Anne Pingree. Sa matou auai ma Peresitene Hinckley, ma Peresitene Monson i le faamanuiaina o nei tuafafine i o latou tofiga i le Au Peresitene Aoao o le Aualofa. O la latou tiutetauave musuia, o le taitaia lea o le faalapotopotoga a tuafafine i lalo o le taitaiga a le perisitua. Sa ofoofogia ni faamanuiaga na folafola atu i luga o nei tuafafine e le gata o i latou taitoatasi ae faapea foi i le tuufaatasiga o i latou. Ina ua faamanuiaina e Peresitene Hinckley ia Tuafafine Parkin i le tofiga, sa ia faamanatu atu i tuafafine “na faataatia e le Perofeta o Iosefa le alafua o le galuega a le Aualofa ina ia aapa atu, ia taulimaina tulaga e manaomia e e matitiva, ma e le tagolima, o e faaletonu ma faanoanoa, ma faamanuiaina ia tamaitai.”
O la tatou autu i le po nei o le “Le Alii e … O Au lenei; auina atu au.” O lenei faaupuga maoae e matua talafeagai lelei, a o ou tautala atu ia te outou tuafafine i lenei afiafi, aua ua matua toatele outou ua faaalia lelei lenei naunautaiga e ofo atu e auauna atu. Na auina mai outou uma mai le lagi. O outou o se vaega matagofie o tagata soifua. O la outou matafaioi o ni tuafafine, e faapitoa ma tulaga ese i le galuega a le Alii. O outou o failelele ma tausitama, e pei ona ta’ua e le Perofeta o Iosefa Samita, e i ai “lagona o le alofa ma le agalelei.”1
E leai ni a’u upu e faamatala atu ai lo’u faaaloalo, talisapaia, ma le faananau mo outou tuafafine ofoofogia. Ua faamanuiaina tamaitai o augatupulaga uma i lenei Ekalesia, i se meaalofa tulaga ese faatamaitai o le agaalofa. Ua faalotomaualaloina lava i matou i a outou galuega o le faatuatua, faamaoni, usiusitai, ma le galuega alofa, ma a outou faataitaiga o le amiotonu. Semanu e le mafai e lenei Ekalesia ona ausia lona taunuuga e aunoa ma tamaitai naunautai, faamaoni, o e ua le mafuatiaina lo latou faamalosia o le Ekalesia i la latou amiotonu. Ua tele tausaga o feagai tuafafine o le Ekalesia ma luitau tele e faapei foi o outou i aso nei. E ese a outou luitau mai o outou tina, o tinamatutua, ma tina o tina matutua, ae e matua moni lava.
Ou te fiafia lava ona o le faateleina o avanoa mo tamaitai i le Ekalesia ma le lalolagi. Matou te faamoemoe o le a outou faalauteteleina nei avanoa faateleina i lo outou faasafuaina atu lea ia i latou o la outou pa’i faatamaitai ua faaeaina. O nei avanoa e matua leai lava ni tuaoi. Ina ua faavae e le Perofeta o Iosefa lenei faalapotopotoga, sa ia tatalaina le faitotoa mo le saolotoga o tamaitai,” ma “sa tatalaina mo le lalolagi atoa.”2 Talu mai ona tatala lena faitotoa i le 1842, ua saga faaopoopo mai le malamalama i le lalolagi ma tamaitai nai lo le talafaasolopito uma o le lalolagi.
Ua autausaga, o tuputupu ae pea ma suia lenei sosaiete mo tamaitai, i lalo o musumusuga, ae o le galuega faavae lava latou o le Aualofa e lei suia lava. Sa ta’ua sa’o e le Perofeta o Iosefa, o la outou galuega ua “le na ona fesoasoani atu ai i e matitiva, ae ia laveai ai agaga.”3
Ou te talitonu o manatu mausali tetele e fa o lenei sosaiete o:
Muamua, o se usoga ua faavaeina faalelagi.
Lona lua, o se nofoaga mo aoaoga.
Lona tolu, o se faalapotopotoga o lona faamoemoega autu lava o le auauna atu lea i isi. O lana mau autu o le “E le uma le alofa.”
Lona fa, o se nofoaga e mafai ona fegalegaleai ai tamaitai ma faia ai ni faauoga e faavavau.4
E ese lo’u fiafia ona ua maua e outou na tuafafine talavou le avanoa e auai i le Aualofa i le tai 18 o outou tausaga. O le a outou matua manuia lava ona o le avea o outou ma ni uso auai i lenei faalapotopotoga taua. O le a faamanuiaina o outou olaga pe a outou auai atu ma le naunautai ma tuafafine i le faatinoina o auaunaga alofa ma le tausiga o i latou e manaomia le fesoasoani. O mataupu aoaoina a le Aualofa, e taulai atu i aoaoga faavae ma o le a outou maua ai le avanoa, e suesue ai i le talalelei ma faateleina ai lo outou faaleagaga. E fetaui lelei lava mataupu aoaoina mo tagata soifua uma, e le na o tamaitai ua nofotane ma tina. O tuafafine uma lava, e aofia ai ma tuafafine talavou, “e tatau ona manatulia i latou ma tausia i le afioga lelei a le Atua.”5 O le a faamalolosia outou i aoaoga faavae, ma fesoasoani ia te outou e atiinae ai le faaleagaga lea e tatau ona i ai, e faatoilalo ai luitau o le olaga.
E i ai se tamaitai talavou o se uo lelei ia te au, o mea ia sa na maitauina: “E 18 o’u tausaga ma o se uso aupito itiiti o le Aualofa i le matou uarota. Ou te fiafia lava matou te o ma lo’u tina ma lo’u tinamatua, aua e ese le manaia o le mafuta ma i lae pei ni uo. Ou te fia faalogologo i lo’u tina o talanoa i ana uo aua ou te maua ai se avanoa ou te iloa ai uso o lana tupulaga. E toatele foi tamaitai e fia fusi mai ia te au ma fesilisili mai po o fea ou te faigaluega ai ma pe o a a’u mea o fai i le taumafanafana. Latou te faatupuina e le aunoa o’u lagona, e taua au ma o se tagata e faapitoa ia i latou. A o matou mafuta ma tinamatutua ma tina o tinamatutua o la’u uarota, sa ou atiinaeina ai ni faauoga fou ma le tulaga ese ua faatamaoaigaina ai ma faamanuiaina lo’u olaga. Ou te fiafia foi i lesona e faia e uso matutua. E eseese mea e nonofo ai, ae o o latou aafiaga taitoatasi ua ou maua ai se malamalamaaga sili atu i le auala e taulima ai luitau ma faafitauli o le olaga. E mananaia tala o o latou olaga latou te faamatalaina ma e fesoasoani na ia te au i le faatatauina o le lesona. Ua ou iloa ai o le Aualofa, e moni lava e mo tamaitai uma, tusa lava po o le a le matutua.”6
Tusa lava po o a tulaga e oo i ai outou na tuafafine, e mafai ona ofoofogia le aafia ai o le toatele o tagata i a outou faatosinaga. Ou te talitonu, e i ai nisi o outou ua tauau e manatu maualalo i lo outou tulaga maoae tou te gafatia ai ona faamanuia i olaga o isi. O le tele lava o taimi, tou te faamanuiaina olaga o isi, e le faia i luga o se tulaga i se faaaliga i nofoaga faitele, ae o a outou faataitaiga o le amiotonu, ma faatinoga malu e le mafaitaulia o le alofa ma le agalelei lea tou te faia ma le matua naunautai, o le tele lava foi o taimi tou te faia ai mo tagata taitoatasi.
O le popolega faapitoa o le Alii mo fafine ua oti a latou tane, o lo o matua molimauina tele mai i tusitusiga paia. O le mea moni, o lenei foi atugaluga e mo tina nofofua uma. Ua tele naua matafaioi ua faatietie atu ia i latou. E tatau ona latou saunia meaai ma lavalava ma isi mea e manaomia mo le aiga. Latou te manaomia foi ona faafailele a latou fanau ma se alofa ma se tausiga faaopoopo.
Sa ou maua talu ai nei se tusi mai le tama a se tuafafine i lenei tulaga, ma ou te fia faitauina atu se palakalafa mai lea tusi: “Sa mafai e Tina ona nofofale i le aso atoa a o laiti le matou aiga. O iina sa manao o ia e i ai, ae i le 28 tausaga talu ai, a o i ai lana fanau e toafa e amata mai le 5 tausaga e oo i le 14, sa tatau ai ona alu e faigaluega i fafo atu o le aiga, ina ia mafai ai ona tausi i matou, aua ua faafuasei ona nofofua. E ui ina matou iloa e le o se tulaga lelei lea mo le tausiga o se aiga, ae sa galue punouai Tina ina ia faaauau ai le faafaileleina o i matou i le talalelei ma faia ona tiute faaleaiga uma, a o faigaluega foi i le aso atoa e lagolagoina ai i matou i mea tautupe. O lea la ua avea foi a’u o se matua, o se faamanuiaga le i ai o lo’u toalua i le fale e vaai le ma fanau, ma ua amata foi ona ou malamalama i le ata atoa o le tulaga na i ai Tina, ma faigata o le tausiga o i matou i lena taimi. Sa faigata ma mamafatu ma maimau e, pe ana tele mea sa ou faia e faafaigofie ai lana galuega. O le a faavavau lo’u agaga faafetai mo lana taulaga, i le faia o se faataitaiga i lona aoaoina lea o i matou i le ala e galue ai ma le ala foi e ola ai. O le poto o le folafolaga i le aiga, e faapitoa lona moni ia te au i le taimi lenei, ona o mea na matou fefaasoaai ai o se aiga.”7
E toatele tuafafine faamaoni, ma amiotonu latou te lei maua le avanoa e faaipoipo ai, ae sa avea i latou ma se vaega taua o lenei galuega paia. O nei tamaitai ofoofogia, ua i ai se tiutetauave manino o ni agelu o le alofa i matua, tuafafine, uso, o fanau a uso ma fanau a tuafafine, faapea foi isi tagata o aiga ma uo. I totonu o le Ekalesia, e anoanoai avanoa e alolofa ai ma faafailele. O tuafafine nofofua, atonu e tele atu o latou taimi, e matua lelei tele la latou auaunaga.
O Tuafafine Makelita Anderson o Centerville, Iuta, o se faataitaiga matagofie lea o se tuafafine nofofua, o le sa soifua i se olaga o faaaoaoga ma le fiafia e auauna atu i isi. E tele tausaga, sa ia tausia ai ma le alofa lona tina ua afu le soifua, o le uso o lona tina, ma lona uso e tausi esea. Sa ia taitaia ma faatosina mai le faitau fiaselau o tamaiti a o faiaoga i le aoga tulagalua. Ua litaea nei, ae o lo o faaauau pea ona ofo atu i vaiaso taitasi e fesoasoani i tamaiti e aoao le faitautusi. O ana faatinoga o le auauna atu ua avea ma se faamanuiaga faapitoa i tagata o lana uarota. Sa faapea le tala a se tamaitai talavou, “A o ou laitiiti, e fai mai e Makelita se keke o lo’u aso fanau i tausaga taitasi. Na te faakulimiina le keke ma teuteu i gaoioiga sa ou faia i le tausaga ua te’a, e pei o le siva po o le soka foi.” E leai se faifeautalai e alu ese mai lana uarota e aunoa ma se atotupe anagata a Makelita. O ia o se punaoa taua i le avea ai ma se tagata atamai i le talalelei, aemaise lava i le Aualofa. E manatu ona tuaoi ma uo, sa sagisagi fiafia lava o ia e fai a latou feau ma ave i latou i le malumalu. O Makelita o se talimalo tauagafau. E mananaia ana lole e fai ma e matagofie foi ana ata e vali, ma e fiafia lava o ia e tufatufa atu i isi. Ua ia matua faamanuiaina lava olaga e le mafaitaulia o tagata taitoatasi.
Ua faatele ona folafola mai e perofeta a le Alii e leai ni faamanuiaga e taofia mai tuafafine nofofua o le Ekalesia pe afai, e le mafua ia i latou, ua le faaipoipo ai i lenei olaga ma faamau i se tagata agavaa o umia le perisitua. O le a mafai ona latou olioli i lena faamanuiaga e faavavau i le isi olaga. “E i ai taimi e te moomoo ai ma le tiga mo lena taliaina ma lena alofa lea e maua i le olaga faaleaiga i le fogaeleele, faamolemole ia outou iloa ua silafia e lo tatou Tama oi le Lagi lo outou faanoanoaga, ma e i ai se aso o le a ia faamanuiaina ai outou e sili atu nai lo outou malosi e faaali atu ai.”8
Ina ua maea le faapaiaga o le malumalu fou matagofie i Navu, sa matou toe taliu mai i se vaalele ma Tuafafine Parkin, o Tuafafine Hughes, ma Tuafafine Pingree, ma o latou soa tamalii. Sa ou fesili i tuafafine pe na latou asiasi i le faleoloa piliki lanumumu i Navu, i le mea sa faavae ai e le Perofeta o Iosefa le Aualofa i le aso 17 o Mati, 1842 i tuafafine na o le 20 sa auai. Sa tali mai Tuafafine Parkin sa latou asiasi atu i ai.
A o matou talanoa, sa malosi se faamanatu mai ia te au, o tuafafine uma lava i soo se mea o le lalolagi, e mafai ona latou maua le tofi ma manuia mai faamanuiaga a le Alii i tamaitai. Sa saunoa le Perofeta o Iosefa Samita, “Ua ou tatalaina nei le faitotoa mo outou i le suafa o le Atua … . E tatau ona tafe atu le poto ma le malamalama i lalo e amata atu i le taimi nei.”9 O lenei faamanuiaga o le poto ma le malamalama, e maua e tamaitai amiotonu uma o le Ekalesia, e tusa lava pe o a o latou lanu po o atunuu e o mai ai, ma tusa foi pe fou mai i le Ekalesia pe o nisi e tupuga mai i se tasi o uluai sui e 20 sa i ai i Navu i le 1842. E tafe atu nei faamanuiaga i tuafafine e faatinoina ma le naunautai galuega a agelu.
Sa ou faalogo talu ai nei ia Elder Dieter i lenei saunoaga malamalama: “E leai a se gafa o lo’u aiga na ui mai i Navu. E le mafai foi ona ou faafesootai atua lo’u gafa i paionia. Ae faapei lava o le toatele o tagata o le Ekalesia i le lalolagi, e mafai ona matua ootia lo’u loto atoa i le Au Paia o Navu ma la latou faigamalaga i Siona. O taumafaiga faifai pea o le fatufatuina o a’u lava asaga faalelotu i se Siona o e ‘loto mama’ ou te latalata atu ai lava i paionia o le senituri e 19. O i latou o o’u augatama faaleagaga, e faapena foi i tagata taitasi uma o le Ekalesia, tusa lava po o le a le atunuu, gagana, po o le aganuu. Sa latou faatuina se nofoaga saogalemu e le gata i sisifo, ae faapena foi le faavae faaleagaga mo le fausiaina o le malo i atunuu uma o le lalolagi.”
O se upu mo outou tuafafine ua faaipoipo. I se tulaga taua tele, o outou na tuafafafine e faia o tatou fale ma se sulufaiga o le filemu ma le fiafia i se lalolagi o faigata. O se tane amiotonu, na te tauaveina le perisitua, o lea perisitua o le pule lea e taitai ai le aiga. Ae e le o ia o le perisitua; o ia na te umia le perisitua.10 E la te tofu aia ma lana ava i faamanuiaga o le perisitua. E le sili a’e lona taua i le tulaga paia o lana ava. Sa saunoa Peresitene Gordon B. Hinckley i le sauniga aoao a le Au Perisitua ia Aperila na te’a nei: “I le mafutaga faaulugalii i le faaipoipoga, e leai se taufaatauvaaina e leai foi se faasausili. E le muamua le fafine i le tane, e le muamua foi le tane i le fafine. La te savavali faatasi, o se atalii ma se afafine o le Atua, i se malaga e faavavau.”
Sa ia toe saunoa mai, “Ua ou mautinoa, pe afai tatou te tutu i luma o le nofoa faamasino o le Atua, o le a le tele se ta’ua pe fia ni au oa na faaputuputu i le olaga, po o ni mamalu na tatou maua. Peitai, o le a i ai fesili auiliili e faatatau i a tatou fegalegaleaiga faaleaiga. Ma ua ou mautinoa foi, e na o i latou lava sa savavali i le olaga ma le alolofa ma le faaaloalo, ma le talisapaia o a latou soa ma fanau, o le a latou maua mai i lo tatou faamasino e faavavau ia upu nei, ‘Ua lelei ia, le auauna lelei e ma le faamaoni: … ina ulufale mai ia i le fiafia o lou Alii.’ ”11
O faletua latou te lagolagoina o latou taitoalua i au epikopo, o au peresitene o siteki, ma isi tofiga faale-perisitua, o se faamanuiaga tele ia i le Ekalesia. O lo o latou faia gugu ae atoatoa le tautua i ni auala e le vaaia e tagata lautele, ma lagolagoina le aiga ma le auaiga a o auauna atu o latou taitoalua i le Au Paia. Sa ou fai atu, [e tautua] “gugu.” Sa ou faalogo o faapea se tala o nisi tamaitai e fiafia i se tamaloa malosi ae gugu—e manatu latou o la e faalogologo mai!
E leai se isi e sili atu lona iloa nai lo a’u, i le mea e igoa o le malosiaga e mafai ona oo i ai se ava lagolagosua. Talu ona ma faaipoipo, sa lagolagoina ma faamalosiauina au e la’u Ruta i le anoano o o’u tofiga, i tausaga toeitiiti atoa le 60. Sa le mafai ona ou tautua i se aso se tasi e aunoa ma lana lagolago alofa. E tumu au i le faafetai ia te ia ma ou te alofa ma le faamaoni ia te ia.
O Tuafafine Effie Dean Bowman Rich ua maliu lana tane, o se tasi o au paaga faifeautalai, e ese le pisi i lona aiga ma e lua ana pisinisi. E le gata i lea, ae o ia o se tina, ma o se tinamatua foi o se auaiga toatele. Sa i ai se taimi i aso ua mavae, a o tauivi o ia ina ia faataunuuina tulaga manaomia o nei mau matafaioi, sa fai mai a ia, “O le mea lea ou te manaomia o se ava!” E sa’o, o le uiga o lana tala, ua na lagona e tatau ona i ai se lagolagosua mai se tasi na te mafai ona vaaia le mau mea, lea e mafai e se ava alofa ona matua fai lelei.
Tuafafine e, pe o a lava tulaga o outou i ai, tou te manaomia uma lava le i ai o suauu i a outou lamepa. O lona uiga, ia outou saunia. Tatou te taufai manatua uma le faataoto i taupou e toasefulu sa valaaulia i le taumafataga o se faaipoipoga. E toalima e popoto ma sa saunia, ma sa i ai suauu i a latou lamepa e faafetaiai ai i le Faatoafaiava; o le isi toalima e lei saunia. Sa teuteuina lamepa uma a le toasefulu, peitai e toalima e lei lava suanuu na o ma latou ma sa iu ina uma. Tatou te taufai manaomia le malamalama o a tatou lamepa tatou te savavali atu ai i le pogisa. Tatou te taufai mananao uma lava e faafeiloai i le Faatoafaiava ma auai atu i le taumafataga o le faaipoipoga.
I ni nai tausaga ua mavae, sa faamanino mai ai e Peresitene Spencer W. Kimball lenei tulaga matautia o le le saunia. Sa ia saunoa mai, o taupou valelea e toalima, “ua uma ona aoaoina. Sa lapataia i latou i o latou olaga atoa.” O le ao, sa foliga tutusa ai e popoto ma e valelea, ae peitai “o le itula aupito pogisa, i le taimi ua le magafagafa ai, sa sau ai le faatoafaiava.” O le toalima na pepe a latou lamepa sa faataalise e saili ni suauu sa manaomia, peitai ina ua taunuu mai i le tausamaaga, ua tapuni le faitotoa. Ua tuai tele mai.
Sa faamatala mai e Peresitene Kimball e faapea “sa talosaga atu e valelea i isi e faasoa mai a latou suauu, peitai e le mafai ona faasoa le saunia faaleagaga i se minute. Sa tatau foi ona o le au popoto, nei alu loa le faatoafaiava ae lei faafeiloaia. Sa latou manaomia foi a latou suauu mo i latou lava; sa le mafai ona latou laveaia taupou valelea.”
“O [lenei] faataoto,” sa faaauau lana saunoaga, “sa mafai ona faatau suauu i le maketi. O le suauu o le saunia, e faaputuputu i sia mataua ma sia mataua i le ola amiotonu i o tatou olaga. O le auai i sauniga faamanatuga e faaopoopoina ai suauu i a tatou lamepa, o sia mataua ma sia mataua i tausaga. O le anapogi, tatalo faaleaiga, faia o asiasiga faaleaiga, pulea o manaoga o le tino, talai atu o le talalelei, suesue i tusitusiga paia—o faatinoga taitasi o le faamaoni ma le usiusitai o se mataua lea e faaopoopo i a tatou suauu. O galuega alofa, totogiina o taulaga anapogi ma sefuluai, o mafaufauga ma amioga mama, o le faaipoipo i totonu o le feagaiga mo le faavavau—o mea uma nei, e taua lo latou sao i le suauu ina ia oo atu i le tulua o po, a o mafai ona toe utu ai a tatou lamepa ua tauau ifo.”12
Tuafafine, e taua le i ai o suauu i a outou lamepa ina ia outou fai atu i le Alii, “O Au lenei; auina atu au,” ae o la ua outou saunia ma agavaa e auina atu. Na auina mai i tatou uma mai le lagi, ae o mea e mafai ona tatou faataunuu i le galuega a le Alii, e matua faalagolago tele lea i lo tatou naunautai ma o tatou tomai.
O la’u molimau, e faavae i le 59 o tausaga o lo’u olaga faaleaiga, o le auai o la’u Ruta i le Aualofa na aumaia ai le faaleagaga e tumu i le tamaoaiga ma le filemu i le matou aiga. O lenei faalapotopotoga na musuia mai le lagi, e le gata ina faamanuiaina ai lona olaga, ae faapena foi olaga o tagata taitoatasi o lo matou aiga. O le auai i le Aualofa, e mafai ona fesoasoani e toe faatutumu ai a outou lamepa i le suauu. E mafai ona e maua ai le malosi ma le tulaga mausali e te manaomia pe a lutia oe i puava o le olaga ma le malaga fai i lenei olaga.
Ina ua faia le uluai fonotaga ma le au faasalalau ina ua maea ona faauuina Peresitene Hinckley ma faamanuia e fai ma Peresitene o le Ekalesia, sa fesili se tasi tagata i le Peresitene e fai sana saunoaga e uiga i luitau o tina, o e e tatau ona faigaluega ma faapaleni tulaga manaomia o o latou fale ma aiga. Sa tali atu i ai Peresitene Hinckley, “Fai le mea sili e te mafaia, ma manatua o le aseta aupito sili e te maua i lenei lalolagi, o fanau, na e fanauina mai i le lalolagi, lea foi e ia te oe le tiutetauave o le faafaileleina ma le tausia.”13 Ou te toe ta’u atu foi lena mea i lenei po. Fai le mea sili e te mafaia e fesoasoani ai ia i tatou uma ia aapa maualuga atu ma sili atu mea e faia. Faaaoga au meaalofa faaleagaga faanatura e faamanuia atu ai. Fesoasoani ia tatou faatoilaloina aafiaga faatiapolo o le lalolagi i o tatou olaga, o o tatou aiga, ma le Ekalesia.
Talosia ia faataunuuina le folafolaga a Nifae mo outou, “Ma ua fai auupega i latou i le amiotonu atoa ma le mana o le Atua i le mamalu tele.”14 Ou te fia tuuina atu la’u molimau e uiga i faamanuiaga ua ou maua i lo’u olaga, mai le alofa o lo’u toalua, o Ruta, o lo’u tina faapei o Keriso, o o’u tinamatutua paia, o le ma fanau teine ma fanau teine a le ma fanau, ma le toatele o isi tamaitai amiotonu. Ou te faia ai i le suafa o Iesu Keriso, amene.