Elaine Schwartz Dalton
Fesoasoani Lua, Au Peresitene Aoao o Tamaitai Talavou

E lei leva ona amata le tausaga lona lua o Elaine S. Dalton i le Iunivesite o Polika Iaga, ae maliu faafuasei lona tama. O se taimi faigata i lona olaga, ma sa tatalo faalausosoo ina ia malamalama pe aisea ua aveese faafuasei ai lona tama mai se aiga o loo matua manaomia ai lava o ia.

Na ia faatoa mauaina le tali i ana talosaga i le taumafanafana na sosoo ai, ina ua malaga asiasi atu o ia i Europa i le malaga a le ausiva faaanamua a le BYU. I le Aso Sa o Tama, a o faia le lotu faamanatuga a le au malaga, sa ta’ua e se tasi o failauga le Faataoto 3:5–6: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”

“Sa ou iloaina ai o lena mau o la’u tali lea,” o lea ua saunoa nei i ai Tuafafine Dalton. “Ou te le iloaina lava pe aisea na maliu ai lo’u tama, ae sa ou iloaina e tatau ona ou faalagolago i le Alii. O iina na avea ai lena mau ma taiala i lo’u olaga. O mea uma lava sa tutupu ae ou te le i malamalama i ai, sa ou iloa afai ou te faalagolago i le Alii, o le a Ia taitaiina o’u ala.”

I lona valaauga fou o se fesoasoani lua i le au peresitene aoao o Tamaitai Talavou, ua faamoemoe Tuafafine Dalton e uunaia tamaitai talavou ina ia atiinae lena lava faalagolago i le Tama Faalelagi ma saili atu i le taitaiga a le Agaga Paia.

Sa soifua mai Tuafafine Dalton i Ogden, i Iuta, i le aso 1 o Novema 1946 i ona matua o Melvin Leo ma Ema Martin Schwartz. Sa faaipoipo i la’ua ma Stephen E. Dalton i le aso 13 o Setema i le Malumalu o Sate Leki. E toaono o la’ua alo ma o loo aumau nei i le Aai o Sate Leki.

Sa maua le faailoga o Tuafafine Dalton i le Igilisi mai le Iunivesite o Polika Iaga. Sa avea o ia ma se tasi o le au ofisa aoao o Tamaitai Talavou, o se peresitene o Tamaitai Talavou i le siteki, o se faufautua i le Lora, ma se faiaoga o le Aualofa.

“E matua maoae lava tamaitai talavou o nei aso—e mataalia ma malolosi faaleagaga,” na ia saunoa ai. “Ua ia i latou se luitau tulaga ese ina ia amiotonu i le lalolagi o loo tatou ola ai nei. O le avea ai o i latou ma tagata o le Ekalesia, ua mafai ai ona latou tulaga ese ai ma taitaia isi o loo sailiili mo ni faataitaiga amiotonu.”