“Ae peitai, a le o lea”
O le suega sili o le olaga faaletino o le faafetaiaia lea o le [fesili] “pe aisea” ona tuu ai lea, ae faalagolago atu ma le lotomaualalo i folafolaga a le Alii “o mea uma e ao ina oo mai i ona aso.”
O nisi o ou mafaufauga e sili ona pele ou te manatuaina pea, na mafua mai i taimi o ou tofiga i faaiuga o vaiaso i konafesi a siteki, ao ou malaga faatasi atu ma se peresitene o se siteki i ni asiasiga i tagata o lana siteki, o e o loo tauivi ma luitau o le olaga i le lototele ma le faatuatua, aemaise lava ia i latou ua aveesea fanau e le maliu ma le oti, po o e o loo taumafai pea ma le lototetele e tausia se tamaitiiti mai, pe le atoatoa foi le malosi i le tino ma le mafaufau. Ua ou iloa mai i se mea na tupu ia te au, e leai se tofotofoga e sili ona pogisa nai lo le maliu o se tamaitiiti. E leai foi se aso e sili ona umi ma faalelava tagata, e pei o le faigata o le tausiaina o se tamaitiiti e mai i le tino ma le mafaufau. O nei matua uma e mafai ona latou matuai faailoa mai faatasi ma le tama o le tama na i ai le “agaga gugu,” o le, ina ua aoaiina e le Faaola ina ia talitonu, sa ia tali atu ma le loto tiga, “Le Alii e, ua ou faatuatua; ia e fesoasoani i lou le faatuatua” (tagai Mareko 9:17, 23–24).
Ma o le aso, ou te fia talanoa atu ai ia te outou uma, o e o loo tauivi ma lenei suega o le faatuatua i le olaga faaletino—aemaise lava i matua loto faavauvau, ma le mafatia i le mamafa o ia avega, o e o lo o augani atu pea ma tuufesilisili, “Aisea?”
O le mea muamua, faamolemole e ao ona outou silafia, o le faanoanoa o le taunuuga masani o le alofa. E le mafai ona alofa atu se tasi tagata i le isi, ae na te lē lagonaina le faanoanoa i ona puapuaga po o le oti foi. Na o le pau lava le ala e aloese mai ai i le faanoanoa, o le aua lea nei aafia i lagona alofa; o le alofa lena na te aumaia le manuia ma iloa ai le taua o le olaga. O le mea lea, o tatalo faatauanau a ni matua loto faavauvau i le Alii, atonu e le masani ona aveesea ai le faanoanoa, peitai, e mafai e le Alii ona tuuina mai se faamautinoaga matagofie, o le tamaitiiti ua i ai i le tausiga alofa a se Tama Faalelagi agalelei, e tusa lava pe o le a le tulaga atonu o lagonaina e matua.
Ma le isi, ia aua lava nei fesiligia le agalelei o le Atua, e tusa lava pe e te le iloa “pe aisea”. O le fesili masani e fesiligia e tagata loto faavauvau ma mafatia, o lenei: Aisea? Aisea ua oti ai le ma tama ae sa ma tatalo malosi ina ia mafai ona ola pea o ia, ma ua uma foi ona faia lona faamanuiaga faale-perisitua? Aisea ua oo mai ai ia i maua lenei mala ae o nisi ua latou faamatalaina mai ni aafiaga i faamalologa faavavega na tutupu i e pele ia i latou? O nei fesili o ni fesili masani lava, ma e malamalama foi. Peitai, e i ai foi fesili e masani ona le maua ni tali i le olaga lenei. Ua fetalai mai le Alii e faapea,“Ua sili ona maualuga o [ou] ala i o outou ala, ma ou manatu e sili i o outou manatu” (Isaia 55:9). E pei ona “faaumatia foi le loto o le Alo i le finagalo o le Tama” (Mosaea 15:7), e tatau foi ona faapea i tatou.
Peitai, o i tatou o tagata faaletino, tatou te mananao lava ia iloa po o le a le faapogai po o le mafuaaga. Ina nei o tatou soona naunau atu i le fia maua o ni tali, atonu o le a galo ai ia i tatou, na fuafuaina le olaga faaletino, o se vaitaimi tatou te le mafai ona mauaina uma ai tali i a tatou fesili. O le olaga faaletino ua i ai se faamoemoega ese mai, e sili atu ona vaapiapi lona faamatalaina: O se nofoaga e suesueina ai, o se tulaga faataitai, o se taimi e savavali ai i le faatuatua, o se taimi e sauniuni ai e fetaiai ma le Atua. (Tagai, i le faataitaiga, Aperaamo. 3:24-25; 2 Nifae 31:15–16, 20; Alema 12:24; Alema 42:4–13.) O le atinaeina o le lotomaualalo (tagai Alema 32:6–21) ma le usiusitai (tagai Mosaea 3:19) ina ia mafai ona tatou iloa le atoatoaga o aafiaga faaleagaga ua faamoemoeina, ina ia saunia ai i tatou faalemafaufau ma faaleagaga, e mauaina musumusuga a le Agaga. O le mea moni, o le lotomaualalo ma le usiusitai o le faaalia lea o le lotomalie atoatoa e tuuina atu ia fesili o le “pe aisea” ia le taliina i le taimi nei, pe aua foi nei toe fesiligia, “pe aisea ua leai ai?” O le “tumau lelei” seia oo i le iuga (tagai 2 Nifae 31:15–16; Alema 32:15; MFF 121:8) e mafai ai ona tatou ausia faamoemoega o lenei olaga. Ou te talitonu o le suega sili o le olaga faaletino o le faafetaiaia lea o le [fesili] “pe aisea” ona tuu ai lea, ae faalagolago atu ma le lotomaualalo i folafolaga a le Alii “o mea uma e ao ina oo mai i ona aso” (MFF 64:32).
Peitai, ua le tuua i tatou e le Alii e aunoa ma se faamafanafanaga pe aunoa foi ma ni tali. E pei o le faamaloloina o e mamai, na manino Lana fetalaiga e faapea: “O lenei foi, o le a oo mai le faatuatua ia te au ina ia faamaloloina, ma e lei filifilia ia oti, o le a faamaloloina” (MFF 42:48, ua faatusilima mea e faamamafa). O le tele o taimi, e sopoloa ai la tatou vaai i le fasifuaitau e i ai se tuutuuga po o se tuaoi, “ma e lei filifilia ia oti” (“pe”, e mafai foi ona tatou faaopoopo i ai le, “mai pe le atoa foi le malosi o le mafaufau”). Faamolemole ia aua nei aveesea o tatou faamoemoe pe afai ua uma ona faia tatalo faamaoni, ma faataunuuina foi faamanuiaga faaleperisitua, ma ua foliga mai e leai lava se suiga manuia e oo mai i e pele ia i tatou, ma iu ai lava ina oti. Ia faalototeteleina outou i le iloa sa outou faia mea uma e mafai ona outou faia. O lena faatuatua, anapogi ma faamanuiaga e le mafai ona foi fua! O le le toe foi i se lelei o lou alo, e ui i le tele o mea na faia i ai, e mafai, ma e tatau, ona avea ma faavae o le toafilemu ma le faamafanafanaga ia i latou uma o e alolofa ia te ia! O le Alii—o Le ala mai ai faamanuiaga ma o Le foi na te faafofogaina tatalo faamaoni uma—o ia foi na te valaau mai i le tamaitiiti e foi atu i le fale. O aafiaga uma o le tatalo, anapogi, ma le faatuatua, atonu e sili atu ona aoga mo i tatou nai lo le atalii.
E faapefea la, ona tatou talanoa atu i le Tama Faalelagi, ao tatou augani atu ma le faamaoni mo se ua pele ia i tatou, ma tuu atu lima i luga o lona ulu, e tuuina atu se faamanuiaga mai se tasi ua i ai le pule tatau o le perisitua? E faapefea ona faaali moni atu lo tatou faatuatua? Na faamatalaina e le Perofeta o Iosefa Samita lea uluai mataupu faavae o le talalelei o le “faatuatua i le Alii o Iesu Keriso” (Mataupu Faavae o le Faatuatua Lona Fa, ua faatusilima mea e faamamafa). O le fasifuaitau malamalama lena—“i le Alii o Iesu Keriso”—tatou te faagaloina i nisi o taimi. E masani ona tatou tuuina atu ni tatalo pe faia se faamanuiaga, ona tatou faatalitali lea ma le popole pe taliaina mai la tatou talosaga, ma e foliga mai o le taliaina mai o le a maua ai se faamaoniga na moomia o lo o soifua o Ia. E le o se faatuatua lena mea! O le faatuatua, o le talitonu lea i le Alii. I upu a Mamona, o le “tutumau o latou mafaufau i le amioatua uma lava” (Moronae 7:30; ua faatusilima mea e faamamafa). Na faaali atu e ni faamasino Eperu e toatolu le faatuatua o le a laveaiina i latou e le Alii mai le ogaumu aasa, na latou faapea atu ai i le tupu “ae peitai, a le o lea,” “matou te le auauna [lava] i ou atua” (Tanielu 3:18; ua faatusilima mea e faamamafa). O le mea moni, e le toatolu, ae toafa, tagata na vaaia i le totonugalemu o le afi, ma “ua tino mai lona toafa [ua ] pei o le Alo o le Atua” (Tanielu 3:25).
E faapena foi i tatou. Ua masani ai lo tatou lalolagi ona faapea ane, “sei iloga ou te vaai i se mea faatoa ou talitonu lea i ai”. Po o le a lava le taua o lenei faamatalaga i gaoioiga masani o le olaga, e le aoga lava lenei faaupuga i mea faaleagaga, lea tatou te tepa atu ai i le Alii i taimi e sili ona oo mai ai o tatou tofotofoga faigata. O le ala a le Alii ua sili ona faamalamalamaina mai e le isi faaupuga lenei, “O le talitonu o le vaai lava lea i ai.” O le faatuatua i le Alii o se aoaoga faavae, ae le o se faaiuga. Ua tatou iloa o loo soifua o Ia; o le mea lea, tatou te faamoemoe ai ia te Ia e faamanuia mai i tatou e tusa ai ma Lona finagalo ma Lona silafia faalelagi. O lenei talitonuga faatamaitiiti i le Alii ua taua i tusitusiga paia, o se “taulaga” o le “loto momomo ma le agaga maualalo lava lea” (MFF 59:8).
Ou te fia tuuina atu lenei tala o se molimau maoae na maua mai i le loloto o le sueina o lou faatuatua i lenei olaga. Na oo mai i o ma olaga, lo ma atalii lona lua, o Atamu, ao ou i ai i se nofoaga mamao lava i togavao ma faatoaga araisa o Viatename. O lo o ia te au pea le tusi fiafia na logoina ai au i lona fanau mai. O Atamu o se tamaitiiti, e lanumoana ona mata, ma lona lauulu lanuauro ma ona uiga agamalie. Ina ua atoa le lima o ona tausaga, sa sauniuni o ia ma le fiafia i le taimi e amata ai ona alu i le aoga. Peitai, sa pesi se faamai i tamaiti o le matou pitonuu o Kalefonia i Saute, ma na pesia ai Atamu. Ma te lei lagonaina se popole, sei vagana ai lo ma alolofa i ona tiga. Sa le foliga mai e tuga tele lona mai. O se tasi taeao, na faafuasei ai ona le mafai ona ia nofo mai i luga, sa le mafai ona ia toe iloa se mea. Sa matou faanatinati atu i le falemai, ma na tuuina ai o ia i le potu o mai tigaina. O se vasega o alii ma tamaitai fomai faamaoni na faia togafitiga ia te ia. Sa le mapu lo ma vaavaai atu pea ia te ia mai se potu faatalitali e lata ane.
Sa ou telefoni atu i le peresitene pele o lo matou siteki, o sau uo mai lava i le taimi o ma laiti ma ua avea nei o se uso pele i le Au Fitugafulu, o Elder Douglas L. Callister, ma talosagaina pe mafai ona susu mai i le falemai, ma te tuuina atu se faamanuiaga faale-perisitua mo Atamu. Na o ni nai minute, ae taunuu mai loa o ia. Ao maua ulu atu i le potu va iti, i le mea o lo o taoto ai le tino ua le gaioi o Atamu, sa siomia lona moega e masini a le falemai, na meimei ese ma le faaaloalo alii ma tamaitai fomai agalelei, ma piilima o latou lima. A o fofogaina i le faatuatua ma le faatauanau faamaoni atu, upu masani ma le mafanafana o se faamanuiaga faale-perisitua, sa faatumulia au i se faalogona maoae, sa faatasi ai foi iina ma se isi Tagata. Sa lofituina au i lea mafaufauga, ma pe ana fai ou te pupula atu, o le a mafai ona ou vaaia le Faaola o tu mai ai! E le na o au sa i ai i totonu o le potu na lagonaina lea Agaga. Sa faafuasei ona matou iloa i ni nai masina mulimuli ane, o se tasi o tamaitai fomai sa i ai i lea aso, sa ia lagona le ootia, ma saili atu loa i faifeautalai ma na papatisoina ai.
Ma e ui lava la i taumafaiga uma na faia e alii ma tamaitai fomai ma le faamanuiaga faale-perisitua, ae sa le i toe foi le mai o Atamu i se tulaga lelei. Sa leai se suiga tele i lona tulaga, ao matou augani pea i le Alii ina ia toe faafoi mai o ia ia i maua. Mulimuli ane, i se tasi taeao i le mavae ai o se po sa le maua ai se moe, sa ou savalivali toatasi ai i totonu o le falemai. Sa ou talanoa atu i le Alii ma tau atu ia te Ia, sa ma mananao ina ia toe manuia lo ma atalii, ae peitai o le taimi lava foi lea, o le mea sa sili ona maua mananao i ai, o le faia lea o Lona finagalo, ma o le a ma—taliaina lava ma Pat—lena mea. E lei umi se taimi, ae maliu loa Atamu.
O le mea moni, o lo o ma faanoanoa pea mo la maua tama, e ui lava i le pai malu mai o le Agaga ma le tele o tausaga ua mavae ua tuuitiitia ai o maua faanoanoaga. O lona ata laitiiti o loo tu i luga ae o le tulaga o le afi faamafanafana o lo matou potu malolo, i tafatafa ane o se ata lata mai nei o lo matou aiga ma fanau a fanau. Peitai, ua ma iloa ma Pat o lana malaga i lenei olaga, sa fuafuaina e se Tama Faalelagi alofa, ina ia puupuu ma faigofie nai lo i tatou, ma ua teleteleai atu nei o ia e muamua atu e avea o se tasi e faafeiloai mai pe a matou sopoia atu foi lea lava faitotoa taua e tasi.
A valaau oe e feagai ma faigata,
E le manumalo ia oe mea faatiga,
Aua ou te ia te oe, ma faamanuia oe, …
E avea ou tiga, ma ou manuia.
A oo mai mala ma tofotofoga,
E fesoasoani ia oe lou alofa.
E le afaina oe i ia tiga,
Ua ou fai o ia mea, …
Mo lou lelei naua… .
O le ua faamoemoe o ia ia te au,
Ou te le tuulafoaia o ia i le fili;
Pe o le a lava lona malosi, …
E le lafoaia, e au o ia!
(“Le Faavae Malosi,” Viiga, nu. 45).
I le suafa o Iesu Keriso, amene.