Inisitituti
Lesona 3: Aoaoina e ala i le Agaga

3

Aoaoina e ala i le Agaga

Folasaga

Mo faifeautalai ina ia ola i le talalelei ma tumau ai i le ala e oo atu ai i le ola e faavavau, e manaomia ona latou atina a‘e se aga masani o le suesue i le talalelei. I nofoaga autu mo le aoaoina o faifeautalai, e faaalu ai e faifeautalai le tele o itula i aso taitasi e suesue ai i latou lava ma faatasi ma a latou soa. I totonu o le galuega faamisiona e faamoemoe ia latou faaauau ai pea lo latou suesueina o le talalelei i aso taitasi. E tatau ona latou aoao “e ala lava lea i le suesue ma le faatuatua foi” (MF&F 88:118) ina ia mafai ona fausia se faatanoa o malamalamaga o le talalelei ma faateleina ai lo latou liua. E taua mo faifeautalai ona i ai lenei faatanoa o malamalamaaga e maua mai e ala i suesuega e taitaia e le Agaga ina ia mafai ona aoao atu ma le mana ma faataunuu ai lo latou faamoemoega.

Sauniuniga Muamua

Fautuaga mo le Aoaoina Atu

O le Taua o le Suesue i le Talalelei

Faaali atu i tamaiti aoga se ata o Iosefa Samita ma lona uso o Ailama, ma fai atu ia i latou e sue a latou tusitusiga paia i le Mataupu Faavae ma Feagaiga 11. Fesoasoani i tamaiti aoga ia malamalama i le anotusi o le vaega lenei e ala i le faamatala atu e faapea, a’o faaliliu e Iosefa Samita le Tusi a Mamona, sa matuai fiafia lava lona uso matua o Ailama i le galuega ma manao ai e faasoa atu le savali o le Toefuataiga i isi. O le sailia o le finagalo o le Alii, na talosaga ai Ailama ia Iosefa e ole atu mo se faaaliga mo ia [Ailama]. O le tali a le Alii ua faamaumauina i le Mataupu Faavae ma Feagaiga 11. I le tele o itu, sa i ai Ailama i le tulaga lava e tasi e pei ona i ai tagata o lau vasega, o e o loo sauniuni foi i latou e faasoa atu le savali o le talalelei toefuataiina.

Tuu atu i ni tamaiti aoga se toalua e auauai e faitau leotele le Mataupu Faavae ma Feagaiga 11:15–17 ao mulimuli le vasega i le faitauga, vaavaai mo le fautuaga na tuuina mai e le Alii ia Ailama. Ona fesili atu lea:

  • Aisea na ta’u mai ai e le Alii ia Ailama e “faatali umi laitiiti atu” ona faatoa faasoa atu lea o le savali o le talalelei i isi?

Tuu atu i tamaiti aoga e faitau le Mataupu Faavae ma Feagaiga 11:21–22 ma le 26, ma vaavaai mo fautuaga e talafeagai mo faifeautalai faaolioli i aso nei.

  • O le a le mea na ta’u mai e le Alii ia Ailama e fai a’o ia sauniuni e faasoa atu le talalelei i isi? O le a le uiga o le maua o le upu a le Atua? O le a le uiga o le teu o le afioga a le Atua i totonu o lou loto?

  • E mafai faapefea ona fesoasoani le apoapoaiga a le Alii o loo i nei fuaiupu i se tasi i aso nei o loo sauniuni e auauna atu i se misiona? (E ui atonu latou te faaaogaina ni upu eseese, e tatau i tamaiti aoga ona faailoa mai le mataupu faavae lenei: O le suesue i le talalelei e saunia ai faifeautalai e talai atu le talalelei i le Agaga ma le mana.)

  • O a faamanuiaga na folafola mai e le Alii ia i latou o e “saili ia maua [Lana] upu”?

Tuu atu i tamaiti aoga e su’e i le itulau e 195 i le Tala’i La’u Talalelei, ma tuu atu i se tamaitiiti aoga e faitau leotele le parakalafa lea e amata i le “O lou tomai e aoao atu ai ma le mana.” Ona fesili atu lea:

  • O a manatu o loo i lenei parakalafa o loo faamamafa ai le taua o le suesue i tusitusiga paia i aso uma mo i latou o e mananao ia avea ma faifeautalai mataalia? (O le suesue i tusitusiga paia e saunia ai faifeautalai e aoao atu le talalelei ma le mana.)

Ta’u atu i tamaiti aoga o le vaega o loo totoe o le lesona o le a taulai atu i le auala e mafai ona latou maua ai le malamalama sili atu mai a latou suesuega patino o tusitusiga paia. Uunai tamaiti aoga e mafaufau loloto i le lesona atoa i auala e faaaoga ai mea latou te aoaoina ina ia faaleleia atili ai le mataalia o a latou suesuega i tusitusiga paia ma le talalelei.

Faaaogaina o se Tusi Talaaga o Suesuega

Faatonu le vasega e su’e i le itulau x i le folasaga o le Tala’i La’u Talalelei. Valaaulia se tamaitiiti aoga e faitau leotele ia parakalafa e lua i le soavaega “Tusi Talaaga o Suesuega” . A uma ona faitau e tamaiti aoga, fesili atu:

  • E tusa ai ma le vaega lenei, e mafai faapefea e le faaaoga o se tusi talaaga o suesuega ona fesoasoani ia te oe a’o e suesue i le talalelei?

  • Aisea o le a taua ai le faamaumau o manatu ma lagona e te maua i le taimi o suesuega i le talalelei?

Mafaufau e fesili atu i au tamaiti aoga pe i ai se isi o i latou e i ai se tusi talaaga o suesuega, ma valaaulia i latou e i ai e faasoa mai po o a auala ua aoga ai a latou tusi talaaga o suesuega ia i latou. Uunai tamaiti aoga e amata faaaoga se tusi talaaga o suesuega pe afai latou te le’i faia lea mea. Faamanatu atu ia i latou o se tusi talaaga o suesuega e mafai ona faaaoga ai se api e sai faatasi taugofie, se api laitiiti, po o ni itulau e tuu i se faila faimama. E mafai foi ona latou faaaoga ia faamatalaga ma meafaigaluega i luga o le LDS.org po o se polokalama o le tusiga-manatu i luga o se masini eletonika. Uunai tamaiti aoga e aumai se tusi talaaga o suesuega i vasega taitasi e faamaumau ai manatu, lagona, ma malamalamaaga sa’o ma loloto latou te maua i le taimi o le vasega.

Aoaoina e ala i le Agaga

Vaevae tagata o le vasega i ni paga. Valaaulia i latou e galulue faatasi e faitau le parakalafa lona lua i le itulau e 17 o le Tala’i La’u Talalelei ona talanoa lea o le mea e manaomia e maua ai ni aafiaga anoa e aoao ai i tusitusiga paia. A uma se taimi na talanoa ai tamaiti aoga i le parakalafa, valaaulia nisi o i latou e faasoa mai ni nai manatu autu mai a latou talanoaga. E mafai ona e fai atu fesili e pei o nei:

  • O le a le uiga o le suesue ma le “manatu tonu”? (O lemanatu tonu o lona uiga ua tatou manatu e usitai pe faatino mea ua tatou aoaoina.)

  • O a auala e mafai ona aafia ai le suesuega o le talalelei e se tagata i le suesue ma le “manatu tonu” ma le “fia ai ma fia inu i le amiotonu”? (A o tali mai tamaiti aoga, mafaufau e fai atu ni fesili tulitatao e uunaia ai i latou e mafaufau loloto atili e uiga i a latou tali. Mo se faataitaiga, afai e tali mai tamaiti aoga e faapea, o le manatu tonu o le a atagia i le ala e tatalo ai se tasi, atonu e te fai atu ia i latou e faamatala mai pe o le a faapefea ona ese ia tatalo a se tagata. Afai e tali mai tamaiti aoga e faapea, o le a faaalia i lo latou naunau, fai atu ia i latou e faamalamalama mai le uiga o lena manatu.)

Fai atu i ni tamaiti aoga se toatolu e auauai e faitau leotele ia parakalafa i le vaega ua faaautuina “Aoaoina e ala i le Agaga Paia” i le itulau e 18 o le Tala’i La’u Talalelei. Tuu atu i le vaega o loo totoe o le vasega e mulimuli i le faitauga ma faailoga ia faamanuiaga e oo mai ia i latou pe a fesoasoani le Agaga Paia ia i tatou e aoao i le talalelei. Ona fesili atu lea:

  • O a faamanuiaga e mafai ona oo mai ia i tatou pe a taiala e le Agaga Paia lo tatou aoaoina o le talalelei. (Mafaufau e tusi le mataupu faavae lenei i luga o le laupapa ao tali mai tamaiti aoga: A taitai e le Agaga Paia lo tatou aoaoina o le talalelei, tatou te maua le sulu ma le malamalamaaga sili atu.)

Ina ia fesoasoani i tamaiti aoga ia malamalama lelei i le auala e mafai ona latou valaaulia ai le Agaga Paia e aoao i latou a’o suesue i le talalelei, faitau pe faaali atu le upusii lenei mai ia Elder D. Todd Christofferson o le Korama a Aposetolo e Toasefululua. Valaaulia au tamaiti aoga e vaavaai mo mea e mafai ona latou faia e maua ai ni malamalamaaga atili mai a latou suesuega i tusitusiga paia.

Elder D. Todd Christofferson

“Ina ia “tusia le talalelei i lou loto, e tatau ona e iloa le talalelei ma ia e malamalama atoatoa i ai. O lona uiga, e tatau ona e suesue i ai. O lo’u fai atu e ‘suesue,’ o lona uiga, e sili atu nai lo le na ona faitau. O se mea lelei i nisi taimi le faitau o se tusi mai tusitusiga paia, mo sina taimi ia maua ai se lagona aoao o lana savali, ae ina ia liua, e tatau ona e manatu mamafa i le tele o le taimi e te faaaluina i tusitusiga paia, nai lo le tele o lau faitau i lena taimi. Ou te iloa o nisi taimi tou te faitauina ai ni nai fuaiupu, ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai. O le suesue faapea, atonu e le tele ni mataupu po o ni fuaiupu tou te faitauina i se afa itula, ae peitai o le a e tuua ai se vaega i lou loto mo le upu a le Atua, ma o le a fetalai atu o Ia ia te oe” (“Pe a Liua Mai Oe,” Ensign po o le Liahona, Me 2004, 11. Mo manatu faaopoopo e suesue ai, tagai i le Elder Richard G. Scott, “E Faapefea ona Maua Faaaliga ma Musumusuga mo Lou Olaga Patino,” Ensign po o le Liahona, Me 2012, 45–47).

Fesoasoani i tamaiti aoga e suesue auiliili le faamatalaga a Elder Christofferson e ala i le fai atu o fesili nei:

  • O a ni faatinoga na faailoa mai e Elder Christofferson e mafai ona taitai atu ai i le faateleina o le malamalama i tusitusiga paia?

  • E mafai faapefea e nei faatinoga ona faataga lelei ai le Agaga Paia e aoao oe?

  • Na mafai faapefea e se tasi pe sili atu o nei faatinoga ona fesoasoani e faaloloto lou malamalama o le talalelei?

Faamatala atu, e aoga pe a suesue i tusitusiga paia ia malamalama ai i le ala e fesootai mai ai le Agaga Paia ia i tatou. Vaevae le vasega i paga (atonu i paga lava e tasi mai le gaoioiga na muamua atu). Tusi mau nei i luga o le laupapa, ma fai atu i tamaiti aoga e kopi i totonu o a latou tusi talaaga o suesuega po o se pepa: Mataupu Faavae ma Feagaiga 8:2–3; 9:7–8; 11:12-14; ma le 138:1–2, 11.

Tuu atu i tamaiti aoga le taimi e suesue ai nei fuaitau ma faailoga upu po o fasifuaitau o loo faamatala ai le auala e fesootai mai ai le Agaga Paia ia i tatou? E mafai foi ona latou tusia ni nai faamatalaga laiti i a latou tusi talaaga o suesuega e uiga i mea ua latou aoaoina mai nei fuaitau. Fai atu i tamaiti aoga e talanoa ma a latou paga i mea ua latou faailogaina i nei fuaiupu ma mea ua latou aoaoina. A mavae se taimi talafeagai, ona fai atu lea o fesili nei:

  • O a ni upu po o fuaitau sa e maua o faamatala mai ai le auala e fesootai mai ai le Agaga Paia ia i tatou? (Tusi tali a tagata o le vasega i luga o le laupapa.)

  • Na faapefea ona aoaoina oe e le Agaga Paia i se tasi o nei auala, ma faalolotoina ai lou malamalama e uiga i se aoaoga faavae po o se mataupu faavae o le talalelei? O a ni aafiaga faapitoa na outou mauaina?

Valaaulia tamaiti aoga e su‘e i le itulau e 22 i le Tala‘i La‘u Talalelei, ma tuu atu i se tamaitiiti aoga e faitau leotele ia aitema togitogi muamua e fa i lalo o le autu “Manatu ma Fautuaga mo Suesuega.” Mafaufau e fai atu fesili nei:

  • E ono mafai faapefea e nei fautuaga ona aafia ai le gafatia e se faifeautalai ona faasoa atu ma le mataalia le talalelei i isi?

  • E mafai faapefea ona e fetuunaia nei manatu ma faaaoga i le taimi nei i le avea ai o ni faifeautalai faaolioli?

  • E mafai faapefea e le faaleleia atili o ou tomai ma aga masani i le suesueina o tusitusiga paia ona saofaga i lou tulaga faamanuiaina o se faifeautalai? (Atonu o le a ta‘u mai e tamaiti aoga se mataupu faavae e talitutusa ma lenei: A o atina a‘e e faifeautalai ni aga masani o le suesue ma le mataalia i le talalelei, o le a aoaoina i latou e le Agaga, o le a sili atu ona tauia o latou aafiaga, ma o le a lelei atu ona latou saunia e aoao atu le talalelei.)

Vaevae le vasega i ni vaega taitoatolu, pe taitoafa. Fai atu i vaega taitasi e vaevae ia i latou ia soavaega e ono o loo i lalo o le “Manatu ma Fautuaga mo Suesuega” i itulau e 22–25 o le Tala‘i La‘u Talalelei, ma tuu atu i tagata o le vaega e suesue i a latou soavaega atofaina. E ono manaomia e nisi o vaega ona suesue ni vaega se tele atu nai lo na o se soavaega se tasi. Tofi se taitai i vaega taitasi e taitaia se talanoaga e uiga i mea ua aoaoina e tagata o le vaega, ma po o a ni mea e mafai ona latou faia i le taimi nei ia faia ai lo latou suesueina o le talalelei ia sili atu ona mamana ma aoga. A uma se taimi na tuu atu i vaega e talanoa ai, fesili atu i le vasega

  • Na faapefea ona fesoasoani nei tomai po o aga masani o suesuega ia te oe e faateleina ai le lelei o le suesueina o tusitusiga paia?

Ina ia fesoasoani i tamaiti aoga ia faapatino le faaaogaaga o mea na talanoaina, tuu atu i tamaiti aoga taitoatasi se kopi o le pepa e tufa atu o le “Aga Masani o le Suesueina Patino o Tusitusiga Paia”. Tuu atu i le vasega ni nai minute e faauma ai le gaoioiga o loo i le pepa e tufa atu.

Pepa e tufa atu mo le Suesueina o Tusitusiga Paia

Pe a maea le taimi na tuuina atu, fai atu i tamaiti aoga e faasoa mai soo se manatu po o malamalamaaga sa‘o ma loloto na latou maua mai lenei galuega. Uunai i latou e mulimuli i le faaaogaina o tomai ma aga masani o le suesueina o tusitusiga paia na latou filifilia, i a latou suesuega patino. Faamautinoa atu ia i latou, a latou faia lenei mea, o le a faamalamalamaina e le Agaga Paia o latou mafaufau ma faateleina lo latou malamalama i le talalelei.

Fesoasoani i le vasega ia malamalama e faapea, e faaopoopo atu i le e faapefea ona latou suesue, o le a le taimi ma le o a mea latou te suesueina, e faapena foi ona taua tele i le fesoasoani ia i latou ia avea ma ni faifeautalai mataalia. Tuu atu i tagata o le vasega e su‘e i le itulau viii i le folasaga o le Tala‘i La‘u Talalelei ma vaavaai i le [Fuafuaga] Faatulaga[ina] a le Faifeautalai i Aso Taitasi o loo maua i le vaega “Suesuega Faaletagata Lava Ia, Suesuega Faalesoa, Fonotaga Faaleitu, ma Konafesi Faalesone”. Ona fesili atu lea:

  • O a auala o loo faaalia ai i le [Fuafuaga] Faatulaga[ina] a le Faifeautalai i Aso Taitasi le taua o suesuega i le talalelei?

  • E mafai faapefea e le faia i aso uma o suesuega o tusitusiga paia i le taimi nei, ona saunia ai oe mo lenei fuafuaga faatulagaina faigata i le avea ai ma se faifeautalai?

Faailogaina o Mau

aikona o le vitioA lava se taimi e totoe, mafaufau e faaali atu le vitio “Advice for Studying the Scriptures” (2:07) e fesoasoani ai i le vasega e mafaufau i ni auala e mafai ona latou faaleleia atili ai le ala e faailoga ai a latou tusitusiga paia.

A uma ona faaali le vitio, fesili atu:

  • O le a se mea na e aoao mai ia Elder Bednar o le a fesoasoani ia te oe e faaleleia ai au suesuega o tusitusiga paia?

  • O le a le faamoemoega o le faailogaina o tusitusiga paia? (E fesoasoani e te toe manatua ai mea sa e aoaoina i se taimi mulimuli ane pe a e toe manaomiaina.)

  • Aisea e taua ai le i ai i faifeautalai o se auala lelei e toe manatua ai mea na latou aoaoina?

Ola I Mea Ua E Aoaoina

Tuu atu i se tamaitiiti aoga e faitau atu i le vasega le parakalafa muamua i lalo o le ulutala “Ola i Mea e te Aoaoina” i le Tala‘i La‘u Talalelei, itulau e 19. Ona tuu atu lea i se tamaitiiti e faitau leotele le Ioane 7:17. Fesoasoani i tamaiti aoga e faailoa mai se mataupu faavae o loo aoao mai i le Tala‘i La‘u Talalelei ma le Ioane 7:17 e ala i le fesili atu:

  • O le a se eseesega o i ai i le va o le iloa o tusitusiga paia ma le ola i aoaoga o loo maua i tusitusiga paia? (E ui atonu latou te faaaogaina ni upu eseese, e tatau i tamaiti aoga ona malamalama i le mataupu faavae lenei: A tatou ola e tusa ai ma aoaoga o le talalelei, o le a molimau mai le Agaga Paia i le moni o na mataupu faavae ma o le a faamalosia ai lo tatou faatuatua, malamalama ma molimau.)

Faamatala atu, na aoao mai e Elder David A. Bednar o le Korama a Aposetolo e Toasefululua le taua o le faatino o mea tatou te aoaoina. Faaali atu le upusii lenei, ma fai atu i se volenitia e faitau leotele atu i le vasega:

Elder David A. Bednar

“I le avea ai ma ni tagata aoao lelei, e tatau ona avea i tatou ma ‘e anaana i le upu, a e aua le na ona faalogologo i ai‘ (Iakopo 1:22). E matala o tatou loto i faatosinaga a le Agaga Paia a‘o tatou faaaoga tatau le faitalia e faatino ai e tusa ma mataupu faavae sa‘o—ma faapea ai ona tatou valaaulia Lona mana aoao ma le molimau” (“Ia Mataala Pea ma le Maelega Atoatoa,” Ensign po o le Liahona, Me 2010, 42).

  • O le a le uiga o le ia avea ma e anaana i le upu ae le na o le faalogo i ai?

  • E faapefea e le faatino e “tusa ai ma mataupu faavae sa’o” ona faaloloto lo tatou malamalama i se auala lea e le mafai e le na o le suesue ona fai?

  • Na faapefea e le faatino e tusa ai ma mataupu faavae sa‘o ona faataga oe ia maua se malamalamaaga loloto atu ma le molimau e uiga i se mataupu faavae o le talalelei sa e taumafai e ola ai?

Tuu atu i se tamaitiiti aoga e faitau le parakalafa lona lua i le itulau e 19 o le Tala‘i La‘u Talalelei a o mulimuli le vasega i le faitauga ma vaavaai mo auala faaopoopo e faia ai e le ola i le talalelei ni aafiaga i loto ma gafatia o faifeautalai. A uma ona faitau, fai atu fesili nei:

  • O a faamanuiaga faaopoopo e oo mai i faifeautalai pe a latou ola i mataupu faavae o le talalelei ua latou iloa e moni? (Fesoasoani i tamaiti aoga e ta‘u mai le mataupu faavae lenei: A ola faifeautalai i le talalelei, e faateleina e le Agaga Paia lo latou naunau ma le mafai e faasoa atu ai le talalelei.

  • Ao e sauniuni e auauna atu i se misiona, ua faapefea ona faateleina e le Agaga Paia lou naunau e auauna atu?

Valaaulia o Tagata Sailiili e Auai i le Lotu.

E fesoasoani faifeautalai i tagata sailiili ia agai atu i luma i le papatisoga e ala i le valaaulia o i latou e tausia ia tautinoga. Mo se faataitaiga, faamatala atu i tamaiti aoga, a auai mai tagata sailiili i le lotu, e mafai ona latou maua ni faaaliga faateleina e ala i le Agaga Paia ma mananao ai ia latalata atili atu i le Atua. O le auai i le lotu e mafai ona fesoasoani i tagata sailiili ia maua se molimau e uiga i le talalelei toefuataiina ma saunia ai ia papatisoina.

Faatino le valaaulia o se tasi ia auai mai i le lotu. Muamua, ia faasoa puupuu atu faamanuiaga e oo mai e ala i le auai i le lotu. Ona faaaoga lea o le tamaitusi a le faifeautalai O Le Toefuataiga (itulau e 22–23) e faamatala ai le mea e tupu i le taimi o le sauniga faamanatuga. Ona faatino lea o le auala e tuu atu ai se valaaulia i se tagata sailiili ia auai mai i le lotu. A uma lau faatinoga, tuu atu i tamaiti aoga e faataitai ma se paga ona faatino ia sitepu na e faatinoina. Tuu atu ia i latou e auauai e faasoa puupuu mai faamanuiaga latou te maua e ala i le auai i le lotu, ia faamatala le mea e tupu i le taimi o le sauniga faamanatuga, ma ia valaaulia le isi tagata ia auai i le lotu.

Molimau atu e uiga i aoaoga faavae ma mataupu faavae o le talalelei na talanoaina i le lesona.

Valaaulia e Faatino

Valaaulia tamaiti aoga ia fai suesuega patino i le talalelei o se mea e ave i ai le faamuamua ao latou sauni e auauna atu i se misiona. O gaoioiga fautuaina nei e ono fesoasoani i tamaiti aoga e taulai atu ai i le aoaoina i le Agaga.

  • Faatulaga se aga masani o le suesue patino i le talalelei i aso taitasi, e aofia ai le suesue ma mafaufau loloto i le Tusi a Mamona.

  • Tatalo i le amataga o au suesuega patino i le talalelei e valaaulia ai le Agaga e fesoasoani ia te oe. Afai e te le‘i faia lava, amata ona faaaoga se tusi talaaga o suesuega i le taimi o au suesuega patino i le talalelei.

  • Filifili se manatu se tasi o manatu ma fautuaga mo suesuega i le talalelei o loo maua i itulau e 22–24 o le Tala‘i La‘u Talalelei, ma faaaoga i au suesuesga patino i lenei vaiaso.

Pepa e tufa atu

Pepa e tufa atu mo le Suesueina o Tusitusiga Paia