Aoaoina Atu o le Ata o le Faaolataga (Vaega 1)

Folasaga

O le ata o le faaolataga o le fuafuaga a le Tama Faalelagi mo le fiafia o Ana fanau. E totonugalemu i le Togiola a Iesu Keriso ma o loo aoao mai ai le pogai e manaomia ai le Togiola. O le fuafuaga a le Tama Faalelagi ua tali ai foi fesili “O fea na ou sau ai?,” “O le a lo’u faamoemoega i le olaga?,” ma le “O fea o le a ou alu i ai pe a ou oti?” E tatau i faifeautalai faaolioli ona i ai se malamalamaaga manino o le aoaoga faavae o le ata o le faaolataga ma ia saunia e faamalamalama atu faafaigofie ma molimau atu e uiga i ai ma le mana.

Sauniuniga Muamua

Suesue i le 2 Nifae 2:22–25; Alema 12:32–34; Mose 1:39.
Suesue i le Tala’i La’u Talalelei, itulau 48–50.
Sauni e faaali atu le vitio “God Is Our Father” (3:05), o loo maua i le LDS.org.
Saunia e faaali atu le vitio “The Plan of Salvation” (4:30), o loo maua i le LDS.org.

Fautuaga mo le Aoaoina Atu

Muai Olaga: O Le Faamoemoega ma le Fuafuaga a le Atua mo i Tatou

Mafaufau e usu e le vasega le viiga “O Au se Atalii o le Atua” o se vaega o le faigalotu amata. Ina ia amata le lesona, fai atu i tamaiti aoga e toe faamanatu filemu upu o le fuaiupu muamua o le “O Au se Atalii o le Atua,” ma fai atu ia i latou e vaavaai mo soo se aoaoga faavae po o ni mataupu faavae o loo maua i upu [o le viiga].

O le Atua lo’u Tama,
Ia aumai o ita,
I se aiga i lalo nei
I matua agalelei.
Taitai a’u, faasino mai,
Le ala e ui ai,
Aoao mai mea e ao na ou fai
Ma te toe mafuta ai.

(“O Le Atua Lo’u Tama,” Viiga, nu. 184)

A mavae ni nai minute, valaaulia tamaiti aoga e faamalamalama soo se aoaoga faavae po o ni mataupu faavae taua na latou maua i le viiga. Afai e manaomia, atonu e te manatu e fai atu fesili nei:

O a ni mea ua faailoa mai e nei upu e uiga i lo tatou olaga a’e tatou te le’i o mai i le lalolagi?
O a ni mea ua faailoa mai e nei upu e uiga i le faamoemoega o le olaga iinei i le lalolagi?

Tau atu i tamaiti aoga e faapea, i le avea ai ma ni faifeautalai, o le a latou maua le avanoa e aoao atu ai e uiga i le faamoemoega o le olaga. Tau atu i se tamaitiiti aoga se toatasi pe sili atu e faitau leotele ia parakalafa muamua e lua o le vaega ua faaautuina “Muai Olaga: Faamoemoega ma le Fuafuaga a le Atua mo i Tatou” i le itulau e 48 o le Tala’i La’u Talalelei.

Atonu foi e te faasoaina atu le faamatalaga lenei mai ia Peresitene Boyd K. Packer o le Korama a Aposetolo e Toasefululua:

“E le o toe i ai se upumoni maoae e fesootai mai ia i tatou i le toefuataiga nai lo le malamalama i lo tatou i ai i le muai olaga. E leai se isi ekalesia e iloaina pe aoaoina lenei upumoni. O le aoaoga faavae e na o le tulaga o le auivi ua tuuina mai ai, ae o upumoni taua e masani lava ua lava ma totoe ona ta’u faafia mai i faaaliga e faamautinoa mai ai ia i tatou e uiga i upumoni faavae taua” (Our Father’s Plan [1984], 14).

Fesili atu:

E mafai faapefea i le iloaina e uiga i lo tatou muai olaga ma sa tatou nonofo o ni fanau agaga faatasi ma lo tatou Tama oi le Lagi ona fesoasoani e aumaia le taua faateleina i o tatou olaga? (Ao tali mai tamaiti aoga, atonu e te filifili e faamamafa atu le mataupu faavae lenei: A tatou malamalama o i tatou o fanau a le Tama Faalelagi, e faapea ona tatou maua le taua faateleina i lo tatou olaga i le fogaeleele.)

Ina ia fesoasoani i tamaiti aoga e faaloloto o latou malamalamaaga e uiga i lenei mataupu faavae, faaali atu le vitio “God Is Our Father” (3:05), ma fai atu i tamaiti aoga e faalogologo mo faamanuiaga na faamatalaina e tagata o loo i le vitio.

A uma ona matamata e tamaiti aoga le vitio, fai atu feisli nei:

O a nisi o faamanuiaga na faamatalaina e tagata o loo i totonu o le vitio na oo mai mai le iloaina o i latou o fanau a le Atua?
Ua mafai faapefea e lenei malamalama e faapea, o oe o se atalii/afafine o le Atua ona fesoasoani e te maua ai le taua sili atu o lou olaga?

Fai atu i tamaiti aoga e auauai i le faitauina leotele o parakalafa mulimuli e fa o loo i le itulau e 48 o le Tala’i La’u Talalelei. Faatonu le vasega e vaavaai mo aoaoga faavae ma mataupu faavae o loo aoao mai ai le faamoemoega a le Atua mo Ana fanau, ma pe faafepea ona faataunuu e le ata o le faaolataga lena faamoemoega. Ona fesili atu lea:

O le a le fuafuaga a le Atua na mamanuina e faia mo Ana fanau? (O a latou tali, e ono aofia ai e tamaiti aoga le aoaoga faavae e faapea, o le ata o le faaolataga ua mafai ai e fanau uma a le Atua ona olioli i faamanuiaga o le tino ola pea ma le ola e faavavau. Afai e manaomia le faamaninoga, atonu e te ono faatatau atu i faauigaga o le tino ola pea ma le faaeaga i itulau e 58–59 i le Tala’i La’u Talalelei. Faamamafa atu o le ola e faavavau o le ituaiga olaga lea o loo soifua ai le Atua.)

Ina ia fesoasoani i tamaiti aoga ia malamalama i lenei aoaoga faavae, fai atu ia i latou e faitau ma tauloto le Mose 1:39. A mavae ni nai taimi na latou maua e tauloto ma faataitai ai le faiga o lenei mau, ia fesili atu:

E mafai faapefea e le aoaoina o tagata sailiili e faapea, o le faamoemoega o le Atua o le aumaia o le tino ola pea ma le ola e faavavau, ona aafia ai filifiliga latou te faia i o latou olaga i aso uma.

Tuu atu i tamaiti aoga se taimi e mafaufau loloto ai i le matafaioi a faifeautalai i le fesoasoani i le Tama Faalelagi i Lana galuega “ia aumaia le tino ola pea ma le ola faavavau o le tagata” (Mose 1:39). Valaaulia tamaiti aoga e faasoa atu o latou manatu i se isi tamaitiiti aoga po o le tusi o o latou manatu i se api talaaga mo suesuega.

O Le Foafoaga ma O Tatou Tino Faaletino

Fai atu i se tamaititi aoga e faitau leotele le vaega ua faaautuina “O Le Foafoaga” i le itulau e 49 o le Tala’i La’u Talalelei. Faatonu tamaiti aoga e vaavaai mo le taua o le Foafoaga i le ata o le faaolataga a le Atua. Ona fesili atu lea:

Aisea tatou te manatu ai i le foafoaga o le lalolagi o se vaega taua i le ata o le faaolataga a le Atua (Ina ia mafai ona alualu i luma ma avea faapei o le Atua, na tatau ai ia i tatou taitoatasi ona o mai i le lalolagi ia maua se tino ma ia tofotofoina i le aluga o se taimi o le tulaga vaavaaia.)

Ina ia fesoasoani i tamaiti aoga ia malamalama i le taua o le mauaina o se tino faaletino, faaali atu ma faitau leotele le faamatalaga lenei, lea sa saunoa i ai Sister Susan W. Tanner a’o tautua ai o le peresitene aoao o Tamaitai Talavou. Tuu atu i tamaiti aoga e vaavaai pe aisea na fiafia ai i tatou uma taitoatasi e maua se tino faaletino.

“I le lalolagi o le muai olaga, sa tatou aoao ai o le tino o se vaega o le fuafuaga sili o le fiafia a le Atua mo i tatou. E pei ona ta’ua i le folafolaga i le aiga: ‘Sa iloa ma tapua’i atalii ma afafine faaleagaga o le Atua o lo latou Tama e Faavavau ma sa [latou] talia Lana fuafuaga e mafai ai e Lana fanau ona maua se tino faaletino ma le tomai faalelalolagi latou te maua ai le atoatoaga ma iloa tino ai lona taunuuga paia o se suli o le ola e faavavau.’ O le mea moni, sa tatou ‘alalaga fiafia’ (Iopu 38:7) i le avea ai o se vaega o lenei fuafuaga

“Aisea na tatou matuai fiafia ai? Sa tatou malamalama i upumoni e faavavau e uiga i o tatou tino. Sa tatou iloa o o tatou tino o le faatusa o le Atua. Sa tatou iloa o o tatou tino o le a tuuina i ai o tatou agaga. Sa tatou malamalama foi, o le a oo o tatou tino i tiga, ma’i, le atoatoa, ma faaosoosoga. Ae sa tatou mananao lava, ma naunau, e talia nei luitau aua sa tatou iloaina, ua na o le agaga ma le elemene faafesootaia le mavavaeeseeseina, e mafai ai ona tatou alualu i luma e avea faapei o lo tatou Tama Faalelagi (tagai i le MF&F 130:22) ma ‘maua le atoatoaga o le olioli’ (MF&F 93:33)” (“O Le Paia o le Tino,” Ensign po o le Liahona, Nov. 2005, 13).

Ona fesili atu lea:

I le muai lalolagi, o a ni upumoni sa tatou malamalama i ai na faapea ona tatou fiafia ai e o mai i le lalolagi ma maua se tino faaletino?
Aisea na tatou mananao ma naunau ai e o mai i le lalolagi, e ui lava ina sa tatou iloa o le a tatou feagai ma luitau faigata i le olaga nei?

Tuu atu i tamaiti aoga se taimi e mafaufau loloto ai i le fesili lenei: E faapefea ona e faamalamalama atu i se tagata sailiili le auala e fesoasoani ai lo tatou aafiaga faaletino ia tatou alualu ai i luma ia avea e faapei o lo tatou Tama Faalelagi? Pe a lava le taimi, valaaulia i latou e suesue i mau o loo i le pusa o Mau Suesueina i lalo ifo “O Le Foafoaga” i le itulau e 49 o le Tala’i La’u Talalelei. Pe a mavae se minute pe a, fai atu i tamaiti aoga e faasaga atu i se tasi o loo nofo i o latou talane ma faamalamalama i ai a latou tali i le fesili.

Saolotoga ma le Pa’ū o Atamu ma Eva

Tusi ulutala nei i luga o le laupapa:

O mea e mafai ona fai e Atamu ma Eva i le Faatoaga

O mea e le mafai ona fai e Atamu ma Eva i le Faatoaga

Valaaulia tamaiti aoga e suesue i le 2 Nifae 2:22–25 ma le vaega “Saolotoga ma le Pa’ū o Atamu ma Eva” o loo i le itulau e 49-50 o le Tala’i La’u Talalelei. A’o latou faitau, tuu atu i le afa o le vasega e fai se lisi o mea e mafai ona fai e Atamu ma Eva i le Faatoaga o Etena (e mafai ona laua nonofo e faavavau i se tulaga e le sala, e mafai ona faaaoga o laua lava faitalia e fai ai faaiuga). Fai atu i le isi afa o le vasega e fai se lisi o mea e le mafai ona fai e Atamu ma Eva i le Faatoaga o Etena (e le mafai ona laua alualu i luma pe oo i mea faafeagai, e le mafai ona oo i le olioli po o le faanoanoa po o le tiga po o le faavauvau, e le mafai ona agasala, e le mafai ona oo i faama’i po o mafatiaga, e le mafai ona maua ni fanau). A maea ni nai minute, fai atu i tamaiti e faasoa mai ni mea na latou maua. A’o latou tali mai, mafaufau e tuu atu i se tagata o le vasega e tusi ia tali a tamaiti aoga i luga o le laupapa.

Ia taina atu mafaufau o tamaiti i faaupuga oti faaletino ma le oti faaleagaga i le itulau e 49 o le Tala’i La’u Talalelei. E masalo o le a malamalama uma tamaiti aoga o le oti faaletino e faatatau i le oti o le tino faaletino. Fesoasoani ia latou malamalama o le oti faaleagaga e faatatau i le vavaeese mai le afioaga o le Atua. O ia oti uma e lua o ni taunuuga o le Pa’ū o Atamu. E na o le Togiola a Iesu Keriso e mafai ai ona tatou manumalo i nei oti uma e lua.

E mafai ona e faalolotoina le malamalamaaga o tamaiti aoga e uiga i le taua o le Pa’ū i le ata o le faaolataga, e ala i le faaali atu o le upusii lenei mai ia Peresitene Iosefa Filitia Samita (1876–1972) ma fai atu i se tamaitiiti e faitau leotele atu i le vasega:

“Ina ua tuliese Atamu mai le Faatoaga o Etena, sa faapea ona tuu ai e le Alii se faasalaga i ona luga. Ua manatu nisi o tagata e uiga i lena faasalaga e faapea, o se mea leaga tele. E leai; sa o se faamanuiaga. Ou te le iloa e mafai ona mafaufau moni i ai o se faasalaga i foliga taufaasese.

“Ina ia mafai ona maua e tagata le faaolataga ma le faaeaga, e manaomia ai ona latou maua ni tino i lenei lalolagi, ma ui atu i aafiaga ma aoaoga ia e na o le olaga nei lava e maua ai. Ua fetalai mai le Alii e faapea, o Lana galuega maoae ma [Lona] mamalu o le “ia aumaia le tino ola pea ma le ola faavavau o le tagata” (Mose 1:39). Ana leai le olaga nei, e le mafai ona ausia lenei faamanuiaga maoae. O le mea lea, ua foafoaina ai lalolagi ma ainaina e le fanau a le Atua, ma ua tuuina atu ia i latou le avanoa e ui atu ai i le olaga faitino, faatasi ai ma lo latou umiaina o le meaalofa maoae o le faitalia. E ala i lenei meaalofa latou te filifili ai le lelei pe filifili le leaga, ma faapea ona maua ai le taui o le tulaga lelei i le faavavau a sau. Ua tatou i ai iinei i le olaga faitino ona o le solitulafono a Atamu. …

“O le pa’ū o le tagata na oo mai o se faamanuiaga na natia, ma o le auala e faalauteleina ai faamoemoega o le Alii i le alualu i luma o le tagata, nai lo o se auala e faalavefau ia i latou” (Doctrines of Salvation, comp. Bruce R. McConkie, 3 vols. [1954–56], 1:113–14).

Ona fesili atu lea:

Aisea e talafeagai ai le vaai i le Pa’ū o Atamu ma Eva o se vaega taua o le ata o le faaolataga a le Atua? (O le Pa’ū o Atamu ma Eva na mafai ai e fanau agaga a le Atua ona maua ni tino faaletino, ma mafai ai e i latou ona alualu i luma e faapei o Ia.)

Valaaulia tamaiti aoga e toe faamanatu le pusa “Aoao atu e uiga i le Pa’ū” o loo i le itulau e 50 o le Tala’i La’u Talalelei. Ona fai atu lea i tamaiti aoga e faamatala le aoaoaga faavae o le Pa’ū i a latou lava upu i le tamaitiiti aoga o loo nofo i ona talane.

O lo Tatou Olaga i le Lalolagi

Faaali le vitio “The Plan of Salvation” (4:30) pe fai atu i se tamaitiiti aoga e faitau leotele le upusii lenei mai ia Peresitene Boyd K. Packer o le Korama a Aposetolo e Toasefululua. Fai atu i tamaiti aoga e vaavaai mo ni auala e fai ai se tala faatino e tolu vaega o se faatusa o le ata o le faaolataga.

“O le ata o le faaolataga, ma ona vaega e tolu, e mafai ona faatusaina i se tala faatino matagofie e tolu vaega. Vaega 1 e faaautuina ‘Muai Olaga.’ Ua faamatalaina e tusitusiga paia o lo tatou esetete muamua (tagai i le Iuta 1:6; Aperaamo 3:26, 28). Vaega 2, mai le fanau mai e oo i le taimi o le toetutu, o le ‘Esetete Lona Lua.’ Ma le vaega 3 ua ta’ua o le ‘Olaga Pe a Mavae le Oti’ po o le ‘Ola e Faavavau.’

“I le olaga nei, ua pei ai i tatou o tagata e faatinoa tala, o e ulu atu i se fale faafiafia ae faatoa sisi lava i luga pupuni o le vaega lona lua. Ua tatou misia le vasega 1. O le faaaliga e tele ona vaega autu ma soavaega autu lea e milo faatasi, lea e faigata ai ona iloa po o ai e fesootai ia te ai, ae o le a foi e fesootai i le a, po o ai le vaega lelei ae o ai foi le vaega leaga. E atili faigata ona e le o i tatou na o ni tagata matamata; o i tatou o tagata o le vaega faafiafia, i luga o le tulaga, i le ogatotonu o mea uma!

“O se vaega o le fuafuaga e faavavau, o mea e manatua o lo tatou olaga i le muai olaga, vaega 1, ua ufitia i se veli. Talu ona tatou ulufale mai i le olaga nei i le amataga o le vaega 2 ma le leai o se manatua o le vaega 1, e leitioa a faigata ona malamalama i le mea o loo tupu. …

“Afai e te faamoemoe e maua na o le taugamalie ma le filemu ma le fiafia i le aluga o le vaega 2, e mautinoa lava o le a e le fiafia. O le a itiiti se mea e te malamalama ai i le mea o loo tupu, ma le pogai ua oo ai ia mea i tulaga ua i ai.

“Ia manatua le mea lenei! O le faaupuga, ‘Ona latou nonofo fiafia ai lea e faavavau’ e le’i tusia lava i le vaega lua. O le vaega tolu e anaina le faaupuga lena, i le taimi e faaalia ai mealilo ma faasa’osa’o ai mea uma. …

“E i ai se mea o loo i ai o se tusiga mo lenei tala faatino maoae, o le tulaga e uiga i vaitausaga. O le mea sili ai ua otootoina faapuupuu, le mea na tupu i le vaega 1—o le muai olaga. E ui e le o tele ni faamatalaga auiliili, ae o loo manino i le tusiga le faamoemoega atoa, ma ua lava mea ua faaalia ai o le vaega autu e fesoasoani ia te oe e iloa ai le mea e faatatau i ai le olaga atoa.

“O lena tusiga, lea ua tatau ona outou iloa, o tusitusiga paia—o faaaliga. Faitau i ai. Suesue i ai. Latou te tauina atu ia te oe po o le a le tagata, pe aisea e ‘manatu mai [ai le Atua] ia te ia,’ ma pe aisea ua faia ai i tatou ‘faamaulalo ane teisi o ia i agelu’ ae ‘ua faapaleina … i le mamalu ma le matagofie’ (Salamo 8:4–5).

“Ua talanoa mai tusitusiga paia i le mea moni. Mai tusitusiga paia e mafai ona lava mea e te aoaoina ai e uiga i vaega uma e tolu, e amata ai ona e ola e tusa ai ma upumoni o tusitusiga paia ma maua ai le taitaiga i lou olaga. Ua latou faaalia mai, ‘sa outou i ai foi i le amataga faatasi ma le Tamā; o lena o le Agaga, o le Agaga lea o le upumoni;

“‘Ma o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai’ (MF&F 93:23–24)” (Boyd K. Packer, “The Play and the Plan” [faeasaite a le Ofisa o Aoga a le Ekalesia, 7 Me, 1995], 2–3; si.lds.org).

Ona fai atu lea o fesili e pei o nei:

O a ni auala e faatusa ai se tala faatino e tolu vaega i nisi o elemene o le ata o le faaolataga?
E tusa ai ma lenei tala faatusa, aisea e faigata ai i le toatele o tagata ona malamalama i le faamoemoega o le olaga i le lalolagi?
E tusa a ma lenei tala faatusa, o fea e mafai ona tatou maua ai le tusiga mo lenei tala faatino maoae e tolu vaega?
E mafai faapefea e tusitusiga paia ona fesoasoani i fanau a le Atua ia malamalama lelei i lo latou faamoemoega i le fuafuaga a le Atua?

Faamalamalama atu i tamaiti aoga e faapea, a aoao atu e faifeautalai le ata o le faaolataga, ua latou fesoasoani i tagata sailiili ia malamalama lelei i le faamoemoega o le olaga faitino ma auala e mafai ona tatou toe foi atu ai e toe mafuta ma le Tama Faalelagi (tagai i le Alema 12:32–34). Fai atu i tamaiti aoga e faitau le vaega ua faaautuina “O Lo Tatou Olaga i le Lalolagi” i le itulau e 50 o le Tala’i La’u Talalelei. A ua lava se taimi na latou maua e faitau ai le vaega, ia fesili atu:

E faapefea ona e faamatalaina le faamoemoega o lenei olaga i se fuaiupu se tasi pe lua?

Ta’u atu i tamaiti aoga e taua i tagata sailiili ona malamalama o a tatou sauniuniga e toe foi atu i le afioaga o le Atua, e faalagolago lea i faaiuga tatou te faia i le aluga o lo tatou olaga i le lalolagi. O faaiuga e mulimuli i poloaiga a le Atua e mafai ona fesoasoani tatou te faalatalata atili atu ai i lo tatou Tama Faalealgi, ae o le solia o poloaiga a le Atua e taofia ai i tatou mai le toe foi atu i Lona afioaga. Tusi le faamatalaga lenei i luga o le laupapa:

O taunuuga o le agasala:

Ona fesili atu lea:

O a taunuuga o agasala? (Pe a manaomia ai, ia uunai tamaiti aoga e toe faamanatu le parakalafa lona lua o le “O Lo Tatou Olaga i le Lalolagi” i le itulau e 50 o le Tala’i La’u Talalelei. E ui atonu latou te faaaogaina ni faaupuga e ese teisi, ae e tatau i tamaiti aoga ona malamalama i upumoni nei: O le agasala e taitai atu ai i le le fiafia ma mafua ai lagona o le ta’usalaina ma le faalumaina. Tatou te le mama ma le agavaa ai e ulu atu i le afioaga o le Atua? O le agasala e taofia ai i tatou mai le foi atu i lo tatou Tama oi le Lagi, vagana ai ua faamagaloina i tatou.)
E faapefea ona fesoasoani le malamalama i taunuuga o agasala e saunia ai tagata sailiili e talia le savali o le Togiola?

Faamanatu i tamaiti aoga e faapea, i le olaga lenei, tatou te oo uma i se oti faaleagaga—e vavae ese mai i tatou mai le afioaga o le Atua. Fesili atu i tamaiti aoga:

E fesoasoani faapefea le talalelei a Iesu Keriso ia i tatou e faatoilalo le oti faaleagaga ma toe foi atu i le afioaga o le Atua? (A’o tali mai tamaiti aoga, atonu e te manao e fesili atu ia i latou, po o a auala e mafai ai e le faatuatua ia Iesu Keriso, salamo, papatiso e ala i le faatofuina, ma le meaalofa o le Agaga Paia, ona fesoasoani ia i tatou taitoatasi e faatoilalo ai aafiaga o le Pa’ū ma saunia ai i tatou e toe foi atu i le afioaga o le Atua.)

E taua le tuu atu i tamaiti aoga o le avanoa e faataitai ona faamalamalama mai ai elemene o le ata o le faaolataga na talanoaina i le lesona lenei. O lenei mea o le a fesoasoani ai ia i latou ia malamalama lelei i aoaoga faavae ma mataupu faavae o le a latou aoaoina atu i tagata sailiili.

Vaevae tagata aoga i ni paga. Ia lava se taimi e tuu atu i paga e sauni ai e aoao atu se lesona e lima i le sefulu minute le umi e uiga i le faamoemoega o lo tatou olaga i le lalolagi. Fai atu i tamaiti aoga e toe faamanatu mea o loo i itulau e 49–50 o le Tala’i La’u Talalelei, e aofia ai mau mai pusa o Mau Suesueina. Afai e maua, e mafai foi ona latou suesue i itulau e 2–9 o le tamaitusi a le faifeautalai ua faaautuina O Le Ata o le Faaolataga. A’o sauniuni tamaiti aoga, savalivali solo i le vasega ma fesoasoani ia i latou e sauni ni faamalamalamaga faigofie ma pupuu o elemene o le ata o le faaolataga. Toe faamautu atu ia i latou o le faaaogaina o fuaitau o mau i a latou savali ma molimau atu e uiga i aoaoga faavae ma mataupu faavae latou te aoaoina, o le a faaopoopo ai le mamana i a latou lesona.

A ua lava loa se taimi na tuu atu i tamaiti aoga e toe faamanatu ai aoaoga ma saunia ai se lesona puupuu, tofi ia paga taitasi o tamaiti aoga e aoao atu i le isi paga. Ona fai atu lea ia i latou e faataamilo ina ia maua e le isi paga se avanoa se tasi e aoao atu ai. A’o faaiu e paga taitasi a latou aafiaga faafaiaoga, fai atu ia i latou e talanoa i fesili nei faatasi ma tamaiti aoga na latou aoaoina:

O a mea na lelei ona faia e faiaoga?
O a ni auala na ono faaleleia ma mataalia atili ai ia aoaoga?

A uma ona maua e paga taitasi le avanoa e faataitai ai ma iloilo a latou [taumafaiga] faafaiaoga, valaaulia tagata o le vasega e faasoa mai i le vasega atoa ni malamalamaaga sa’o ma loloto mai o latou aafiaga.

Faaiu le lesona i le tusi o faamatalaga nei i luga o le laupapa, ma fai atu i tamaiti aoga e mafaufau, pe o a ni auala e mafai ai e nei mataupu faavae ona faateleina lo latou manao e auauna atu i se misiona:

O tagata uma tou te feiloai o se atalii/afafine o le Tama Faalelagi ma e alofaina e Ia.

O tagata uma tou te feiloai o loo tauaveina se avega o le le fiafia lea e oo mai mai agasala e le’i faaleleia e ala i le Togiola faamama a Keriso.

Valaaulia ni nai tamaiti aoga e faasoa mai ni o latou lagona a’o latou mafaufau loloto i nei faamatalaga. Mafaufau e faaiu le lesona i le fesili atu i tamaiti aoga pe i ai se tasi o i latou e fia tuuina atu se molimau i le vasega e uiga i aoaoga faavae e faatatau i le ata o le faaolataga.

Valaaulia e Faatino

Valaaulia tamaiti aoga e faaloloto lo latou malamalamaaga e uiga i le ata o le faaolataga ma faaleleia atili o latou tomai faafaiaoga e ala i le filifilia o se tasi o gaoioiga nei e galulue ai i fafo atu o le vasega:

Toe faamanatu le vaega “Faauigaga Autu” o loo i itulau e 58–59 o le Tala’i La’u Talalelei. Faataitai ona faamalamalama atu ia upu taitasi i a oe lava upu e faaaoga ai faamatalaga faigofie o upumoni.
Toe faamanatu fuaitau o mau o loo maua i pusa o Mau Suesueina i itulau e 49–50 o le Tala’i La’u Talalelei. Filifili se fuaitau se tasi pe lua o le a e manao e faaaoga e aoao atu ai vaega eseese taitasi o le ata o le faaolataga ma faailoga i au tusitusiga paia. Mafaufau e fai se tautinoga e tauloto se fuaitau se tasi pe sili atu o nei fuaitau.
Fai se fuafuaga mo le aoaoina atu o le ata o le faaolataga? Mafaufau e faaaoga ia manatu mo le fuafuaina o le lesona o loo i itulau e 55–58 o le Tala’i La’u Talalelei e faatatau atu i ai.
Mafaufau i se taimi na faamanuiaina ai lou olaga ona o lou malamalamaaga i le ata o le faaolataga. Tusi se aotelega o lena aafiaga i lau api talaaga mo suesuega pe faasoa atu i se uo.