2

O Lo Tatou Manaomia o le Togiola

Folasaga

O le Togiola a Iesu Keriso e totonugalemu i le fuafuaga o le faaolataga a le Atua. E ala i Lana Togiola, ua faataunuuina ai e Iesu Keriso ia faamoemoega o Lona Tama, e ala i le togiolaina o i tatou mai le oti faaleagaga ma le oti faaletino, faamalie manaoga o le faamasinogatonu, ma faamamaina tatou taitoatasi mai ia tatou agasala i luga o aiaiga o le salamo. E faamafanafana foi i tatou e le Faaola i o tatou vaivaiga, tuu mai ia i tatou le malosi e ausia ai mea o le a le mafai ona tatou faia na o i tatou lava, ma tuu mai ia i tatou le faamoemoe e faapea, e mafai ona tatou toe foi atu e nonofo faatasi ma Ia ma le Tama Faalelagi. E auai faifeautalai faamisiona i le galuega o le faaolataga e ala i le fesoasoani atu i isi ia iloa auala e maua ai faamanuiaga o le Togiola, e ala i le faatuatua ia Iesu Keriso, salamo, papatisoga, faamauga, ma le tumau e oo i le iuga.

Sauniuniga Muamua

• Suesue i mau o loo i lalo ia malamalama lelei ai i le pogai tatou te manaomia ai le Togiola: Roma 3:23; 2 Nifae 9:6–10; ma le Alema 42:9–14.

• Suesue i mau o loo i lalo e iloa ai nisi o faamanuiaga e maua e ala i le Togiola: Mosaea 3:19; 4:3; 24:12–15; ma le Alema 5:12–13; 7:11–13.

• Suesue i le [saunoaga a] Elder Jeffrey R. Holland, “Missionary Work and the Atonement,” Ensign, Mat. 2001, 8–15.

• Suesue i le Tala’i La’u Talalelei, itulau e 51–52 ma le 61–62.

• Sauni e faaali atu le vitio “O Loo Soifua o Ia! Ia Viia Lona Suafa!” (2:51; kilipi mai le saunoaga a Elder Richard G. Scott, Ensign po o le Liahona, Me 2010, 75–78), o loo maua i le lds.org/media-library.

Fautuaga mo le Aoaoina Atu

Uunaia se agaga o le alofa ma le faaaloalo. A’o o mai tamaiti aoga i le vasega, faafeiloai i latou i o latou igoa, ta’u atu ia i latou ua e fiafia e vaai ia i latou, faailoa atu le talisapaia o i latou, pe fesili atu po o a mai o latou aiga, galuega, po o aoga. O tamaiti aoga o e lagona le alofaina, faatuatuaina, ma le faatauaina e lo latou faiaoga ma isi tamaiti aoga, atonu o le a sili atu ona naunau e o mai i le vasega, sili atu ona mataala i faatosinaga a le Agaga ma i ai se naunautai malosi atu e auai.

O Le Pogai Tatou Te Manaomia ai le Togiola

Amata i le fai i tamaiti aoga o le mea lenei:

• E faapefea ona oo ina malamalama tagata latou te manaomia le Togiola a Iesu Keriso i o latou olaga?

O le isi, faaali atu le faamatalaga lenei:

“E pei lava o se tagata e le manao i se meaai seiloga ua fiaai, na te le manao ai foi i le faaolataga a Keriso seiloga ua ia iloa le pogai na te manaomia ai Keriso.

“E leai se tasi na te iloa lelei pe aisea na te manaomia ai Keriso seiiloga ua ia malamalama ma talia le aoaoga faavae o le Pa’ū ma ona aafiaga i tagata uma” (President Ezra Taft Benson, A Witness and a Warning [1988], 33).

Ona fesili atu lea:

• O le a le mea o loo tatou faatatau atu i ai pe a tatou talanoa i le Pau o Atamu.

Faaali atu le upusii lenei ma tuu atu i se tamaitiiti aoga e faitau leotele i le vasega:

“Ona sa agasala Atamu ma Eva … ma aai i le fua o le laau e iloa ai le lelei ma le leaga, sa tuliesea ai i laua mai luma o le Alii (tagai i le MF&F 29:40–41). I nisi faaupuga, sa la oo i le oti faaleagaga. Sa avea foi i laua ma tagata ola i la le tino—e oo i ai le oti faaletino. O lenei oti faaleagaga ma le oti faaletino e ta’ua o le Pau. …

“O le avea ai ma fanau a Atamu ma Eva, ua tatou maua ai se tulaga pau i le olaga faitino (tagai i le Alema 42:5–9, 14). Ua vavaeeseina mai i tatou mai le afioaga o le Alii ma oo i ai i le oti faaletino. Ua tuuina foi i tatou i se tulaga o le faafeagai, lea e tofotofoina ai i tatou i faigata o le olaga ma faaosoosoga a le fili (tagai i le 2 Nifae 2:11–14; MF&F 29:39; Mose 6:48–49)” (Faamaoni i le Faatuatua [2004], 130).

Fesoasoani i tamaiti aoga ia iloa aoaoga faavae na aoaoina i le upusii lenei e ala i le fesili atu:

• O le a le aafiaga o le Pau o Atamu ia i tatou taitoatasi i le avea ai ma suli o Atamu ma Eva? (E pei lava o Atamu ma Eva, tatou te oo foi i le oti faaletino ma le oti faaleagaga. Ua tatou ola i se lalolagi pau ma e oo i ai faigata o le olaga ma faaosoosoga a le fili. Ua vavaeeseina i tatou mai le afioaga o le Tama, ma e manaomia le fesoasoani a le Faaola ina ia tatou toe foi atu ia te Ia.)

Tusi mau nei i luga o le laupapa, ma tuu atu i tamaiti aoga ni nai minute e su’esu’e ai:

Roma 3:23

2 Nifae 9:6–10

Alema 42:9–11, 14

A o latou suesue, uunai tamaiti aoga e vaavaai mo auala e aafia ai i tatou taitoatasi i le Pau o Atamu ma Eva.

Faamatalaina o le aoaoga faavae. O se tasi o tomai e manaomia mo faifeautalai uma, o le mafai lea ona malamalama i aoaoga faavae latou te aoao atu ma faamatala atu i faaupuga faigofie. E mafai ona e faateleina le mafai a au tamaiti aoga ona fai o lenei mea e ala i le fai soo atu ia i latou e faamatala se aoaoga faavae, ma pe aisea e taua ai ona latou malamalama pe malamalama i ai tagata sailiili.

• O faapefea ona faamatala e nei mau le auala e aafia ai i tatou taitoatasi i le Pau o Atamu ma Eva? (Ao tali mai tamaiti aoga, tusi a latou tali i le laupapa. E ui atonu e eseese a latou tali, ae atonu e tai foliga faapenei: Tatou te agasala uma lava ma le mama ai i le silafaga a le Atua; ona tatou te agasala, o lea ua vavaeeseina ai i tatou mai le afioaga o le Atua; o le a tatou oo i le oti faaletino; ua tatou ola i se lalolagi pau ma e ao ona [tatou] lafoaia le “tagata natura” [Mosaea 3:19].)

Fesili atu i tamaiti aoga pe o a ni a latou fesili e uiga i aoaoga faavae ma faaupuga latou te tau i ai. Faataga se talanoaga a le vasega e suesue ai nei fesili. Ona fesili atu lea:

• E faapefea ona fesoasoani nei mau e faamatala ai le mafuaaga tatou te manaomia uma ai Iesu Keriso? (O le Togiola a Iesu Keriso e togiola ai i tatou mai le Pau o Atamu ma mai a tatou lava amioga le usiusitai.

Faamatala atu e faapea, o se vaega o le fuafuaga alofa a le Atua, o le Togiola a Iesu Keriso ua mafai ai ona tatou sao mai le “sauai” o le oti ma seoli (tagai i le 2 Nifae 9:10), o lona uiga o le oti faaletino ma le oti faaleagaga. O le a tatou toetutu uma. E ala i le Togiola a Iesu Keriso, e mafai ai ona faamamaina i tatou i a tatou agasala pe a tatou salamo. Ana leai Iesu Keriso, semanu e le gata ina tatou fano, ae o le a pulea i tatou e le tiapolo i le faavavau atoa.

Faasoa atu se molimau puupuu e uiga i le poto ma le alofatunoa o le fuafuaga a le Atua. Faamautinoa atu i tamaiti aoga e faapea, o taunuuga uma o le Pau e mafai ona faatoilaloina e ala i le Togiola a Iesu Keriso.

O Le Taua o le Aoao Atu o le Togiola

Mafuafau e faitau pe faaali atu le vitio puupuu o le faamatalaga lenei mai ia Elder Richard G. Scott o le Korama a Aposetolo e Toasefululua: Fai atu i le vasega e vaai mo mafuaaga e taua ai le faateleina o lo tatou malamalama i le Togiola.

“Ao e manatua le Toetu ma le tau na totogiina ma le meaalofa na tuuina mai e ala i le Togiola, mafuafau loloto i mea ua aoao mai e tusitusiga paia e uiga i na mea paia na tutupu. O le a faamalosia lau molimau patino e uiga i lo latou moni. E ao lava ona sili atu nai lo na o ni mataupu faavae e te taulotoina. E ao ona lalagaina i totonugalemu o lou tagata atoa se papuipui malosi e faasaga i le tai fana’e o le amioleaga ua pisia ai lo tatou lalolagi. …

“Ana leai le Togiola, semanu e le mafai ona aoga atoa le fuafuaga o le fiafia a le Tama oi le Lagi. O le Togiola ua tuuina mai ai i tagata uma le avanoa e manumalo ai i taunuuga o measese e faia i le olaga. A tatou usitai i se tulafono, tatou te maua se faamanuiaga. A tatou solia se tulafono, e leai se mea e totoe mai i le usiusitai sa i ai muamua e faamalie ai poloaiga o le faamasinoga tonu mo lena tulafono ua solia. O le Togiola a le Faaola ua mafai ai ona tatou salamo i soo se le usiusitai ma faapea ona aloese ai mai sala ia semanu e faaee mai e le faamasinoga tonu.

“O lo’u faaaloalo ma le loto faafetai mo le Togiola a le Paia e Toatasi o Isaraelu, le Aloalii o le Filemu ma lo tatou Togiola, e faaauau pea ona faateleina a’o ou taumafai e malamalama atili i ai. Ua ou iloa e leai se mafaufau [o se tasi] i le olaga nei e mafai ona lava mafaufauina, pe e mafai foi e le laulaufaiva o se tagata ola ona faamatala, le taua atoatoa o mea uma ua faia e Iesu Keriso mo le fanau a lo tatou Tama Faalelagi e ala i Lana Togiola. Ae peitai, e taua ona tatou aoaoina taitoatasi mea e mafai ona tatou aoaoina e uiga i ai. O le Togiola o le elemene taua lea i le fuafuaga o le fiafia a lo tatou Tama oi le Lagi, ana leai semanu e le mafai ona faatino lena fuafuaga. O lou malamalama i le Togiola ma le malamalamaaga sa’o ma loloto o loo aumaia ai mo lou olaga, o le a matuai faaleleia atili ai lou faaaogaina lelei o le poto, aafiaga, ma tomai uma e te maua i le olaga lenei. …

“O loo i ai se tulaga e matua manaomia mo i tatou taitoatasi ia faamalosia lo tatou malamalama i le taua o le Togiola a Iesu Keriso, ina ia avea ai ma faavae e le maluelue e fausia ai o tatou olaga. …

“O le mafaufau loloto faamaoni o le tagata lava ia i tusitusiga paia, e o faatasi ma le tatalo fiailoa ma mai le loto, o le a faamalosia ai lou malamalama ma le talisapaia o Lana Togiola e le mafaatauina” (O Loo Soifua o Ia! Ia Viia Lona Suafa e Faavavau!” Ensign po o le Liahona Me 2010, 75–76).

Fesoasoani i tamaiti aoga e suesue le saunoaga a Elder Scott e ala i le fai atu o fesili e pei o fesili nei:

• O a vaega o le saunoaga a Elder Scott na faamamafa mai ai le taua o le malamalama i le Togiola? (Ia mautinoa e faailoa mai e tamaiti aoga ia faamatalaga e pei o nei: o puapuaga o le Faaola “o le a aafia ai i tatou e le gata i lenei olaga ae e oo atu i le faavavau atoa”; “O Lana Togiola ua aoga atoatoa ai le fuafuaga o le fiafia a Lona Tama oi le Lagi”; “Ua aoao mai e Iesu le paleni i le va o le faamasinoga tonu ma le alofatunoa e faalagolago lea i luga o lo tatou usiusitai”; “o le Togiola ua tuuina mai ai i tagata uma le avanoa e faatoilalo ai taunuuga o measese na faia i le olaga”; ma le “o lou malamalama i le Togiola ma le malamalamaaga sa’o ma le loloto na te auamaia mo lou olaga o le a matuai faaleleia atili ai lou faaaogaina lelei o le poto, aafiaga, ma tomai uma e te maua i le olaga nei.”)

• Na saunoa Elder Scott, o mataupu faavae o le togiola “e ao lava ona sili atu nai lo na o ni mataupu faavae e te taulotoina. E ao ona lalagaina i totonugalemu o lou tagata atoa.” E mafai faapefea e se faifeautalai faaolioli ona faatupu lenei mea?

E toatele tagata talavou e le malamalama o faamanuiaga, e ese mai i le faamagaloina o agasala, e oo mai i o latou olaga e ala i le Togiola. Ina ia fesosaoani e faaloloto le malamalama o tamaiti aoga e uiga i isi faamanuiaga nei, tuu atu i le vasega ni nai minute e suesue ai ia mau fuaitau nei, ma vaavaai mo faamanuiaga ia e oo mai e ala i le Togiola a Iesu Keriso: Mosaea 3:19; 4:3; 24:12–15; Alema 5:12–13; 7:11–13. A ua lava se taimi na tuu atu i ai, fai atu i tamaiti aoga e faamatala mai nisi o faamanuiaga e tele o le Togiola. Aotele a latou tali i luga o le laupapa.

Manatua: A o le’i faaauauina [le lesona], atonu e te faaaluina ni nai minute e faitau ma talanoa ai ma tamaiti aoga le tusiga i le Bible Dictionary mo le Togiola.

Faaali atu le saunoaga lenei, ma fai i se tamaitiiti aoga e faitau leotele:

“A o faatupulaia lou malamalama i le Togiola a Iesu Keriso, o lou manao e fetufaai atu le talalelei o le a faateleina” (Tala’i La’u Talalelei, 2).

Fesoasoani i au tamaiti aoga ia malamalama lelei i lenei mataupu faavae e ala i le fesili atu:

• Aisea o le a faateleina ai le manao o se tagata e fetufaai atu le talalelei pe a malamalama o ia i le Togiola?

Tofi ni tamaiti aoga e galulue faatasi ma se isi tagata o le vasega e auauai e faitau leotele le 1 Nifae 8:10–12; Enosa 1:5–9; ma le Mosaea 27:34–36 ma le 28:1–4. Tuu atu ia i latou e vaavaai mo se mamanu o loo maua i nei fuaitau: A maea le taimi, valaaulia ni nai tamaiti aoga e faamatala le mamanu na latou mauaina. (Ina ua uma ona maua e Liae, Enosa, ma atalii o Mosaea ia faamanuiaga o le Togiola, sa latou lagona se manao e fetufaai atu le talalelei ma fesoasoani i isi ia maua ia lava faamanuiaga.)

Ina ia fesoasoani i tamaiti aoga e lagona le upumoni ma le taua o le mataupu faave na e tusia i le laupapa, fesili atu i ai:

• Afai e le patino tele, o a ni aafiaga na e oo i ai e uiga i le Togiola na faapea ona faaosofia ai oe e fetufaai atu le talalelei i isi?

• E faapefea ona faaosofia oe e lou malamalamala ma [ou] lagona e uiga i le Togiola ina ia aumaia isi ia latalata atili atu ia Iesu Keriso?

Tuu atu i tamaiti aoga se taimi e mafaufau loloto ai pe o lo latou malamalama i le Togiola a Iesu Keriso o se vaega lea ua faaosofia ai i latou e faia se misiona, ma o le a se mea latou te ono faia e faateleina ai le maualuga o lo latou loto faafetai mo le mea ua faia e Iesu Keriso mo i latou.

O le Fesoasoani i Tagata Sailiili ia Maua Faamanuiaga o le Togiola

Ta’u atu i au tamaiti aoga, e leai se aoaoga faavae o le a latou aoao atu o ni faifeautalai, e sili atu ona taua mo tagata sailiili ma faifeautalai ina ia malamalama i ai ma talia nai lo o le Togiola a Iesu Keriso.

Tuu atu i tamaiti aoga e suesue i le 2 Nifae 2:6–8 ma vaai mo le mea na aoao mai e Liae e tatau ona tatou faia i lo tatou malamalama e uiga i le Togiola. A uma ona tali mai ni nai tamaiti aoga, fesoasoani ia latou malamalama i le manaomia e tagata sailiili ona malamalama ma talia le Togiola e ala i le faaali atu ma le faitau atu o le faamatalaga lenei mai ia Elder Jeffrey R. Holland o le Korama a Aposetolo e Toasefululua:

“I konafesi faalesone, o nisi ia o taimi faaleaoaoga sili ona matagofie matou te mauaina o ni Pulega Aoao faatasi ma nei alii ma tamaitai faifeautalai talavou, sa ou fesili ai i faifeautalai po o le a le mea latou te mananao i tagata sailiili e fai pe a maea a latou talanoaga ma lesona.

“‘Ia papatisoina!’ sa taufai alalaga mai ai.

“‘Ioe,’ sa ou fai atu ai, ‘tatou te mananao ina ia latou papatiso, ae o le a le mea e tatau ona muamua atu i le mea lena?’ …

“… E toetoe lava a le mafai ona oo atu faifeautalai e faaailoa mai ia mea aupito taua e lua tatou te mananao i tagata sailiili e fai ao lei papatiso: ia faatuatua i le Alii o Iesu Keriso ma salamo i a latou agasala. Aua ‘tatou te talitonu o uluai mataupu autu ma sauniga nei o le Talalelei: muamua, Faatuatua i le Alii o Iesu Keriso; o lona lua, Salamo; [ona sosoo ai ma le] lona tolu, Papatisoga e ala i le faatofuina mo le faamagaloga o agasala; o lona fa, Faaeega o lima mo le meaalofa o le Agaga Paia’ (MF o le F 1:4; ua faaopoopo le faamamafa).

“O le olaga fou o se tagata liliu mai e tatau ona fausia i luga o le faatuatua i le Alii o Iesu Keriso ma Lana taulaga togiola—o se tautinoga o Ia moni o le Alo o le Atua, o loo soifua o Ia i le taimi lava lenei, o Ia moni o le faitotoa o le pa mamoe, ma e na o Ia lava o loo umia le ki i lo tatou faaolataga ma le faaeaga. O lena talitonuga e tatau ona sosoo atu ai ma le salamo moni, o le salamo lea e faaalia ai lo tatou naunau ina ia mama ma faafouina ma atoatoa, o le salamo e mafai ai ona fai mo i tatou faamanuiaga atoatoa o le Togiola” (“O Le Galuega Faafaifeautalai ma le Togiola,” Liahona, Oke. 2001, 10–11).

Ona fesili atu lea:

• O le a se mea e tatau ona faia e se tagata sailiili e maua ai faamanuiaga atoatoa o le Togiola? (Ia faatuatua ia Iesu Keriso, salamo, ma ia papatisoina.)

Faamatala atu i tamaiti aoga o le Mataupu Faavae ma Feagaiga 20:37 o loo faamatala mai ai tulaga e agavaa ai mo le papatisoga. Tuu atu i tamaiti aoga e faitau le fuaiupu ma vaavai mo mea e tatau ona fai e tagata sailiili a’o lei papatisoina. Fesili atu:

• O a nisi o mea e tatau ona fai e tagata sailiili e faaali ai o loo latou atiina a’e le faatuatua ia Iesu Keriso? (O le a faalotomaualalo i latou lava, salamo i a latou agasala, faaalia galuega lelei, ma isi mea faapena.)

• O le a le matafaioi e fai e faifeautalai e fesoasoani ai i tagata sailiili ia ausia ai tulaga e agavaa ai mo le papatisoga? E faapefea ona fesootai lenei mea i lou faamoemoega o se faifeautalai? (Afai e manaomia, faamanatu atu i tamaiti aoga ia mataupu faavae mai le lesona ua te’a atu.

Ua Poloaiina Faifeautalai e Aoao Atu le Salamo

I luga o le laupapa, tusi ai le fesili lenei:

O le a le mea e aupito sili ona taua e mafai ona faia e faifeautalai e aumai ai fanau a le Atua ia Keriso?

Tuu atu i tamaiti aoga e faitau le Mataupu Faavae ma Feagaiga 18:11–14 ma vaavaai mo le tali i le fesili o loo i luga o le laupapa. Ia talanoaina tali a tamaiti aoga i le fesili, ona fesili atu lea:

• Aisea ua na o le salamo le auala e mafai ai e fanau a le Atua ona maua faamanuiaga atoatoa o le Togiola? (Tagai i le Mosaea 16:13; Alema 11:37; ma le Helamana 14:13.)

I luga o le laupapa, tusi ai le tali lenei i le fesili lena ua uma ona faaalia:

Ua poloaiina faifeautalai e aoao atu le salamo ina ia mafai ona maua e i latou, latou te aoaoina ia faamanuiaga atoatoa o le Togiola ma amata ai se olaga fou ia Keriso.

Faamalamalama, faasoa atu, ma molimau atu. O se mamanu faavae o le aoao atu e tatau ona aoaoina ma masani lelei ai faifeautalai uma o le: (1) faamalamalama se aoaoga faavae e faaaoga ai a latou lava upu, (2) faasoa atu se mau po o se aafiaga patino e fesoasoani e faamatala ai le aoaoga faavae, ma le (3) molimau atu e uiga i o latou lagona e uiga i le aoaoga faavae ma le pogai e taua ai.

Vaelua le vasega. Tuu atu i le afa o le vasega e suesue i le vaega ua faaautuina “O Le Togiola” i itulau 51–52 o le Tala’i La’u Talalelei. Tuu atu i le isi afa o le vasega e suesue i le vaega ua faaautuina “E Mafai Ona Faamamaina i Tatou mai Agasala e Ala ia Keriso” i itulau 61-62 o le Tala’i La’u Talalelei. Tuu atu i tamaiti aoga ni nai minute e faitau ai ma ia sauni e aoao atu se vaaiga aoao e lua minute e uiga i mea na latou faitauina. O se vaega o la latou vaaiga aoao, uunai tamaiti aoga e (1) faailoa ma faamatala ia vaega taua o le aoaoga faavae, (2) faasoa atu se aafiaga patino po o se mau e lagolago ai le aoaoga faavae, ma le (3) molimau atu e uiga i mea latou te aoao atu. Aotele nei sitepu e tolu i luga o le laupapa.

A ua lava loa le taimi o tamaiti aoga e sauni ai, atonu e te tuu atu tamaiti mai le vaega muamua e paga ma se tasi mai le isi vaega ma auauai e aoao e le tasi le isi. A ua uma ona maua e tamaiti aoga uma le avanoa e aoao ai le isi tagata o le vasega, atonu e te valaaulia se tamaitiiti aoga e volenitia e sau i luma o le vasega e aoao atu lana vaaiga aoao i le vasega. A uma loa le aoaoga, faamalo atu i le tamaitiiti aoga sa fai atu lana aoaoga ma fesili atu i le vasega mo soo se manatu faaalia e uiga i le aafiaga. Fai atu pe i ai ni a latou fesili, ona fesili atu lea:

• Na faapei le lagona i le aoao atu ma le molimau atu e uiga i le Togiola a Iesu Keriso?

• O a nisi o mea na e iloaina e ono fesoasoani ia te oe pe a e aoaoina tagata sailiili e uiga i le Togiola a Iesu Keriso?

• Aisea e te tulimata’i atu ai i le aoaoina atu o le Togiola a Iesu Keriso i isi?

Manatua: Afai e lava le taimi, atonu e te mafaufau e faaaoga le manatu faafaiaoga lenei e fesoasoani ai i tamaiti aoga e atina a’e le talitonuga sili atu i le aoaoina atu o le Togiola a Iesu Keriso. A le o lea, faaiu i le valaauliaina o ni nai tamaiti aoga e faasoa mai o latou lagona e uiga i le Faaola ma Lana Togiola.

Faaaogaina o Tusitusiga Paia

Faamatala atu i tamaiti aoga, i le avea ai ma faifeautalai, e mafai ona latou aoao atu ma le mana sili atu pe a latou faaaogaina tusitusiga paia. Tuu atu i le afa o le vasega e suesue i fuaitau o mau i le vaega o le “Togiola” i le pusa o Mau Suesueina i le itulau 52 o le Tala’i La’u Talalelei. Tuu atu i le isi afa o le vasega e suesue i fuaitau o mau i le pusa o Mau Suesueina i le itulau 62 o le Tala’i La’u Talalelei. Uunai tamaiti aoga e filifili se fuaitau e uiga i le Togiola a Iesu Keriso latou te malamalama i ai, ma o le a [latou] lagona le to’alelei e molimau e uiga i ai. A maea se taimi talafeagai e tuu atu i tamaiti aoga e faasoa mai ai, ia fesili atu:

• E faapefea ona e faaaogaina le mau na e filifilia e fesoasoani ai i se tasi ia malamalama lelei ai i le Togiola a Iesu Keriso? (Uunai ni nai tamaiti aoga e tali mai.)

• Aisea e te manatu, e taua ai i faifeautalai ona faaaoga tusitusiga paia pe a latou aoao atu?

Tuu atu i tamaiti aoga e sue i le vaega ua faaautuina “Faaaoga ia Tusitusiga Paia” i itulau 194-95 o le Tala’i La’u Talalelei. Tuu atu i se tamaitiiti aoga e faitau le parakalafa muamua, ia aofia ai vaega togitogi e fa, ona fai atu lea i tagata o le vasega e mafaufau, pe faapefea ona tutusa o latou manatu e uiga i le faaaogaina o tusitusiga paia ma le faamatalaga i le Tala’i La’u Talalelei.

Ta’u atu i lau vasega, i ni nai minute o le a latou aoaoina ai se isi tamaitiiti aoga, e faaaoga ai mau e uiga i le Togiola ia na latou filifilia muamua atu. Faamatala atu o loo i ai mataupu faavae i le Tala’i La’u Talalelei o le a fesoasoani ia i latou a o latou aoao atu. Tuu atu i se tamaitiiti aoga e faitau leotele le soavaega ua faaautuina “Ia folasia atu le mau” o loo i le itulau 195 o le Tala’i La’u Talalelei. Fesili atu pe i ai ni tamaiti aoga e i ai soo se fesili e uiga i lenei laasaga, ma tuu atu ia i latou se taimi e mafaufau ai pe o le a faapefea ona latou folasia mai le mau ua latou filifilia.

O le isi, tuu atu i se isi tamaitiiti aoga e faitau leotele le soavaega ua faaautuina “Faitau le fuaitau” o loo i itulau 195-96 o le Tala’i La’u Talalelei. Tuu atu i tamaiti aoga se taimi e faitau filemu ai a latou fuaitau o mau filifilia, ma faailoa mai soo se upu po o fuaitau latou te ono manaomia ona faamatala atu i se tagata sailiili. Ona tuu atu lea i se tamaitiiti aoga lona tolu e faitau leotele le soavaega ua faaautuina “Faaaoga le mau” o loo i le itulau 196. Ia toe fesili atu i tamaiti aoga pe i ai ni a latou fesili.

Ina ia fesoasoani i tamaiti aoga ia manuia i le aoao atu mai tusitusiga paia, e tatau ona e faataitaia le tomai mo i latou. Mafaufau e filifili se fuaiupu se tasi pe lua mai le Mosaea 3:7–11 ma le 16–19 e aoao atu, ina ia e le faaaogaina ai le fuaitau o le mau ua filifilia e tamaiti aoga. Ia faafaigofie ma faapuupuu ao e faaalia ia laasaga e tolu: folasia, faitau, ma faaaoga le fuaitau o le mau. O lenei faataitaiga o le a fesoasoani i tamaiti aoga ia aua ai ne’i lagona le lofituina i mea ua faamoemoeina mai ia i latou. A uma lau [faataitaiga], fai atu i tamaiti aoga pe i ai ni a latou fesili.

Tuu atu i tamaiti aoga ni nai minute e sauni ai e aoao atu a latou fuaitau o mau na filifilia e faaaoga ai sitepu e tolu o loo maua i le Tala’i La’u Talalelei. Ona fai paga lea o tamaiti aoga taitoatasi ma se isi tagata o le vasega, ma tuu atu ia i latou e aoao e le tasi le isi. A uma ona aoao atu tamaiti aoga, ia faamautinoa atu ia i latou, a’o latou suesue i tusitusiga paia ma le Tala’i La’u Talalelei, o le a faateleina lo latou gafatia ma le to’a i le aoaoina atu o le talalelei.

Ina ia faaiuina le lesona o le aso, fesili atu i tamaiti aoga pe i ai se isi o i latou e fia faasoa mai o latou lagona e uiga ia Iesu Keriso, ae maise lava e uiga i le Togiola a Iesu Keriso.

Valaaulia e Faatino

Valaaulia au tamaiti aoga e fai se mea se tasi pe sili atu o mea nei, e fesoasoani ai ia latou malamalama lelei i le Togiola a Iesu Keriso?

• I le taimi o au suesuega patino o tusitusiga paia, faailoga pe valivali ni fuaitau e fesoasoani e te malamalama ai ia Iesu Keriso ma Lana Togiola.

• Faasoa atu lau molimau e uiga i le Togiola i se tasi i le fale, i le lotu, po o luga o le initoneti.

• Pe a tusa ai ma [ou] tulaga, molimau atu e uiga i le Togiola i le taimi o se aoaoga faatulagaina faatasi ma faifeautalai faamisiona.

• Faaalu se taimi i aso taitasi e suesue ai i tusitusiga paia i le Togiola a Iesu Keriso.