E malamalama faifeautalai faamanuiaina, “pe a tautala se tagata e ala i le mana o le Agaga Paia, e molioo e le mana o le Agaga Paia i loto o le fanauga a tagata” (2 Nifae 33:1). Pe a na o i latou lava, e le mafai e faifeautalai ona aumai faamanuiaga o le molimau ma le liua i le isi tagata, e tusa lava po o le a lo latou lelei po o le potomasani. E na o le Agaga Paia e mafai ona aumaia le liua moni. A lagona e tagata sailiili le Agaga o galue i totonu ia i latou, pe a latou vaaia foi faamaoniga o le alofa ma le alofa mutimutivale o le Alii i o latou olaga, e faapea ona faamalamalamaina ma faamalosia i latou faaleagaga, e faateleina lo latou faatuatua ia Iesu Keriso, ma e tele se avanoa latou te liliu mai ai.
Faamatala atu i tamaiti aoga e faapea, sa i ai se taimi na saunoa ai Peresitene Polika Iaga e uiga i lona liliu mai i le talalelei ma e uiga i le faifeautalai sa fesoasoani ia te ia ia maua se molimau. Ona faaali lea o le vitio “A Man without Eloquence” (6:06). Fai atu i tamaiti aoga e taulai atu ma le totoa i le auala na faia ai e le Agaga se aafiaga ia Peresitene Polika Iaga ma fesoasoani i lona liliu mai.
A uma ona matamata le vitio, fai atu fesili nei:
O le a le auala na fesoasoani ia Polika Iaga e liliu moni ai e ala i le faalogo atu i le molimau a le alii lotomaualalo?
Mai le aafiaga a Polika Iaga, o a ni mataupu faavae ua e aoaoina e uiga i le aoao atu e ala i le Agaga? (E mafai e tamaiti aoga ona faailoa mai ia mataupu faavae nei: O le aoao atu e ala i le Agaga e mafai ona taitai atu ai i le liua o isi; a tatou aoao atu e ala i le Agaga, e ao ona tatou faamaoni ma tautala mai le loto; e ao ona tatou lotomaualalo [tagai i le MF&F 136:33].)
O a mataupu faavae e uiga i le aoaoina atu o le talalelei ua tuuina mai i nei faaaliga? (E tele tali sa‘o e mafai ona ta‘u mai e tamaiti aoga. O tali e mafai ona aofia ai le mataupu faavae lenei: Ua poloai mai le Alii, e tatau ona aoao atu le talalelei e ala i le Agaga ae e le o se isi lava ala.)
E tusa ai ma le Mataupu Faavae ma Feagaiga 50:22, o le a le mea e tupu pe a aoao atu se faifeautalai e ala i le Agaga? (O le faifeautalai ma le tagata sailiili “e malamalama i le tasi, ma e faagaeetiaina ma olioli faatasi i laua uma.” Ia faamanino atu mo tamaiti aoga e faapea, o le aoao atu e ala i le Agaga, na pau le taimi e mafai ona tupu ai, o le taimi lea e i ai le Agaga ma lagonaina e le faiaoga, e le tagata aoao, po o i la‘ua uma. Mafaufau e tusi le mataupu faavae lenei i luga o le laupapa.)
Faamanatu atu i tamaiti aoga o le i ai o le Agaga e le o taimi uma e faaali mai ai e ala i lagona ma loimata. Afai e manaomia, faitau atu i le vasega le saunoaga lenei mai ia Peresitene Howard W. Hunter:
Ata
Peresitene Howard W. Hunter
“Se‘i ou tuuina atu se upu lapatai e faatatau i lenei mataupu. … Ou te popole pe a foliga mai e faapea, e tutusa ia lagona malolosi po o le maligi gofie o loimata ma le faatasi mai o le Agaga. E moni lava, e mafai e le Agaga o le Alii ona aumaia lagona malolosi, e aofia ai loimata, ae o lena faailoaga mai fafo e le tatau ona fenumiaia ma le i ai o le Agaga lava ia.
“Ua ou matauina le toatele o o’u uso i le tele o tausaga, ma ua matou fefaasoaai faatasi foi i nisi o aafiaga faaleagaga e seasea ona tutupu ma e le mafaamatalaina. E matua eseese uma lava na aafiaga, e faapitoa mea taitasi i lona lava tulaga, ma o na foi taimi paia atonu e i ai pe leai foi ni loimata e aumai ai. E tele taimi o le mea lena e i ai, ae o nisi foi taimi e o mai faatasi ma le matuai taaligoligoa. O isi taimi e o mai faatasi ma le olioli. O taimi uma lava e o mai faatasi ai ma se faaaliga maoae o le upumoni, o faaaliga i le loto” (“Eternal Investments” [saunoaga i faiaoga o mataupu faalelotu a le Ofisa o Aoga a le Ekalesia, 10 Fep. 1989], 3; si.lds.org).
Ina ia fesoasoani i tamaiti aoga ia malamalama lelei i auala e mafai ai e le Agaga Paia ona faia se aafiaga i faiaoga ma tagata aoao, tusi ia mau nei i luga o le laupapa, pe tufa atu i tamaiti aoga i se pepa e tufa atu. (Manatua: ia tuu atu i tamaiti aoga na o tusi o mau; o faaupuga o loo i puipui e mo le fesoasoani i le faiaoga):
Tofi tamaiti aoga e suesue ia mau fuaitau nei i paga. Tuu atu i se tamaitiiti aoga e toatasi i paga taitasi e vaavaai mo auala e mafai ai e le Agaga Paia ona faia se aafiaga i faiaoga o le talalelei, ae o le isi tamaitiiti aoga e vaavaai mo auala e mafai e le Agaga Paia ona faia se aafiaga i se tasi o loo aoaoina. Ona tuu atu lea ia i latou e talanoa i le tasi ma le isi i mea ua latou aoaoina. A ua lava se taimi e talanoa ai paga taitasi i mea na latou aoaoina, fai atu fesili e pei o nei e fesoasoani e suesue atili ai mea na latou faitauina:
E tusa ai ma nei fuaiupu sa outou suesueina, o a nisi o auala e fai ai e le Agaga ni aafiaga ia i latou o e aoao atu? (Ao tali mai tamaiti aoga, e mafai ona e fesili atu ia i latou po o a fuaitau o tusitusiga paia na maua ai a latou tali.)
E faapefea ona faia e le Agaga se aafiaga i isi ina ia liliu mai i le talalelei a Iesu Keriso?
O faapefea ona faaalia i nei fuaitau le mafuaaga e taua ai i faifeautalai ona aoao atu e ala i le Agaga?
Valaauliaina o le Agaga a‘o E Aoao Atu
Ta‘u atu i lau vasega e faapea, o loo i le Tala‘i La‘u Talalelei nisi o vaega o loo faamatala mai ai mea e mafai ona fai e faifeautalai e valaaulia ai le taitaiga a le Agaga a‘o latou aoao atu. Vaevae lau vasega i ni vaega toalaiti ia le sili atu ma le toafa tamaiti aoga i le vaega. Tofi vaega taitasi e suesue se tasi o vaega nei o le Tala‘i La‘u Talalelei:
“Faalogo,” itulau e 200–01 (e le aofia ai le pusa o le Gaoioiga)
Tusi faatonuga nei i luga o le laupapa ina ia iloa e vaega mea e tatau ona latou faia:
Faitau lau vaega o le Tala‘i La‘u Talalelei.
Talanoa i a outou vaega po o a mataupu faavae sa outou faitauina e mafai e faifeautalai ona avea ai ma ni tagata aoao atu sili ona mataalia ma ia i ai le Agaga e faatasi ma i latou a‘o latou aoao atu.
A uma se taimi talafeagai, fai atu i se tamaitiiti aoga mai vaega taitasi e fai se aotelega pe mafai faapefea e le tomai sa latou faitau i ai ona saofaga i le gafatia e se faifeautalai ona aoao atu ma le Agaga Paia. Valaaulia se tamaitiiti aoga e aotele ia vaega taua i luga o le laupapa.) Ao aotele e vaega o latou manatu, mafaufau e fai atu fesili e pei o nei:
E mafai faapefea e le amataina o se lesona i se ala sa‘o ona valaaulia le Agaga Paia e auai i le aoaoina atu o le lesona.
E mafai faapefea e le faafaigofie o le savali o le talalelei ona valaaulia le Agaga Paia e aoao atu ma aoao i se tagata sailiili.
E faapefea ona valaaulia le Agaga Paia e ala i le taula‘i atu o le lesona i manaoga o le tagata sailiili?
O a auala o le a saofaga ai le faalogo atu i faamatalaga a se tagata sailiili, i le gafatia o se faifeautalai ona aoao atu e ala i le Agaga?
Ina ia fesoasoani i tamaiti aoga ia iloa pe faapei foliga o nisi o tomai faafaiaoga o loo i luga, faaali atu le vitio “Aoao Atu Tagata, Ae Le o Lesona: Jynx” (6:34). Uunai tamaiti aoga e vaavaai mo ni faamaoniga faapea sa aoao atu faifeautalai e ala i le Agaga. E mafai ona matamata faapitoa tamaiti aoga e vaavaai auala na faaaoga ai e faifeautalai ia tomai na aoaoina e le vasega i le Tala‘i La‘u Talalelei ma pe na faapefea ona valaaulia le Agaga i le aoaoga a faifeautalai e ala i le faaaogaina o nei tomai.
A uma ona matamata le vitio, ia talanoa i fesili nei:
O a mea na fai e faifeautalai i la laua aoaoga na mafai ai ona laua aoao atu e ala i le Agaga?
O le a se faamaoniga na e vaaia sa aoao Jynx e ala i le Agaga?
A‘o le‘i faaauaua, tuu atu i tamaiti aoga se taimi e tusi ai i lalo se tali i le fesili lenei:
O le a faapefea ona e faaaogaina ia mataupu faavae ua tatou talanoaina e tau mai i le taimi lenei i le lesona?
Fesoasoani i Tagata Sailiili ia Iloa le Agaga
Fai atu i ni tamaiti aoga e auauai i le faitauina leotele o le vaega “O Le Mana o le Agaga i le Liuaina” i itulau 96–97 o le Tala‘i La‘u Talalelei (e le aofia ai pusa o le Gaoioiga ma Mau Suesueina). Tuu atu i isi tamaiti aoga uma o le vasega e mulimuli i le faitauga ma faailoga fuaitau o loo faamatala ai lagona e ao ona lagonaina e se tagata sailiili ina ia mafai ona tupu le liuaina. Ona fesili atu lea:
O le a le mea e tatau ona lagona e tagata sailiili ina ia mafai ona tupu le liuaina? (Ia mautinoa e faailoa mai e tamaiti aoga le mataupu faavae lenei: A lagona e tagata sailiili le Agaga o galue ia i latou, o le a tele atu se avanoa latou te liliu mai ai i le talalelei a Iesu Keriso.)
E mafai faapefea ona e iloa ua lagona e se tagata sailiili le aafiaga o le Agaga Paia? (O tali e mafai ona i ai: e lagona e le faifeautalai le Agaga Paia; e lagona e le tagata sailiili le saogalemu i le fesiligia o fesili, manao e aoao atili, ma e naunau e fai ma tausia tautinoga; e i ai le agaga malamalama, se lagona o le fiafia, ma se latalata atu i le Atua; ma e i ai se faauoga loloto atu i le va o le faifeautalai ma le tagata sailiili.)
Na aoao mai Elder M. Russell Ballard, “O aafiaga i le Agaga e sosoo mai lava pe a naunau se tagata e tofo i le upu” (“O Le Taimi Lenei,” Liahona, Ian. 2001, 89). O a mea e mafai ona fai e se faifeautalai e uunai ai tagata sailiili e tofo i le upu?
Faamatala atu i tamaiti aoga e faapea, o se tasi o o latou matafaioi e sili ona luitauina i le avea ai o ni faifeautalai, o le fesoasoani lea i tagata sailiili ia iloa uunaiga a le Agaga Paia, ona sosoo ai lea ma le fesoasoani ia i latou e faatino loa na manatu ma lagona. E ala i musumusuga e ala mai i le Agaga Paia, e mafai ai e faifeautalai ona iloa ia uunaiga faaleagaga e manaomia ona maua e se tagata sailiili, ina ia mafai ai ona liliu mai, ma e mafai ona latou faia se siosiomaga e mafai ona oo mai ai na uunaiga.
Ina ia faaali atu le ala e mafai ona faia ai lenei mea, faaali atu le vitio “Aoao Atu e uiga i le Agaga Paia ma le Tatalo: John” (5:00). Valaaulia le vasega e vaai mo auala na fesoasoani ai faifeautalai ia John e aoao ia iloa le Agaga.
A uma le vitio, fai atu fesili nei:
Na faapefea ona fesoasoani faifeautalai ia John ia iloa le Agaga?
O le a le mea na fai e faifeautalai e fesoasoani ai ia John ia iloa le auala e maua ai tali mai le Alii?
Valaaulia tamaiti aoga e faitau le Mataupu Faavae ma Feagaiga 11:12, ona tuu atu lea ia i latou e talanoa ma ni paga le fesili lenei.
Afai e fesili atu se tagata sailiili ia te oe pe faapei le lagona o le Agaga Paia, e faapefea ona fesoasoani le Mataupu Faavae ma Feagaiga 11:12 ia te oe i lau tali i ai?
Faatino o Uunaiga a le Agaga
Faaali atu le faamatalaga lenei ma tuu atu i se tamaitiiti aoga e faitau leotele:
Ata
Elder Richard G. Scott
“O le fesootaiga ma lo tatou Tama i le Lagi e le o se mataupu faatauvaa. O se avanoa paia. O loo faavae i luga o mataupu faavae le masuia e faavavau. Tatou te mauaina le fesoasoaniga mai lo tatou Tama i le Lagi o le tali mai i lo tatou faatuatua, usiusitai, ma le faaaogaina tatau o le faitalia” (Richard G. Scott, “E Faapefea ona Maua ia Faaaliga ma Musumusuga mo Lou Olaga Patino,” Ensign po o le Liahona, Me 2012, 47).
Ona fesili atu lea:
O a ni auala e mafai ona avea ai a tatou fesootaiga ma le Tama Faalelagi o se mea faatauvaa? O le a se mea e mafai ona tatou faia ia atili anoa ai a tatou tatalo?
O le a le uiga ia te oe o le, “tatou te mauaina le fesoasoaniga mai lo tatou Tama i le Lagi o le tali mai i lo tatou faatuatua, usiusitai, ma le faaaogaina tatau o le faitalia”? (E ui atonu latou te faaaogaina ni upu eseese, atonu o le a tali mai tamaiti aoga i se mea e pei o lenei: Tatou te maua le fesoasoani mai lo tatou Tama i le Lagi pe a tatou taulai atu i le faateleina o lo tatou faatuatua, usiusitai, ma le faaaogaina tatau o le faitalia. Tusi le mataupu faavae lenei i luga o le laupapa.)
Ina ia fesoasoani e faaloloto le malamalamaaga o tamaiti aoga e faatatau i lenei mataupu faavae, faaali atu upusii nei e lua a Peresitene Boyd K. Packer o le Korama a Aposetolo e Toasefululua, ma valaaulia se tamaitiiti aoga e faitau leotele atu i le vasega:
Ata
Peresitene Boyd K. Packer
“O lenei siufofoga o le Agaga e saunoa lemu mai, e uunaia outou i le mea e ao ona faia, po o mea e ao ona fai atu ai, po o le lapataia foi o outou.
“A faagalogalo pe le usitaia foi nei uunaiga, o le a tuua loa outou e le Agaga. O la outou filifiliga—o la outou filifiliga saoloto lea” (“O Faaaliga mo le Tagata lava Ia: O Le Meaalofa, o le Tofotofoga, ma le Folafolaga,” Liahona, Ian. 1995, 60).
Ata
Peresitene Boyd K. Packer
“E le mafai ona maua e le Agaga lo tatou gauai atu i le feei po o le luluina o i tatou i se lima mamafa. Ae e musumusu mai. E pa’i mai ma le malū, ioe, afai o pisi i tatou, o le a lē mafai lava ona tatou lagonaina. …
“E masani lava o le a ia faamamafa mai tau lava ina ia mafai ai ona tatou faalogo atu. Ae o le tele lava o taimi, afai tatou te le faalogo i le lagona malu, o le a aluese le Agaga ma faatali sei tatou o mai e saili ma faalogo” (“O Le Lamepa a le Alii,” Liahona, Tes. 1988, 33).
O a ni mea ua outou aoao mai i aoaoga nei a Peresitene Packer?
Talu ai o le Agaga Paia e fetalai malu mai, o a ni ituaiga o mea e mafai ona faigata ai ona lagona pe iloa le Agaga i le lalolagi i aso nei?
Ao tali mai tamaiti aoga, mafaufau e talanoa i auala e mafai ai e le soona faaaoga o masini eletonika ona faafaigata ai ona iloa le Agaga. (Mo nisi faamatalaga e uiga i lenei autu, tagai i le M. Russell Ballard, “Be Still, and Know That I Am God” (Faigalotu a le Ofisa o Aoga a le Ekalesia, mo talavou matutua, 4 Me, 2014.)
O le isi, mafaufau e faitau le saunoaga lenei a Elder Richard G. Scott o le Korama a Aposetolo e Toasefululua:
Ata
Elder Richard G. Scott
“O leloto maualalo e taua tele i le ausia o le malamalama faaleagaga. O le lotomaualalo, o le taliaina lea o aoaoga. O le lotomaualalo e te faatagaina ai oe e aoaoina e le Agaga, ma aoaoina i ala ua musuia ai e le Alii, e pei o tusitusiga paia. O fua o le faatupuina o le tagata ma lona malamalama, o le a fuga ma fua mai i le laueleele lafulemu, o le loto maualalo. O o laua fua, o le malamalama faaleagaga lea, e taitaiina oe i lenei olaga ma le olaga a sau.
“O le tagata faamaualuga, e le mafai ona malamalama o ia i mea a le Agaga. Na aoao mai e Paulo lenei upu moni, ina ua faapea mai:
“E le iloa e se tasi mea a le Atua, ua na o le Agaga o le Atua. …
“‘Ae le talia e le tagata faaletino o mea a le Agaga o le Atua; aua o mea valea ia ia te ia, na te le mafai foi ona iloa, aua e faamasinoina faaleagaga‘ (1 Kor. 2:11, 14)” (“Ausia o le Malamalama Faaleagaga,” Liahona, Ian. 1994, 102).
O le a le matafaioi e faia e le loto maualalo i lo tatou gafatia o le mauaina ma iloa uunaiga a le Agaga.
Sa i ai ni ou aafiaga i se taimi na taitaiina ai oe e le Agaga? Na faapei? Na faapefea ona e iloa o le Agaga? (Tagai Moronae 7:13.)
Afai e lava le taimi, vaelua lau vasega. Faamatala atu i au tamaiti aoga o le a latou vaavaai i ni mau se lua e suesue ai, e vaai ai pe na faapefea ona taitaiina e le Agaga o le Alii le galuega a Ana auauna. Tuu atu i le afa o le vasega e faitau le Galuega 4:5–13. Ta‘u atu i le afa lenei o le vasega e faapea, i le Galuega e 3, na faamaloloina ai e Peteru ma Ioane se tagata. I le Galuega e 4, sa pu‘eina i laua ma aumai i luma o taitai Iutaia mo le fesiliga e uiga i le faamalologa. Tuu atu i le isi afa o le vasega e suesue i le Galuega 16:6-15. Ta‘u atu i le afa lenei o le vasega e faapea, o fuaiupu nei e faatatau ia Paulo i le taimi o se tasi o ana malaga faafaifeautalai. Atofa atu i afa e lua o le vasega e vaavaai mo auala na fesoasoani ai le Agaga Paia i a Peteru po o Paulo e talai atu le talalelei. A maea le taimi, fai atu i tagata o le vasega e lipoti mai pe na faapefea ona taitaiina taitoatasi e le Agaga Paia ia Peteru ma Paulo. Ona fesili atu lea:
Na faapefea ona faaaoga e Peteru ma Paulo o laua faitalia e mulimuli ai i le taitaiga mai le Agaga?
O le a se faamaoniga o loo i ai iina sa mulimuli Peteru ma Paulo i le Agaga?
O le a tonu le mea na tupu ia Peteru i le Galuega e 4 ma ia Paulo i le Galuega e 16 ona sa mulimuli uma i laua i le taitaiga a le Agaga?
O a ni auala ua faamanuiaina ai oe ona o le mulimuli i le taitaiga a le Agaga Paia?
Faaiu i le valaaulia o tamaiti aoga e molimau mai i auala ua faamanuiaina ai i latou e le Alii e ala i Lona Agaga. Fai atu ia i latou e mafaufau pe o faapefea ona aafia lo latou naunau e valaaulia isi [e o mai] ia Keriso, e ala i le aoao atili e uiga i le aoao atu e ala i le Agaga. Faamautinoa atu ia te i latou, a o latou saili i le Agaga i o latou olaga, o le a faateleina lo latou gafatia ona aoao atu e ala i le Agaga.
Valaaulia e Faatino
Valaaulia tamaiti aoga ia saunia e aoao atu le talalelei e ala i le Agaga, e ala i le faamaeaina o le tasi pe sili atu o gaoioiga fautuaina nei:
Matamata i nisi o vaega o le O Le Itu (o loo maua i luga o le LDS.org) ao e sauniuni e auauna atu i se misiona.
Faataitai ni auala eseese e amata ai ona aoao atu se lesona e faaaoga ai ni nai fasifuaitau mamana e valaaulia ai le Agaga o loo i le Tala‘i La‘u Talalelei, itulau e 190.
Mafaufau loloto ma tatalo e uiga i se tagata e te manao e faamalosi i le talalelei. Tatalo e uiga i se savali o le talalelei e mafai ona e fetufaai atu i lenei tagata. Faasoa atu le savali ma lau molimau i le tagata, a le o le faafesaga‘i pe ala atu foi i ala o faasalalauga faaagafesootai.