9

Atiina Ae o Uiga FaaKeriso

Folasaga

E tatau i faifeautalai ona taumafai ia avea atili e pei o le Faaola a’o latou galulue e valaaulia isi e o mai ia te Ia. O le Faaola o le tatou faataitaiga atoatoa lea na faatonuina i tatou ia avea e pei o Ia (tagai i le 3 Nifae 27:27), ma o Lana Togiola e mafai ai ona tatou avea atili e pei o Ia ma lo tatou Tama Faalelagi. O se vaega taua o le avea e pei o Iesu Keriso, o le aoao i le ala sa Ia soifua ai, amio a’i, ma aoao mai ai. A tatou atiina ae atoatoa ia uiga faaKeriso, o le a lelei atu ona tatou saunia e auauna i le Atua ma isi i le taimi o a tatou misiona ma i o tatou olaga atoa.

Sauniuniga Muamua

• Suesue i le Alema 17:22–37; 18:1–3, 8–10; Moronae 7:45–48; ma le Mataupu Faavae ma Feagaiga 4:1–7.

• Suesue i le Tala’i La’u Talalelei, itulau e 123–31, 135.

• Fai ni kopi o le Gaoioiga o Uiga i le itulau e 135 o le Tala’i La’u Talalelei mo tamaiti aoga taitasi i lau vasega (tuu i le faitalia).

• Sauni e faaali atu le vitio “Christlike Attributes” (2:54), o loo maua i le LDS.org.

• Sauni e faaali atu le vitio “Impressions of Missionaries” (4:32), o loo maua i le youtube.com.

Fautuaga mo le Aoaoina Atu

O le Taua o Uiga FaaKeriso

Valaaulia tamaiti aoga e susue i le itulau e 132 i le Tala’i La’u Talalelei ma tilotilo i le ata o le pine o le igoa o le faifeautalai. Fesili atu:

• O a vaega e lua e sili ona taua o le pine o le igoa o se faifeautalai? (O le igoa o le faifeautalai ma le suafa o le Faaola.)

• Aisea e taua ai mo oe ma mo isi ona faafesootai lou igoa ma le suafa o le Faaola?

Fai atu i tamaiti aoga e auauai e faitau leotele parakalafa e lima o loo i itulau e 123-24 i le Tala’i La’u Talalelei a’o mulimuli le vasega i le faitauga, ma vaavaai mo auala e mafai ona tatou talia ai le valaaulia e mulimuli atu ia Iesu Keriso. A maea ona latou faitauina, fesili atu:

• E mafai faapefea ona tatou taliaina le valaaulia a Iesu Keriso e mulimuli ia te Ia? (E tatau ona faailoa mai e tamaiti aoga le mataupu faavae: Tatou te talia le valaaulia a Iesu Keriso e mulimuli atu ia te Ia e ala i le avea faapei o Ia ma atiina ae Ona uiga.)

• E mafai faapefea e le atiina ae o uiga faaKeriso ona avea ai oe ma se tagata malosi ma tauaogaina e fesoasoani atu i le talalelei ai Iesu Keriso?

Fai atu i tamaiti aoga ia taitasi le tagata ma filifili se mau se tasi i le pusa Mau Suesueina o loo i le itulau e 124 o le Tala’i La’u Talalelei. Fai atu i tamaiti aoga e faitau a latou mau fuaitau na filifilia ma vaavaai mo mea o loo fai mai ai e uiga i le mulimuli i faataitaiga a Iesu Keriso. Valaaulia ni tamaiti aoga e faasoa mai i le vasega ni mea na latou aoaoina. A uma ona tali mai ni nai tamaiti aoga, fesili atu:

• O a nisi o uiga o le tagata e te faafesootaia ia Iesu Keriso?

Faaali le vitio “Uiga FaaKeriso” (2:54), e faaalia ai nisi o uiga o le Faaola. Fai atu i tamaiti aoga e vaavaai pe na faapefea ona faamaonia uiga faaalia paia o le Faaola e ala i ana faatinoga—ae maise lava i le ala sa ia fegalegalea’i ai ma isi.

Tuuina atu o le taimi e mafaufau loloto ai i tali. Atonu e mafai ona tali mai tagata o le vasega i ni tali loloto i fesili pe afai e lava le taimi e tuuina atu i ai e manatunatu loloto ai i a latou tali. Mo se faataitaiga, a maea ona tuuina atu se fesili, e mafai ona e faapea atu, “Faamolemole faaalu se minute e te mafaufau ai i lau tali, ona ou fesili atu lea mo a outou tali.”

A uma ona matamata le vitio, fai atu fesili e pei o nei, ia mautinoa e lava se taimi e tuu atu mo tamaiti aoga e mafaufau loloto ai i a latou tali:

• Na faapefea ona faamaonia uiga faaalia paia o le Faaola i ana faatinoga, ae maise lava i le ala sa ia fegalegalea’i ai ma isi.

• O a aafiaga o faatinoga a Iesu Keriso ua i ai i isi?

Fai atu i tamaiti aoga e faasoa atu i se tasi o nofo i o latou tafatafa se mea na tupu sa faapea ona i ai se aafiaga malosi o se amioga FaaKeriso a se isi tagata ia i latou. Ona tuu atu lea ia i latou sina taimi e mafaufau loloto ai i le fesili lenei:

• O a uiga o Keriso na faaalia i le vitio e te manao e atiina ae atili?

Atiina Ae o Uiga FaaKeriso

Valaaulia ni nai tamaiti aoga e auauai i le faitauina leotele o le Mataupu Faavae ma Feagaiga 4:1–7.

• E tusa ai ma le Mataupu Faavae ma Feagaiga 4:5–6, o le a le sootaga i le va o uiga faaKeriso ma agavaa mo le valaauina i le galuega? (E ui atonu latou te faaaogaina ni upu eseese, e tatau i tamaiti aoga ona faailoa mai le mataupu faavae lenei: O tagata taitoatasi o loo i ai uiga faaKeriso ua agavaa e auauna atu i le galuega a le Alii.)

Valaaulia le vasega e su’e i le Gaoioiga o Uiga i le itulau e 135 o le Tala’i La’u Talalelei. A uma ona faamalamalama atu faatonuga o loo maua i le pito i luga o le itulau, valaaulia tamaiti aoga e faauma le gaoioiga. Atonu e fesoasoani le ta’u atu i tamaiti aoga le umi o le taimi e tatau ona latou faaaluina i le gaoioiga. Mafaufau e tuuina atu kopi o le gaoioiga mo tamaiti aoga. Afai e filifili tamaiti aoga e faataunuu le gaoioiga i a latou lava kopi o le Tala’i La’u Talalelei, atonu e te uunaia i latou e tusi i le penitala. Tuu atu ia lava se taimi mo tamaiti aoga uma e faauma ai le gaoioiga. Ona fai atu lea i tagata o le vasega e faasoa mai ni mea na latou aoaina ma lagonaina a’o latou galulue ai i lenei iloiloga faaletagata lava ia. A manaomia, mafaufau e fai atu fesili e pei o nei:

• O le fea o uiga mai le gaoioiga e foliga taua ia te oe, ma aisea?

• O le a se mea na e aoaoina mai lenei gaoioiga?

Fesoasoani i tamaiti aoga e faaloloto o latou malamalamaaga i uiga FaaKeriso, i le valaaulia o i latou e filifili se uiga se tasi latou te mananao e aoao atili i ai ma atiina ae atili i o latou lava olaga. Fai atu i tamaiti aoga e su’e le vaega o loo faamatala ai le uiga ua latou filifilia i itulau e 124–31 o le Tala’i La’u Talalelei. Ona tuu atu lea o le taimi e suesue ai a latou vaega, faatasi ai ma mau e o faatasi ai. Atonu e fesoasoani le ta’u atu i tamaiti aoga le umi o le taimi o le a latou maua e suesue ai. Tusi fesili nei i le laupapa mo tamaiti aoga e mafaufau i ai a’o latou faitau:

• O a ni manatu faaopoopo e faatatau i lenei uiga na e mauaina?

• O a ni mea e ao ona suia i lou loto, mafaufau, po o faatinoga e atiina ae ai lenei uiga?

• E mafai faapefea e le atiina ae o lenei uiga ona faateleina lou mataalia i le avea ai o se faifeautalai?

Savalivali solo i le potu e vaai po o a mai gaoioiga a tamaiti aoga taitoatasi ma tali ni a latou fesili e ono i ai. A ua lava loa le taimi, valaaulia tamaiti aoga e faasoa mai a latou tali i fesili o loo tusia i luga o le laupapa.

Faaali atu le saunoaga lenei a Peresitene Dieter F. Uchtdorf, ma fai i tamaitiiti aoga e vaavaai mo le mea na ta’u mai e Peresitene Uchtdorf e ao ona tatou faia ina ia mafai ona atiina ae ai uiga FaaKeriso:

“O loo faamatalaina e tusitusiga paia le tele o uiga faaKeriso e moomia ona tatou atiina ae i le taimi o o tatou olaga. “O uiga faaKeriso o ni meaalofa mai le Atua. E le mafai ona atiina ae e aunoa ma Lana fesoasoani. O le fesoasoani e tasi lea tatou te manaomia uma lea ua tuuina fua mai ia i tatou e ala i le Togiola a Iesu Keriso. O le i ai o le faatuatua ia Iesu Keriso ma Lana Togiola o lona uiga o le faalagolago atoa atu lea ia te Ia—faalagolago i Lona mana faavavau, atamai, ma le alofa. O uiga faaKeriso e oo mai i o tatou olaga a o tatou faaaogaina ma le amiotonu o tatou saolotoga. … I le saili atu ina ia avea atili e faapei o le Faaola e moomia ai ona tatou toe iloiloina o tatou olaga e le aunoa ma faalagolago i le ala o le salamo moni, ma faalagolago i le atoatoa ona lelei o Iesu Keriso ma faamanuiaga o Lana Togiola” (“Uiga FaaKeriso— O Le Mana Lea e Siitiaina i Tatou i Luga,” Ensign po o le Liahona, Nov. 2005, 102–103).

• O le a le uiga ia te o le faamatalaga “o uiga faaKeriso o ni meaalofa mai le Atua”? (O ni meaalofa e le mafai ona atiina ae atoatoa e aunoa ma le fesoasoani a le Atua.)

• E tusa ai ma le saunoaga a Peresitene Uchtdorf, o a ni mea e mafai ona tatou faia e faaaoga ai le fesoasoani a le Alii i le atiina ae o nei uiga? (Atonu e te aoteleina tali a tamaiti aoga e ala i le tusia i luga o le laupapa: E mafai ona tatou atiina ae uiga faaKeriso a’o tatou salamo, i ai le faatuatua ia Iesu Keriso, ma faalagolago i le Togiola.)

• E mafai faapefea e le salamo ma le i ai o le faatuatua i le Togiola ona fesoasoani ia i tatou e atiina ae ai uiga faaKeriso? (E ala i le faatuatua ma le salamo, tatou te valaaulia ai le Alii e faamanuia i tatou i uiga faaKeriso. A tatou salamo, ua tatou faaali atu lo tatou naunau e avea atili e faapei o Keriso, ma tatou valaaulia ai se mafutaga sili atu ma le Agaga Paia i o tatou olaga.)

Faaali atu le faamatalaga lenei a Elder Dallin H. Oaks o le Korama a Aposetolo e Toasefululua, ma valaaulia se tamaitiiti aoga e faitau leotele i le vasega:

“I le aoaoina o sa Nifae, sa faatatau atu ai le Faaola i le tulaga e ao ona avea ai i latou. Sa Ia luiina i latou e salamo ma ia papatisoina ma ia faapaiaina e ala i le talia o le Agaga Paia, ‘ina ia outou tutu ma le le pona i ou luma i le aso gataaga’ (3 Ni. 27:20). Sa ia faaiuina: ’O lea, o a ituaiga o tagata e tatau ona outou i ai? E moni ou te fai atu ia te outou, e pei lava o au nei’ (3 Ne. 27:27).

“O le talalelei a Iesu Keriso o le fuafuaga lea e mafai ai ona avea i tatou ma ituaiga fanau a le Atua e tatau ona avea ai i tatou. O lenei tulaga le pisipisia ma le atoatoa o le a oo i ai mai se faaauauina tumau o feagaiga, sauniga, ma amioga, ma se faaputuga o filifiliga sa‘o, ma mai le faaauauina o le salamo. ‘O le olaga lenei o le taimi lea mo tagata e saunia ai e feiloai ma le Atua’ (Alema 34:32)” (“O Le Luitau i le Avea ma se Tasi,” Liahona, Ian. 2001, 40).

Fesili atu:

• E tusa ai ma le saunoaga a Elder Oaks, o le a le mea e ao ona tatou faia ina ia avea atili ai e faapei o Iesu Keriso (E ao ona tatou osia ma tausia feagaiga paia, maua ma le agavaa sauniga, ma fai filifiliga sa’o, ma salamo.)

Valaaulia tagata o le vasega e su’e i le Moronae 7:47–48. Faamalamalama atu, e ui lava o nei fuaiupu e faapitoa lava ona nafa ma le alofa mama, ae o loo aoao mai ai se mataupu faavae e sili atu ona faalauaitele, e uiga i le mauaina o uiga faaKeriso. Valaaulia se tamaitiiti aoga e faitau ia fuaiupu a’o mulimuli le vasega i le faitauga, ma vaavaai mo mea e mafai ona tatou faia e valaaulia ai le fesoasoani a le Tama Faalelagi i le [tatou] avea e pei o Lona Alo (o tali e tatau ona taulai atu i le taua o le ole atu i le Tama Faalelagi e fesoasoani mai ia i tatou ma avea ma “soo moni” o Keriso). Ia faailoa atu e faapea, talu ai o uiga faaKeriso o ni meaalofa mai le Atua, e tatau ona tatou ole atu ia te Ia mo le fesoasoani i le atiina ae o i latou.

Faaaogaina e le tagata aoao. O le faaaogaaga e mafai ona tupu pe a (1) talia e tamaiti aoga se aoaoga faavae po o se mataupu faavae i o latou loto ma mafaufau ma le (2) amata ona faatino ma ola ai e tusa ma na [aoaoga po o mataupu faavae]. E mafai e faiaoga ona faafaigofie le faaaogaaga e ala i le tuu atu i tamaiti aoga o se taimi i le vasega e mafaufau loloto ai pe tusi ai e uiga i mea ua latou malamalama i ai ma lagona, ma ia mafaufau i ni faatinoga faapitoa e tatau ona latou faia e faaaoga ai i o latou olaga ia mea ua latou aoaoina.

Ina ia fesoasoani i tamaiti aoga e mafaufau pe ono mafai faapefea ona latou faaaogaina mea ua latou aoaoina, atonu e te fai atu i tamaiti aoga e faasoa mai ni faataitaiga o ni faatinoga e ono faia e se faifeautalai faaolioli pe a taumafai e atina a’e le uiga sa latou suesue i ai. Ona tuu atu lea i tamaiti aoga ni nai minute e tusi ai i lalo se fuafuaga, ia aofia ai ni filifiliga sa’o faifaipea e mafai ona latou faia, e fesoasoani latou te atiina a’e lelei ai lena uiga. Uunaia i latou e faasoa atu a latou fuafuaga i o latou matua po o se uo faatuatuaina. Ia uunaia foi tamaiti aoga e aua le faatuai ona mulimuli i a latou fuafuaga. O taumafaiga latou te faia i le taimi nei, e mafai ona i ai se aafiaga tele i o latou aafiaga i le misiona.

Faaiu lenei vaega o le lesona i le faamautinoa atu i tamaiti aoga e faapea, o le a faamanuia i latou e le Alii a’o faaali atu lo latou faatuatua i le Togiola ma saili ia pei o Ia

Uiga FaaKeriso i le Galuega Faafaifeautalai

Tusi i luga o le laupapa le saunoaga lenei a Peresitene Dieter F. Uchtdorf o le Au Peresitene Sili, o le sa faasoaina mai se upusii sa faia e Saint Francis o Assisi: Fai atu i se tamaitiiti aoga e faitau leotele le saunoaga.

“Tala’i le talalelei i taimi uma, ma a manaomia, faaaoga upu” (“Faatalitali i le Auala i Tamaseko,” Ensign po o le Liahona, Me 2011, 77).

Fai atu fesili e pei o nei:

• E mafai faapefea ona tatou talaiina le talalelei e aunoa ma le faaaogaina o upu?

• E mafai faapefea i le faatupulaia o uiga faaKeriso na mafai ona tatou faaleleia o le talaiina o le talalelei, e ala i le faaogaina poo le le faaogaina o upu?

• O le a le mea e tupu i loto o tagata taitoatasi pe a taulimaina i latou i se ala faaKeriso? (E faamaluluina o latou loto ma o le a sili atu ona naunau [e faalogo] i le savali o le talalelei).

• Aisea e taua tele ai uiga faaKeriso o se faifeautalai ina ia manuia ai i le galuega faafaifeautalai? (O tali a tamaiti aoga e tatau ona aofia ai le upumoni lenei: O uiga faaKeriso e mafai ona avea ma se faatosinaga mamana i le aumaia o tagata i le Faaola.)

Faaali le vitio “Impressions of Missionaries” (4:32). Tuu atu i tamaiti aoga e tusi ni faamatalaga e uiga i uiga na matauina e tagata sailiili i faifeautalai, ma le aafiaga o na uiga i tagata sailiili.

A uma le vitio, fesili atu:

• O a nisi o uiga lelei o faifeautalai na iloa e tagata sailiili?

• Aisea e te manatu na faia ai e nei uiga se aafiaga lelei i tagata sailiili?

• Sa ta’ua e tagata sailiili ni uiga faalelelei. Na aafia faapefea tagata sailiili i nei uiga?

• E mafai faapefea ona aloese faifeautalai mai le tuua ai o nei aafiaga faalelelei?

Ina ia faaalia atili auala e mafai ai e uiga ma amioga faaKeriso ona fesoasoani i faifeautalai ia saunia tagata latou te aoaoina e maua le talalelei, fai atu i se tamaitiiti aoga e aotele le tala e uiga i taumafaiga a Amona e talai atu le talalelei i sa Lamana. Vaevae le vasega i ni vaega se fa, ma atofa atu se mau fuaitau se tasi i vaega taitasi. Fai atu i tamaiti e faitau filemu a latou fuaitau atofaina ma faailoa mai uiga faaKeriso na faaali atu e Amona.

Alema 17:22–25

Alema 17:28–31

Alema 17:33–37

Alema 18:1–3, 8–10

A ua uma ona tuu atu i tamaiti aoga le taimi e faitau ai, ia talanoa ma le vasega i mea nei.

• O le fea o uiga faaKeriso na faaalia e Amona i fuaiupu sa e faitauina?

• E faapefea ona faia e uiga o Amona se aafiaga i tagata sa ia aoaoina?

• O a nisi o auala e mafai ona mulimuli ai faifeautalai i aso nei i le faataitaiga a Amona?

Valaaulia tamaiti aoga e mafaufau i se tagata na latou matauina o le sa faataitaia ni uiga faaKeriso. Fesili atu:

• O a ni auala na faatosinaina ai oe e lenei tagata e ala i a latou amioga faaKeriso?

Auauna atu ma se Soa

Faamanatu atu i tamaiti aoga e faapea, o faifeautalai e tofia i taimi uma e auauna atu faatasi ma se soa. Valaaulia tamaiti aoga e fautua atu ni luitau e ono i ai lea e ono tupu a o galulue ma se soa. Fai atu i tagata aoga fesili nei:

• Aisea e te manatu e galulue ai faifeautalai i ni soa?

Faitau leotele le Mataupu Faavae ma Feagaiga 42:6 ma le 2 Korinito 13:1 e fesoasoani ai i tamaiti aoga e iloa ai, e galulue faifeautalai i soa ona o se mamanu ua tuuina mai e le Alii. Ona fesili atu lea:

• Aisea e taua ai ona faaali atu e faifeautalai ia uiga ma amioga faaKeriso i a latou soa? (Tagai i le MF&F 38:24–25, 27.)

Faaali atu le saunoaga lenei a Peresitene James E. Faust (1920–2007) o le Au Peresitene Sili, ma fai atu i se tamaitiiti aoga e faitau leotele atu i le vasega:

“Ia aua lava ne’i faatagaina finauga i a outou [va] faalesoa. O nisi o au soa faifeautalai o le a avea ma au uo mamae o le olaga. Ia avea [oe] ma ituaiga o soa e te manao e faatasi i ai. Ia aua le manatu faapito i a outou sootaga ma au soa? O le taimi lava e i ai le finauga, o le a alu ese le Agaga o le Alii, e tusa lava po o ai e sese. O i tatou uma taitoatasi o se tagata e toatasi ua i ai ni malosiaga ma ni taleni tulaga ese, e ese mai i soo se isi lava tagata i le lalolagi. E tofu i tatou taitoatasi ma vaivaiga. O se soa e taugalemu, e i ai le galulue faatasi—a faapea e vaivai le tasi, e malosi le isi” (“O Mea Ou Te Manao ia Iloa e Lou Atalii, ao lei Tuua mo Lana Misiona,” Liahona, Iulai 1996, 47).

• O le a le saunoaga a Peresitene Faust i le mea o le a tupu pe a i ai finauga i le va o se soa faifeautalai? (Tagai foi i le 3 Nifae 11:29.)

• E mafai faapefea ona fesoasoani i faifeautalai ia uiga ua tatou suesueina e aloese ai mai finauga ma maua ai se mafutaga sili atu ona taugalemu? (Fesoasoani i tamaiti aoga e faailoa mai le mataupu faavae e faapea, a faaalia e soa faifeautalai ia uiga ma amioga faaKeriso agai i le tasi ma le isi, e faamanuiaina i latou i le Agaga.)

• Aisea e mafai ai e se mafutaga taugalemu ona faateleina le mataalia o se soa i le talaiina atu o le talalelei?

Mafaufau e faitau leotele parakalafa e lima i lalo o le soavaega ua faaautuina “Your Companion” (i le vaega “Relationships with Others”) i le Missionary Handbook (itulau e 29–30). Ona fesili atu lea:

• Na faapefea ona e faaaogaina se mataupu faavae na maua i nei parakalafa e faamalosia ai lou sootaga ma se tasi o le aiga po o se uo?

Faaiu i le valaauliaina o au tamaiti aoga e tuuina mai a latou molimau e uiga ia Keriso ma le taua o le avea e faapei o Ia.

Valaaulia e Faatino

Fesoasoani i tamaiti aoga ia iloa o le faagasologa o le atiina ae o uiga faaKeriso, e manaomia ai le fesoasoani a le Alii ma le tele o le taumafaiga a le tagata lava ia. Uunai tamaiti aoga e faauma se tasi pe sili atu o gaoioiga fautuaina nei, o se vaega o a latou taumafaiga e avea atili e pei o le Faaola.

• Filifili se tasi o uiga faaKeriso mai le mataupu e 6 i le Tala’i La’u Talalelei ma suesue atili i ai e faaaoga ai tusitusiga paia, e aofia ai le Bible Dictionary, Topical Guide, faasino upu, ma isi mea faapena. Fatu se fuafuaga ina ia atiina ae atoatoa lena uiga i lou olaga. Faasoa atu lau fuafuaga i ou matua po o se uo faatuatuaina.

• Mafaufau i mea e mafai ona e faia e avea atili ai e faapei o Keriso agai i lou aiga, uo (lolotu pe le lolotu), ma taitai o le Ekalesia. Tusi i lalo ni ou manatu faapitoa o i ai ma faatino loa i lenei vaiaso.

• Fai ni sini i ni auala e te ono saunia ai e aloese mai finauga ma se soa faifeautalai i le lumanai.

• Su’e ni auala e faailoa atu ai le alofa i tagata o le aiga ma uo ma auauna atu ia i latou i le onosai ma le alofa mama.